《瑜亮之戀2巴黎篇～甜蜜點綴》
「沒有圓周的鐘 失去旋轉意義
下雨這天 好安靜
遠行沒有目的 距離不是問題
不愛了 是你的謎底
我佔據 格林威治 守候著你
在時間 標準起點 回憶過去
你卻在 永夜了的 極地旅行
等愛在 失溫後 漸漸死去⋯⋯」
聽住耳機中又一次播住嘅周杰倫嘅《愛你沒差》，Venus不自覺咁跟住旋律慢慢哼唱。
自從Hayden去咗法國之後，呢首歌就成為咗Venus手機入面最常播嘅一首歌。
不過千祈唔好誤會！絕對唔係因為Hayden去咗外國之後見異思遷、拋棄Venus呀！
相反，兩年嘅時間，兩人嘅感情無因為距離嘅遙遠而變淡，兩人除咗各自為夢想而努力奮鬥外，亦好好咁維繫住兩人之間嘅關係。
二人每日都會傾電話，就算可能只係得幾分鐘甚至幾十秒，因為對兩人嚟講，聽到對方把聲就係繼續努力落去嘅力量泉源。
兩人之間即使相隔九千幾公里，仲有七個鐘嘅時差，不過依然無法阻隔兩人之間嘅感情。
「喔 愛你沒差 那一點時差 喔～
你離開這一拳給的 太重
我的心找不到 換日線 它在哪
我只能不停的飛
直到我將你挽回
那一點時差 喔～
就讓我靜靜一個人 出發
你的心總有個 經緯度 會留下
我會回到你世界
跨越愛的時差⋯⋯」
當首歌再次重覆副歌嘅時候，聽住歌詞嘅Venus不禁甜笑起嚟，擰轉頭望一望窗外雪白一片嘅雲海，幻想同Hayden再次相見嘅情景。
只要再過十三個鐘，佢就可以跨越時差地界，去到Hayden所在嘅世界。
「本航班即將降落巴黎戴高樂機場～請各乘客不要解開安全帶！⋯」
在經過了漫長嘅旅途，睇住終於出現喺眼前嘅巴黎市景色，Venus心中都忍唔住有啲激動。
「終於可以見到Hayden啦！」諗到呢度，Venus個心就甜到忍唔住笑出嚟。
飛機啱啱到埗，Venus已經逼不及待咁落機，拎齊證件完成入境手續，係行李大堂度等行李。
係等行李嘅時候，Venus亦都將準備好嘅電話卡換好，確認可以上網之後，就即刻check下Hayden有無send message俾佢。
因為Venus喺出發之前有通知佢哋大概嘅到埗時間，等佢哋預定時間黎機場接佢，不過宜家比預計嘅時間遲咗唔少，Venus擔心佢哋等得太耐，就打算睇下佢哋有無搵佢。
一打開手機，零訊息。
Venus不由一陣失落，不過都無諗太多，只係send咗個message俾Hayden，通知一聲佢已經到咗機場。
拎完行李之後，Venus就拖住行李行出接機大堂，喺無數舉牌嘅人群中，尋找嗰個Hayden嘅身影
一直行一直搵、一直行一直搵，Venus都搵唔到Hayden嘅身影，望著同機嘅人一個一個咁奔向接佢哋機嘅人擁抱歡呼，Venus忽然感到一陣深深嘅孤獨感。
深深嘅孤獨感，加上人生地不熟，Venus有股想喊嘅衝動。
「嚴茜瑜！」
就喺呢個時候，一下熟悉嘅喊叫喺Venus身後傳來。
一聽到呢把聲，Venus都未嚟得切擰轉身，就感覺眼淚已經開始不受控制咁湧出嚟。
Venus擰轉頭，嗰一個佢日掛夜掛嘅男仔就帶住佢熟悉嘅笑容出現喺佢眼前。
一見到Hayden，Venus諗都唔諗，就拋低咗手上嘅行李，直衝埋去Hayden心口度盡情咁喊。
Hayden輕輕咁攬住Venus，笑住咁講：「做咩呀？駛唔駛咁⋯⋯」不過講到一半，就被Venus打斷咗。
「衰人文亮熙！衰人！你去咗邊⋯去咗邊呀？你知唔知頭先我得一個人幾驚呀？！衰人！衰人！衰人！⋯⋯」Venus一路喊一路打Hayden個心口一路不停鬧，而Hayden就靜靜咁攬住Venus，由得佢打、由得佢鬧。
過咗一陣，Venus喊到攰、打到攰、鬧到攰，漸漸咁冷靜番落嚟，靜靜咁伏喺Hayden嘅心口，感受住Hayden嘅體溫、氣息同心跳。
