Commodity
「江長、華沙同亞星爾戴被炸中，返起點再嚟過。」東南西北的說話在硝煙中猶如再對三人拋下震撼彈，導致哀鴻遍野。
「而家先要我返起點？造馬㗎你哋，我唔玩喇！」江長率先發難。
「咁你係咪要退出？只要你話係就可以隨時退出，好似我第一日講咁，呢度唔會強逼你繼續。」東南西北口說隨意，但給人的感覺卻是必定要留下，江長也敢怒不敢言。
華沙亦都同樣有所不滿：「我啱啱先起到機行到幾步，又要我再嚟過？」
亞星爾戴雖然亦有怨言，但選擇逆來順受：「去到呢個階段先跌返落起點，真係好唔抵，仲要有三個人未起機，係好大嘅挑戰。」
十二時正，擲骰的機會又降臨在拉斯特身上。
「綠色四隻棋都最後直路，除非可以拉其中一個返起點，否則其他三隻色都輸硬。」心水清的拉斯特心裏正盤算着：「我要擲六起到機，再擲三拎機會卡先有可能逆轉到。唔該，一定要係六！」
拉斯特懷着最後的希望拋起骰子，可是只擲到一點，只好移動密他飛卜艾珠的棋子。
下一個是軟微，在她擲骰前，拉斯特對她說：「唔想綠色贏的話，就只有寄望機會格，靠你喇。」
「唔想綠色贏除咗擲到四踩到機會格之外，」軟微故意望向綠色說：「就係由我哋黃色贏！」
無錯，黃色只差十一步便全員完成棋局。接下來，只要擲到六和五，黃色便能率先完成，晉級最後對戰。
軟微拋高骰子，平心靜氣等待，結果一擲得六，黃色的成員高興得摟作一團。
「只要係五就得，一定要係五。」博彭三世緊張得緊握雙拳，指甲掐進手掌心，使得鮮血在指縫間流出來。
而紋骨甲也求神問卜，得出了一個超級好的卦象，仿佛宣告勝利已經屬於他們。
「五！」軟微的骰子最後如願得出五點，黃色的所有棋子都走到終點，漫長的飛行棋淘汰賽終於迎來結局。
「終於都係我哋黃色贏咗。」軟微鬆一口氣，露出了久違的笑容。
瑪爾沃斯基也老淚縱橫，為能晉級最後對決而激動不已。
而其他色的人則臉如死灰，有痛哭、有不忿、有放鬆、有失落……
就在場上悲喜交雜的一刻，軟微的棋子竟再行了多一步，退後了一格。
「喂！東南西北，做咩郁我哋啲棋？」軟微錯愕地問。
「唔好意思，但我唔可以畀你哋贏，所以我用咗呢張卡。」阿希把卡交到東南西北口裏。
「咩卡？」紋骨甲吃驚地問。
「加一卡，無論係乜嘢都可以加一，」阿希解釋：「所以我將你哋嘅點數加咗一。」
「果然係可以逆轉形勢……哈哈……我輸得心服口服。」軟微不甘心地說。
「做得好！」遜馬亞里朝阿希豎起大姆指稱讚他。
「由於李友希用咗加一卡，所以黃色嘅棋子行多一步，去唔到終點。」東南西北將情況描述一次後，比賽繼續：「下一個到江長。」
江長盯着骰子，語氣由冷漠變到激動：「我話咗唔再玩，乜嘢末日堡壘，關我屁事？我又無份去住，我哋咁努力都只係幫人可以度過世界末日，有咩意思？點解我哋咁辛苦但要死，而佢哋食住花生就可以長命百歲？我唔再玩，大家一齊攬炒喇！」
「啪！」清脆的一聲，江長被摑了一記耳光、吹飛數米，直接撞上骰子，當作擲了骰。
「垃圾！講咁多廢話，又唔敢講退出，而家仲要擲得三點，廢柴。」華沙揮舞着滾燙的手說：「搞到我手掌鬼咁痛。郁易路登威嗰隻，得佢行得。」華沙成為了代言人，但就算她不說，東南西北也會移動那唯一的一顆棋子。受益於唯一在場上的關係，易路登威的棋子移動三步後再跳了一次藍色，落在空白的藍色格上，全場也安全。
「終於到我，」遜馬亞里自信地對隊友說：「我哋要贏喇。」他仔細調整好骰子，然後根據教阿希的方法，將骰子六點一面朝向天，然後拋四米高，骰子以每秒由前向後轉三圈的速度落到地上，撞上地上突起的地方，翻滾過後，正好是六點。
