話說最近寫文嘅時候
係網上面睇返一D日佔時期嘅資料
當然情況恐怖同埋有好多令人憤慨嘅地方
但我並唔想係度討論當時嘅各樣對與錯

只係，係搵資料嘅途中
無意中發現，元朗公園前身為「水牛嶺」
亦即日佔時期，日軍用作刑場及亂葬崗嘅地方

公園入面嘅百鳥塔，據說係鎮邪之用！
另外，公園入面有頗多嘅金塔甚至墳墓，係原居民安放係度嘅！

但別誤會，筆者並不想導人迷信或增加該處恐怖感！

只係呢D資料，令我諗返起，中學時期，我去左呢個公園，發生左嘅一件怪事！

果陣應該係朝早時間，我同D朋友為左做功課，走左去呢個公園！
雖然係假期，但並唔算多人，我地為左盡快將份功課做完，於是分散去唔同地方，搵返相應嘅答案！
於是我一條友，走左去公園百鳥塔附近，睇完D資料，抄寫完後，就返去搵我D朋友！

當時都無發現有咩唔妥，但依家諗返就覺得有D古怪！
因為，我沿路返去搵我嘅朋友果陣，沿路上係一個人都無！
雖然係少人，但未至於一個人都無！
而最奇怪嘅係，我幾乎行晒成個公園，都搵唔到佢地！

行左唔知幾耐，我見到有個伯伯企在係樹底下。
當時我咩都無諗，走左埋去問佢見唔見有同我差唔多大嘅男仔經過。

印象中，佢好似點左點頭，然後同我講係右邊出口果度，叫我快D去搵佢地！

我講左聲唔該之後，就跑左出去出口，一走左出去出口之後，我就見到佢地，企晒係度唔知傾緊乜。

我走埋去，佢地問我去左邊，成半個鐘都唔見人！
跟住我同佢地講返，我搵左佢地好耐都搵到佢地，佢地就話係公園搵左好耐都唔見我，仲以為我走左！
所以佢地係出口果度，諗住走人！
跟住我就出現左啦！

之後，我地都無理咁多，離開左公園，走返出市區打機！
成件事其實唔係好恐怖！
不過就好離奇！

  1. 公園無啦啦無晒人
  2. 無人嘅公園突然出現一個阿伯
  3. 依家諗返，印象中當時成個公園好靜，人聲無，雀仔聲無，連車聲都無
  4. 見返D朋友之後，雖然都係靜，但印象中好似多返晒D聲，同埋眼尾望過下，公園係有人嘅！

唔知有無住果邊嘅人，係個公園度聽過或者發生過D奇怪事呢？

更多怪奇經歷，更多恐怖鬼故事，或你地都有想分享嘅感受
歡迎到筆者facebook，一起分享自己的怪奇經歷：https://www.facebook.com/insidemyheart2015/

新鬼故＜＜十不思議事件＞＞，正於紙言連載：https://www.shikoto.com/i/AQK