拐子婆
隨着王先生的死，涉案的五狼只剩下游瑞棠一人，可是我對此人毫無頭緒，加上農曆新年的到來，我已經把此事暫時拋諸腦後。
對於還未成家立室的人來說，農曆新年絕對是一年中最重要的節日，因為可以見到一班親戚，當中甚至有一些一年只見這一次，大家可以見面傾談、交換近況，是一件賞心樂事。
當然，這麼說絕對是官方答案，心底最真實的答案是「𢭃利市」！無錯，這是一個最接近不勞而獲可以獲取金錢的途徑。
大年初一、二都是我們家外出拜年的日子，亦是我最豐收的兩日，而年初三是赤口，傳統都不會出外拜年，所以我們一家都留在家渡過這一日，至於我也把握時間温習。
時間來到五時許，我埋首書本中已經一整日，已經達到與世隔絕的境界，直至媽媽的驚呼才把我重新與世界接軌。
「阿曦同阿晴唔見咗！」媽媽驚惶失色。
「佢哋係咪過咗隔籬井玩喳？」爸爸以最符合常人的想法問。
「我已經睇過，甚至問埋平時會去佢屋企嘅鄰居，都話無見過佢哋。」媽媽焦急得快要哭出來︰「唔知係咪遇到拐子婆。」
「呢幾日過年咁多陌生人出出入入，有啲人混水摸魚都唔奇。」爸爸冷靜的說︰「落去問吓看更有無見到佢哋。」
這場騷動隨着爸爸和媽媽問完保安回來後越演越烈。保安表示沒有看到他們進出，換言之他倆依然在大廈內，只是不知被藏在哪裏。
「會唔會係有拐子婆？最近新聞有好多，啲大陸婆走過去就拖走個細路。」阿旻提出意見，卻令到媽媽哭得死去活來。
「唔好亂講，看更都話無見過佢哋，個看更守呢度咁耐，一早認得哂我哋全家人，加上農曆新年呢段日子，佢哋更加金睛火眼，無可能見唔到，所以佢哋只係去咗平時少去嘅人屋企玩啫，我哋細個嗰時都會啦，鄰居搭鄰居就會friend，之後就會去咗佢屋企玩，到肚餓食飯嗰時就會返嚟，唔駛擔心嘅。」我立即大腳解圍。
「唔係喇，一於報警。」媽媽拿着電話說。
「未夠四十八個鐘，警察都唔會理。」我說。
「你細個嗰時走失過都係唔夠四十八個鐘啦，一樣係報警警察揾返你。」媽媽反駁。
很快，警察便來到家門前，循例問了話後便查看大廈閉路電視，然後問鄰居，再在附近簡單搜索，最後安慰數句便收隊，完全零進展。
看來只好靠自己了。我看着阿旻，她立即意會到我的意思，根據警察調查，在他們失蹤前，有鄰居在大約三時看過他們和一個老人家言談甚歡；有鄰居聽到老人家說帶他們到塔內玩耍；有鄰居說那老人家很面善，不過可能是大眾臉而已。
其中最可疑的無疑是「到塔內玩耍」這一線索，阿旻猜到我想說甚麼，於是搶先說︰「一定唔係你諗嗰啲，唔好自high。」
「但唔係我講，係人哋講，咁都仲有錯？」我駁斥說︰「呢度真係鎮魂塔呢，唔係點會話去塔內先？而且佢兩個之前又有講過話想去玩，而家又周圍都揾唔到佢哋，可以定案喇。」
「咁你話嘞，點去個塔？」阿旻一句便把我難倒，我確實不清楚方法，但腦海中有一個人選或者會知道。
我帶着全家人拜訪一六二二室，尋求刁小姐的協助，可是時間已經是晚上八時，刁太為了保障刁小姐的安全而拒絕，無論我們怎樣哀求，她始終拒絕協助，要我們明天請早。
「阿哥，我都話你見到嗰個係全息影像嚟㗎喇，而家一人多有機會穿煲，佢就耍手擰頭，今次你仲唔信我？」阿旻趁機得意的說。
我又一次無言以對，畢竟除了我以外，他們沒有親眼見過。另外，以我兩次在鎮魂塔的經驗，在現實時間過了超過五小時，即是他們在鎮魂塔內已經過了數天，這麼長時間，他們很大可能已經忘了自己是誰，要永遠留在塔內成為其他鬼的玩物，一想到這，我便更加意難平，誓要用最快時間救他們出生天。
就如劇本一早已經寫好一樣，在我最無助之時，Tracy再次像天使一般出現在我眼前，向我伸出援手。
「我知道你屋企發生咩事，我知點入到去鎮魂塔，但只限你一個，有無問題？」Tracy站在樓梯前悄悄地對我說。
