「咦？」Hayden醒嚟嗰陣，發現披喺自己身上嘅薄被，知道一定係Venus入過嚟驚佢冷靜幫佢披上，心裡面係一陣溫暖。
Hayden摸一摸身上披住嘅薄被，再望一望筆記裡面寫滿注意同改善嘅重點，覺得自己已經充滿信心！
第二朝，當Hayden再一次起身，喺房行出嚟準備食早餐嘅時候，見到早就已經起身坐咗喺度嘅Venus同成吉思。
「早晨呀！Hayden！」Venus笑得好開心，睇嚟心情非常靚。
「早晨。」Hayden笑一笑，又轉頭同成吉思講：「早晨，成吉思。」
「早晨。」成吉思都笑住回應，而且明顯是一種帶著深意嘅笑。
「做咩嘢呀你兩個？一大朝早喺度傻笑嘅？」Hayden望住笑得有啲莫名其妙嘅兩個人，有啲搞唔清楚發生咗咩事：「咦，今日嘅早餐？」
只見係枱面上放住唔少嘢，火腿煙肉、炒蛋多士、通粉麥皮，仲有牛奶咖啡，正係香港最常見嘅早餐配搭。
Hayden望住枱面仲冒住熱氣、熱辣辣嘅食物，一邊坐低一邊講：「嘩～我都好似好耐無食過啦～成吉思，做咩突然心血來潮整呢啲嘅？」講到最後Hayden轉頭問成吉思。
不過成吉思只係搖一搖頭，笑住咁指一指Venus。
「係Venus你整嘅？」Hayden有啲驚訝。
「咁～有人～琴日帶我遊咗成日巴黎，又準備咗好多驚喜送俾我，咪諗住煮番餐早餐嚟多謝下嗰個人囉～」Venus笑住講：「不過我整嘢食無你同成吉思咁犀利吖嘛～淨係識整呢啲比較簡單嘢咋～你唔準笑人㗎！」
「唔會！點會呀！」Hayden心入面一陣感動，一邊講一邊將一塊炒蛋放入口：「嗯～好味！」
Venus望住食得開心嘅Hayden，都覺得好開心。
「係呢～Venus，今日有無邊度想去呀？」Hayden一邊食住早餐，一邊問：「「不如過去蒙馬特嗰邊睇下？」
「嗯～～～」Venus托住頭諗咗一陣之後講：「不如～我哋今日留喺屋企？」
「嗯！？點解呀？」Hayden驚訝咁講：「我哋琴日只係行咗好少地方咋喎！仲有好多好靚嘅地方我都未帶你去睇！」
「Hayden，我知你好緊張嚟𡁵嘅考驗，我亦都知你為咗令我開心，寧願陪我周圍玩完之後先捱夜溫書！但係我唔想你為咗我咁辛苦！我想成為支持你嘅人，唔係想做個連累你辛苦嘅女朋友！」Venus好認真咁望住Hayden講：「去玩幾時都得，但係你呢個機會錯過咗就唔知仲有無下一次㗎啦！」
Venus停一停，伸手摸住Hayden塊臉笑住講：「況且，對我嚟講，可以喺你嘅身邊，就已經係最開心嘅事，去邊度做啲咩其實都無所謂㗎～」
Hayden呢一刻望住Venus認真嘅雙眼，忽然有少少感動到想喊，可以有一個咁體貼自己嘅女朋友，真係唔知道到底佢積咗幾多世嘅福氣先換番嚟。
Hayden輕輕咁捉住Venus摸住自己塊臉嘅雙手，慢慢咁合上雙眼用額頭抵住Venus嘅額頭，用非常溫柔嘅語調慢慢咁講：「多謝你！」
Venus亦都合埋眼，笑住咁感受住兩人嘅額頭貼埋一齊所傳嚟嘅對方嘅溫度。
至於喺旁邊嘅成吉思，唔知幾時已經擰轉咗身繼續自己食早餐，甚至臉上已經多咗副黑超嚟保護自己雙眼免受閃光傷害。
跟住落嚟嘅幾日，Venus都陪住Hayden準備考驗，望住Hayden練習、幫手試味、一齊諗可以改善嘅地方，雖然有啲辛苦，但兩個人都好開心。
當練到攰嘅時候，兩個人都會出去行一行街放鬆一下，羅浮宮、傷兵院、聖母院、蒙馬特，兩人不知不覺間都走過了巴黎嘅大街小巷。
兩人仲去過成吉思嘅餐廳，除咗享受美食之外，Hayden仲喺Thierry同成吉思身上得到唔少嘅建議。
