《瑜亮之戀～初之聖誕與離別之日》
12月頭 尖沙咀
Venus同Hayden喺度行街拍拖，順便搵𡁵參加聖誕party嘅禮物。
不過行行下，Hayden發現Venus有啲神不守舍咁。
「Venus？Venus？⋯」Hayden見嗌咗幾聲無反應，又拍一拍Venus膊頭。
「嗯～做咩呀？」Venus明顯嚇咗一跳，停低擰轉頭問Hayden。
「我問你做咩就真呀，個人呆呆滯滯咁嘅？」Hayden反問：「唔舒服？」
「無呀⋯」Venus一路講，個頭就一路跟住越耷越低：「只係覺得時間過得好快啫，話咁快就12月啦⋯」
「做咩呀？」Hayden望住耷低頭係度不停扭手指嘅Venus，溫柔咁輕輕攬住Venus：「我去法國又唔係唔再返嚟，而且我應承過你㗎嘛，我會每日都打電話俾你㗎！」
「我知呀，只係諗到之後無得再隨時搵你，無你係身邊，覺得有少少寂寞咁啫⋯」Venus輕輕咁攬番住Hayden，想借攬住Hayden所帶嚟嘅溫暖趕走心入面嘅不安。
兩人就咁互相攬住一陣，兩個都無再講啲咩。
「不如，我哋聖誕節嗰日出去拍拖，好無呀？」Hayden忽然話。
「但係，嗰日我哋應承咗同媽咪佢哋一齊開聖誕party㗎喎。係咪唔係咁好呀？」Venus鬆開手，望住Hayden有啲擔心咁問。
「唔緊要嘅～嗱，我哋晏晝呢就同佢哋一齊開party，之後夜晚出去二人世界咪得～而且⋯」Hayden停一停，望一望Venus之後，繼續溫柔咁講：「今次係我哋兩個一齊之後嘅第一個聖誕節啊！我想同你兩個人一齊過！」
見到Venus聽到之後，雖然一臉嘅開心同感動，不過都仲係有啲擔心猶豫，Hayden就繼續安慰佢：「放心啦！等我去同Auntie Nat同Uncle佢地講，宜家Auntie Nat咁好人，一定會明白嘅！」
講完之後，Hayden就拖起Venus隻手，邊行邊話：「宜家呢，我哋就要先去決定好買咩禮物去聖誕party先，之後再去食嘢，好無？」
「嗯！」Venus開心咁答，同時用力咁拖實Hayden隻手。
------------------------------分隔線------------------------------
聖誕節當天 Eliz屋企
「聖誕快樂！」「Merry Christmas！」⋯⋯
嚴家、文家兩家人，加埋Meg同Hugo，大家一齊放住手上嘅小彩炮，慶祝住呢個全城歡樂嘅節日。
枱面上早已放滿了一盤盤嘅美食，有意粉、有沙律、有雞翼等十幾款食物，中間仲放咗一個非常靚嘅彩虹蛋糕。
「嘩！好多嘢食呀！」Echo望住成枱嘅食物，雙眼即刻好似發哂光咁。
「全部都係舅父仔你一個人整㗎？好犀利呀！」Issac擰轉頭望住Hayden講。
「我哋都有份幫手㗎，小朋友～」Meg同Hugo即刻彈出嚟邀功認叻。
「Meg姐姐、Hugo哥哥，你哋都好犀利呀！」
「望落賣相係真係幾唔錯咁喎！」Natalie同嚴夏行咗過嚟，望一望枱面嘅美食，都舉起手指公讚一讚Hayden：「睇嚟呢段日子你真係下咗唔少苦功～」
「係呀，佢真係好俾心機㗎，呢排呢日日都係度研究啲食譜同練整嘢食，睇得出佢今次真係好有決心嘅！」Claire笑住咁行過嚟話：「不話呢，就成日試整埋啲新嘢就叫我同Issac試，當正我哋白老鼠咁囉～」
「咁我整出嚟嘅都唔係咁差啫，明明你同Issac都食得好開心㗎～」Hayden立即反駁。
大家聽住兩姊弟喺度鬥嘴，都忍唔住笑起上嚟。
