Matchup
豆大的汗珠由額角流至下顎，再滴在桌上，雅萊歐、金歌谷，以及她們所代表的富豪均被消除了記憶再搬離場地。
阿希滿頭大汗，不是因為炎熱，而是因為緊張。面對着足智多謀、信心十足、遊刃有餘的遜馬亞里，阿希始終想不出勝利的方程式。
「十個籌碼，兩隻九。」阿希故作冷靜地說，但腦內還是不斷重播遜馬亞里設計淘汰兩位女士時的可憎嘴臉。
「你好緊張喎，放心，好快就會以我勝利為結局咁完。」遜馬亞里語帶挑釁地說：「我出一張十。」
「得過三十七張牌，我二十佢十七，要贏就一定唔可以咁正路，但要點先可以必勝？換轉係我，而家一定盡量出真牌唔會搏，但斷估唔會次次都有真牌，我點先可以抓住佢出假牌嘅嗰一次？」阿希依然糾結在必勝法上，想不通便無法專心作賽。
「到你出牌喇。」遜馬亞里友善地提醒，但始終讓人隱約感到有不友善的因子。
「兩隻J。」阿希想到數牌，但除了自己和被揭開的牌，根本不知其他牌是甚麼，這方法行不通。
「你好緊張噃，好想靠鑽遊戲漏洞取勝？」遜馬亞里一眼便看穿阿希的心思，加以否定：「死心罷啦，唔會有，有我都用咗，你快啲認輸好過。一隻Q。」
「佢得返十六隻牌，而我手上有三隻Q，佢真係有Q？」阿希不斷衡量風險，猜錯的話手牌又會增加，勝出的機會便更渺茫，可是遜馬亞里有一張Q的機會確實也不高，猜對的話形勢便會逆轉。
「信自己，」阿希大喊：「你講大話，我要開你！」
阿希一手揭開桌上的牌，牌上的圖案是一個女王，角落毫無懸念的印着Q。
「係好嘅嘗試嚟，再接再厲。」遜馬亞里嘲諷道。
「李友希冤枉好人，二十個籌碼累積落下輪，六隻牌歸李友希。」東南西北說：「而家由李友希開始。」
「仆你個……七隻，雖然唔係追唔到，但好吃力，」阿希又一輪推算，預計遜馬亞里還有多少張A。
阿希望向遠方，嘗試將注意力由撲克牌上抽離一會，好讓腦子放鬆。然而就是這一個小小舉動，一道靈光閃過阿希的腦袋，打通了他任督二脈，腦內的神經元活躍起來，神經傳導物質速度翻倍，眼前豁然開朗，他想到了一個好方法。
阿希的目光重新回到遜馬亞里身上，自信地笑着說：「今次都係十個籌碼，兩隻K。」
「做咩傻笑？意識到自己輸硬所以傻咗？一張A。」遜馬亞里口裏不饒人，但心裏卻有另一個想法：「佢成個氛圍都唔同哂，肯定係諗到咩方法，不過唔理佢有咩方法都好，而家個形勢都係我贏。」
「開你，你無A！」阿希以充滿氣勢的聲線又翻出了一張A。
「哈哈！呢個就係你嘅策略？」遜馬亞里大笑起來。
「李友希冤枉好人，二十個籌碼累積落下輪，三隻牌歸李友希。」東南西北說：「而家由李友希開始。」
「繼續十個籌碼，三隻二。」阿希打出三張牌，鬥志十足地盯着遜馬亞里。
「三張二？真係有咁多？但如果我開錯，我就會多咗牌，贏嘅機會就會細咗，搏唔過，反正我嚟緊嘅牌都有，唔需要冒呢個險。」遜馬亞里思考一輪後便拿出一張牌說：「一張三。」
「開。」阿希想也不想便說。
「李友希冤枉好人，二十個籌碼累積落下輪，四隻牌歸李友希。」東南西北說：「而家由李友希開始。」
「十個籌碼，三隻……開。」阿希像機械人般，不停重複了四次。