一張一弛，Hayden感覺自己嘅狀態越嚟越好，亦都對嚟𡁵嘅考驗越嚟越有信心！
之後，終於嚟到Hayden接受考驗嘅日子！
Hayden早早就起咗身，雖然同Thierry約定嘅時間係中午，不過由於周日餐廳休息嘅關係，Hayden打算早啲返去好好預備一下。
「加油呀！Hayden！」Venus幫Hayden加油，因為驚會打擾到Hayden，所以Venus會同成吉思之後先一齊去餐廳。
「嗯！」Hayden上前攬住Venus輕吻一下多謝佢嘅打氣支持，笑住講：「咁我出去啦！一陣見！」
「嗯～一陣見！」Venus臉紅紅咁笑住同Hayden講。
喺成吉思同Venus兩個人食早餐嘅時候，成吉思嘅電話忽然響起嚟。
「喂？」成吉思拎起電話聽：「哦～咁呀？嗯⋯好啦！咁我宜家過一過嚟呀。」
成吉思收線之後，同Venus講：「Venus，我有啲急事要處理，整完之後先再直接過去餐廳，不過就可能會遲少少，咁你諗住自己去定宜家跟埋我出去？」
「你有緊要嘢做就做嘢先，我認得路，可以自己去餐廳㗎啦。」Venus笑住咁講。
「真係無問題？」成吉思明顯有啲趕急，不過都仲有少少擔心。
「無問題呀！我真係ok㗎！」Venus再三強調，佢都睇得出成吉思件事應該真係好緊要好趕急，就出手將成吉思推出門口。
「咁你自己小心啦喎！我走先啦！」成吉思再三叮囑。
「知道！」Venus笑住答。
Venus送走咗成吉思之後無耐，見時間仲早，就想出去行下，順便睇下有無咩禮物啱送俾Hayden。
Venus換好衫出門口，就向一間網上推薦嘅精品店出發。
不過巴黎大街小巷眾多，錯綜複雜尤如迷宮，Venus行行下就覺得好似唔係好對路。
正當Venus拎出手機想查下地圖嗰時，忽然被人好大力咁撞咗一下，Venus「哎呀！」一聲之後被撞到跌低，手機都甩手飛咗出去。
跟住撞跌Venus嗰個人就立即上前，執起Venus嘅手機就即刻跑走！
「喂！」Venus即刻起身跑上去追，同時一路喝住嗰個人：「唔好走呀你！俾番部手機俾我！」
不過呢刻街上行人唔多，嗰個人又跑得幾快，又一直左彎右轉，所以追咗幾個路口之後，Venus就已經唔見咗嗰個人嘅身影。
Venus見追甩咗嗰個人，代表部手機已經好難再搵到番，即刻好喪氣咁忍唔住想喊，因為手機入面有好多佢同Hayden之間嘅回憶，宜家全部都無哂！
跟住，Venus發現咗一個更加嚴重嘅問題，因為佢一直追住個賊咁跑，不知不覺就跑到好遠嘅地方，一個佢唔知道喺邊度嘅地方！
Venus第一時間拎銀包出嚟諗住睇下夠唔夠錢搭車嘅時候，發現連銀包都唔知幾時唔見咗！
「唔通係嗰個人撞我嗰時俾佢偷埋銀包？！」Venus心入面諗，不過諗一諗其實點都已經無所謂，重點係佢宜家喺無錢無電話嘅情況下，喺人生地不熟嘅巴黎異地盪失路了！！！
另一邊，正當Venus彷徨不知所措嘅時候，仍然未知Venus出咗意外嘅Hayden，正喺餐廳嘅廚房入面專心咁準備點算一陣要用到嘅每一樣材料。
「啪⋯嘞！」Hayden一時唔小心，將一個玻璃器具掃跌咗落地整爛咗。
望住一地嘅玻璃碎片，Hayden忽然一陣心神不寧，感覺好似有種唔好嘅預感。
「唔會嘅！」Hayden拍一拍自己塊臉，要自己提起精神集中，同自己講：「我落咗咁多心機，一定無問題嘅！我一定唔可以令Venus失望！」