「好啦好啦～大家都唔好淨係掛住講啦，食嘢啦～食嘢啦～」笑咗一陣，魯大媽同Eliz一齊咁講。
「Yeah！食嘢嚕！」一講到食，Echo就最興奮。
「嚴茜聰，至為食係你啦～食還食，唔好食得咁急呀～」Venus望住細妹都唔知好嬲又好笑。
「嚟，Issac，試下呢個呀。」Clarie將一隻放滿嘢食嘅碟拎俾Issac。
「唔該媽咪～」Issac拎好隻碟之後，又叉起一粒肉丸餵向Clarie：「媽咪，你都試下呀～」
「好呀！」Clarie望著孝順乖巧嘅兒子，開心咁食咗粒肉丸。
「喂呀，隻塊蛋糕係我睇中先㗎，俾番我呀！」Meg追住Hugo，要佢將件蛋糕交番出嚟。
「呢啲嘢梗係先到先得㗎啦！嗯呀～真係好好味呀！」Hugo無視Meg，一啖就咬咗落蛋糕度。
「喂呀！！！」Meg暴走了。
所有人就係咁一邊開心咁食住唔同嘅美食，一邊繼續傾下玩下，笑聲不斷。
喺客廳嘅一角，Venus同Hayden坐埋一齊食緊件彩虹蛋糕。
「點呀？呢次個蛋糕真係我自己一個一手一腳整出嚟，好唔好味呀？」Hayden一臉期待咁望住Venus，等緊佢個答案。
Venus望住Hayden認真期待嘅眼神，忽然好想整估一下佢，就扮哂嘢咁講：「係唔錯嘅，不過呢～我都係覺得上次嗰個好味好多喎，我就鐘意嗰個多啲喇⋯」仲要一邊講一邊偷望Hayden啲反應。
「哦，乜係咁呀⋯」Hayden聽完之後，失落嘅心情完全寫哂上面。
呢個時候，Venus即刻起身，行去Hayden後面攬住佢，好開心咁笑住講：「講笑咋，個蛋糕好好味呀！我好鐘意呀！」
「呀！你整估我！」Hayden一聽就知道自己被佢呃咗，即刻起身反擊吱Venus：「整估我呀嗱！睇住嚟啦！」
「呀！唔好呀，救命呀！」Venus即刻被吱得笑唔停。
Hayden係咁吱Venus，兩個人旁若無人咁打鬧起嚟。
就係旁邊無幾遠嘅Echo望住呢一幕，忽然唔知係邊度變咗副黑超出嚟戴起嚟講：「太閃啦～」之後起身繼續去拎嘢食。
食咗一陣，大家就開始抽禮物嘅環節。當中Hayden抽到Hugo「精心準備」嘅禮物之後，兩個人又係一陣追打跑鬧，搞到大家又一次笑到停唔到。
「嗯，媽咪呀，我想呢⋯ 」Venus行埋去Natalie面前，有啲唔敢開口。
「得㗎啦，明㗎啦，你同Hayden佢哋出去玩啦！」媽咪點會唔知寶貝女諗緊咩，好溫柔咁笑住講。
「多謝媽咪！」Venus開心得即刻攬住Natalie，又擰轉頭開心咁望住Hayden。
「多謝Auntie！」Hayden都上前多謝Natalie。
「嗯～」Natalie都笑一笑回應。
「咁我哋走先啦～Byebye媽咪爹哋、Byebye Grandma、Byebye嫲嫲、Byebye Auntie Clarie～」Venus繞住Hayden隻手同各人講拜拜。
「Byebye Uncle Auntie～Byebye各位」Hayden都講拜拜。
「唉～乜你哋走啦？」Eliz驚訝咁講。
「哎呀，阿媽，宜家後生仔有後生仔嘅世界，你由佢哋啦。」Natalie開聲。
「係囉，親家，今日咩日子，你就唔好做電燈膽阻住佢哋啦！」魯大媽都幫口。
Venus同Hayden兩個人望住咁多位，之後笑得好開心咁離開，準備過兩個人第一次嘅二人聖誕節。
「呀，咁多位Auntie Uncle，我都走先啦～Byebye～」Hugo忽然起身話。
「我都係呀，Byebye咁多位，好多謝今日請我嚟呢個Party呀！」Meg都話走了。
之後兩人急急腳咁走，啱啱好追到離開樓下大門口嘅Hayden同Venus。