「先郁疊住三隻棋先。」遜馬亞里對東南西北說，因為三顆棋六步正好到終點。
「無喇……」拉斯特跪倒在地。
接着遜馬亞里再擲骰，數字不偏不倚的落在五點上，亦即是他的棋子剛好到達終點所需的步數。
「恭喜哂！」東南西北全身閃着不同顏色，就像一個彩球，它興奮地說：「恭喜綠色贏咗呢盤棋，可以得到晉級最後對決、爭取末日堡壘門票嘅機會。」
阿希聽到之後鬆了一口氣，很自然便轉身望向包廂，對阿滔和錢先生做了一個勝利手勢，眼尾同時瞄了一眼時間。
「十二點一？只係過咗一個字？點會……」阿希對眼前的時間極度懷疑。
「其餘嘅十二位參加者，多謝你哋嘅參與同演出，而家到你哋嘅末日喇。」東南西北壓低聲線、陰沉地說，同時，鐳射槍的槍口已經對準他們和其富豪，一輪「咇噍」之後，他們連一聲「嗚」也沒有留下便軟攤在地，被工作人員運送離場。
「喂……」這一幕阿希已經第三次目睹，也深知他們只是昏倒，但心總是有點不舒服。
隨着他們的退場，螢幕右下角的數字亦由「16」變為「4」，表示比賽終於來到最後、亦是最重要的部份。
「綠色嘅四位，遜馬亞里、金歌谷、雅萊歐、李友希，恭喜你哋進入最後決賽，爭取唯一嘅末日堡壘門票。」東南西北友善地說：「喺最後決賽開始之前，你哋有兩個鐘時間食晏，食完之後就開始最後決賽。」
正當四人懷着沉重的心情轉身向觀眾席走去之時，東南西北補充：「你哋唔駛走得咁急，仲有一樣嘢要同你哋講。飛行棋比賽勝出嘅組係有籌碼獎，一開始都同你哋提過，分別係第一名十個、第二名七個、第三名四個同第四名一個。不過你哋頭三名係疊棋一齊到達，所以籌碼會平分，每人有七個，而第四名嘅遜馬亞里就得一個。」
「七個籌碼，咁少有咩用？」阿希接過籌碼後心想。
「至於你哋一路累積落嚟嘅籌碼，經過換算，會變為最後決賽可以用嘅籌碼。」東南西北說：「所以最終，金歌谷有三十六個，雅萊歐有三十三個，遜馬亞里有二十個，李友希有七個。呢啲就係決賽時可以用嘅籌碼，籌碼越多，贏面越大。」
「兩點十分，準時中場見。」東南西北最後說。
+x+x+x+x+x+x+x+x+x+x
「Ben、Fiona，你哋支持嘅人都入決賽喎，唔知邊個可以笑到最後呢？」Elise笑着問。
「咁仲駛問？一定係我，個童顏妹籌碼最多，優勢最大，唔係佢贏我切！」Ben信誓旦旦地說。
「切咩先？」Alfred帶着壞笑地問。
「切咩都得，反正我唔會輸。」Ben信心十足、趾高氣揚地答。
此時，Chris也加把嘴道：「我覺得個阿差反而有機，成盤棋入面佢發揮最穩，感覺佢仲有好多貨，好深不可測。」
「你眼光咁差，實燈死佢。」Daisy半開玩笑半嘲笑道。
「又唔係喎，小道消息話佢係實驗室嗰面Number Man安插嘅內應，有背景support，好難輸。」Alfred說出驚人內幕。
「決賽嘅關鍵，唔係靠背景同靠目前嘅籌碼咁簡單，仲有靠觀眾緣，觀眾buy同pay先最緊要。」Fiona輕輕地笑着說。
今次的決賽，大會將四人商品化，每一次購買都會直接轉化為籌碼落到該參加者戶口。而根據實時顯示，現在購買四人的人數相若，沒有任何一個有明顯優勢，真正比賽時的表現絕對是關鍵。
+x+x+x+x+x+x+x+x+x+x
另一方面，在實驗室內的兩人正在為最後決賽做準備，他們將體育園的燈光設定為長開，不會有明暗變化；又將螢幕上的大鐘刪去，令到參加者無從得知客觀的時間變化。這些舉動旨在消滅參加者的客觀時間觀念，令他們只靠自身的生理時鐘來感受時間，亦即單純靠內部感知。
