唇舌之爭
這個大牢與現代的監獄無異，只是柵欄不是用鐵造，而是用鑽石造，而大牢內也設有床鋪、食物販賣機，還有廁格，我想這算是一個豪華的大牢了。
我們在大牢內乾等，不知等了多久，啲悲依然未出現，甚至連除了我們以外的人也看不到半個，大家也有點不耐煩了。
首先發難的是亞旺努，他握着鑽石柵欄用力的搖晃，以他的力量和女母的建築水平，一般的柵欄早就壞了，好一點的也會被搖得鬆了，唯獨這一個柵欄紋風不動，無論亞旺努多用力，鑽石柵欄始終屹立不倒。
「點解呢個大牢咁實淨嘅？點推點搖都唔郁。」亞旺努累得放棄了，直接躺在地上休息。
同時，樂蒙也在研究這座大牢的結構，發現與他們居住的洞穴很類似，基本都是開鑿出來，一體成形，只有這些鑽石柵欄是後天安裝，但卻異常堅固，技術非凡。
「救世主大人，呢度嘅建築技術好似幾好，同我哋之前去過嘅部族完全唔同檔次。」樂蒙讚賞道。
「的確，」我亦毫不吝嗇的稱讚說︰「佢哋嘅建築工藝比你哋領先幾十個世紀，啱啱畀佢帶入嚟嗰時經過嘅建築你哋有無留意？呢度同我住嘅現世界相差無幾，係現世界七、八十年代嘅水平。」
此時，一直看着窗外的亞骨多它說︰「有一個加本族人騎住一個史拉族嚟緊，後面有好多史拉族跟住，可能佢就係我哋一直等緊嘅啲悲。」
「好，終於肯嚟，一陣一定要說服佢幫手。」我立即充滿鬥志。
數分鐘後，騎着史拉族的加本族人來到我們的牢房前，而剛才一人包圍我們的史拉族凶惡的說︰「見到啲悲大人仲唔坐低？你哋高過啲悲大人係咪想作反？」
「坐低？睇嚟呢度興坐低表示恭敬，仲要唔可以坐得高過佢，有趣。」我心想，然後不自覺的嘴角上揚，笑出了一聲「嘻」。
那個史拉族立即把我拖出去，命其他史拉族人堆到我腳下把我推高，然後當着其他人面前讚揚道︰「你哋要好似佢咁，見到啲悲大人要笑，咁先係尊重！」
雖然莫名其妙被表揚，但我還是感到高興的，於是嬉皮笑臉、半開玩笑對樂蒙、亞旺努和亞骨多它說︰「快啲笑吓啦，唔好死老竇咁，佢哋鍾意人笑。」就這樣，他們都勉強擠出笑容，而史拉族也笑了，整個場面仿佛和諧了，緊張感也消退了不少。
誰不知，這只是大戰前的先禮後兵。
勉強擠出的笑容慢慢變成虛假的笑聲，虛假的笑聲又逐漸演化成真心的笑臉，最終成為發自心底真誠的笑顏。
「收！」啲悲突然站起來大喝一聲，史拉族人的笑容立即消失，板起了臉，而我們四人一來不知發生甚麼事，二來也的確反應不及，笑容是僵住了，但也是維持住。
看到我們還有笑容，史拉族們立即彈到我們身上，用重量把我們重重壓在地上，動彈不得。
「喂！我哋咪笑緊囉，做乜事？」我大叫伸冤。
「掌！」啲悲指着我說，然後壓在我身上的史拉族便一人一下的掌我嘴，掌了足足一百下才停下來。
受到這種屈辱，我生氣了，我破口大罵︰「可怒也，你呢個茄呢啡竟然咁對我呢個救世主？三分顏色上大紅，唔畀啲顏色你睇都唔得！兄弟，做嘢！」
我一聲令下，樂蒙和亞旺努率先發難，把身上的史拉族人都甩開，然後再替我撥走身上的史拉族。
而亞骨多它也按下腰帶的按鈕，飛行翼彈出，把部份的史拉族彈走後，再飛起把身上剩低的史拉族也甩開。
