上集：https://post.shikoto.com/posts/213852

John一走，我個胸就變番正常。

當然，之後佢再無聯絡我。

發生啲咁嘅事，我梗係要同果兩隻妖精算帳。

兩隻矽膠妖好一致咁表示：「其他野我地唔理妳，但關乎妳個胸，即係我地兩個嘅利益嘅事，我地應該有發表意見嘅權利。」

OK，佢地贏，佢地有果招「令我喺任何場合失態」嘅絕技，我可以點？

講到尾，都係揀男友果陣，要俾佢地參與意見啫。

但實行起黎，先知道佢地真係好煩。

正常女仔揀男友會考慮咩條件？樣、錢、性格、興趣......佢地考慮嘅係手！

隻手靚唔靚、滑唔滑，配唔配掂兩隻矽膠妖，變成我最重要嘅擇偶條件。

搞到我一識個男仔，就要拎起人地隻手，又望又摸，好似變態佬咁。

我有興趣嘅男仔，佢地都嫌隻手唔夠完美。

唔止咁，兩隻矽膠妖對擇偶以外嘅野，都要話事。

我想著低胸衫，「唔好啦，今日咁曬，曬親我地兩個點算。」

我買沐浴露，「呢隻牌子咁Cheap，妳唔係諗住用佢黎捽我地掛？」

我化妝，「妳個下巴可唔可以落重少少粉，我地呢個位，成日要望住妳個下巴。下巴太樣衰，我驚我地生眼瘡。」

港女好煩，港女格嘅胸更煩。

兩隻矽膠妖有一致意見果陣還好，佢地自己傾唔掂數，我就更加煩，乜野決定都做唔到。

終於，我下定決心，無視途中個胸點樣痕點樣震，我都要去醫院拎番兩舊矽膠出黎，重獲自由！

醫生好疑惑：「妳情況幾好喎，又無發炎，點解要拎番出黎？」

我是但答：「我發現胸太大，都唔太適合我嘅衣著風格。」

醫生諗一諗：「咁不如換兩舊細啲嘅矽膠落去？」

仲黎兩舊？我嚇到耍手兼擰頭。

做完手術，拎番兩舊矽膠出黎，無咗煩到爆炸嘅兩把女聲，我鬆一口氣，覺得人生充滿希望。

重獲自由後，我聯絡番John，當日如果唔係兩隻矽膠妖，我地已經一齊咗。

John好興奮咁應約，但出到黎，佢望住我平坦嘅胸部，臉色一變，又扮接電話，話奶奶有事就走咗。

我再約番幾個之前有興趣嘅男仔，都係同樣嘅結局。

我以為，無咗兩隻矽膠妖，我就有擇偶嘅自由。

點知，無人干涉我嘅選擇，但我又回到起點：無得選擇。

擁有某啲自由，就必定會失去另一種自由。
或者，根本無人係完全自由嘅。
　　
－完－