「點樣呀？好啲未？」Hayden輕輕抬起Venus塊臉，望住佢個對喊到有少少紅腫嘅雙眼溫柔咁問。
「嗯⋯⋯」Venus望住Hayden充滿關愛嘅眼神，忍唔住臉紅起嚟。
Hayden笑一笑，深深咁錫咗Venus一啖之後，再一次重新將Venus攬住，細細聲咁講：「嚴茜瑜，我好掛住你啊！」
Venus雙手亦都攬番住Hayden，好安心咁靠係Hayden身上，臉上亦都換番笑容回應Hayden：「我都好掛住你啊～文亮熙！」
兩個人就咁攬住對方，好耐都唔捨得放手，好似一放手對方就會消失唔見咁。
「喂，好啦，差唔多啦～攬咗咁耐仲未夠呀？」過咗唔知幾耐，一把聲將兩個人拉番嚟現實世界。
二人立即鬆手分番開，即刻就發現成吉思靜靜咁企咗係佢哋隔離，而且睇嚟已經企咗一段時間，就連Venus拋低嘅行李都已經執埋番嚟放咗喺成吉思腳邊。
兩個人諗番起頭先自己嘅舉動全部都被成吉思見到哂，都忍唔住臉都紅哂，尷尬得唔敢望對方。
「我知你哋兩個好耐無見、好掛住對方，不過時間都唔早啦，我哋番去先啦好無？」成吉思輕鬆咁笑住講，呢啲年輕人嘅感情佢都仲係好明白嘅：「嚟，Hayden，幫手拎啲行李去我架車度。」
成吉思又擰轉頭同Venus講：「Venus，你媽咪同我講咗㗎啦，你喺巴黎嘅呢幾日，就放心住喺我屋企得㗎啦，同埋一陣記得打俾你媽咪報平安。」
交代完之後，成吉思就轉身拎起Venus嘅行李去拎車。
Hayden見成吉思行咗去，亦都快快手一手拎起剩底嘅行李袋，一手拖起Venus隻手，雙雙咁跟住成吉思去拎車。
望住兩個人十指緊緊相扣，Venus又忍唔住甜甜一笑。
------------------------------分隔線------------------------------
Hayden同成吉思將行李放落車尾之後，成吉思就坐上駕駛位，而Hayden同Venus兩個就一齊坐係後面。
成吉思只係笑一笑，明白年輕人久別再聚，自己都係唔好做電燈膽。
Hayden望住雙眼喊到有啲腫嘅Venus，眼角下仲殘留住一啲淚印嘅可憐樣，忍唔住有啲心痛咁摸下Venus嘅眼角。
「做咩呀？」Venus望住好小心咁摸佢眼角嘅Hayden，笑住咁問。
「喺度諗𡁵做咩有人咁傻～忽然喊到豬頭咁樣～」Hayden又移上少少，幫Venus一邊整好鬢角嘅頭髮一邊答。
「最衰都係某個人囉～明明應承咗嚟接我㗎嘛！但係又搵極都見唔到人喎，咁人哋係呢度又咩人都唔識，咁會驚會喊⋯有幾出奇啫！」Venus睥咗一眼Hayden，哼咗一聲。
「對唔住呀！我同成吉思其實好早就嚟咗㗎啦！不過你班機delay咗，所以就行開咗一陣去買啲嘢，點知班機最後又早咗⋯⋯」Hayden即刻雙手合十咁低頭道歉。
「買嘢？買咩嘢咁緊要呀？」Venus奇怪咁問。
Hayden喺袋入面拎咗一個精美嘅三文治出嚟，尷尷尬尬咁講：「我⋯我驚你搭完長途機肚餓，就諗住去買定啲嘢食俾你，又想揀啲好味嘅⋯就揀耐咗⋯」
「哈哈⋯⋯」Venus聽完，忍唔住笑出咗出嚟：「你正傻瓜嚟㗎！我喺飛機上面有食到晚飯㗎！同埋，駛咩咁揀擇喎～你買嘅我實食㗎～」
見到Hayden咁關心自己，Venus個心就感覺到陣陣嘅溫暖，拎過Hayden手上嘅三文治就開始食起上嚟。
「嗯～真係好好味，比飛機上面啲嘢食好好多！」Venus一邊食一邊講：「嚟呀，你都試下呀～呀⋯」
Hayden咬咗啖Venus遞過嚟嘅三文治，又伸手將Venus嘴角嘅一啲麵包碎拎起放埋入口，笑住講：「你睇下你，食到污糟哂～」
Venus笑一笑，就挨落Hayden膊頭，繼續食住Hayden買俾佢嘅「愛心三文治」。