一輪操作後，我們便與啲悲對峙起來。
「撤！」啲悲說完後，史拉族人便疊起來把出口堵住，自己則騎着史拉族人離開。
「WTF？咁就想走？咪住！」我立即大叫，無視堵門的史拉族衝了過去，坦白說，我以為我會被反彈回來，豈料我竟然真的衝了過去，只是身上留下了黏黏的、滑潺潺的黏液。
既然衝了過去，我也不再猶疑，立即上前擒殺啲悲。我極速跑到他身後，一躍而起，待他發現的時候，我已經雙手抱着他的身體，慣性與衝擊力把他撲倒了，雙雙倒在地上。
「喂！你……」我本想繼續說下去，但眼前的景像強行把我暫停了，因為這個本應是加本族族長的啲悲，竟然也是黏糊糊的史拉族人，難道亞骨多它聽到的傳聞是真有其事？果然空穴來風未必無因？
眼見真正身份敗露，啲悲立即對座騎下指令︰「包！」然後座騎便撲上前把我吞進體內。他的身體就是一個大的黏液綜合體，被他吞進肚內的我雖然能看到外面，但我整個人全被他包裹得緊緊的，完全不能動彈，不過有趣的是，我呼吸依然順暢，丁點的黏液也沒有隨着呼吸吸進體內。
他帶着我一直爬，我就像被鎖在一個流動監獄一樣遊街示眾，沿途的史拉族看到我也指指點點、竊竊私語，我雖然沒有犯事──最少我自己是這樣認為──但確實也有點不是味兒，真的想挖個洞把自己藏起來。
就這樣爬了十數分鐘後，他終於在一座府邸前停了下來。這座底邸有個氣派的前庭，由大閘走到大門前會經過花園和噴水池，而且花園種有不同的花草樹木，可以四季常開。至於大宅則是佔地很大的一層平房，但外觀上與禮賓府相約，只是面積比它大上好幾倍。
很快，大宅內又出來了十數個史拉族人迎接我們，我一直被帶到大門前才被吐出來，然後被運到大宅內的會書房坐下來，而坐在書桌另一面的，正正是啲悲。
「喂，你想點？運我到咁遠又係見返你，有咩啱啱當面講埋唔得咩？你呢個可惡嘅史拉族！」我不滿的道。
他聽到後大笑起來，笑了好一陣子才靜下來，然後對我說︰「唔好意思，啱啱個分身對你咁粗暴，我代佢同你道歉。啱啱嗰個係我嘅史拉族分身，而你面前見到嘅呢個我係真真正正嘅加本族族長啲悲。我之所以接待你過嚟，係因為你一望就同其他人唔同，唔係女母嘅人，我諗你係現世界嚟、七十幾年先出現一次嘅救世主，我有無估錯？」
我對眼前自稱為「加本族」的啲悲始終有點戒心，畢竟剛剛才被一個假扮的騙了一次，天知道這個是不是又是史拉族假扮的，所以我說話有點保留︰「既然你知我係邊個，仲咁對我？」
「你嚟得，都係想我犧牲自己，用魔法陣消滅粒妖星，我有無估錯？」啲悲推敲道。
「吓？乜犧牲你可以發動魔法陣消滅妖星？我第一次聽，咁就靠你喇，早啲搞掂我早啲返自己世界。」我詐傻扮懵說。
「哈哈，乜你唔知？見你有有佐呼族同柯卡族跟班，以為佢哋嘅族長有同你講，咁睇嚟佢哋都貪生怕死，唔願意犧牲自己救返其他人，咁個魔法陣永遠唔會發動到。」啲悲說。
「Shit，畀佢擺咗一道，咁好難兜返去叫佢幫拖。」我心想，口卻回答︰「雖然個魔法陣發動唔到，但都仲有其他辦法嘅。」
啲悲聽到後有點好奇便問︰「喔？仲會有啲咩辦法？願聞其詳。」