「嗯？你兩個做咩呀？想做電燈膽呀？」Hayden望住兩個人追上嚟喘哂氣咁，懷疑咁問。
「我先無咁得閒呀！只係唔記得咗俾嘢你咋！」Meg一副無你好氣嘅樣，係袋拎咗樣嘢俾Hayden：「嗱，拎去啦，今日咁嘅日子，周圍都勁多人，有佢會方便啲㗎！」
Meg拎俾Hayden嘅係佢媽咪架車嘅車匙。
「唔該。」Hayden接過車匙，感激咁多謝Meg。
「我都係為咗Venus咋，話哂Venus都係我最好最好最好嘅姊妹嚟！」Meg一邊講一邊攬住Venus：「你唔好搞到佢唔開心呀！唔係我實唔放過你！」
「多謝你呀Meg～」Venus好開心咁攬住Meg講。
「我都有嘢俾你呀Hayden～」Hugo一邊講，一邊快速塞咗樣嘢入Hayden隻手：「唔駛多謝我啦！」
「你！⋯」Hayden立刻就知道Hugo塞咗咩俾佢，即刻收入褲袋，雙眼睥實Hugo極惡咁講。
「咩嚟㗎？」Venus好奇咁問。
「無⋯無嘢呀，無聊嘢嚟之嘛～」Hayden口窒窒咁解釋。
「哦！我知啦！⋯」Meg大嗌，正想講個陣，就被Hayden夾硬推走咗。
「好啦好啦，總之唔該哂你哋兩個，快啲走，唔好阻住我哋啦！」Hayden只想快啲送走呢兩個人。
「唔駛你講我都會啦，我一早就約咗仔仔今晚出街啦～」Meg一路行一路揮手再見。
「我都約咗班兄弟去飲嘢～」Hugo向另一個方向離開。
「Byebye，玩得開心啲啦！」兩個人最後異口同聲咁講。
「佢兩個真係呀！」Hayden覺得個頭有少少痛。
「唔係呀，有兩個咁為我哋嘅朋友幾好呀～」Venus笑住咁同Hayden講。
「嚟啦，我哋行囉！」Hayden伸出手同Venus講。
「嗯！」Venus開心咁拖住Hayden隻手，兩個人慢慢咁行去拎車。
------------------------------分隔線------------------------------
晚上 聖誕樹廣場
「嘩！好靚啊棵聖誕樹！」Venus望住棵掛滿閃亮燈飾嘅大型聖誕樹，開心得好似個細路女咁。
「你睇下，仲有聖誕老人添呀！我哋過去影相囉！」Hayden指一指遠處依然醒目嘅紅色大帽。
「好呀！」Venus開心咁拖住Hayden過去。
兩個人影到停唔到手，同聖誕樹影、同聖誕老人影、同聖誕老人屋企影⋯⋯有自拍、有叫途人幫手影，大部份都係兩個人開心嘅合照。
兩個人將寫上二人名字嘅心型小鎖扣上聖誕樹下嘅欄杆上，望著呢個象徵二人嘅感情嘅鎖緊緊咁扣住係欄杆上面，兩個人互相對望咗一眼，忍唔住甜笑起嚟。
「先生，要唔要買支花俾你女朋友呀？只要$50咋！」突然一個拎住花籃嘅女仔行埋嚟Hayden同Venus身邊問。
「好呀，俾一支我呀～」
「喂！⋯」Venus啱啱想阻止，Hayden已經拎咗$50俾咗個女仔，喺女仔手上拎過嗰支包得好靚嘅玫瑰。
「嗱～送俾你！」Hayden雙手將支玫瑰遞俾Venus。
「做咩駛埋呢啲錢喎，一支要成$50咁貴～」Venus接過支花，雖然覺得好開心，不過都忍唔住話兩句。
「你仲記唔記得我第一次約你出嚟嘅事呀？」Hayden忽然講。
「梗係記得啦～嗰陣你呃我出嚟，點知原來係幫你同阿純去賣花。」Venus藐一藐嘴，又諗番起起嗰陣嘅事。
「嗰陣我拎支花俾你，跟住話唔係送嘅，有人個失望樣我宜家都仲記得㗎！」Hayden望住Venus，依然係溫柔咁笑住講：「今日就補番數啦！」
Venus聽完之後，一臉冧爆嘅樣，輕輕咁挨咗落Hayden心口：「多謝～」
