Illusion
「而家到第五位，密他飛卜艾珠擲骰。」主持東南西北高聲呼喊，骰子亦應聲出現在密他飛卜艾珠面前。
「我哋一齊疊棋行，好唔好？」密他飛卜艾珠問同樣處在起點的拉斯特和亞星爾戴，他們都點頭表示同意。
「咁希望可以擲到六。」密他飛卜艾珠心想，然而，世事總不能盡如人意，她最後擲出四，三顆棋子一同前進，踏在一個印有爆炸的格子上。
「呢個係咩嚟，之前未見過嘅？」密他飛卜艾珠驚訝地問。
東南西北笑淫淫地說：「終於……終於有人踩中爆炸喇！呢個係隨機炸一格，企喺嗰格嘅棋都會立即墜毀返機場。而隨住踩中嘅次數越多，爆炸嘅格數都會越多。嚟喇嚟喇嚟喇，今次會爆炸嘅格係……」
「嘭！」棋盤上其中一格無棋的格子無預警地爆炸了，在場的十六人連同包廂內的富豪都被嚇倒。
「噢！大家真係好彩，無人被炸飛，不過下次就未必咁好彩㗎喇。」東南西北話中帶着點奸詐和惡趣味。
接着到紋骨甲擲骰，他隨便一擲，得出了一。與之前的快狠準作風不同，他現在舉棋不定，猶疑了。
瑪爾沃斯基是第一個察覺到異樣的人，他關心地問：「你有咩擔憂？我哋同組，可以一齊諗喎。」
紋骨甲未有回答，他雙眼緊閉、雙手合十，口中唸唸有詞，還滿頭大汗。
「你有無事？係咪唔舒服？」軟微也湊前來緊張地問。
終於，紋骨甲打開雙眼，雙唇顫抖地說：「神放棄咗我，佢唔回應我……我唔知應該點做好……我究竟郁軟微隻棋，定我哋兩個一齊疊棋行先？」他雙眼瞪大，低垂着頭，雙手按着太陽穴，好像頭痛得很。
「呢啲唔駛求神問卜嘅，依我分析，軟微而家前後被夾，只要行一步就可以跳棋避開被圍攻嘅情況，咁一定係逃走先最重要。我哋喺起點非常安全，甚至下次幫埋老……瑪爾沃斯基起機，就可以三隻疊埋一齊行，時間快三倍，仲有利㖭！」博彭三世分析得頭頭是道，其他人也紛紛點頭。
紋骨甲根據隊友建議，替軟微行了一步，然後跳棋，棋子落在印有問號的黃格上。
「係機會，大家留心聽住喇，」東南西北對眾人說：「身上衣物有啡色嘅人就有得抽牌。」
眾人同時仔細檢查自身，看看衣物上有沒有哪怕一丁點的啡色，場面異常壯觀，亦極為惹笑。
然而，瞎搞一輪後，只得群巴之頭和紋骨甲在自己的衣物上找得到啡色，其餘的人皆落空。
「請抽卡。」東南西北機械式地說，群巴之頭和紋骨甲眼前分別出現了三張卡。對於抽卡，他們都不陌生，很快便選定了。
「吓？『免除』？即係點？」群巴之頭看着翻起的牌不解地問，但東南西北沒有多加解釋。
至於紋骨甲則抽到了「轉移」，他望着東南西北問：「即係可以將懲罰轉畀第二個？」但東南西北同樣沒有回答。
接着輪到易路登威擲骰，他大手一揮，擲出了三點，想也不想就動了自己的棋，成為第二個踏中爆炸圖案的人。
「嘭、嘭」兩聲，隨機的兩格又爆炸了，幸好沒有人受影響。然而，易路登威的隊友對他卻有微言：「喂，一陣炸到自己友點算？你咁魯莽嘅？」說話的是江長。
「切！我哋一向都各有各㗎喇，扮乜嘢團隊？嘔心！」易路登威做了一個嘔吐的動作調侃江長。
藍色完成後，便到綠色的金歌谷了。她擲骰前與其他隊員討論過，大家有了共識，於是她便放心行動。她大力一拋，任由骰子自由落體，最後得出了五點。
