香港都市傳說三：無法逃離的上環地鐵站

第一章：上環站傳聞

「咦？朗哥，仲未走呀？」阿仁問。

「未呀，仲有排搞！啱啱公司個Server死咗，好辛苦先搞返好，點知又到個客嗰邊死，老細咪要我留到十二點確定無事先俾走囉！唉，真係黑仔！」說話的是林天朗，三十歲，在同一家公司工作了接近七年！

「咁你又真係黑仔啲嘅，不過我都係勸你早啲走啦！唔好話我唔提你，如果你夜咗走，你千祈唔好搭上環架尾班地鐵呀。」阿豪在一旁裝神弄鬼的說。

「痴線，夜咗走唔搭地鐵搭咩呀？唔通真係的士呀？成舊水咁鬼貴，公司又無得Claim！唉，仆街，個Server又死！」阿朗邊回應邊處理手上的工作。

「咁你又唔好話佢喎，佢都係為你好先同你講，你知唔知……」阿仁在說話的時候，阿豪突然用力用手肘撞了他一下。

這一微小的動作，和阿仁突然的停頓，都引起了阿朗的注意。
阿朗在公司這七年來，學懂的除了如何卸膊之外，另外還學懂了觀人於微的特別技能。

剛剛阿豪那一下撞擊，只有當他在提醒別人說錯話或提醒別人不應提起某事時，才會做出的小特徵。

所以，即使手上的工作再緊急，阿朗也稍為停頓，並把視線投向他們。
「咪住先，唔好講啲唔講啲好喎！搞到我心掛掛，陣間個Server搞唔掂我留返啲屎俾你兩個執架！」

為了讓兩位同事就範，阿朗出動了這種職場大絕：「蘇洲屎」。

「哇，咁仆街嘅嘢你都講得出？」兩個同事一起說。

「我唔止講得出，仲真係做得出架！反正依家大把時間，Hea到十二點走，聽朝我就Home Office，你兩個就返嚟執屎！」阿朗說話同時，從抽屜裏拿出了一本雜誌，看來是真的不打算工作了。

「得得得！阿朗哥，有事慢慢講，你想知咩事，我咪講你知囉。不過係驚你唔信啫。」阿仁知道阿朗不是說笑，馬上改口。

「係囉朗哥，你搞返掂個Server先啦，你留啲屎俾我地，我地真係搞唔掂架。」阿豪也說。

阿朗偷偷看了兩人一眼，便放下手上的雜誌，開始在鍵盤上不斷敲打著。

「搞掂！好啦，到你地講啦！究竟咩事先，神神秘秘咁唔想同我講！」五分鐘後，阿朗抬頭看著兩人。

「朗哥咁快搞掂啦？真係勁，咁我地都係……」兩人見Server的問題已經解決，竟想逃走。

「走呀，你地咪睇下聽日返嚟會點囉。」說完後，兩人乖乖回到原位。

「點呀，想講啦？」阿朗看著二人，臉上露出勝利的賤笑。

「其……其實係咁嘅，朗哥你最近有無留意網上瘋傳緊一單嘢呀？」阿仁開口。

「網上日日瘋傳咁多嘢，我鬼知邊單咩，你唔係諗住叫我上網自己搵呀？」阿朗略帶不滿地說。

「唔係，點敢呢？其實最近，網上有一篇文章關於上環地鐵站，有一個人聲稱去搭尾班地鐵，但之後消失咗無再留言。因為嗰個人幾乎每日一Post，但竟然連續幾日都無再開Post。啲人就開始討論究竟發生咩事，有啲人又話俾外星人捉走咗、有啲又話條友特登唔再出Post扮失踪、另外又有啲人話嗰個人發現咗地鐵嘅秘密，所以俾地鐵職員捉走咗！」阿豪見阿朗有點不滿，馬上補充。

「哦，嗰個Post我知呀，我見佢上個星期長期留守喺熱門度。不過呢啲咁嘅Post，應該都係假架啦！你地咁緊張就係想講呢單嘢？」阿朗聽到後，不肖的笑了一笑。

「朗哥，如果淨係得啲留言，我地梗係唔駛咁緊張同你講啦！最大問題係，嗰個Post入面嘅主角，係我地朋友呢！」阿仁歎了口氣，帶點無奈地說。

「吓？唔係啩？咁你地咪知道發生咩事囉？」阿朗終於明白，為甚麼兩人會這麼緊張，原來是知道一些「內幕」。

「唉……呢一層……」阿豪和阿仁都露出不知所措的神情，阿朗感到事情真的有點不尋常。

「朗哥，呢度講呢度散，我地都唔想惹啲咩麻煩。其實嗰日開完Post之後，開Post嗰個人，即係我朋友有打過俾我，佢失踪之後，差佬都有嚟問過我啲資料，直到依家都仲未搵返我朋友！所以，你要應承我唔好周圍講。」阿豪嚴肅地說，阿朗也認真的點了點頭，表示明白。