「今次實驗嘅終極目標，就係要睇吓無客觀事物可以依靠之下，齋靠自身生理時鐘去判斷時間，人體會有咩變化。之前嘅設置特登破壞佢哋嘅內部感知，就係想喺最後決賽入面睇清楚，畢竟真正嘅末日堡壘喺地底，不見天日，呢樣都好影響班有錢佬嘅身心靈健康。」Zero邊調整場地邊說。
One一邊設置，一邊定睛看着弟弟阿希，他內心多麼渴望阿希能看穿這次比賽的背後目的，然後可以在不受影響的情況下順利完成、勝出比賽。因為這次實驗的假設是參加者由於失去了時間知覺，加上生存壓力、生理時鐘紊亂、專注力及判斷力下降，繼而產生幻覺和情緒不穩，最終精神永久受損。作為血脈相連的親兄弟，他絕對不想親眼看着弟弟受這種永久折磨。
「我已經設置好。」One的語氣中帶着淡淡憂傷，敏銳的Zero也察覺到異常。
「我哋係為組織、為班有錢人服務，雖然入面有你細佬，但都要維持實驗公平。」Zero勸道。
「咁遜……Eight呢？佢一早知個實驗目的，仲點公平？」One情緒激動地問。
「咁你就錯喇。科學家出身嘅我，係絕對唔會容許任何被操控嘅實驗出現，連Eight都一樣，況且佢都未係我哋嘅正式成員。今次係佢嘅入隊考試，所以佢完全唔知實驗嘅事，只知道要令比賽順利進行，同埋要贏。」Zero說。
Zero說完後，便離開去為最後決賽作準備，One也跟了上去，看看有沒有需要臨時調整的地方。
+x+x+x+x+x+x+x+x+x+x
「恭喜你入到最後決賽，我由第一眼見到你開始，就知你一定可以入到決賽，幫我贏到張門票。」錢先生早已站在包廂入口歡迎阿希凱旋回歸，甚至給了他一個擁抱。
阿希面對錢先生盛情的歡迎又再面紅耳熱，連忙否認說：「唔係唔係唔係，都未贏，張門票仲未到手，仲要決賽，我會努力。」
「你無問題嘅，一定會贏，最後個遊戲你表現得幾好，有你嘅風範。」阿滔豎起大姆指稱讚阿希。
「都係你提我要做返自己。」阿希高興地說，但當他看到阿滔的手時，不禁驚訝地問：「你隻手……點解條疤痕會出現返？你唔係話錢生個機械管家幫你醫返好咩？」
阿滔會心微笑地說：「你果然返嚟喇，但呢層等你完哂個比賽先再解釋你知，而家食啲嘢再唞陣先。」
阿希望向滿桌的美食，加上時間已經是下午十二時多，饑餓的感覺理應油然而生，可是他的肚卻沒半點空虛的感覺，對眼前美食完全提不起神。
錢先生看出了阿希的遲疑，於是勸說：「我都知時間上做咗手腳，而家可能你同我哋一樣仲未餓，但點都食啲先，下次唔知幾時有得食，況且餓住肚去決賽會影響發揮。」
於是三人勉強吃下了午餐，並為接住下來的決賽製定計劃。
「個場而家乜都無，完全估唔到之後係比乜，所以你身上嗰七個籌碼要用得其所，咁先可以反敗為勝。」錢先生切着西冷牛扒說。
「籌碼越多贏面越大，會唔會係同賭有關？」阿滔嚥下一件龍蝦後也搭話。
阿希沒有回答，因為場上的螢幕吸引住他的目光，本應在上面的時鐘竟不翼而飛，取而代之的是四人的頭像和籌碼數目，以及四組不斷跳動的數字，同時他亦留意到體育園的燈光出現了微妙的變化。
「果然係同時間有關，」阿希輕聲地問：「你哋有無覺得飛行棋完咗之後，包廂有嘢唔同咗？」
錢先生和阿滔同步搖頭，工作人員才放下警戒，阿希才驚覺自己差點闖禍。他定睛看着場上的螢幕，口裏含着一大口粟米，腦內回想着這數天的比賽過程，竟被他理出了一點頭緒。