Hayden低頭望一望掛喺頸上面屬於兩人嘅頸鍊戒指，又抬頭望住放喺枱面上嘅其中一份材料，更加自信咁講：「無錯，我唔係得自己一個喺度努力，我知道，佢係同𡁵我一齊面對，再加埋我哋一齊諗出嚟嘅呢樣秘密武器，一定得嘅！」
「文亮熙，俾心機呀！」
Hayden再次打起精神，拎嚟掃把將地上嘅碎片掃走清理，又再一次重新集中精神，投入預備工作！
------------------------------分隔線------------------------------
臨近考驗嘅約定時間，率先出現喺餐廳嘅係考驗Hayden嘅Thierry。
Thierry和典型嘅法國人感覺有啲唔同，個子不高嘅佢俾人一種沉穩嘅成熟感，慈祥嘅外貌下又隱隱散發出一陣威嚴感，堅實厚壯嘅雙手充分咁說明了佢嘅經歷。
「Thierry。」Hayden見到Thierry行入嚟，即刻恭敬咁打招呼。
「嗯～Hayden，準備成點呀？」Thierry笑一笑咁問。
「放心，我一定會將自己最好嘅一面展現俾你睇！」Hayden自信咁講。
「嗯。我期待你嘅表現。係呢～成吉思仲未到呀？」Thierry拍一拍Hayden嘅膊頭，跟住又望一望周圍之後問。
「未呀，佢未到。」Hayden都有啲疑惑，照道理成吉思同Venus應該都差唔多時間嚟到，但係到宜家都仲未見人⋯⋯
「唔通佢哋出咗啲咩事！？」Hayden只係諗到呢個可能性。
當Hayden正想拎電話出嚟聯絡一下佢哋嘅時候，成吉思啱啱好入到嚟餐廳。
「成吉思！點解得你一個嘅？Venus呢？」Hayden一見到得成吉思一個，即刻好心急咁問。
「Venus？佢仲未到咩？我今朝臨時有事出咗去做嘢，Venus話佢自己過嚟㗎！」成吉思都好驚訝咁問。
「未呀，仲未見人呀。」Hayden有啲焦急咁講。
「你唔好慌住先，試下打個電話俾佢，話唔定佢只係仲嚟𡁵啫。」成吉思安慰有啲失咗方寸嘅Hayden。
「嗯。」Hayden即刻拎電話出嚟打Venus嘅號碼，不過打咗幾次都無人聽。
「你所撥打嘅電話已經關機⋯⋯」最後只換嚟呢一句。
「Venus一定係出咗事！我⋯我一定要出去搵佢！」Hayden立即就做好決定，轉身就同Thierry講：「對唔住！Thierry，我宜家有啲非常緊要嘅事要做，考驗嘅事真係對唔住啦！」
講完之後，Thierry連反應都未反應得切，就見到Hayden一支箭咁衝咗出餐廳門口，連成吉思想拉住佢都嚟唔切。
「Hayden！」
當Hayden行出餐廳門口，仲諗𡁵應該去邊個方向開始搵起嘅時候，一把熟悉嘅聲音大叫Hayden個名，跟住就係一道人影跑埋嚟撲咗入Hayden嘅懷抱入面。
「Hayden！Hayden！我仲以為自己會再見唔到你呀！」撲入Hayden懷內嘅人影正係Venus。一直擔驚受怕嘅情緒，喺見到Hayden嘅一刻終於全部爆發出嚟，Venus忍唔住攬住Hayden喊起嚟。
「太好啦！你無事！頭先打極你電話都無人聽，你知唔知我有幾咁擔心！宜家見到你無事真係太好啦！」Hayden攬住Venus，慢慢咁摸住Venus嘅頭髮安慰喊到停唔到嘅佢。
「到底發生咗咩事？」喊咗一陣之後，見Venus開始冷靜落嚟，Hayden先開口問。
「今朝⋯今朝成吉思因爲有嘢做，所以我就諗住自己過嚟，點知⋯點知中途遇到被人搶手機，我為咗追個賊，就跑咗好遠盪失咗路⋯⋯」Venus慢慢咁講番今朝嘅事。
「你！你點可以做啲咁危險嘅嘢㗎！一陣如果個賊有武器咁點算！？」Hayden聽完之後立刻鬆開手，捉住Venus膊頭望住佢，忍唔住有啲嬲咁話：「電話唔見咗可以再買，你自己嘅安全先係最重要呀！」