車依然喺漆黑嘅巴黎夜色中慢慢奔馳，但車入面就傳嚟一陣陣窩心嘅感覺。
返到成吉思屋企嘅時候，已經係凌晨時份。
成吉思同Hayden幫Venus將啲行李搬上房同執好間房， Venus就去咗沖涼洗一洗塵。
當Venus返到房嘅時候，就淨係得番Hayden喺度。
「成吉思呢？」 Venus問。
「佢返咗房休息啦～聽日要返餐廳幫手。」Hayden答。
「咁⋯你呢？你仲唔訓嘅？」Venus繼續問。
「因為⋯」Hayden一邊慢慢攬住Venus一邊講：「因為我掛住你囉～掛到訓唔到呀！」
Venus甜甜一笑，攬番住Hayden講：「我都好掛住你啊！」
兩個人就咁互相攬住，靜靜咁享受呢一刻二人相聚嘅時光。
過咗一陣，Hayden忽然鬆開手問：「係喎～你唔係要打俾Auntie Nat報平安咩？」
「係喎，差啲唔記得咗添～」Venus即刻拎手機出嚟，打通電話簿入面「Mom」嘅號碼。
「喂～媽咪～」Venus望住電話視像中嘅Natalie講。
「Venus，到咗Hayden同成吉思嗰度啦？」Natalie問。
「Hello，Auntie Nat。」Hayden笑住講。
「Hayden，好耐無見。」Natalie都笑一笑回應：「你Auntie Nat同Uncle太忙行唔開，喺法國嗰邊就拜託你好好睇住Venus啦！」
「得㗎啦，放心啦，Auntie Nat，我會好好睇住佢㗎啦！」Hayden望一望Venus，笑住咁答。
「喂呀！你哋兩個唔好當我細路好喎，我就嚟二十歲㗎啦，我識自己照顧自己！」Venus開聲抗議。
不過只係換嚟Natalie同Hayden嘅笑聲回應。
「好啦～你哋嗰邊都好夜㗎啦，早啲休息啦！我都差唔多要返鋪頭。」Natalie揮一揮手講。
「嗯～Byebye媽咪。」「 Byebye Auntie Nat。」
收線之後，Hayden亦都起身講：「好啦！真係夜啦！你搭咗咁耐飛機應該好攰㗎啦，早啲休息啦！」Hayden講完之後喺Venus額頭錫咗啖，就轉身準備出房。
不過，Venus捉住咗Hayden嘅衫尾，細細聲咁講：「今晚⋯今晚你可唔可以留喺度陪我訓呀？」
Hayden擰轉頭，望住臉都紅哂嘅Venus，笑一笑講：「知道啦！我今晚留低陪你啦～嘻嘻，仲成個細路咁詐嬌～」
「咩⋯咩喎！咁人哋今日係機場嚇親，唔係咁想得自己一個人嘛？」Venus隨手攬過枕頭講，將自己個頭深深咁埋入去。
「係咩？我仲以為有人唔捨得我添～」Hayden又整蠱Venus。
「哼！唔駛你個衰人陪啦！你走啦！」Venus將個枕頭向Hayden扔過去。
Hayden接過枕頭，之後行埋去攬住Venus，笑住道歉：「陪陪陪⋯⋯係我唔捨得你嘛！你打我都唔走㗎啦！」
「哼！」Venus擰轉頭，唔理Hayden。不過嘴角隱藏唔住心情，忍唔住彎向上。
兩個人就係咁渡過咗一齊係巴黎嘅第一個夜晚。
------------------------------分隔線------------------------------
第二日 成吉思屋企
屬於巴黎嘅陽光微微照射入房，早就醒咗嘅Hayden半側住身，靜靜咁望住仲訓𡁵嘅Venus。
十幾個鐘嘅飛機加上精神上嘅勞累，早就覺得非常攰嘅Venus，依然訓得好舒服。
微微顫動嘅長睫毛輕輕遮住緊閉嘅雙眼，淡紅嘅嘴唇隨住Venus均勻嘅呼吸微微開合，安靜嘅睡容就好似BB一樣。
Hayden靜靜望住Venus訓覺嘅樣，只係好小心咁伸手幫Venus整理訓亂咗嘅一點鬢髮，似乎好驚連咁樣嘅動作都會整醒Venus咁。
忽然，Venus雙眼睜開，就同正溫柔咁望實自己嘅Hayden嘅視線對上。