「如果目的真係要我哋唔知真實嘅時間，即係話知道時間係一個關鍵，而唯一可以判別到時間嘅就得返人體嘅生理時鐘，所以之前先不斷用盡方法去擾亂我哋。」阿希雖然猜到個大概，但卻想不出對策：「我個時鐘都亂咗，雖然大家都應該係，但如果其中一個無受影響，咁佢咪贏硬……我應該要點做先好？」
「仲有一個鐘，快啲食完爭取時間休息，唞半個鐘都好。」阿滔對阿希說，但這普通的一句關心，竟然成為阿希突破的關鍵。
阿希逗趣地以哭腔問阿滔：「好感動，但你點解會知過咗一個鐘？明明四圍都已經無哂可以知道時間嘅嘢。」
阿滔先是愕然，然後大笑，接着解釋：「睇嗰班工作人員就知，佢哋每過一次整點就會lag一lag機，可能係要接收主機嘅訊息啦。但我指嘅一個鐘唔係真係一個鐘，而係呢度嘅一個鐘。」
聽到阿滔的解釋，阿希認真看着工作人員，雖然外觀各有不同，但仔細看眼珠的話，就會發現瞳孔是一塊晶片。
阿希瞪大雙眼看着阿滔，非常激動地以口型說：「機械人！」
阿滔點頭回應，再進一步向阿希分享自己的想法：「既然要喺時間度做手腳，大會一定係要用唔受時間影響嘅人去做嘢，所以用機械人係合情合理嘅做法。只要一個程序、一條指令，佢哋就會言聽計從，二四七non-stop咁去做，絕對比真人好用好多。」
得到關鍵提示的阿希立即便想到對策，交代了阿滔一句便沒有牽掛、安心地聽從阿滔建議打了一個盹，為最後的決賽養足精神，爭取最後勝利。
「你做得好好，呢個時候係要靠你，你一句比任何人都有效。」錢先生拍着阿滔肩膀說。
「我為咗阿希可以財自先咁做，佢無依無靠過得太辛苦。」阿滔突然賣起温情，錢先生也有點動容。
錢先生目光誠懇，對阿滔說：「放心，我牙齒當金使。我擔心嘅係一陣究竟會係咩比賽，同埋個印度人會有咩動作，畢竟佢先係最強敵人。」
阿滔將視線投向房裏的阿希，錢先生即時意會到他的意思，也附和道：「你啱，要信佢。」
一輪交談後，時間已經差不多，阿滔喚醒阿希後，對他說：「時間大約係四十分鐘，記住信自己，你有無限可能。」
「好，我出發打大佬喇！」阿希露出陽光笑容、精神飽滿地說：「唔知有無人發現唔到機械人嘅秘密而唔知時間被淘汰呢？如果係咁……一於咁話，而家開始，唔會再有朋友，全部都係敵人，李友希，一定要謹慎。」
阿希出門前先透過窗觀察其餘三人的動靜，發覺尚未有人行動，心底暗喜，再悄悄地開門，以座位作掩護，躡手躡腳地爬到通往賽場的通道暗處躲藏。
「好彩叫阿滔早啲叫我起身，其他人仲未郁。根據呢度嘅時間流逝，數四十聲之後行出去就得，我就會係唯一準時、不戰而勝嘅人。」阿希越想越有畫面，有點沾沾自喜。
「三十九，四十。」阿希數完想進場之際，發現自己的腳不聽使喚動不了，下肢乏力使他整個人趴在地上，只能靠雙手支撐身體，同時金歌谷從他身後出現，往中場飛奔過去。
「對腳痺哂郁唔到，係佢做咗手腳？」阿希盯着金歌谷遠去的身影，雖說已有心理準備，但對此還是難以置信。
此時，雅萊歐和遜馬亞里在另外兩個入口陸續進場，距離集合時間只餘下三十秒，阿希唯一能移動的方法就只有靠雙臂爬。他想都不想便動起來，雙臂疾速舞動，爭分奪秒，務求能準時到達。
然而，要在三十秒內只靠雙臂匍匐而行半個足球場，簡直是天方夜譚。十秒，阿希只爬到禁區，但他已經氣喘如牛；再十秒，他尚有一半路程，但他已經筋疲力盡；最後十秒，他距離中圈只餘十米，但時間已經耗盡。
「可惡吖，竟然未玩就輸，阿哥、阿滔、錢生，我真係對你哋唔住……」阿希趴在地上，悔恨的眼淚不斷流出來，不甘的雙手猛烈地捶打草地。
「最後嘅比賽，而家開始！」東南西北無視了阿希直接宣布。