「咁我郁遜馬亞里隻棋。」金歌谷對東南西北說，然後遜馬亞里的棋子便一馬當先地到了紅色格上，上面印了遊戲機的圖案。
東南西北飛起來，居高臨下地對十六人說：「今次要玩嘅遊戲特別啲，食腦嘅，就係經典黑魔法遊戲『超級市場』，係個人戰。」
「黑魔法？」紋骨甲對這個詞語特別敏感，這讓他聯想到一些不見得光的宗教，與他所信奉的信仰相違背。
正當紋骨甲想開口投訴之際，東南西北續說：「所謂嘅黑魔法遊戲，同任何宗教同神秘主義無關，純粹係喺當中尋找一個規律，揾到當中規律就係勝利者。而今次係用時間嚟判定，遊戲時間三十分鐘，而家係十點零七分，十點三十七分前揾到規律嘅人都係贏家。」
阿希聽着東南西北的介紹和解說，又有一種似曾相識的感覺，「超級市場」這個black magic以前阿樂也和他玩過，所以他知道當中的竅門和蹺妙。
「直到目前為止，無論淘汰階段玩嘅遊戲，定而家飛行棋入面玩嘅遊戲，全部都係阿哥以前教我玩過嘅，唔通錢生真係估中，東南西北真係阿哥？所以啲遊戲其實都係為我度身訂造？」阿希心裏百感交集，越來越相信東南西北的真正身份就是阿樂。
「超級市場有懶賣，但無勤力賣；有女士賣，但無男士賣。」東南西北開題。
聽到這兩個提示，全場的人──包括包廂內的富豪──都鴉雀無聲，除了阿希。他滿懷自信地說：「太易喇，超級市場有燈賣，但無電力賣。」
「超級市場無燈賣。」東南西北冷酷地說。
「無可能，點會？」阿希難以置信。
東南西北續說：「超級市場有大堂賣，但無大門賣；有貨車賣，但無車賣。」
「係囉，我啱㗎，點解話我錯？」阿希向東南西北投訴，就像小時候向哥哥阿樂投訴一樣。
「佢話唔啱就唔啱，你嘈都唔會變啱。」江長不屑地說。
「四眼靚仔，」密他飛卜艾珠走近阿希，用温柔的聲線在他耳邊嬌嗲地說：「不如你講我知個規律係點，我哋再一齊諗。」
以密他飛卜艾珠動人的外表、姣好的身材和甜美的聲線，加上她拋的眉眼，正常男人根本抵不住誘惑，何況是一生甚少機會接觸異性的阿希？他直情整個人亂了套，反應正如大部份宅男一樣，立即推開她並自己後退數步拉開距離，然後臉紅得像蘋果一樣結巴地說：「你……你……你唔好企……企咁埋，我……我唔會……唔會話你知係L字頭……」
「哦，原來係『L』字頭，咁我知喇。」密他飛卜艾珠立即對東南西北說：「超級市場有光賣，但無電筒賣。」
「超級市場無光賣。」東南西北依然冷酷地否決這個答案。
「無可能，超級市場有豹賣，但無老虎賣。」密他飛卜艾珠立即補上另一個答案，但同樣被東南西北判為錯誤。
「會唔會唔係『L』字頭，而係有其他規律？」眾人議論紛紛。
「有懶、有女士、有大堂、有貨車，呢幾個字中間有咩共通點？」各人對着這些詞語完全毫無頭緒。
不知不覺，時間已經過了十分鐘，除了阿希和密他飛卜艾珠兩位嘗試過外，並沒有其他人開口，而東南西北也樂得清閒。
「無理由，阿哥講我聽嘅嘢，點會有錯？點會唔係『L』字頭？東南西北係阿哥，佢唔係會照住我咩？」阿希的心思已經由題目轉移到東南西北身上。
「超級市場有奢華賣，但無貧窮賣。」東南西北又拋出了一個提示。