「咁⋯咁電話入面有好多人哋同你嘅回憶吖嘛，人哋一時都無諗到咁多，淨係想追番部電話返嚟⋯⋯」見到Hayden發嬲，Venus即刻頭耷耷咁細聲講。
見到Venus個楚楚可憐、想喊想喊嘅樣，又知道咗Venus嘅理由之後，Hayden即刻嬲唔落，連本來想話多兩句嘅嘢都收番，只係重新將Venus緊緊咁攬番住。
「係呢～咁最後你係點返番嚟呢度？」Hayden又問。
「哦！因為我好彩遇到佢呀！」Venus一邊講一邊擰轉頭，因為見到Hayden太開心，所以佢一支箭咁衝咗埋嚟攬住Hayden，都差啲唔記得咗佢。
「嗨～Hayden。」來人笑住同Hayden打招呼。
Hayden抬頭望一望，見到慢慢行埋嚟二人身邊嘅，就係佢法國嘅好朋友，Jesper。
原來Venus係發現自己無錢無電話加上盪失路嘅情況下，無辦法之下唯有四周圍不停咁行，希望可以行到去一個佢認得嘅地方。
因為今日係周日，所以大部份嘅店鋪都無開門，而街上嘅行人更係稀少，加上Venus有限嘅法語，想要問路卻苦無辦法。
「Venus？」正當Venus諗唔到辦法嘅時候，覺得沮喪失落嘅時候，一聲叫喊將佢由地獄拯救返出嚟。
Venus抬頭望見嘅係一張金髮藍眼睛嘅外國臉孔，正係有過一面之緣嘅Hayden好朋友Jesper！
喺Venus嘅法語混雜廣東話嘅說明解釋下，Jesper總算好唔容易咁明白咗Venus嘅處境，佢之前亦都去過成吉思嘅餐廳搵Hayden，所以知道位置，就帶住Venus返嚟。
「多謝，Jesper！」Hayden衷心咁向Jesper道謝，因為如果唔係佢，可能後果不堪設想。
「五曬克氣！」Jesper笑住咁講，Hayden係好朋友，好朋友嘅女朋友Venus有事幫手係好平常嘅一件事。
「無論點都好，都係要多謝你！」Hayden笑住講，Venus亦都向Jesper笑一笑講：「多謝你，真係好彩有你咋！」
之後，三個人就互相望一望之後，一齊開心咁笑。
------------------------------分隔線------------------------------
「係呢～Hayden，你唔係要考驗咩？你宜家出咗嚟，咁個考驗點呀？」Venus忽然擔心咁問。
「弊！」Hayden頭先一心都沉醉喺Venus無事上面，唔記得咗仲有考驗呢回事。
之後Hayden就拖住Venus轉身返入去餐廳入面，而Jesper亦都跟住入埋去。
一入到去，三人只見到Thierry同成吉思正坐咗喺度傾𡁵唔知咩嘢，而Thierry嘅表情一臉平靜，令人唔係好睇得出喜怒。
「Thierry！」Hayden拖住Venus嚟到Thierry面前，即刻就第一時間鞠躬道歉：「對唔住，因為頭先我女朋友出咗啲事，所以一時情急就⋯真係好對唔住！」
Thierry靜靜咁望住鞠躬道歉嘅Hayden，以平淡嘅語氣講：「你知唔知你頭先咁樣拋低客人離開，係做一個廚師嘅大忌？你咁樣做，同放棄考驗係無分別。」
聽到Thierry講嘅嘢，維持鞠躬姿勢嘅Hayden就覺得好似有一大盤冷水淋落佢個頭咁，一粒聲都無再出。
雖然其實佢都已經早預到個結果會係咁，不過當事實嚟到，依然感到一陣失落。
「Thierry，請你俾多一次機會Hayden啦！今日嘅事係我唔好，唔關Hayden事㗎！Hayden真係好著緊呢個考驗，佢落咗好多心機同時間去準備，佢係真係好想跟你學整嘢食㗎！」企喺Hayden嘅Venus忽然開口講，同時同Hayden一樣向Thierry鞠躬請求。