「早晨啊～」Venus甜笑住咁同Hayden講。
「早晨。」Hayden嘅招牌笑容。
對佢哋嚟講，可以一訓醒擘開眼就見到對方真係一件非常幸福嘅事。
兩個人就係咁保持住訓喺度嘅動作，互相望住大家，直到成吉思過嚟叫兩個人起身食早餐為止。
兩個人手拖手咁行出房，一去到大廳就望見滿枱嘅法式早餐。
由Croque monsieur、Brioche、Baguette、Oeuf a la coque傳嚟嘅香味，絕對令人忍唔住流口水。
「嚟，快啲坐低食早餐。」成吉思早就已經坐低，正喺度品味𡁵佢杯早晨咖啡。
Hayden同Venus亦都各自坐低開始食嘢。
「係呢～Hayden，你呢兩日係咪都唔返餐廳住？」成吉思將手上嘅最後一啖麵包食完之後，開口問Hayden。
Hayden嚟到巴黎嘅呢段日子，除咗寄住喺成吉思嘅屋企之外，亦都會喺廚藝學院唔駛上堂嘅日子，去成吉思嘅餐廳幫下手，由一開始嘅洗碗打雜到宜家間唔中都會做下助廚嘅角色。
宜家喺學院放暑假嘅時節，Hayden更加係經常落場幫手，順便鍛練自己嘅技術。
「嗯，呢兩日我想全心全意咁陪Venus～始終我哋真係太耐無見啦！」Hayden擰轉頭望住Venus講，換嚟Venus嘅一個笑容回應。
「我唔返餐廳幫手，會做成麻煩嗎？」Hayden又轉頭望住成吉思問。
「哦唔係～唔係～只係我想confirm下啫，無嘢嘅。你放心去陪Venus啦！」成吉思即刻笑住解釋：「同埋你唔好唔記得，仲有幾日就喺你同Thierry嘅約定之日，你準備好未㗎？」
「放心啦，我已經準備得七七八八，仲爭少少～我今次好有信心會得嘅！」Hayden充滿自信咁講。
「嗯～總之你自己俾心機啦！」成吉思鼓勵完Hayden之後，就拎起背囊準備出門，笑住同兩個人講：「好啦！我食飽返餐廳先啦！你哋兩個自己玩得開心啲！」
「Byebye～路上小心！」
「好啦～食飽未？食飽就等我帶你遊下巴黎呢個名聞世界嘅浪漫之都啦！」Hayden擰轉頭問Venus。
「嗯！」Venus已經將開心興奮嘅心情全部都寫哂喺臉上。
海明威曾經講過呢一句話：「如果你夠幸運，在年輕的時候待過巴黎，那麼巴黎將永遠跟著你，因為巴黎是一席流動的饗宴。」
當你看見巴黎嘅塞納河，大概就會對海明威嘅呢一句有多啲嘅感受。
此刻，Hayden正同Venus喺塞納河畔漫步，感受巴黎呢座城市嘅浪漫氣息。
初夏早晨嘅巴黎陽光非常溫暖，就好似輕輕咁喚醒巴黎呢個懶訓嘅美女。
由於時間尚早，可以見到好多店鋪都仲喺度準備𡁵並未開鋪，所以兩人只係肩並肩咁沿住塞納河慢慢散步，欣賞住美麗天然嘅河色。
「係呢？頭先你同成吉思講咩Thaigo、咩約定日，係咩一回事？」Venus諗起頭先食早餐嘅事，轉頭問Hayden。
「哦，你話呢件事呀～Thierry呢其實係成吉思餐廳入面嘅主廚，佢整嘢食好勁㗎！我一直都想拜佢為師跟佢學嘢！我足足捱咗兩年，佢終於肯俾個機會我！佢叫我準備一餐晚餐，只要令到佢滿意嘅就肯收我教我嘢！」Hayden提起呢件事，忍唔住一陣興奮同期待。
「嘩！」Venus讚嘆，之後又好擔心咁講：「等陣先！成吉思頭先話仲有幾日就係，咁宜家你同我出嚟玩，會唔會對你有影響㗎！？」
「傻瓜嚟嘅！我為咗呢個考試已經準備咗成個月，出嚟玩幾日無問題嘅！而且，我仲諗住帶你周圍去食勻全巴黎，順便睇下有無新靈感～」Hayden笑住解釋，唔想Venus玩得唔開心。
「呵！文亮熙，你想肥死我呀！到時無人要點算呀！？」Venus雙手叉腰，扮嬲咁講。
Hayden笑一笑，順手咁攬住Venus膊頭講：「點會無人要？無論嚴茜瑜你變成點，我都會要你㗎！～」