「我諗答案應該係咁，不過如果咁快答，其他人都有機會諗到，咁我就無得拋離佢哋，要忍到最後三分鐘先。」江長心想。
而另一邊廂，金歌谷也想到了一個解答：「可能唔係『L』字頭，而係……」但北韓出生和長大的她，自小被灌輸不能犯錯否則會被罰的觀念，所以始終不敢衝口而出。
與金歌谷相反，來自自由民主國家美國的雅萊歐，則願意不斷發聲試錯，經過腦內一番整理，開始不斷說出答案：「超級市場有幸運賣，但無命運賣；有瞓低賣，但無瞓覺賣。」
「無錯，超級市場有幸運同瞓低賣。」東南西北說：「雅萊歐，你跟住部無人機過去，講個規律出嚟，睇吓係咪真係知。」
雅萊歐自滿地邊笑邊跟無人機走到一旁，然而，很快她便一臉失望地回到大伙當中，東南西北也同時宣布：「雖然知道有咩賣，但規律錯，所以暫時都未有人知道，大家繼續努力。」
江長看到雅萊歐垂頭喪氣地回來，心中暗自竊喜：「今次仲唔係我估中，睇你個洋鬼子個答案，就知你聰明反被聰明誤。」
「你哋唔試多啲，係唔會知道個答案，呢個遊戲，係靠試得多嚟揾個答案。」東南西北看到還未有人猜中，忍不住說出遊戲的攻略。
可是，或許是成年人的緣故，大家也很顧及面子，不願在他人面前顯露自己失敗的一面。直至……
「我想試。」金歌谷打破沉默，戰戰兢兢地說出自己的答案：「超級市場有錢賣，但無金賣；有威士忌賣，但無酒賣。」
聽過金歌谷的答案，參賽者──尤其是阿希──已經一口咬定是錯，但萬萬想不到東南西北竟沒有反駁，還肯定地說超級市場的確有錢和威士忌賣。
然後金歌谷便跟隨無人機走到一邊再進行確認。
「錢同威士忌都唔係『L』字頭，點解佢有得賣？究竟係咩規律？前後兩者又唔覺有咩關係，究竟係點？」阿希不斷鑽牛角尖，逃不出這個死胡同。
與此同時，江長也不自覺露出了不抵得的樣子自言自語道：「可惡，畀個八婆擾亂我計劃，佢應該估中，咁樣畀到好大提示其他人，我都唔可以再等。」
「超級市場有民主賣，但無自由賣；有蜜糖賣，但無熊賣；有開心賣，但無傷心賣；有寂寞賣，但無凍賣。」江長一口氣說出了數個答案。
東南西北立即回應：「的確，超級市場有民主、蜜糖、開心同寂寞賣。江長，你跟無人機過去進一步確認。」
就在江長走過去的時候，金歌谷剛好回來，東南西北隨即宣布她是第一個猜中的人，緊接着，江長亦成為第二個知道答案的人。
「究竟個規律係咩？」縱然聽到金歌谷和江長的答案，阿希還是找不到當中的規律：「點解唔係『L』字頭都會啱？究竟係點？明明最清楚點玩嗰個係我，點解會錯？」
另一邊廂，在包廂的錢先生已經猜到答案，但他只能乾着急，唯一能做的只有祈禱阿希能冷靜，只要他能冷靜下來，必定可以輕易猜出答案。
「錢生，你可以放心，阿希一定會估到答案，呢個black magic，阿樂由細同佢玩到大，佢知點玩。」阿滔對阿希充滿信心。
聽到阿滔的說話，錢先生更是憂心忡忡，他擔憂地說：「有時聰明反被聰明誤，就係因為知點玩，先更加容易陷入去，睇唔清大局，最後走唔出個死胡同，希望佢唔會咁……」
阿滔雙眼凝望着阿希，充滿信心地說：「佢一定得。」
錢先生則定睛看着阿滔，雙眼充滿疑惑。
「超級市場有男孩賣，但無女孩賣；有烏蠅賣，但無蚊賣。」華沙說，然後經過無人機驗證，證實是正確。