Hayden都輕輕咁攬住Venus，一陣之後笑笑口咁繼續講：「不過呢，我仲記得，嗰陣有人我讚佢靚女，即刻開心到不得了，拎住個花籃不知賣得幾落力！」
「喂呀！」Venus聽到之後，即刻紅哂塊臉，係Hayden個心口度扮嬲咁係咁細細力拍咗幾下。
「哈哈哈⋯⋯」Hayden望住Venus怕醜個樣，忍唔住開心咁笑，同時亦攬得更加實。
晚上 冰雪森林市集
「嘩～好靚啊！」Venus望著眼前雪白一片嘅景色，仲有點點飄落嘅「白雪」，忍唔住發出一次次嘅驚歎。
「你咪話好想感受下白色聖誕嘅感覺嘅？點呀，感覺開唔開心？」Hayden望著被眼前嘅「雪景」吸引住嘅Venus：「總有一日，我會帶你去睇真正嘅雪景，過真正嘅白色聖誕！」
「嗯！」Venus擰轉頭，望住Hayden溫柔嘅笑臉，快速咁錫咗佢一啖，之後就覺到自己臉上好似發燒咁講：「呢個⋯呢個就當係多謝你嘅禮物，我真係好開心呀！」
Hayden呆咗一呆，望住Venus臉都紅哂，又開心咁拖起Venus隻手：「嗰邊有啲攤檔，我哋過去睇下囉～」
「嗯～好呀！」Venus開心咁回應，感覺自己今日好似無一刻唔係笑緊。
「你睇下，呢個雪人好似你呀，傻下傻下咁。」Hayden指住其中一個檔攤上面一隻笑得好開心嘅雪人公仔講。
「乜呀，我話呢隻鹿先最似你，成個樣都鈍下鈍下咁。」Venus指住另一隻鹿公仔反擊。
「哎吔～你話我鈍！？」兩個人就係咁，一邊行住睇各種攤檔賣嘅嘢，一邊細聲講大聲笑，同時又影咗一大堆相。
「點呀，肚唔肚餓呀？」行咗一陣，Hayden出聲問Venus。
「少少啦～」Venus摸一摸肚，得確差唔多係食晚餐嘅時間。
「咁我哋走啦！」Hayden拖住Venus去拎車。
「我哋去邊度食呀？」Venus問。
「去到你咪知囉！」Hayden神神秘秘咁講。
Hayden載住Venus，一路揸車返到佢嘅屋企。
「嗯？做咩返咗嚟你屋企嘅？」Venus隱隱約約已經估到，不過都忍唔住開口問。
「上去你咪知囉～」Hayden繼續保持神秘感。
上到去文家，一打開門，Hayden只係開咗少少燈光，足夠Venus望到一張已經鋪好白色枱布嘅長枱，同埋枱上面一支好靚嘅白色蠟燭台。
Hayden拖住Venus行埋去，叫Venus坐好，點好蠟燭之後就講：「恭喜嚴茜瑜小姐，你有幸成為未來世界知名嘅大廚文亮熙為你炮製聖誕大餐嘅第一位客人！請你稍等一下，我宜家就入去準備一下。」
Hayden行入去廚房準備，入去之前仲打開咗音樂嚟播，為呢刻嘅環境再增添一絲浪漫。
過咗一陣之後，Hayden就係廚房拎出一盤盤嘅美食，係枱面上慢慢咁擺好，由餐湯、頭盤、主菜到甜品都一應俱全，賣相絕對唔差得過嗰啲四五星級嘅高級餐廳。
之後Hayden又拎咗兩隻高腳杯同一支紅酒出嚟，喺自己同Venus面前一人一個放好並斟好紅酒。
一齊都準備好之後，Hayden先喺Venus對面坐好，一臉笑住咁望住Venus問：「請問嚴小姐滿唔滿意今晚呢個安排呢？」
「滿意，好滿意！」Venus已經連眼都好似係度笑咁。
「咁就好啦～嚟呀，試下啲嘢食好唔好味？」Hayden已經等唔切咁想Venus試下佢努力練成嘅手勢。
Venus試咗一啖湯之後，驚訝咁講：「嗯，真係好好味呀！真係好似去咗高級餐廳食嘢咁⋯唔係，係好味過啲高級餐廳！」
Hayden望住Venus食得咁開心滋味嘅樣，總算覺得呢大半個月嘅辛苦同努力係無白費到。
「Cheers～」