雖然Venus講嘅係廣東話，Thierry唔係好聽得明，不過都大概明白佢想表達嘅意思，於是饒有深意咁望住Venus。
「Venus，算啦～」Hayden細細聲同Venus講。
正當Venus都覺得絕望嘅時候，Jesper行前一步，亦跟住向Thierry深深一躬，希望佢俾次機會Hayden。
Thierry望住低頭鞠躬嘅三個人，再次開口講：「Hayden。」
「係！」Hayden抬頭企直望住Thierry講，另外兩人亦都抬起頭企番好。
「我問你，如果再發生今日咁嘅情況，你嘅決定係咩？」Thierry嚴肅咁問。
「我⋯」Hayden擰轉頭望一望Venus，Venus俾咗一個笑容鼓勵佢講落去，亦都笑住肯定咁講：「我嘅決定係唔會變！」
「就算因爲咁而失去考驗資格、失去你追夢嘅機會，都唔後悔？」Thierry繼續問。
「唔後悔！」Hayden之後轉頭望住Venus講：「因為呢個女仔，對我嚟講，係比任何嘢都重要，無嘢可以取代到。」最後幾句係用廣東話講，明顯只係講俾Venus聽。
Venus聽完之後，心中嘅感動只可以化為最燦爛嘅笑容綻放。
之後，坐喺Thierry隔離嘅成吉思翻譯返俾Thierry聽之後，Thierry只係點一點頭。
「Hayden，身為一個廚師，對待客人係好重要。」Thierry停一停，繼續講：「不過，如果為咗客人，而要拋棄身為人嘅基本情感，一個如此無情嘅廚師，佢整出嚟嘅食物都唔會感動到人。」
之後Thierry放低嚴肅嘅臉容，笑住講：「我相信你整嘅食物有感動人心嘅條件，我好期待。」
「即係⋯？」Hayden有啲唔確定咁問。
「即係你嘅考驗宜家開始啦，仲唔快啲入去準備！」成吉思笑住講。
「耶！」「Bravo！」Hayden同Venus聽到之後，立即興奮得相擁，而Jesper亦開心得跳起大叫。
「多謝你，Thierry！」Hayden一邊向Thierry道謝，一邊整理好自己嘅廚師服行去廚房講：「我宜家即刻入去準備！」
Thierry只係笑住咁點點頭。
Hayden又擰轉頭望一望Venus同Jesper，兩個人同時對佢豎起手指公以示鼓勵！
過咗一陣，Hayden開始逐樣逐樣咁上菜俾各人。
松露雜菌湯配香麵包、前菜煙燻火腿洋蔥卷、凱薩沙律、主菜蘑菇白酒汗配菲力小牛排，加埋Hayden精心挑選嘅白酒，喺Venus同Jesper眼中完全就係一個完美嘅法式套餐，而靜靜觀察住一必嘅成吉思亦都點點頭表示讚賞。
不過身為考驗者嘅Thierry，從佢嘅表情上暫時仍然睇唔出有咩滿意或者不滿，只係默默咁觀察住喺廚房忙碌嘅Hayden，同品嘗Hayden拎出嚟嘅每道菜。
終於去到最後嘅甜品，只見Hayden拎出一個七彩繽紛嘅塔型甜品出嚟。
「呢個係？」Thierry從未見過呢款甜品。
「呢個，係我⋯」Hayden停一停，又望住Venus講：「同Venus一齊諗出嚟嘅自創甜品，請你好好品嘗一下～」
「哦～」Thierry望住呢道甜品，第一次表現出深有興趣嘅表情。
Hayden將甜品放到枱面，Thierry就開始試起上嚟。
相比之前嘅毫無反應，Thierry有好明顯嘅表情變化，有啲似係驚奇，亦有啲似係諗唔明，不過到底滿唔滿意仲係未知之數。
終於，等到Thierry食完哂所有嘢之後，就係公布考驗結果嘅時候！