「得我一個？點都好，無問題，得我一個都要去，佢兩個而家好危險，一刻都唔可以再拖，快啲講我知點去到！」我急得如熱鑊上的螞蟻，假如要我跳樓才去到我也願意。
「文件夾。」Tracy簡潔的說︰「佢哋想要本嘢，你帶住佢，再是但入去一個空置單位，咁就去到。」
我得知方法後，連道謝也趕不及說，便衝進屋內拿出文件夾，往最就近的空置單位──一五零八室──跑去，只是，我該怎麼進入已經上鎖的單位？與此同時，家人們也留意到我的動向，也跟着我跑到單位前。
「阿曉，佢哋係咪喺入面？」媽媽着急的問。
「嗯……都算係嘅……」我支吾以對。
「係就係，唔係就唔係，咩叫都算係？你講清楚啲！」爸爸也緊張起來。
我面有難色，但還是勉強回答︰「佢哋係喺入面，但呢個入面又唔係嗰個入面，總之佢哋就係喺入面，我會救返佢哋出嚟。」
「呢度鎖住咗你點入去？同埋你拎住本剪報做乜？」阿旻問。
「我自然有辦法，呢本嘢係門匙，你哋返屋企先，我會帶佢哋返嚟。」我並沒有十足信心，不過我沒有其他選項。
「唔得，我哋同你一齊去，人多好辦事，同埋點可以畀你一個自己冒險。」媽媽說，母愛的偉大大概就是如此。
「邊有冒險，我入去帶返佢哋出嚟喳喎，一出一入，好簡單，無險要冒，而且對方只准我一個人去。」我故作輕鬆，一方面不想他們擔心，另一方面要支開他們，好讓我能進入鎮魂塔。
「好喇好喇，阿哥都咁講，我哋就乖乖哋返屋企等佢哋返嚟，你煮定飯差唔多。」阿旻看得出我的意圖，幫忙游說兩老。
「係囉，快啲返去先，拖越耐佢兩個越驚，你畀我快快脆脆帶佢哋返嚟咪仲好。」我再補上一句。
經過一番擾攘，兩老逼於無奈只好讓我獨自前往。我對着重門深鎖的一五零八室，其實也茫無頭緒，只好先敲門試試。
「咯、咯」，裏面無動靜，門也無異樣。
我正煩惱之際，身後不遠處傳來一把老婆婆的聲音︰「歡迎光臨，嘢係咪帶咗嚟？」
我回頭一看，原來是許婆婆，我再環顧四周，原來我已經不知不覺身處在鎮魂塔內。
「許婆婆？點解你會喺度？你唔係應該去咗投胎咩？」我吃了一驚。
「咩許婆婆？我都唔知你噏乜，廢話少講，你係咪要救返兩個塞豆窿？本嘢係咪帶咗嚟？」許婆婆忿怒的重複一次說。
看來眼前這個許婆婆已經失去了記憶，被「王」抓住做了奴隸，她在醫院過身，靈魂正常不會在這，大概是回魂夜當晚被抓了，「王」真可惡，連老人也不放過。
「我已經帶咗嚟，佢哋人呢？」我將文件夾緊抱在胸前，拍了數下。
「畀我檢查吓真定假先。」許婆婆雖然老，但絕不糊塗。
可是未看到阿曦和阿晴，我是不會把文件夾給她的，所以我對她大吼︰「我要見到人先！」
「敢同阿婆討價還價？好大膽！不過你揀錯場合，呢度係我主場，我叫你畀我係畀臉你，你唔好敬酒唔飲飲罰酒，我啲同伴隨時都可以郁手搶！」許婆婆暴怒，面容扭曲，已經面目全非，我也被她嚇倒。
「佢哋敢郁一吓，我就立即燒咗佢大家一拍兩散！」我輸人也不能輸陣，在褲袋拿出鎖匙裝成打火機威脅道。
顯然，許婆婆忌諱我的行動，不敢輕舉妄動，乖乖吩咐其他鬼把阿曦和阿晴帶來，無他，因為她實在負不起文件夾變成灰燼的責任。
「大哥哥！」在走廊盡頭傳來了阿曦和阿晴的聲音，太好了，他們還記得我，證明並未失憶。
「阿曦、阿晴，你哋唔駛驚，大哥哥嚟帶你哋返屋企！」我大喊回應，同時向他們走去，不過許婆婆始終擋在我們中間，不讓我們見面。
「放低文件夾咪可以帶佢哋走囉。」許婆婆以典型反牌的口吻說。
「我要見到佢哋先，而家只係聽到聲，未見到人。」我差點便鬆懈，幸好懸崖勒馬，堅持要見到真人。
「嘖！麻鬼煩！」許婆婆不情不願又不滿的說︰「帶佢哋上前。」
「大哥哥、大哥哥……」映入我眼簾的的確是阿曦和阿晴，但他們明顯已經失憶，只是牙牙學語的對着一枝玩具鎚說，難怪許婆婆不想讓我看到他們。