「而家累積到百六個籌碼，我仲有一百五十六個籌碼，而你就得返二十二個；牌我得十張，你二十七張，你用咩詭計都好，真係贏到我咩？投降唔駛輸得咁樣衰。」遜馬亞里眼見勝利在望，言語上也越見狂妄。
「你都講得啱，投降真係唔駛輸得咁樣衰，你想而家投降定輸到一敗塗地嗰時先投降？」阿希雙眼並未失去信心，反之變得越來越銳利，仿佛已經手握勝利。
「大言不慚，咁唯有令你認清你贏唔到我嘅事實。」遜馬亞里並未退縮，正面與阿希硬碰。
「今次係最後一局，晒冷，一百五十七個籌碼，三隻Q。」阿希說。
「咁大膽？我話你知，跟住嘅每輪我都有牌，你唔駛旨意贏到我。」遜馬亞里當自己已經勝出比賽，目中無人地着東南西北說：「我贏到你細佬呀，仲唔認同我？一張K」
「乜咁啱嘅，我都係每輪都有三隻牌喎。咁計一計，我會出哂啲牌先，贏嘅係我。三隻A。」阿希眼裏滿是自信，絕不似嚇唬人。
此刻的壓力落在遜馬亞里身上，每輪也有三張牌絕不可能，不過如果稍有不慎開錯一次，手牌數量會逆轉，伸手可及的勝利亦會遠離；然而，不賭一次，勝利只會拱手相讓給阿希，這比沒有奮力一搏更令人婉惜。應當何時揭牌成了關鍵，但這並非全是賭搏，只是猜中的機率比較低而已。
「我嚟緊要出嘅牌，分別係二、四、六、八、十、Q、A、三和預定落敗嘅五。本身最有把握係八，但已經等唔到，而家我手上唯一有機會翻盤嘅得返K。我手上有一張，枱上有一張，得返六張，無咗幾十張牌之後咁好彩佢會有三張？我死都唔信，就用K決勝負，況且退一步講，就算我估錯，籌碼都會累積，我都仲未輸。」遜馬亞里擬好策略後便出牌。
「你仲堅持出一張？咁叻計數嘅你實知咁落去你會輸，而家到你放棄掙扎喇？」阿希挑釁道，然後再拿出三張牌。
遜馬亞里想好策略後變得冷靜和冷酷，頭腦異常清醒，不僅沒有受阿希挑釁，甚至無視了場地的所有事情，一心按照自己的計劃行事。
「一張四。」遜馬亞里以沒有起伏的平淡聲線說。
阿希並未見過這狀態的遜馬亞里，但在進化過程中隱藏在基因的動物直覺告訴他，現在的遜馬亞里十分危險，逃走是最聰明的做法。
但根本無處可逃啊！現在只有正面對抗這一途。雖然不知道遜馬亞里甚麼葫蘆裏賣甚麼藥，但阿希還是硬着頭皮上，再打出了三張牌。
「一張六。」遜馬亞里平靜依舊。
每次出牌，阿希都膽戰心驚，因為他每次都在說謊，每次都沒有足夠的三張牌，這場心理戰，誰先怯誰就輸，即使說謊也要繼續裝。
真的需要裝嗎？還是……
阿希皺一皺眉，維持了不過零點零零一秒，然後便從手牌中拿出三張牌，放在桌上，以比之前更雄壯的聲音說：「三隻七。」
這一連串的舉動，令遜馬亞里有了一絲猶疑。轉瞬即逝的失敗表情管理，掩蓋心虛的更響亮聲線，是實情還是陷阱？要提早結束還是依計行事？
「遜馬亞里精神啲，唔好被其他嘢影響，你嘅計劃係萬無一失，照住做就得。」遜馬亞里內心掙扎一輪後下了定案，冷靜地拿出一張牌。
「雖然佢表面無嘢，但今次出牌嘅決定慢咗，佢有諗，即係個計劃行得通。」阿希心裏竊喜，繼續對遜馬亞里大放厥詞：「多謝大哥不殺之恩，明知我無牌都饒我一命，今次我有三隻九。」