「咦～行開啦你～喺度賣口乖～」Venus扮嘢咁要推開Hayden。
「況且呀，陪我嘅嚴茜瑜大小姐係頭等嘅大事，就算法國總統嚟想食我整嘅嘢，都要叫佢等下先啦！」Hayden唔理Venus嘅反抗，繼續講笑。
「懶巴閉啦你！法國總統都要等下先？法國總統會嚟食你啲嘢先算啦！」Venus伸一伸脷，對Hayden講嘅嘢有啲不屑。
「都係打個比喻啫！」Hayden笑住講。
「行啦！我哋去嗰邊睇下囉！」Venus無佢咁好氣，指一指其中一堆鋪講。
「好好好！我哋行啦！」Hayden和應，跟住維持住搭住Venus膊頭嘅動作拖住Venus慢慢行過去。
雖然巴黎大街上一向閃光無限，但呢對小情侶嘅幸福畫面，依然吸引咗唔少人羨慕嘅目光。
------------------------------分隔線------------------------------
沿住塞納河一直行，兩人不知不覺間就行到協和廣場同桃樂麗花園前。
「嘩！係摩天輪呀！」Venus望住高大嘅摩天輪，雙眼立即閃閃發光。
「你好好彩呀～呢個巴黎摩天輪唔係一直都喺度，係因為上年世界盃法國贏咗嘅關係，佢先可以繼續留喺度俾你見到～」Hayden望住興奮到好似小朋友咁嘅Venus，笑住解釋。
「咁我哋可唔可以去坐下呀？喺摩天輪上面望哂成個巴黎景色，一定好靚～好浪漫啫！」Venus忍唔住期待咁問。
不過Hayden聽到之後，只係搖一搖頭，好可惜咁講：「呢樣就無辦法啦～呢個時候嘅摩天輪係唔開放俾任何人㗎⋯⋯」又擺一擺手表示佢都無辦法。
「吓～～～」Venus一臉失望，又擰轉頭再望一望摩天輪，失落嘅眼神就好似一隻可憐嘅小白兔。
「唔好咁啦，雖然無得坐摩天輪，但你想睇巴黎嘅景色，我仲有辦法嘅！」Hayden安慰失望嘅Venus。
之後Hayden就拉住Venus行入桃樂麗花園，搵咗個地方就拉住Venus一齊坐低，享受住微暖嘅陽光，望住澄澈嘅藍天。
「你睇下，呢度幾舒服～今日天氣又咁好，就唔好唔開心啦！」Hayden望一望訓喺側邊嘅Venus，又篤一篤佢扁起嘅嘴講：「嚟啦～笑番先啦！」
望住不停氹佢開心嘅Hayden，Venus總算開心番啲咁笑一笑。
「係囉～笑番先靚女㗎嘛！」Hayden見到Venus開心返就放心了。
「即係頭先我唔靚女咩？」Venus笑住咁問。
「唔係唔係～頭先都靚女，不過宜家仲靚女，簡直係全巴黎至靚。」Hayden笑住答。
「哼！口花花，唔啋你呀！」Venus擰轉頭，不過一陣之後就慢慢挨咗落Hayden身上。
兩個人就咁互相挨住，享受住呢一刻嘅寧靜。
平淡嘅時光，對二人嚟講就無最好嘅時光。
之後，為咗補足無得坐摩天輪嘅遺憾，自然少不免要影番一大堆相。
摩天輪、噴水池、方尖石碑、廣場雕像，通通成為二人合照嘅對象或者背景。
影完一輪之後，Hayden帶住Venus向名聞世界嘅香榭麗舍大道出發。
走入香榭麗舍大道，一股恬雅清新嘅氣息就迎面撲來。
呢一刻已經接近正午，各種店鋪早就開門，相比二人朝早啱啱出嚟嘅時候，宜家嘅巴黎明顯熱鬧咗唔少。
喺香榭麗舍大道，隨處可以見到各具特色嘅咖啡店，唔少嘅法國人同遊客都喺度邊嘆咖啡邊享受悠閒嘅時光。
同香港急促繁忙嘅城市節奏相比，完全係兩種風格。
Hayden同Venus拖住手，漫步於大街上，感受住呢種悠然，舒緩呢段時間嚟生活與分離所帶嚟嘅壓抑情緒。
另外，除咗咖啡之外，出現喺兩人眼前最多嘅就係各種各樣嘅法式甜品。
Macaron、Soufflé、Mille Feuilles、Creme Brûlée、Eclair，每一樣無論喺外形定香味，都係度不斷誘惑住人嘅食慾。