「嗰一日，我朋友阿達開咗Post，諗住同其他人Share下尾班車嘅情況，佢開咗個Post一陣，本來都Keep住Update，點知過咗一陣，我就收到佢嘅電話！」阿豪開始回憶當時的情況。

「阿豪，大鑊啦，我撞鬼呀！」電話裏傳來一把驚恐的聲音，是阿達。

「係咪阿達呀？你講咩呀？我完全聽唔到呀，大聲啲啦！」阿豪那時在家裏大喊。

「我話我撞鬼呀！而且佢地依家就喺我身邊！」阿達稍稍提高了聲量，但感覺得到他比剛剛更加恐慌。

「吓，你講乜呀？你係咪飲撚醉咗呀，快啲瞓啦屌！」阿豪聽到阿達的「瘋言瘋語」，本想立刻掛斷電話。

「咪住……我……我叫鬼仔達，因為係混血而俾你班仆街咁叫！我同你識咗十二年，第一次見嗰陣因為你執咗我跌嘅二十蚊，所以我同你打交，之後俾訓導主任『黃腳雞』捉咗去罰企操場！仲有當年你溝校花……」阿達說到一半，阿豪便打斷了他。

「得得得，唔駛講啦，我信你無醉！但……但係你話撞鬼，仲要喺你身邊，好難信喎？你打得俾我點解仲唔走呀？」阿豪雖然相信阿達是清醒的，但實在很難相信他真的見鬼了。

「我唔係唔想走呀，我依家坐咗喺架地鐵度，唔知搞乜做未到站！我喺上環搭咗幾分鐘都仲未到中環……死啦死啦，佢地好似開始留意到我……」阿達明顯愈來愈驚慌。

「你……你冷靜啲先……可能地鐵故障先咁耐啫，你知依家地鐵架啦，有邊日唔壞架？同埋，你點知佢地係鬼呀？」阿豪開始感到事態好像有點奇怪。

「故乜鬼嘢障，故障有廣播架嘛，我乜都聽唔到囉！仲有，你問點知佢地係鬼，我話你知，頭先我上車嗰陣一個人都無……但臨閂門嗰陣，其他車廂突然多咗好多……好多『人』，本來佢地個個都係耷低頭，各有各咁企，但佢地……佢地依家開始慢慢抬頭，唔知......唔知係咪發現咗我……唔……唔係佢地同類……點算呀依家，救我呀阿豪。」

「吓……我唔識捉鬼架喎，點救你呀……一係你試下上網搵方法啦，再唔係，你試下唸經祈禱，總之捱到落車就無事架啦！」雖然阿豪仍然半信半疑，但他認識的阿達並不是會在深夜跟他開這種玩笑的人，所以仍盡力給他建議。

「吓，唸咩經呀？馬經波經財經我就識……仆街啦，佢地全部擰個頭過嚟望住我！屌，佢地個樣……仆街！」

阿達說完這句後，阿豪聽見「砰」的一聲，猜想是電話掉在地上產生的聲音。
過了一會兒，電話只傳來空洞的「嘟嘟」聲！

「件事就係咁啦，之後我嘗試再打俾佢，佢部電話好似無咗訊號咁，一打去就飛咗去留言！」阿豪搖了搖頭，好像有點自責的樣子。

「之後，我同阿豪就喺啲討論區出Post，但始終都搵唔返佢！之後我地仲上埋佢屋企，但又係咩都無發現！」阿仁也在一旁補充。

「咁……有無可能佢只係離開咗香港，又……又或者係匿埋咗……」阿朗說完後，才發現那些粗淺的理由根本連自己都說服不了。

「唉，就算係，佢都可以留個言交代聲啫。佢又無咩不良嗜好又無爭人錢，我地真係諗唔到佢點解要玩失踪。點都好啦，朗哥，講我地就講咗啦，信唔信就隨你啦。不過，無謂慳嗰幾十蚊，去……去搵命搏啦……」阿豪說到最後，大慨想起了他那失踪的朋友吧，所以語氣才會帶點悲傷。

似乎他已認定，那位失踪的朋友已經不在人世，這也難怪，消失了差不多一個月，有這樣的猜測也不奇怪吧。

然後，阿朗和二人結束對話後，便繼續他的工作。

「唉！總算搞掂！哇，十二點，快啲走先！」阿朗把東西都收拾好後，便離開公司了。

多謝您睇完第一章
如果想追落去可以去以下的Link：
https://www.shikoto.com/i/GYc

非常希望大家可以俾個Like我，我會更用心寫下去的
https://www.facebook.com/insidemyheart2015

第二章：失踪

阿朗離開公司，慢慢來到上環地鐵站。
他站在閘口的位置，腦海裏回憶起阿豪和阿仁的說話，他看了看時間，在心裏想著：「十二點半……應該無事啩……」。

他呆站了一會，在確認有其他人入閘後，便馬上跟著進去了。
在前方的人是一位妙齡少女，被阿朗這舉動嚇了一嚇，這妙齡少女嚇得拔腿就跑，大慨懷疑阿朗是甚麼變態人物吧。

「唓，好巴閉咩？我都係想有人陪我搭車啫！最衰都係嗰兩條友，搞到我俾人誤會，聽日返公司諗下點整佢地先得！」阿朗內心這樣想，身體本能地四處尋找其他人的身影，看來阿仁和阿豪的故事真的嚇到了他。