兩個人一邊食一邊傾，Venus望住滿枱嘅美食，又望到Hayden額頭嘅點點細汗，心入面嘅感動即刻湧上嚟。
Venus知道，呢一年嘅聖誕節，絕對係佢今生最難忘嘅一個聖誕節。
只不過，Venus唔知道嘅係，Hayden準備俾佢嘅驚喜其實仲未完。
就係兩個人都食得差唔多嘅時候，Hayden就將啲碗碗碟碟收番入廚房，之後同Venus講叫佢等一等，就行咗入房唔知整咩。
Venus見佢神神秘秘咁，唔知佢想做咩，就乖乖坐咗係度，邊聽住音樂邊等Hayden。
過咗一陣，本來播𡁵嘅音樂停低咗，取而代之響起嘅係另一首音樂，同埋結他聲仲有熟悉嘅歌聲。
Venus擰轉頭，見到Hayden正抱住結他係度自彈自唱，而唱嘅係佢曾經提過好鐘意嘅一首歌，話如果有人可以自彈自唱俾佢聽實會好感動。
「由我共你下輩子一起過每天
即使說愛肉麻極了 亦每朝親你一張臉
誰怕悶透 就算這生不再冒險 不需脫險
齊日間奮鬥每晚同眠
凡事可變得這份愛永不變
由我共你下輩子一起過每天
即使說愛肉麻極了 亦每朝親你一張臉
誰怕悶透 就算這生不再冒險 不需脫險
如為今世作結案陳詞
能獲得你足以是我那冠冕」
唱到Venus最鐘意嘅個段副歌，Hayden放低咗結他，慢慢邊唱邊行去Venus身邊。
見到Hayden精心準備俾佢嘅最大驚喜，Venus真係覺得感動到不得了，甚至都可以見到有啲眼淚係眼入面碌下碌下，隨時都可以流落嚟。
曲終，Hayden行到Venus身邊，喺身後面拎咗一條頸鍊出嚟，鍊上面掛住咗一隻款式雖然簡單但閃閃發光嘅銀戒指，戒指上面刻住嘅係二人嘅姓名。
Hayden兜去Venus身後面，為佢一邊掛起呢條頸鍊，一邊講：「呢隻戒指，係嚟𡁵嘅四年入面，就會代替我，陪住係你身邊。等到我番嚟嘅嗰一日，我就會親手咁將佢，帶落你左手隻無名指度。」
Hayden幫Venus戴好咗條頸鍊，Hayden又擰番轉Venus望住佢。
此時嘅Venus已經喊得一塌糊塗，笑咗成日嘅佢，喺今日最後嘅最後，流下了眼淚。
不過，呢啲眼淚，大概比起世界上嘅任何一種甜品，都要嚟得甜。
Hayden望住喊到收唔到聲嘅Venus，輕輕咁攬住佢，笑住咁講：「傻女嚟嘅，喊到咁樣樣嘅～」
「你好衰㗎，整喊人嘅！人哋諗住今日絕對要笑住咁過全日㗎嘛，等我可以將自己最開心最靚嘅樣留喺你心入面㗎嘛！」Venus輕輕力咁拍住Hayden心口表示不滿。
「唔係呀，宜家嘅你喺我心入面，係最靚嘅！無論係笑𡁵嘅你，定係喊𡁵嘅你，都無人可以比得上你。」Hayden雖然笑住咁講，但眼神非常認真。
Venus聽住Hayden認真嘅眼神，終於忍唔住笑咗出嚟：「嗯，知道啦～傻瓜。」
「真係呀，又喊又笑～」Hayden刮一刮Venus個鼻，笑住講。
喊完一輪又笑完一輪之後，Hayden開始清理枱面，將嗰支只係飲咗少少嘅紅酒收番埋，跟住就開始洗碗。（呢個情況下飲醉酒嘅後果兩個人都好清楚，所以都只係為咗氣氛少少哋咁飲咗幾啖。）
「駛唔駛我幫手呀？」Venus行入嚟廚房問Hayden。
「唔駛啦～我好快搞掂㗎啦，之後我就送你番Auntie Nat度啦。」Hayden擰轉頭笑住咁答。
「真係對唔住呀，你為我準備咗咁多，我就一樣禮物都無預備到俾你。」Venus有啲歉疚咁講。
「唔駛對唔住喎～對我嚟講，你喺我身邊，就已經係最大嘅禮物啦！」Hayden真心咁答，完全唔覺得有任何嘅失落。
「傻瓜～」Venus聽到又笑起嚟：「咦？咩嚟㗎？」
Venus見到地下有個方型包裝嘅嘢，中間突起咗入面圈形嘢。