時間只餘下七分鐘，到目前為止，尚有八人未猜得出，而阿希是其中一員。
「李友希，冷靜冷靜冷靜，一定要冷靜，而家咁多人估中，有咁多例子，快啲仔細分析吓，一定揾到個共通點，我因為先入為主所以先錯，一定要拋開之前嘅認知，一定要！」阿希心裏默唸，接着閉起雙眼，隔絕外界的干預；再用手掩着耳朵，以免被各種聲音擾亂。
突然，阿希的腦袋「叮」的一聲跳出了一個想法，然後他對東南西北說：「超級市場有日子賣，但無時間賣；有海灣賣，但無海灘賣；有玩具賣，但無娛樂賣。」
東南西北轉向阿希，定睛盯着他三秒，此時無聲仿有聲，就像終於等到他的正確答案而老懷安慰般，然後說：「啱，超級市場有呢啲嘢賣，你跟無人機去確認吓。」
阿希走到一旁，對無人機說：「阿哥，我無辜負你。個規律好簡單，今次唔係睇頭，而係睇尾。只要個字係『Y』字尾就啱。」
阿希說完後，無人機便引領他回到棋盤，接着東南西北便宣布阿希的答案正確，還剩下七人未猜出答案。
或許是猜到答案後如釋重負、心情變好，時間過得很快，眨眼間時間到了十時三十七分，遊戲結束。尚未猜出正確答案的七人包括密他飛卜艾珠、群巴之頭、紋骨甲、博彭三世、易路登威、遜馬亞里和雅萊歐。
終於，阿希在遊戲中總算獲勝，能夠有抽勝者卡的機會。他面前出現了三張卡，他毫不猶疑便選了左面那張。卡一掀起，他不禁爆出了一句髒話。
「翻倍？阿哥，你玩我呀？我而家係零，我要嘅係實數，唔係呢啲倍數，零乘乜都係零，無意思㗎！」阿希指着東南西北呵責道。
東南西北聽到後轉而對着阿希，它沒有出聲，但阿希卻感覺它身上散發出一種熟悉的感覺，一種令他望而生畏、不敢造次的感覺。阿希低垂着頭，不敢與東南西北對望，以免被它責罵，幸好數秒後它便轉向對着其他人，阿希才鬆一口氣。
抽卡之後的結果，各人的籌碼排名有少量變動，螢幕上亦即時顯示出來。
「籌碼排行榜
1.軟微
2.江長
3.華沙
4.達偉英二
5.易路登威
6.瑪爾沃斯基
7.紋骨甲
8.亞星爾戴
9.拉斯特
10.博彭三世
11.金歌谷
12.群巴之頭
13.密他飛卜艾珠
14.雅萊歐
15.遜馬亞里
16.李友希」
「全部都係幻覺，贏同輸我都係零，我仲點解要咁認真去玩遊戲去贏籌碼？雖然話最後對決籌碼多少會有影響，但個制度都無畀零籌碼嘅人翻身，即係零籌碼都有機會贏出最後對決，拎到末日堡壘嘅入場券啦。」阿希忽發奇想，開始自我催眠。
「遊戲完咗，而家返去棋盤上面，由群巴之頭繼續擲骰。」東南西北引導眾人繼續遊戲，但阿希依然沉醉在自己的世界裏，沒有理會外界的事物。
群巴之頭隨意一擲，得出了四點。
「喂，你哋認為點行好？郁我隻棋就又玩遊戲，但之後就有畀人食嘅風險；郁你哋三隻棋就可以抽籌碼，你哋點睇？」群巴之頭在決定前詢問了紅色隊友們。
拉斯特瞬間下決定說：「行三隻棋，等我哋同你匯合，然後四隻棋疊埋，咁就所向無敵。」
「四步之後，佢哋三個會踩到金錢，有機會一下子就籌碼爆升，對於籌碼落後嘅我好不利。」群巴之頭心裏的魔鬼計算着，同時內心的天使聲音說：「佢哋以大局為重所以先咁講，只要四隻棋疊埋，咁就無人食到，又可以快四倍，一齊贏，一齊去最後階段。而家大家利害一致，都係想去最後階段，唔會咁自私只諗自己，信佢哋啦！」