Venus自然都俾不斷出現眼前嘅甜品輕鬆吸引住目光，對少女嚟講，甜品絕對係極具殺傷力嘅武器！
「嚟啦～我哋去食嘢囉！」Hayden拖起Venus就向前行。
「吓！？但係度度都排哂長龍喎！」Venus好驚訝咁講。
「跟住我嚟啦～」Hayden又係度懶神秘。
Hayden拉住Venus嚟到香榭麗舍大道最出名嘅Ladurée甜品店。
呢個時候正是最多人排隊嘅時間，粗略估計都要等番成個鐘。
「走啦！咁多人，有排排呀！其實我都唔係咁想食咋嘛！」Venus拉住Hayden就想走。
「信我啦～跟住我就無問題㗎啦！」Hayden笑住講。
見點勸都勸唔掂Hayden，Venus只係繼續由得Hayden拖住佢行。
------------------------------分隔線------------------------------
Hayden帶住Venus兜過人龍，行到店門口隔住大門同其中一個店員揮咗揮手。
只見嗰個店員同同事講咗幾句，就行開咗。之後過咗一陣，就拎咗幾袋裝得好靚嘅甜品出嚟，行到Hayden同Venus面前。
店員明顯是個典型嘅歐洲人血統，金髮藍眼睛，和Hayden差唔多高，但相比之下Hayden略為瘦削，是個感覺充滿浪漫基因嘅外國型男。
「Salut，Hayden！」店員用法文同Hayden打招呼，之後將手上嘅幾袋甜品都遞俾Hayden。
「Salut，Jesper。」Hayden邊接過Jesper手上嘅嘢，邊以法語回應番Jesper：「Merci beaucoup！」
（之後會將兩人嘅法文對話轉番做粵語～自動翻譯on！）
Jesper望一望企喺Hayden身邊嘅Venus，就向Hayden問：「呢位就係你香港嚟嘅女朋友？你戴住嗰條鍊戒指上寫住嘅⋯⋯Venus？」
「係呀！」Hayden笑住咁答。
「果然同你所講嘅一樣，好靚女！你真好眼光！」Jesper舉起手指公向Hayden表示讚賞。
「佢唔淨止靚㗎⋯⋯」Hayden講到一半，就俾Venus打斷咗。
「喂呀！你兩個係度講我咩嘢呀？我聽唔明呀！」Venus向Hayden抗議，佢淨係聽到Jesper好似有叫過佢個名。（作者表示Venus無翻譯器～～～）
「對唔住呀！同你介紹，呢位係Jesper，係我學院嘅同學兼好朋友，佢因爲識人所以宜家喺呢間甜品店實習𡁵。」Hayden向Venus道歉，同埋介紹Jesper嘅身份：「其實我之前已經拜託咗佢，幫我預備呢啲甜品，因為我知你見到一定會忍唔住嘅。」
「梨蒿，柯系Hayden嘅貧幽，鵝撬Jesper。」Jesper亦都伸手用生硬唔正嘅廣東話同Venus打招呼。
Venus聽到Jesper嘅「廣東話」自我介紹，好唔容易咁忍住想笑嘅衝動伸手同Jesper握手，之後擰轉頭笑住問Hayden：「啲廣東話⋯你教佢㗎？」
「咁Jesper佢對香港文化好有興趣，就間唔中捉我教佢廣東話咁囉～我都係係咁意教咗佢少少咋！」Hayden有啲唔好意思咁講。
望見Venus望住Hayden笑得好開心咁，相反Hayden就一臉尷尬咁撓頭，於是就問：「早喵史？花生咗喵蒿少嘢？」
之後兩人擰轉頭望住Jesper，即刻忍唔住就笑咗出嚟。Jesper雖然唔知咩事，不過見佢哋笑得咁開心，都跟住笑埋一份。
兩個人喺笑完之後，就開始覺得唔好意思，都覺得咁樣笑人好似好衰咁。
於是Hayden就向Jesper解釋番件事，Venus亦都向Hayden問咗道歉嘅法文「s'excuser」嚟向Jesper道歉。
聽完Hayden解釋之後，Jesper好大方咁表示自己完全唔介意，只係希望Hayden得閒嘅時候教識佢講多啲廣東話同話多啲俾佢知香港嘅事，Hayden當然拍哂心口應承。