「唔好！⋯」Hayden睄咗一眼，即刻認得出就係Hugo塞俾佢嘅嗰樣嘢，諗住出聲制止Venus，但係已經嚟唔切⋯⋯
「咩嚟㗎？」Venus執起咗樣嘢，望咗幾眼，之後就意識到呢樣嘢嘅本質，塊臉立即忍唔住紅哂上嚟。
一時之間，廚房嘅氣氛沉靜得帶啲尷尬。
過咗一陣，Hayden先醒起要開口解釋：「唔⋯唔係你諗嘅咁㗎！係Hugo夾硬塞俾我㗎咋，我真係無諗過㗎！我⋯⋯」
「我⋯我今晚可唔可以留低？」Venus忽然開口講，打斷咗Hayden嘅解釋。
「吓！？」Hayden以為自己聽錯咗。
「我話，我今晚可唔可以留低喺度？」Venus深呼吸咗一下，再次清清楚楚咁重覆一次頭先句嘢。
「你唔想呀？」Venus望住沒有回應嘅Hayden，忽然一陣羞恥感湧上心頭，轉身就想離開。
「Venus！」Hayden見到Venus轉身想走，即刻沖走咗手上嘅洗潔精泡，快速咁捉緊住Venus隻手。
「放開我呀～」Venus掙扎，想揈甩Hayden隻手。
「我唔放呀！」Hayden無放手不特止，仲用力扯咗Venus埋嚟攬住佢：「你聽咗我講先啦！」
Venus聽到呢句之後，慢慢咁冷靜番落嚟，靜靜咁伏喺Hayden心口。
「老實講，我唔只一次有諗過嗰啲事，而且我哋之後仲要分開咁遠。所以頭先聽到你咁講，我真係有諗過不如就咁將你留低⋯⋯」Hayden停一停，拉開咗Venus，認真咁望住Venus對眼講：「但係最終我自己同自己講唔可以咁樣㗎！」
Venus望住非常認真嘅Hayden，等佢繼續講落去。
「因為你係我非常非常重要、非常珍惜嘅女仔，我想要好好咁保護住你，一生一世！」Hayden繼續講：「但係宜家嘅我仲未有呢種能力，所以喺我成為一個可以真正保護你嘅男人之前，我唔想咁輕率咁去做呢樣嘢。」
「對唔住，係我亂咁諗嘢，都無好考慮到你。」Venus聽到Hayden嘅真心表白，感動得再一次攬住佢。
「不過，我今晚都係想留喺度，因為你仲有幾日就走啦～我想盡量同你係埋一齊，得唔得呀？」Venus抬起頭問。
「嗯，唔係唔得⋯不過一定要打電話話咗俾Auntie Nat知先，等Auntie Nat批准咗先得。」Hayden作出讓步，始終佢都想Venus陪住佢耐啲。
「媽咪會俾咩？」Venus有啲失落，覺得無咩可能。
「等我試下同Auntie Nat講啦。」Hayden都話唔定Auntie Nat聽到之後會有咩反應。
「喂～Auntie Nat？」聽得出Hayden都有少少緊張咁。
「喂～Hayden？」Natalie有啲疑惑，唔知Hayden無啦啦打俾佢做咩，兩個唔係應該好開心咁拍𡁵拖嘅咩。
「er⋯係咁嘅，Venus今晚想喺我呢度過一晚夜，唔知得唔得呢？」Hayden 好小心咁講，雖然Auntie Nat已經開明咗好多，但係咁大件事真係唔知佢會點諗。
等咗幾秒，見Auntie Nat無回應，Hayden又即刻解釋：「Auntie Nat，你放心，我哋唔係想做啲咩嘢，只係⋯只係我就嚟要走，所以我哋都想可以喺一耐啲咋，我哋真係唔會做啲乜嘢㗎！⋯」
「Hayden呀⋯」Natalie終於開口，打斷咗Hayden嘅說話。
「係！」Hayden被佢突然開口嚇一嚇。
「我知道啦，咁你今晚幫我好好睇住Venus啦～」Natalie平靜咁講。
「即係，Auntie Nat你應承俾Venus留低？」Hayden唔係好確定咁再問一次。
