上集：https://post.shikoto.com/posts/120009-如果可以幫女友配點（上）
我無質問Jenny，我去質問婚介公司。
經理皺眉：「專一兩分嘅設定，係『受到極大誘惑先會出軌』。果位男士係咪好大誘惑？」
我嬲爆爆咁答：「佢咪有個臭錢！」話一出口，我即刻諗到，有臭錢，對Jenny黎講咪係最大誘惑。
經理似笑非笑咁望住我，對視咗一陣，佢先講：「我地免費幫你配對多一次，作為賠償，你滿唔滿意？」
唯有滿意啦，仲可以點，叫佢地亂槍射死個有錢仔？
呢次我汲取教訓，加爆專一先，之後1分加外表，1分加性格。
唉，靚女靠唔住，要個平庸嘅女友就算。
然後，我就識到慧心，老實講，望住佢個樣，我真係無feel，
不過見到佢深情嘅目光......算啦，娶妻娶賢，慢慢培養下感情。
拍拖一個月，慧心真係好專一，隨傳隨到，連幾點刷牙都報導得一清二楚，完全無可疑。
佢又乜勉強我，性格上只有一個問題，佢、好、悶！
每日嘅生活都係一模一樣，問佢所有野，佢都答「無意見」、「你話事」。
「妳想唔想去廁所？」「你話事。」
唔止咁，慧心屋企窮，雖然唔會問我攞錢，但佢好慳。
作為男人，你無可能睇住女友食面包，自己大魚大肉，亦無可能睇住佢三個月都著同一件衫。
結果，我都係要負責晒佢嘅開支。
慧心嘅存在好似一件傢俬，仲要又貴又醜。
你話我不負責任又好、外貌協會又好，我終於提出分手。
分手後，慧心仲要搵晒我親戚朋友哭訴，搞到我焦頭爛額。
我死心啦，我唔會再搵果間婚介公司，得果五點，點配都係死。
一年後，我老友阿強宣佈結婚，
佢未婚妻好靚女，對佢溫柔熱情，仲同佢一齊供樓。
我忍唔住問佢：「你喺邊度搵到個咁完美嘅女友？」
「婚介公司咋，幾好架，有得畀你配點，揀女友嘅優點缺點。」
我呆一呆：「你點樣配點架？」
阿強答：「外表、性格3分；經濟、專一就2分。唉，可惜得果10分，有時都驚佢受到誘惑。」
10分？！點解我得5分？
「翻查資料，你同陳小強先生嘅情況......有小小唔同。」
我咄咄逼人：「點唔同？佢唔係男人？」
經理笑一笑：「先生，如果要幫自己評分，你覺得你有幾多分？」
我諗咗一陣：「經濟2分、外表1分、專一自問都一般般，1分、性格就睇情況啦，有時我脾氣都幾差，1-2分咁。」
經理鼓掌：「你對自己嘅定位非常準確，我地公司對你嘅評估，都係5分。所以你有5分，可以配落你女友度。」
我覺得好唔公平：「咁阿強呢？佢有錢靚仔體貼，佢就可以有10分？」
「你明啦，雙方分數接近，先可以配對成功。」經理語重心長：「我地係婚姻介紹所，唔係販賣人口。即使介紹個滿分女仔畀你，你都溝唔到。」
雖然佢有道理，但我覺得好委屈。
「先生，鑑於你嘅悲慘遭遇，我地可以畀啲優惠你。」
仲黎？又介紹女人畀我？
「我地有美容院折扣券、性格發展、創業課程禮券......」經理數完一大輪，用一句話總結：「提高自己嘅分數，乜女都有啦。」
我無墮入呢個連鎖陷阱，好落寞咁走咗。
有一晚我聽電台，聽到個經理點咗隻歌畀我：
「莫道你在選擇人，人亦能選擇你......」
－完－