往柴灣方向的地鐵來到時，雖然只有小貓三四隻，但他肯定了還有其他人的存在和確定了不是尾班車後，便安心的乘上這輛地鐵了。

在乘搭途中，阿朗不時四處張望，大慨是怕車廂中會突然出現一些奇怪的人吧！
幸好，地鐵上沒有出現任何異像，不時還能聽見那些喝醉了的年輕人在吵鬧，這亦令阿朗安心了不少。

回到家後，阿朗夢見自己坐上了上環的尾班車，然後整架地鐵竟然出現了大量喪屍，把他撕咬得四分五裂！

阿朗被這個夢嚇得清醒過來，但也由於這一嚇，他才發現自己差點遲到！
在回公司途中，阿朗仍然回憶著昨晚所發的惡夢。

「仆街，最衰嗰兩條友仔講啲咁嘅嘢，搞到我發晒惡夢！不過諗真啲，呢啲『屍殺列車』嘅電影橋段，點會係真先得架！唔得，今日返去要屈兩條友請我食飯定下驚先！」

阿朗邊走邊想，總算回到公司了。
在到達辦公室時，他本想先去找阿豪和阿仁，要他們請他吃個「定驚飯」，怎料到本應平平無奇的早上，公司竟吵鬧得像街市一樣。

「Vinci，搞咩呀，點解咁嘈嘅？」阿朗向其中一名女同事Vinci打探。

Vince是公司資歷最深的秘書小姐，亦是全公司最愛打聽八卦事的人，基本上公司發生甚麼也逃不過她的法眼。

「阿朗，今日咁遲呀？我話你知呀，今日老闆心情唔好呀，你自己小心啲啦。」Vince煞有介事地說。

「今朝呀，Daniel佢約咗個大客上嚟，單生意本來傾到七七八八，今日等個客見埋老闆，Daniel做埋Present，咁就簽得架啦！點知個客八點鐘嚟咗，老闆都喺度，就係唔見Daniel，跟住老闆Call爆佢機都搵唔到佢。個客喺度等咗成個鐘都唔見人！啱啱個客先嬲爆爆咁走咗去，老闆死死氣咁送個客走，不過我諗單生意都凶多吉少架啦！總之，你今日醒醒定定啦！」說完後，Vinci也立即回到座位上繼續工作。

「吓？唔係啩，Daniel未試過咁無交帶架喎！唉，唔理，都係快啲埋位做嘢，陣間俾老闆捉到偷懶真係食屎都唔掂！」阿朗想到此處，也馬上回到座位上工作。

而本來吵鬧的辦公室，在老闆推開門後，仿佛被按了「靜音」一樣，整間公司都陷入了寂靜之中，真的連針掉在地上的聲音也能聽得見。

眾人就在這種氣氛下一直工作，到了午飯時間，整個辦公室的人都馬上逃離了公司，為的，就是呼吸一口沒有壓力的空氣。

「頂你個肺！終於唔駛對住個黑面老闆啦！」阿豪對著大海呼喊。

「喂，細聲啲啦！係咪想死呀，陣間老闆落嚟聽到你就大鑊！」阿仁提醒他的同時，馬上四處張望，深怕被阿豪連累。

「算啦，咁辛苦先捱到Lunch Time，由得阿豪啦！老闆如果真係問起係咪有人話佢黑面，我同你一齊督阿豪出嚟咪得囉！」阿朗拍了拍阿仁膊頭，然後對阿豪露出一臉賤笑，阿仁則一副晃然大悟的模樣。

「哇！你兩個咁仆街！不過呢，你地覺唔覺得有啲奇怪呀，Daniel做咗差唔多十年，唔好話無交帶啦，我真係連病假都無見過佢請咁滯，呢次又會咁樣跣老闆一鑊嘅？」阿豪提出了眾人心中的疑問。

「呢層真係唔知咩事！會唔會……」阿朗神色凝重地看著二人。

「會唔會咩呀？」二人吞了吞口水，等待著阿朗的解釋。

「會唔會……佢俾人綁架咗，依家俾幾條女圍住做緊啲唔見得人嘅嘢！」阿朗忍著笑，一臉認真地說。

「屌！你睇少啲AV啦，成日幻想啲咸濕劇情！」

三人打打鬧鬧的渡過了Lunch Time，然後又回到了那死寂的辦公室中。