「Hayden，你同Venus兩個都大個啦，我相信你哋識得諗㗎啦，知道咩嘢係分寸嘅，識得分咩應該做，咩唔應該做。」Natalie笑住咁講。
「多謝Auntie Nat！」Hayden大聲多謝。
「媽咪應承咗！？」「嗯！」一齊喺旁邊嘅Venus擘大雙眼，有啲唔敢相信，直到見到Hayden好肯定咁講先信。
Venus拎過電話，同電話另一邊嘅Natalie：「多謝你呀！媽咪！」
「得啦，你大個女啦，媽咪話過唔會再管你咁多，而且呢段時間，你同Hayden都俾我哋見到你哋嘅成長。咁我做媽咪嘅，都應該要俾啲信心你哋嘅～」Natalie笑住講：「好啦，嗯，Byebye～」
Natalie收線之後，忽然發現嚴夏就坐咗係隔離，有啲嚇親咁講：「嘩！做咩呀你？偷聽我講電話？」
嚴夏就好似要掃描一下眼前呢個人係咪佢識嘅查向善，疑惑咁講：「咁順攤就應承個女？」
「個女都十八歲啦～呢啲嘢都唔係話禁就禁到㗎啦。」Natalie笑住講：「做咩呀？有人唔捨得個女要跟第二個男人走啦？」
「痴線！Hayden係好男仔嚟，我睇好佢㗎，Venus同佢一齊無問題嘅⋯⋯」嚴夏顯得有啲慌亂，睇嚟係俾老婆講中咗心事。
呢個時候，Clarie亦都帶埋Issac番到屋企，見到Venus都係度都有啲驚訝。
「Venus？咁夜你都仲喺度嘅？」Clarie問。
「我⋯我今晚喺度訓一晚呀。」Venus有啲怕醜咁講。
「過一晚，你媽咪知唔知㗎？」Clarie有啲驚訝。
「嗯，啱啱打咗俾媽咪啦～媽咪都應承咗啦！」Venus開心咁講。
「家姐，Venus今晚喺度訓，你可唔可以借啲衫俾佢呀？」Hayden問。
「梗係無問題。」Clarie答。
就喺Venus去咗沖涼個陣，Clarie拉咗Hayden埋嚟傾計。
「喂！Venus係好女仔嚟㗎！你唔好亂嚟呀！」Clarie警告Hayden。
「哎呀～家姐，你當你細佬我係咩人呀，我大個㗎啦，識分輕重㗎！」Hayden無好氣咁答。
「嗯，你識諗就得啦～」Clarie滿意咁講，之後擰轉身同Issac講：「嚟，Issac，今晚同媽咪一齊訓好唔好？」
「好呀！」Issac開心咁回應：「係咪要俾我張床Venus姐姐訓呀？」
「係呀～好啦，Issac快啲去訓啦。」Hayden唔知點解釋好，索性唔解釋直接催Issac同家姐去訓。
「嗯？Auntie Clarie同Issac佢哋訓咗嗱？」Venus喺浴室行出嚟，一邊抹乾頭髮一邊問。
「係呀，到我去沖涼啦。」Hayden看著啱啱沖完涼，散發住一陣清香嘅Venus，忍唔住臉紅起嚟，為咗唔俾Venus發現，急急腳拎起啲衫就沖入去浴室。
Venus就去咗Hayden間房度邊等頭髮乾邊等Hayden，不知不覺間就訓著咗。
「Venus？」Hayden沖完涼出嚟，一入房就見到攤咗係床度訓著咗嘅Venus。
「真係呀～」Hayden幫Venus調整番好訓覺嘅姿勢，之後自己都跳上床輕輕咁攬住Venus，望住Venus熟睡嘅睡臉，輕輕咁佢額頭同唇上錫咗一啖講：「早抖啦～」
或者係感受到Hayden體溫帶嚟嘅溫暖，熟睡嘅Venus亦都伸手輕輕咁攬住Hayden。
就係咁，兩個人就咁互相攬住直到訓到第二日。
------------------------------分隔線------------------------------
12月尾 機場
今日係Hayden出發前往巴黎嘅日子。