------------------------------分隔線------------------------------
Hayden、Venus同Jesper都好緊張咁屏息靜氣咁等Thierry宣布結果。
「Hayden。」等咗一陣，Thierry終於開口。
「係！」Hayden聽到Thierry叫佢，立即打起精神企直個人回答。
「論食物嘅質素，呢一餐，無論係餐湯前菜，定係主菜配酒，都只可以算係中等之作，可以睇得出你嘅烹調手法仲係太幼嫰！⋯⋯」Thierry慢慢咁作出評論。
一聽到Thierry嘅評語，Venus同Jesper都忍唔住一陣緊張。
（由於Thierry講嘅係法文，所以Venus係靠身邊嘅成吉思代為翻譯。）
「除此之外，餐單菜式嘅安排，雖然可以睇得出你有精心設計過，不過仍然有許多不足之處⋯⋯」Thierry繼續講落去，不過聽到大部份批評居多，令到三人嘅心情開始有啲沉重。
「不過，」Thierry口氣一轉，立即令三人重燃唔少希望，「可以睇得出你嘅準備好用心、好充足，係烹調同上菜嘅過程都做得一絲不苟、不慌不亂，值得讚賞。」
「除此之外，更令我感到驚喜嘅，係最後嘅自創甜品！嗰種獨特嘅變化，的確係一款出人意表嘅甜品！」Thierry講到呢度，已經換上咗開心嘅笑容，將最終結果宣布出嚟：「Hayden，嚟𡁵嘅時間，你會好辛苦！因為我會將我識嘅所有嘢，都盡力傳授俾你，至於能夠領悟幾多，就睇你自己啦！」
得咗啦！！！呢刻嘅Hayden只想大聲叫喊出嚟！！
「係！多謝Thierry！我一定會努力嘅！」Hayden好唔容易先可以冷靜咁同Thierry鞠躬多謝。
「Yeah！」「Bravo！」至於靜靜企喺一邊嘅Venus同Jesper一聽到呢個好消息，早就忍唔住開心咁叫出嚟！
「恭喜你呀！Hayden！你好叻呀！」Venus立即衝上前，攬住Hayden祝賀佢。
Jesper同成吉思都各自上前嚟恭喜Hayden。
「多謝你哋。」Hayden望住Jesper同成吉思表示謝意，又望一望懷內嘅Venus，笑住講：「多謝你！」
「係呢～Hayden，最後嘅甜品，你哋係點樣構思出嚟？」Thierry對於最後嘅嗰道甜品非常有興趣。
Hayden望一望懷內嘅Venus，笑住解釋：「其實我哋嘅構思好簡單，將Elcair以Mille Feuilles嘅方式疊起，每層嘅Elcair都配以不同嘅餡料，由酸至甜，寓意住愛情嘅味道。」
「由於層層搭配，所以每一次都會有新感覺，唔會令人有一種膩咗嘅感覺。」
Hayden解釋完之後，又同Venus對望一笑，呢款甜品，就好似佢哋之間嘅愛情一樣。
「很好！很好！」Thierry以讚許嘅目光注視住呢對小情侶，對Hayden問：「咁呢款甜品你哋有為佢起名嗎？」
Hayden同Venus互望一眼，有默契咁講出同一個名字。
聽到兩人起嘅名，Thierry只係非常滿意咁笑一笑，之後起身準備離開。
Thierry起身，最後拍一拍Hayden嘅膊頭講：「Hayden，呢兩年，我睇得出你對烹調嘅熱誠同勤墾，喺呢次考驗中你亦都表現出你嘅潛力同天賦，加油！我對你嘅未來非常有信心！」
「多謝！」Hayden再次鞠躬感激Thierry俾機會佢。
講完之後，Thierry就轉身離開。
Hayden企番起身，再一次攬住Venus，互相傳遞出呢刻嘅喜悅。
「乾杯！！！！」
