自細平胸嘅我，一向都好羨慕啲玲瓏浮凸嘅女仔。
試過各種按摩、精油、豐胸藥、矯型內衣，木瓜奶當水飲，但現實係殘酷嘅，乜野祕方，都比唔上隆胸咁有效。
唉，就好似人人都知做運動可以減肥，但各種減肥藥依然大行其道，就係因為最有效果條路，永遠都係最難行。
人人都想一步登天，結果，一步登天嘅只有各種「祕方」嘅銷售商。
自從第N個男朋友拋棄我，搵咗一個大胸嘅新女友，我就想隆胸。
好多人會話：「如果佢真係愛你，就唔會在乎你身材啦。」
但呢啲心靈雞湯，好似「內在美比外在美重要」、「心地好就會靚女」一樣，都無辦法阻止廣大女性．為變靚而搏命。
經歷一番掙扎同格價，我揀咗矽膠隆胸。
詳情就唔多講啦，總之都係塞啲野黎個胸入面。
手術成功後，人都有自信咗，著下低胸衫，出街都有男人望，沾沾自喜。
當然，我知道世間所有野都有代價，
我諗過晒所有情況，可能會有病，可能會破裂，然後要不斷做手術......
為咗一時嘅美麗，我願意。
點知，過咗一陣，我開始幻聽，成日好似聽到兩個女人吱吱喳喳。
唔通手術後，我患上抑鬱，所以開始幻聽？
無理由丫，我明明好開心。
呢段時間，我仲識咗個有錢男仔John，打算再進一步發展。
果一晚，我地一齊食燭光晚餐，John含情脈脈咁望住我個胸，讚我係一個好好嘅女仔，
跟住落黎，應該係要求我做佢女朋友。
我個心係咁跳，好興奮，但突然聽到有把女聲：「下，妳唔係真係揀John丫？」
我好驚訝，左望望右望望，但其他人都好似完全聽唔到咁。
再黎第二把女聲：「John隻手好核突，Sorry，我唔會俾佢掂我囉。」
我終於意識到，講野嘅，係我個胸！或者講，胸入面果兩舊矽膠。
本來我唔歧視妖精嘅，睇《美女與怪獸》果陣，見到啲茶壺燭台有思想識講野，都覺得幾可愛，甚至有諗過，如果屋企有啲咩物品成咗精，都可以做下朋友。
我真係無想像過，果兩舊矽膠會成精。
不過，釣金龜機會難得，呢兩個八婆嘅野遲啲先計，反正佢地講野剩係我聽到，無傷大雅。
於是，我無視佢地嘅反對，含情脈脈咁回望John。
突然，我個胸好痕！痕到好似無數螞蟻喺上面爬過咁。
我忍唔住伸手撓一下，然後再撓一下，最後大力咁撓撓撓撓撓......
John雙目圓睜，用望外星人嘅眼神望住我。
更加糟糕嘅係，果兩舊矽膠開始震，直情好似被電擊咁樣。
呢個情景嚇親John，佢即刻扮聽電話，話佢奶奶有事，然後跑出餐廳。