「Hayden，過到去之後自己小心啦，有咩記得打電話番嚟。」Clarie擔心咁講，一直相處咗十幾年嘅細佬終於要離開自己去咁遠嘅地方，心中嘅唔捨得可想而知。
「知道啦，我去到邊仲有成吉思睇住我㗎嘛，放心啦～」Hayden安慰佢。
「舅父仔，你要俾心機呀！你番嚟會煮好多好味嘅嘢食俾我食㗎可？」Issac上前幫Hayden加油。
「我都係呀！Hayden哥哥，我唔介意幫你啲新菜式試味㗎！」Echo係旁邊附和。
「嚴茜聰！你呢個為食鬼呀！」Natalie出聲教訓Echo，跟住轉頭同Hayden講：「Hayden，加油啦！你喺叻仔嘅，Auntie Nat相信你一定得嘅！」
「多謝你，Auntie Nat。放心，我一定會努力㗎！」Hayden笑住咁答，又摸一摸Issac同Echo個頭笑住講：「放心啦，我番嚟一定會煮好多好好味嘅嘢食俾你呢兩個小為食鬼嘅！」
嚴夏只係上前拍一拍Hayden嘅膊頭，咩都無講。Hayden就只係用拳頭打一打自己心口，表示自己收到佢嘅鼓勵。這就是兩個都有想要守護嘅嘢嘅男人之間嘅默契。
「好啦好啦～屬於我哋嘅送行時間已經結束啦！我哋過去嗰邊啦！」Natalie望一望企喺後面嘅女兒，好識做咁拖走哂所有人，留低番一啲二人時間俾呢對小情侶。
二人望住大家明顯嘅行為，都感到一陣窩心嘅感動。
「大家都好體貼我哋呢！」Venus上前，笑住同Hayden講。
「係～」Hayden都笑笑咁答。
兩人一時之間好似搵唔到可以講啲咩好，就咁對望咗一陣。
過咗一陣，Hayden放低手上嘅行李，輕輕咁將Venus攬住。
或者，有時千言萬語，都及唔上一個擁抱可以傳達嘅更多。
攬住一陣之後，兩人慢慢咁分開。
「從今以後，你就係我嘅未來啦」Hayden忽然講。
「嗯？」Venus唔係好聽得明。
「因為香港比巴黎快七個鐘嘛，所以你咪生活係我嘅未來度囉！」Hayden笑住咁解釋：「放心，我會好快追番嚟未來捉住你唔放。」
「傻瓜～」Venus笑住講：「好肉麻呀你！」
之後，Venus喺裙袋入面拎出一條頸鍊，頸鍊上面都係掛住一隻戒指，就同Hayden聖誕節送俾佢嘅戒指頸鍊一模一樣，戒指上面同樣刻著「Venus & Hayden」幾隻字。
「真係呀，戒指係一對㗎嘛，你淨係買一隻送俾我點得㗎。」Venus雖然係度話𡁵Hayden，但話中透著嘅都係笑意同情意：「我搵咗好耐先搵到呢隻一模一樣嘅戒指同鍊㗎。」
Venus一邊講一邊兜去Hayden背後，就好似聖誕節嗰日Hayden幫佢戴上條鍊咁，掛上Hayden身上。
掛完之後，Venus行番去Hayden前面，將自己一隻戴住嘅戒指頸鍊拎出嚟，笑住咁講：「好啦，我哋宜家一人一隻啦，就等你去完過去再返番嚟未來，等我哋可以互相幫大家將隻戒指戴落去大家隻無名指度。」
「嗯！」Hayden摸一摸心口前嘅戒指頸鍊，之後再一次攬住Venus，好溫柔咁捧住Venus嘅臉錫落去佢嘴上。Venus回應住Hayden嘅吻，雙手亦輕輕咁攬住Hayden寬闊嘅背脊。
雖然兩個人都好希望時間可以停留喺呢一刻，但離別嘅時間始終會嚟到。
Venus目送著Hayden入閘，Hayden亦都一直回頭望住Venus，直到被閘口嘅牆壁阻隔，再見唔到對方為止。
之後，Venus跑去一個可以望到飛機起飛嘅位置，望著嗰架載住佢最深愛嘅男仔嘅飛機起飛。心口前嘅戒指喺陽光嘅照耀下閃閃發亮，讓遠在飛機上嘅Hayden發現呢個一直注視住佢嘅女仔。
兩個人就咁遙遙對望住，直到飛機沒入萬里雲海之中。
～完～