夜晚，喺成吉思嘅屋企入面，Hayden、Venus、Jesper同成吉思正為Hayden通過考驗而舉行慶功宴。
「Hayden，跟住落嚟嘅先係真正辛苦嘅時間，Thierry係非常嚴格㗎！」成吉思笑住咁同Hayden講。
「放心喎，無論幾辛苦我都撐落去！」Hayden之後望住Venus講埋後半句：「因為為咗唔可以令某個人失望！」
Venus感受到Hayden嘅目光，以一個甜甜嘅笑容回應咗佢。
「Hayden，梨珍系好梗呀！歐獎！」Jesper向Hayden舉杯道賀。
「Jesper，今日都係多得你咋！」Hayden捉實Venus隻手講：「所以今日你嘅功勞最大，嚟！我哋乾一杯！」講完就起身拎起酒杯同Jesper碰杯。
「好！」Jesper第一次發啱音。
「終於安然渡過咗啦～」Hayden終於可以鬆一口氣，摸一摸Venus嘅頭講：「之後終於可以專心咁同你周圍去玩啦！聽日有無邊度想去？」
「邊度都無所謂㗎！只要係同你一齊！」Venus攬住Hayden，笑住講。
「咁等我帶你去一個地方。」Hayden溫柔咁攬番住Venus，笑住講。
「咩地方嚟㗎？」Venus問。
「到時你咪知！」Hayden唔諗住開估住。
「哼！懶神秘！」Venus一臉不屑咁講。
Venus講完之後，就成個人放鬆挨哂落去Hayden度，呢幾日嚟佢都緊張到個人好攰，加埋今朝嘅事，呢一刻終於可以完全放鬆一下。
兩個人靜靜咁依偎住，享受呢一刻悠閒、輕鬆嘅時間。
------------------------------分隔線------------------------------
第二日一早，Hayden就同Venus搭乘法國高鐵，經過咗幾個鐘嘅車程，嚟到法國嘅南部，普羅旺斯。
「嘩！好靚啊！」Venus望住眼前嘅薰衣草花田，除咗讚嘆之外咩都講唔出。
同巴黎嘅城市感覺唔同，普羅旺斯處處都保留住鄉村嘅風味，喺普羅旺斯，可以輕鬆咁感受到自然嘅氣息圍繞住自己。
當中最出名嘅就係薰衣草花田。
「Venus。」Hayden將一個織好嘅薰衣草花冠戴去Venus頭上。
「多謝！」Venus笑得好燦爛。
兩個人就係咁，靜靜咁欣賞住眼前大片嘅薰衣草花田。
「點解想嚟呢度嘅？」Venus忽然問，普羅旺斯同巴黎一南一北，雖然有高鐵連接，但都要幾個鐘嘅車程。
「薰衣草嘅花語係等待嘅愛。」Hayden講：「呢個係我係網上睇到嘅，我覺得就好似講𡁵我哋咁。」
Venus無任何回應，只係靜靜咁聽Hayden講落去。
「我哋由細玩到大，但係一直都無一齊，因為我一直暗戀阿純，從來都無留意到企喺我後邊、一直等𡁵我回頭嘅你。」Hayden慢慢咁轉頭望住Venus講，Venus嘅眼圈亦都漸漸紅了。
「到我哋好唔容易喺埋一齊，又因為Auntie Nat嘅關係而要偷偷摸摸。終於等到Auntie Uncle認同我哋，可以光明正大咁一齊，我就嚟咗法國，同你分隔兩地，要你忍受相思嘅痛苦。」Hayden慢慢、慢慢咁回憶住兩人嘅過去，繼續講：「喺呢段感情入面，我要你等得我太多啦！或者你成日都以為我為你做咗好多嘢、你自己好似無咩付出咁，但其實，你付出嘅，遠遠比我付出嘅多好多。」
講到呢度，Venus嘅眼淚已經開始掉落嚟，Hayden上前輕輕咁攬住佢，講埋佢未講完嘅嘢。
「所以，請你相信我，等埋呢兩年時間，到時我唔會再離開你，會一直喺你嘅身邊陪住你！」Hayden撫摸住Venus頭髮，溫柔咁講。