「阿曦！阿晴！」我朝他倆大喊，試圖尋找最後一絲希望︰「係大哥哥呀！大哥哥而家嚟接你哋走喇！」可是現實是殘酷的，他們對我沒有記憶。
「人就見到嘞，係時候畀本嘢我喇。」許婆婆伸出手對我說。
我只求盡快帶他倆走，以免失憶繼續加劇，所以爽快的與她交換，而她也沒有使詐，將兩人交還給我，也沒有派人多加阻撓。
「要盡快離開先得，但要令佢哋記得返啲嘢先走到，點算……」我心裏乾着急，因為我擔心「王」很快便會發現我對文件夾動了手腳，然後派人將我們抓住當奴隸。
同時，許婆婆拿到文件夾後也立即消失了，整層十五樓只餘下我們三人。
「小朋友，知唔知我係邊個呢？」我以輕鬆有趣的腔調問阿曦和阿晴，以免嚇倒他們。
只不過他們反倒嚇了我一大跳。
「大哥哥，我哋點會唔知你係邊個。」阿曦精靈的說，完全不像是裝出來。
「你話過呢度會唔記得屋企，所以我哋好努力咁記住屋企。」阿晴也活潑的說，也是自然流露。
「你兩個……係唔係扮知呃我㗎？」我還是不敢相信他們剛才的演技。
「我叫阿曦，佢叫阿晴，係我妹妹，我哋住一五二二。」阿曦嘗試說更多來證明。
「我係阿晴，係最細嗰個，我哋啱啱搬嚟幾個月。」阿晴也說出一些事實來說服我。
「睇嚟係真，咁我哋快啲返屋企，阿爸阿媽好擔心你哋，我哋快啲走。」我緊緊的拖住他們，只是我並不知道該如何離開。
「點樣嚟，就點樣去。」我耳邊忽然傳來一句聲音，但我回頭看卻找不到聲音的主人，可是我還是採納了它的方法。
我先讓阿曦和阿晴抓住我的衣服，然後我伸手碰了一下一五零八室的木門，之後看看我身旁，阿曦和阿晴也在，再看看身後，是我們原來的世界，我們終於回來了。
阿曦和阿晴對望一眼，露出了耐人尋味的笑容，然後便大笑着飛快的奔回家，我在他們身後也跑起來，免得他們又再失蹤。
忐忑不安的媽媽一直在家門前守候，當看到他倆時，那種由心而發的喜悅是我從來沒有看過的；神不守舍的爸爸也罕有的流下了久別重逢的男兒淚，摸着他倆的頭；至於阿旻，她表現得比較含蓄，只是微笑着擁他們入懷。
幸福快樂未必是大富大貴，一家人齊齊整整，迎來一個大團圓結局，看似平淡，其實都已經可以很幸福。
「阿曉，你都無事吖嘛？」媽媽問道，幸好終於有人記起我了。
「哦，無咩事，我都話好簡單就搞掂，唔駛擔心㗎喇。」我露出勝利的微笑。
「你去咗個幾鐘，我哋都唔知幾驚，走返過去睇又唔見咗你。」爸爸也對我表現出少有的關心，不是說他平時不關心我們，只是說出口的關心比較少而已，是一個不折不扣的傳統男人。
「我都話唔駛擔心㗎，阿哥都話已經兩進兩出鎮魂塔，今次只不過去多次之嘛，又點會有問題？佢可能已經拎埋pass㖭。」阿旻半開玩笑又半挖苦道。
「睇嚟你終於都信。」我直接迎擊。
「無信喎，咁唔科學嘅嘢，我點會信？我估係你中咗啲迷魂嘢，被人帶咗唔知去邊，之後演咗場戲畀你睇。」阿旻搖頭道，接着再問︰「本嘢呢？」
「我肯狠定係入咗鎮魂塔，唔信你問佢兩個。而本嘢我用嚟交換咗佢哋返嚟。」我笑着說︰「不過最重要，關於單案嘅嗰幾張剪報我已經抽咗出嚟。」
「佢兩個掛住玩，點會知咁多？不過你咁夠薑出蠱惑，唔驚班人嚟尋仇？佢哋連細路都捉喎。」阿旻擔心起家人的安全。
我胸有成竹對她說︰「驚？都未驚過。佢哋喺鎮魂塔入面出唔到嚟㗎，而且只要我哋喺屋入面，佢哋就乜都做唔到。」
無錯，根據刁小姐所說，鎮魂塔內的鬼要走出來現實世界，是要在特定條件之下才有機會，並不能隨意出入，那個條件雖然不難，但也講機緣，這亦是我願意放手一搏的原因。
「最好佢哋真係鎮魂塔入面嘅鬼。」阿旻投降，放棄再與我爭論。
晚上，為了慶祝阿曦和阿晴的失而復得，媽媽特意做了滿桌子他們愛吃的菜，但他們一反常態，只專注吃白飯和叉燒，對平常愛不釋手的煎雞翼、椒鹽鮮魷和蒸魚不聞不問，大概是他們在塔內太久，有點累，所以才反常吧！