「Hayden，Venus，au revoir～」Jesper因為差唔多喺時候要返入甜品店繼續幫手，於是就同兩人講再見。
「Jesper，au revoir～Merci bien！」兩人都以法文同Jesper講再見，同時為手上嘅甜品再一次多謝Jesper。
之後兩個人就拎住一袋二袋嘅甜品，搵咗一個咖啡座坐低，之後將甜品逐樣逐樣放好，再加上兩杯散發濃郁香味嘅咖啡，兩人已經準備好享受呢個豐富嘅甜品大餐。
Jesper唔單止為兩人準備咗各種口味嘅Macaron，仲有幾款嘅Saint-Honoré蛋糕同Religieuse Rose泡芙。
「嘩！」Venus雙眼早就變得閃閃發亮，望住每款都想試哂佢嘅感覺，不過遲遲都唔怕開始食。
「做咩仲唔郁手呀？」Hayden奇怪咁問，不過立刻就明白Venus諗𡁵咩，於是笑住講：「一次半次唔怕嘅！如果你驚食得太多嘅，咪每樣都試完之後拎俾我都得㗎！」
見到Venus仲有啲猶豫，Hayden繼續講：「呢啲全部都係我好辛苦先拜託到Jesper預備俾我㗎！你唔食嘅話，咁我預備嘅心機就白廢哂㗎啦～至多你變大肥婆嘅，我咪陪你一齊變大肥佬囉！好無？」
「鬼同你一齊變大肥佬大肥婆呀！」Venus雖然咁講，不過手就拎起咗一件Macaron咬咗一啖，之後忍唔住講：「真係好好味呀！同香港商場賣嘅好唔同呀！」
見到Venus食得咁開心滋味嘅樣，Hayden就覺得有種滿足感，嘴角亦都不自覺咁向上彎。
「有咩咁好笑呀？咁真係好食嘛！嗱～俾你試下啦！」Venus伸手就將剩番嘅大半舊Macaron塞咗入Hayden個口度：「點呀？好唔好味呀？」
「嗯！」Hayden笑住咁望住Venus答。佢感覺到一股酥軟嘅甜味入口，不過佢分唔清呢種甜到底係Macaron本身嘅甜，定係因為Venus餵佢食而令塊Macaron比原來更甜。
同Hayden嘅目光對上嘅Venus，亦都甜甜一笑，繼續將各種嘅甜品送入自己同Hayden嘅口中，等兩個人都可以感受到呢份甜味。
甚至乎，就連周圍嘅空氣，都不自覺咁沾染咗兩人嘅呢份甜味。
------------------------------分隔線------------------------------
Hayden同Venus兩人一直沿香榭麗舍大道，行到凱旋門前，以雄偉壯觀嘅凱旋門為背景合影作為兩人嘅香榭大道之行嘅結束。
之後，Hayden帶住Venus嚟到嘅地方，正正係巴黎嘅代表性地標，艾菲爾鐵塔！
「你之前話想睇下巴黎嘅全景嘛？嚟呀～我帶你上去睇！」Hayden笑住講。
等住上去艾菲爾鐵塔睇景嘅人唔少，兩人都排咗好耐隊先輪到佢哋入去。
嚟到塔頂觀景台，Venus就俾一覽無遺嘅巴黎景色吸引，啱啱排隊帶嚟嘅疲倦瞬間唔見哂！
雖然時間已經唔早，不過夏季巴黎嘅天空依然微白，半明半暗嘅天色為巴黎嘅景色添上一種別有風味嘅浪漫。
Venus好興奮咁周圍行住去睇，同時一邊問Hayden邊度係咩地方。
Hayden靜靜咁企喺一邊，只係微笑住咁望住Venus，偶然開口解答Venus嘅問題。
「做咩嘢呀你？一直望住人嘅～我塊臉有啲咩嘢呀？」Venus見到Hayden淨係望住自己傻笑，以為自己塊臉污糟咗，就伸手想抹一抹。
Hayden伸手阻止，笑住講：「無～只係覺得，你真係好可愛咋嘛！」
「口花花⋯」Venus聽完，又係忍唔住一陣臉紅嬌啐：「係呢～我記得頭先Jesper同你傾計有提過我個名，點解佢會知嘅？你係咪成日係人面前講我壞話！？」
「冤枉呀！大人！」Hayden嘅語氣一啲求饒嘅意味都無，笑住講：「佢話你同我講嘅一樣，果然係個非常靚嘅女仔咋！」