「好，就郁你哋！」群巴之頭決定後，拉斯特等三人的棋子便移動，停在金錢圖案上。
「你哋要賭幾多籌碼？」東南西北問。
「全部，我要搏一次。」拉斯特豪氣地說。
「我賭四份一就好。」密他飛卜艾珠比較保守。
「我都晒冷，而家唔搏等幾時？」或許亞星爾戴受到拉斯特的影響，也變得冒險起來。
「我都話佢哋想拋離你。」群巴之頭的魔鬼在耳邊低吟道。
接着，三人面前各出現了四張牌，他們各自抽了一張，結果出乎意料，他們均異口同聲地大叫：「搞錯！『-50%』？」
無錯，他們同時都抽到同一張卡，這使得他們的籌碼大幅減少，籌碼排名又大執位。亞星爾戴、拉斯特和密他飛卜艾珠分別排十三、十四和十五位。紅色陣營頓時瀰漫着一片愁雲慘霧，只有群巴之頭在暗自偷笑。
面對這個局面，拉斯特很快便發揮出他作為領袖的一面，對隊友們精神喊話：「比賽仲有好長，我哋仲有大把機會追返，只要大家繼續積極爭勝，就可以贏返啲籌碼返嚟！」
「我哋而家三個墊底，點同其他色鬥？實輸硬。」密他飛卜艾珠狀態極度低迷，鬥志全失。
亞星爾戴也心情低落地說：「唔係話唔得，但機會極微囉……」
「大家提起精神先，你哋唔記得進入最後決鬥嘅係鬥快完成盤棋咩？同有幾多籌碼無關係，到時就只有我哋四個，我哋啲籌碼都差唔多，咁咪可以公平競爭，無邊個有明顯優勢囉。」拉斯特巧妙地將情境變換，使他們的目光放得更遠，不再介意和聚焦眼前的籌碼，最後他更憑一句說話重新點燃眾人鬥志：「眼前所有人、事、物都係幻覺，都係會被我哋輾壓，我哋目標唔係贏盤棋咁簡單，我哋係要贏全世界！」
「贏全世界？哈！笑話。」群巴之頭心裏嘲笑道：「最後勝利者只有我，我會拎到個名額，再將嗰個特菲巴副身家都攞埋，開開心心咁喺個城堡入面渡過世界末日。」
紅色的回合完了後，便輪到黃色的博彭三世。他輕輕拋起骰子，然後大腳一射，骰子應聲向場外飛去，未待結果出現，瑪爾沃斯基便問：「點解你要當佢波咁踢？係咪有咩玄機？」
「無㗎，純粹身體反射動作，好自然就好似開龍門球咁踢咗粒骰。」博彭三世嬉皮笑臉地說，但暗地裏其實他想測試一下眼前看到的事物是否真實，因為他昨晚也看到了那兩位神秘人，而他看到的是兩位神秘人走到場邊後憑空消失了。
可惜的是，骰子並未如博彭三世所想憑空消失，而是反彈落地，擲出了五點。
「粒骰本身都好奇怪，有時可以憑空出現，有時又要經無人機運返嚟，究竟係實體定係虛擬？但偏偏拎上手又有重量，而且好實在，究竟係咩原理？」博彭三世心裏充滿疑問，但並沒有與其他人說。
「對唔住，幫唔到你起機。」博彭三世裝作沒事，先對着瑪爾沃斯基道歉，然後轉身對東南西北說：「我要疊埋兩隻棋一齊行，盡快追返軟微隻棋，一齊疊住行。」
待黃色行完後，便輪到藍色的華沙，骰子經無人機送到華沙面前，她吐槽道：「等咁耐終於到我。」然後活絡一下筋骨，單手大力將骰子往上拋，骰子差點碰到穹頂之時，詭異的消失了半秒再落下。
「喂喂喂，我有無眼花？粒骰啱啱係咪閃咗一閃？」博彭三世眼睛瞪大，接着露出自信的笑容心想：「我仲揾你唔到？」