「想同我玩心理戰？你仲未夠班。」遜馬亞里沒有開口回應，只是沉默地又打出一張牌。
「佢咁忍得，一定係有陰謀，究竟會幾時出招？會出三隻三定兩隻五，定係再早啲郁手？表面上我佔據主導地位，但實際上有優勢嗰個係佢。只要佢有一輪出多過一隻，咁我就輸。雖然無輪係佢自己定我都特登引導佢每次只出一隻，但假如佢清醒返咁我就無勝算。」阿希只可以心裏祈求遜馬亞里一直只出一張牌。
與此同時，其實遜馬亞里也有自己的考量：「而家唔可以有任何閃失，否則前功盡棄，一定要確保萬無一失，明知佢無都唔可以開，點都要跟住計劃，等佢無得翻身。」
「三隻J。」阿希這次又恢復撲克臉，但遜馬亞里雙眼只看着手牌，無視了阿希的所有小動作。為了挑動遜馬亞里的神經，阿希故意說：「我知你有計劃，不過咩計劃都無用，我嚟緊都唔需要講大話，你嘅勝出機會係零。」
遜馬亞里沒有理會阿希，只自顧自地出牌：「一張Q。」
眼見遜馬亞里已經免疫了各種小動作，阿希只好專注於尚餘的回合。他竭力代入遜馬亞里，列出所有能翻盤的方法，並想好如何應對，幾近萬無一失。
「三隻K。」阿希自信地出牌，因為他想不到有任何的缺口，除非遜馬亞里知道他手持甚麼牌。
只是，所謂「唔怕一萬，最怕萬一」，這個「萬一」終究還是出現了。
「開你！」遜馬亞里閉了良久的悶氣，統統渲洩在這一把上。
阿希整個人也僵硬了，嘴巴吃驚得張到大大的，眼睛驚訝得瞪到圓圓的，遜馬亞里這個攻擊殺了他一個措手不及。
四周的空氣在此刻瞬間凝住了，聲音格外響亮，遜馬亞里的心跳聲大得連全場人士也聽得到。他緩緩伸手翻轉阿希的牌，世界在這刻定格了，直到一輪瘋狂大笑帶動定格的畫面，聲畫再次同步，世界又再運行起來。
「你……你竟然真係有三張K？」遜馬亞里驚訝得不知是哭還是笑。
「好彩我咁啱有三隻K，佢喺七嗰鋪開我就玩完。」阿希捏了一把冷汗，竭力保持冷靜答：「如假包換。我同你講過我每輪都齊三隻，出七嗰輪我特登做戲你都唔開我以為你信，點知你喺度進攻，可惜你棋差一着。」
「而家你有咁多牌，點都贏唔到我，下一次輪到我，我一出牌你就輸，投降啦。」阿希勸說道。
「遜馬亞里冤枉好人，三百一十四個籌碼累積落下輪，三十一隻牌歸遜馬亞里。」東南西北說：「而家由遜馬亞里開始。」
「你一日未出哂啲牌，我一日都未輸，只要呢輪我開啱，咁你就玩完。」遜馬亞里還未放棄：「一個籌碼就夠，三張A。」
阿希打出手上最後的三張牌，他甚至沒有蓋住牌，肆無忌憚地亮出三張印着「二」字的牌，連最後翻牌的機會也沒有留給遜馬亞里。
牌出完後，阿希拍拍手站起來，舒展久未活動的筋骨，等待着東南西北宣布賽果的同時，不忘嘲弄遜馬亞里一番：「想翻盤？翻吖翻吖翻吖，等咩呀，仲唔翻？我都講咗你知㗎啦，叫你自己投降，咁咪唔駛而家輸得咁樣衰囉，你係講唔聽嘅，自取其辱。你估你識工作人員就實贏？我係佢細佬㖭呀，邊個親啲吖你話？會幫邊個多啲吖你話？」
遜馬亞里在座位上仰視站了起來的阿希苦笑，但眼神卻流露出一絲温柔。他欲言又止，轉而望向東南西北，又是一個苦笑，這次的眼神明顯更加複雜，包含着憤怒、失望、悲傷、釋懷、解脱、喜悦……