「真係！？」Venus有啲唔係好信咁講：「你哋平時又會無啦啦提起我嘅？」
「因為呢樣嘛～」Hayden將一直戴住嘅戒指頸鍊喺衫下拎返出嚟，笑住咁講：「佢話我成日都對住條戒指鍊傻笑，就問我咩嚟～我就講咗我哋嘅嘢俾佢聽。」
聽住Hayden講嘅嘢，Venus腦入面浮現Hayden望住戒指傻笑嘅畫面，覺得好好笑，又覺得好甜蜜。
Venus咩都無講，只係同樣將一直戴喺身上嘅同一樣嘅戒指頸鍊拎出嚟，笑住咁同Hayden對望。
兩人都仲記得，兩年前各自為對方戴上呢條戒指頸鍊時嘅情景。
「等到我番嚟嘅嗰一日，我就會親手咁將佢，帶落你左手隻無名指度。」
「等你去完過去再返番嚟未來，等我哋可以互相幫大家將隻戒指戴落去大家隻無名指度。」
當年，艾菲爾建立呢座高塔，就係為咗係最接近天嘅地方，對已經去咗天堂嘅妻子說一聲我愛你。
如今，Hayden同Venus，身處呢個最接近天嘅地方，雖然無講出口，不過兩人只係用𡁵另一種方式向對方表達住「我愛你」嘅情感。
相信上天見識到兩人嘅真情，都一定會好好咁守護住佢哋嘅感情。
兩人離開艾菲爾鐵塔，嚟到附近嘅夏佑宮廣場。
喺夏佑宮廣場，可以輕易咁將艾菲爾鐵塔嘅全貌盡收眼內。
不知不覺間，夜幕已經將巴黎籠罩住，夜空中只見點點繁星閃爍。
忽然，一道金光喺漆黑嘅巴黎綻放，正正係入夜之後亮起燈嚟嘅艾菲爾鐵塔！
兩人望住金光燦爛嘅艾菲爾鐵塔，一時間睇到入咗神。
之後兩人發現廣場周圍嘅情侶紛紛互相擁吻起嚟，喺咁樣嘅氣氛影響之下，兩人亦都慢慢相擁、接吻。
夜暮巴黎嘅景色、閃亮璀璨嘅鐵塔、深情擁吻嘅二人，這一刻真係好似置身夢幻世界一樣。
「啪嚓！」一聲快門聲將兩人拉回現實世界，兩人只見附近企咗位拎住相機嘅人，睇外貌似係遊客。
「打搞到真係唔好意思！只係呢個畫面太靚，我忍唔住影低落嚟！如果兩位想要嘅，我可以send番幅相俾兩位～」嗰個人帶住歉意咁講。
兩人對視一眼，亦都覺得唔係好介意，於是Hayden喺留咗e-mail俾佢之後，就同Venus一齊離開。
不過，兩人唔知道嘅係，嗰個人其實係一位幾出名嘅旅行日誌作家，佢將兩人嘅相連自己嘅旅行誌一齊發佈之後，一時間令呢張相成為網絡上嘅熱門圖片。
當然，呢啲都係後話啦～
兩個人食完晚飯之後，就返番去成吉思屋企，各自沖涼梳洗。
「Hayden？」Venus敲一敲Hayden嘅房門，佢想搵Hayden拎一拎番今日影嘅相。
「我入嚟啦～」敲咗幾下之後，見好似無回應，於是Venus就試下直接開門入去。
「Hay⋯den？」Venus一入到房，就見到Hayden伏咗係枱度訓著咗。
「真係呀！喺度訓會冷⋯親㗎嘛！」Venus一邊行近一邊話，不過當佢行到書枱前，忍唔住越講越細聲。
只見喺Hayden伏住嘅枱面上，放住咗一本寫滿哂嘢嘅筆記簿，上面全部都係唔同菜式嘅步驟同埋需要注意嘅重點。
Venus望一望筆記，又望一望訓著咗嘅Hayden，先知道Hayden對個考驗其實好緊張，不過為咗要陪自己，寧願番嚟先捱夜溫書。
「你真係正傻瓜嚟㗎！」Venus一陣感動，又覺得有啲心痛，輕輕咁摸住Hayden嘅臉，的確發現佢比之前瘦咗唔少。
諗番一直以嚟，Venus覺得好似都係Hayden不停咁照顧自己、幫自己咁，反而自己俾Hayden嘅真係少之又少。
於是，Venus下定決心，今次自己一定要好好回報Hayden，幫Hayden向夢想邁進！
Venus先幫Hayden披上一條薄被以免佢冷親，又輕輕咁喺佢額頭度錫咗一啖，望住佢依然平靜嘅睡臉笑住講：「加油呀！」
之後，Venus慢慢咁離開間房，返番自己房休息訓覺。