「可以用科技去打爆粒妖星。」我隨口答︰「以而家嘅科技，整枝飛彈射過去將佢打碎，然後佢嘅碎片經過同大氣層摩擦燃燒，無咩幾多會落到嚟女母，非常安全。」
「呢個方法唔可行，以前已經試過，之後嘅反饋太可怕，係毀天滅地，直接將女母變成煉獄！」啲悲反應很大，若非親歷其境絕不能造得出這種反應。
不過我還是故意問︰「你親眼見過？成個過程係點㗎？我想知多啲，可能係中間有啲嘢出錯咗先會咁。」
啲悲聽到後臉色一沉，語帶威脅的對我說︰「有啲嘢你唔知好過知，你知得嘅嘢之前嘅族長都應該講過你知，其他嘅即使你係救世主都唔知得，否則後果自負。」
根據目前形勢，看來也是問不出當初事件的全貌，片段的一秒剪接位之謎只好押後再解，於是我立即將話題重新轉移到魔法陣上︰「咁用科技唔得，即係要用返魔法陣，其實係點樣操作？點解要犧牲？」
「魔法陣係傳說，無可能會完成到。」啲悲悲觀的說︰「先唔講要犧牲幾個族族長嘅命，而家史拉族已經名存實亡，無咗族長好耐，佢哋最後一任嘅族長已經為發起女母亂戰付出咗代價，從此之後史拉族變咗流亡一族，被各族趕盡殺絕，族人都越嚟越少，直至我哋族幫手說服其他族放過佢哋，佢哋先得以苟延殘喘，而佢哋嘅文化同文明已經喺不斷嘅躲避中消失殆盡，所以召喚魔法陣係無可能實現嘅事。」
「吓？咁之前嘅努力咪即係白費？」我衝口而出，也顧不上我的謊言會被識破。
「之前嘅努力？唔通你已經說服咗其他族嘅族長？」啲悲非常敏銳，抓住了我的大意失言，續說︰「就算其他族長肯幫，我都肯幫，最後都係發動唔到，就係咁。」
「咁真係只有炸咗佢呢個辦法。」我心意更加堅定。
「為咗成個女母好，我會阻止你。」啲悲堅決的說。
與他硬碰硬絕不明智，於是我嘗試說服他︰「你知唔知每次妖星嚟，對其他族造成幾大嘅傷害？又水災又地震，咩天然災害都有。而今次唔只係經過咁簡單，仲會墜落，係一次世界末日！如果你真係為女母着想，好應該消滅佢。」
啲悲站起來走到窗前，背對着我說︰「妖星會墜落？荒謬！咁多年以嚟，妖星都沿住固有軌道飛，完全無誤差，會跌落嚟絕對係無稽之談！」
「睇嚟你知道好多嘢，同其他族完全唔同。既然你知妖星唔會跌落嚟而係只會經過，但每次都引發咁多天災，點解唔幫手消滅佢一勞永逸？」我再遊說啲悲幫忙。
啲悲重申自己的立場︰「絕對無可能。我比任何人都清楚夾硬妖星帶嚟嘅傷害，所以我先要阻止你。點解我咁致力令到我哋加本族有屋有樓？點解我哋要離開海邊湖邊同森林，令到生活咁不便，咁缺天然資源？我哋係無可能同大自然抗衡，唯有適應、迎合同應對先可以生存到。你哋唔係有句名言叫『物競天擇，適者生存』咩？我從前都係諗住征服，聽完呢句之後我就變成適應。」
不能否認，啲悲的一席話令我如夢初醒，現世界有很多國家都有類似的天災不停發生，他們都是選擇改變自己與天災共存，而不是改變它，畢竟我們的確改變不了大自然。
「所以你哋嘅建築先咁似現世界，係前任救世主設計嘅？」我問。
「係，而且經史拉族嘅工匠改進之後，比現世界嘅更穩固。」啲悲自豪的說。