「嗯！我信你，我一定會等你返嚟！」Venus聽住Hayden嘅深情告白，又開心又感動，又喊住又笑住咁講：「好衰㗎你！文亮熙，明知人哋眼淺，次次都要搞到人喊！」
「唔會㗎啦！以後我只會令你笑，唔會再令你喊㗎啦！」Hayden笑住咁講。
「嗯～」
兩個人就係咁，係大片浪漫嘅薰衣草花田入面，輕輕相擁，許下等待的愛的承諾。
之後，兩人停留喺南法地區四圍遊覽，直到Venus預定離開嘅嗰一日先返番去巴黎。
喺戴高樂機場嘅離境閘口，嚟送Venus機嘅只有Hayden、成吉思同Jesper，Thierry因為仲有餐廳要做嘢所以嚟唔到。
「成吉思，喺法國嘅呢段時間以嚟，好多謝你嘅照顧。」Venus對住成吉思深深一躬，佢一向係個有禮貌嘅女仔。
「唔駛客氣，其實我都無做到啲咩嘢～」成吉思搖住手笑住講，停一停之後又吩附話：「Venus呀，返到香港之後幫我問候下你爹哋媽咪同埋Clarie、Issac佢哋。」
「嗯，我會㗎啦！」
「再劍啦！Venus，再個泥溫Hayden既時后，紀住一訂要泥潭下鵝！」Jesper有啲不捨咁講，不過配埋佢唔正嘅廣東話，就變咗另一種感覺。
「嗯，我一定會！」Venus笑住回應。
「好啦，Jesper，我哋去買啲嘢食啦！」成吉思拉走咗Jesper。
「哎？鵝！豪呀！」Jesper會意，跟住成吉思離開。
「噗！⋯哈哈哈～」Venus同Hayden望住呢一幕，終於忍唔住笑出嚟。
笑完之後，兩個人又靜靜咁望住對方。
似曾相識嘅感覺，不過今次換咗係由Hayden送Venus。
「我唔捨得你！」「我都係！」
兩個人相擁，一諗到又要再次分開，不捨嘅感情就傾瀉而出。
過咗一陣，兩個人分開，Hayden係袋度拎咗一樣嘢出嚟，係一本筆記簿
「Venus，呢樣嘢俾你！就當係你之前部手機嘅代替品啦！」Hayden一邊講一邊將手上嘅筆記簿遞俾Venus。
Venus自從唔見咗手機，雖然有補辦返新手機，不過舊手機嘅一切已經唔存在，就算Hayden將啲相入返落新手機，但兩個人之間嘅訊息都無咗，所以Venus偶然都會為此唔開心。
「咩嚟㗎？」Venus接過本筆記簿，雖然筆記封面好精美，不過有啲殘舊，明顯唔係新買嘅。
Venus打開嚟睇，一打開就被入面嘅內容感到驚喜。
筆記嘅入面記錄住兩人嘅一點一滴，由相片、大事小事到訊息內容都竟然有記低，一幕幕嘅回憶瞬間湧上Venus嘅心頭。
「點解⋯點解嘅？」Venus有啲唔敢相信。
「其實係我之前睇過一本小說嘅情節之後，心血來潮開始記錄我哋之間嘅回憶，因為機器好可靠，亦都好唔可靠。」Hayden笑住解釋：「宜家交俾你啦，嚟𡁵就由你記錄落去～係屬於我哋嘅故事。」
「嗯！」Venus珍而重之咁攬住本筆記簿點頭回答：「我會帶住我哋嘅故事，喺未來好好咁等你返嚟一齊寫落去！」
「再見啦！」Hayden上前輕輕咁吻向Venus嘅嘴唇。
Venus亦都閉上眼，好好感受這個漫長嘅Goodbye kiss。
飛機上，Venus坐喺位度，邊聽住歌邊享受佢同Hayden合力創作嘅自創甜品，同時慢慢翻閱滿載兩人回憶故事嘅筆記。
呢個時候，Venus嘅耳機響起一首歌，令Venus忍唔住微笑起嚟。
Taylor Swift嘅《Love Story》，係擁有同佢哋嘅自創甜品一樣名字嘅一首歌。
Venus將一口甜品放入口中，好滿足咁笑了。
Love Story，對Venus嚟講，就係最甜蜜嘅點綴。
～完～