「咁既然你有咁嘅能力，點解唔教埋同幫埋其他族？大家一齊安然渡過危機唔係更好咩？」我忍不住問，因為我相信「惻隱之心，人皆有之」。
只是，我犯錯了，忽略了不是人人也願意放低尊嚴成為受助者。
啲悲嘆氣說︰「我試過，但失敗咗。佢哋唔聽唔信唔改變，淨係信古老嘅傳說同魔法陣。我都無計可施，只好保住自己一族。」
此刻我慶幸自己已經幫助他們興建了能基本防禦天災的房屋，可是要在天災中完全零傷害恐怕是無可能，特別是我根本不清楚各族的地理位置會有甚麼天災，以及嚴重程度，所以最好的辦法是找到一個完全不受影響的地方安頓好他們。
「言下之意，你呢度係唔受任何天災影響？」我試探性的問。
「會有少少，但唔會係滅頂程度，只有輕微損傷。」啲悲誠實回答。
聽到這答案後我便放心了，我嘴角上揚，大膽提議︰「叫佢哋搬哂過嚟住就搞掂喇。」
啲悲好像一早已猜到我的詭計，我話音未落便回絕了我，並加以解釋︰「一，除咗艾芙族會四處流浪之外，其他都唔會放棄自己族地，嗰個地方就代表佢哋族，離開咗佢哋就唔係佢哋。二，由於艾芙族四處流浪，所以都揾佢哋唔到。三，呢度都無咁多地方可以住哂咁多人。四，各族只要靠得太近，一定會有事發生，女母亂戰就係一個好例子。」
我聽後就是不服，所以我毫不退讓，逐點反駁︰「一，只要有合理原因同我出口，佢哋一定肯搬。二，艾芙族我知佢哋所在之處。三，只要規劃好，以呢塊地嚟計，絕對可以住哂所有人。四，訂好規矩，各族和平融洽平等相處，就唔會有紛爭。」
「天真，我係唔會容許，而且你都無咁多時間。」啲悲嚴厲的說。
「你呢度大部份都係史拉族，而且我留意到你哋同其他族唔同，你哋已經有自己嘅經濟系統，即係話由市場話事，金錢掛帥，唔到你干預。」我嚇唬道。
啲悲不慌不忙的說︰「你認為邊個決定錢嘅價值？你認為邊個有最多嘅錢？」
「完全唔重要，」我用不知哪裏來的自信的笑道︰「既然你哋有金錢概念，只要我用第二種貨幣取代到你現行貨幣就得。」
「哈，理論上可行，理想上好完美，操作上好難，實際上無可能。你呢個救世主真係好天真好幼稚，睇嚟都要等下一個出現。」啲悲不留情面道。
我沒有回答，只是冷冷一笑就轉身離開，在踏出門口一刻停住了，轉身對啲悲說︰「仲有，我啲同伴，你精就快啲放返佢哋。」
「憑咩？」啲悲再次回絕我。
「無所謂，我都係禮貌上循例同你講聲。」我說完頭也不回的走了，門口的史拉族因為沒有啲悲的命令，所以沒有加以阻撓，安靜站着目送我離開。
雖然和啲悲的談判破裂，但最少我已經清楚魔法陣是永遠無可能再發動，只有用科技去消滅它，或者適應它這兩種方法。不過已經不只一個人說用科技會帶來嚴重的反饋，後果會毀天滅地，到底事實是甚麼？我始終覺得和那一秒的跳格有關，但跳格的秘密又是甚麼呢？
另外，要推翻啲悲對這條村的控制，便要運用到我的石幣，但應該如何將石幣打入這個封閉的市場？如何改變人們的習慣，放棄本身的貨幣，擁抱我的石幣呢？真令人頭痛。
除此之外，有另一個更令我頭痛的事情，就是我沿着被送來的路往回走，但始終都找不到大牢，只是不停的回到那座府邸前，難道是鬼打牆？
