死，是生之始
翌日，葛族如啲悲所說如期來到。
葛族人是沒有回到現世界的救世主與女母的不同族人結合所誕生的，是混血兒，而混血兒一般也生得比較漂亮，他們也不例外，男的高大俊俏，女的窈窕美麗，完全沒有女母人的特徵，都生得像現世界的人。
四族族長以及他們的族人一早已經必恭必敬的等待葛族大駕光臨，而我也被逼要早起迎接。
「歡迎葛族大人親臨，吾命歸汝。」全場所有人齊聲高呼，除了我。
「各位唔駛咁多禮，大家都係女母人，大家都係平等。」一頭順滑金髮、身材曼妙、眉清目秀的女生說，她是走在最前的人，想必是葛族族長。
雖然她這樣說，但全場的人無一平身，全部都仍然維持九十度鞠躬狀態。看見這情形，我忍不住開口道︰「人哋都咁講，你哋就快啲起身，唔好要人難做。」
可是他們始終像石像般一動也不動，直至啲悲走出來帶葛族的人離開，他們才再次動起來。
「乜對住哋，你哋要咁卑微？」我不解的問瑪瑪露、魯啦和曬仁鐵士三位族長。
「佢哋嘅地位可以話係我哋嘅神咁上下等級。」瑪瑪露答。
「我哋所有嘢都係佢哋賜予。」魯啦也說。
「對於任何一個葛族人嘅說話，我哋都要絕對服從。」曬仁鐵士回答時更一臉幸福。
可是聽到他們的回答，我第一個反應是覺得荒謬至極，明明只是普通人但卻享有神的地位，十足「天龍人」﹔同時我也明白到為甚麼片段中的一秒跳格大家會絕口不提。或者，這些葛族人現在還在進行着一些瘋狂的事，只是大家敢怒不敢言而已。
正當我還在自我幻想的時候，啲吉跑到我面前，上氣不接下氣的說︰「救世主……大人，夏娃大人要見你，請跟……請跟我嚟。」
「好，我都想會一會佢。」我欣然答允，隨着啲吉走到啲悲的府邸，一直走到啲吉的書房，只見啲悲九十度鞠躬的站在一旁，而剛才那位葛族族長，即啲吉口中的「夏娃大人」正端正的坐在座位上，她身旁站着一個鬈曲棕髮、身材壯健、英俊瀟灑的男生，至於其他穿着全套長袍手持武器的葛族人則站在書房的一旁。
「你好，現任救世主大人，請坐。」夏娃謙恭的說，然後再命其他人在書房外等候，只留下鬈髮男生。
「呢位係亞當，係我嘅伴侶。」夏娃簡單介紹。
「你係夏娃，佢係亞當，一定係咁，好合情合理。」我自言自語道，但聲量故意大一點，好讓他們知道我並非無知之人。
「你揾我嚟係咪有啲咩重要事要傾？」我禮貌的問，畢竟她到目前為止還是對我很禮貌。
夏娃半掩着嘴笑了出來，舉止端莊，完全是上流社會人士才有的好教養，然後對我說︰「救世主大人果然聰明。最近喺我哋伊甸園有種石幣開始流入，打聽之下先知原來係今次救世主大人嘅功勞，將唔同族嘅以物易物變成用錢交易，令到大家交易頻繁咗，交流多咗，進步快咗，而且最近仲促成咗種族融和，將全部人都聚埋一齊住。葛族作為女母嘅主宰都樂見此事，所以難得你嚟到附近，就想同你見一面，當面答謝你。」
送了我一頂如此大的高帽，我沒辦法逃避不戴，但同時我的警戒心達至前所未有的高水平，根據多年看電影經驗，一個又美麗又禮貌又好人又受人景仰又德高望重的人，鐵定是大反派。
「唔駛客氣，幫助女母進步係我嘅使命，啲石幣嚟緊會通行全女母，你哋收定儲定差唔多。」我提高警覺，準備隨時擋開她的舌劍和唇槍。
「我哋一直都想統一貨幣、種族融和，但各族一直都各自為政，無論我哋有咩政策計劃佢哋都唔接受，令到我哋都好頭痕，今次真係多得你，我哋先成功到。」夏娃傾前握着我雙手十分感激的說。
我承認此刻我的確有一點相信她的說話，畢竟自古英雄難過美人關，她出動美人計我很難不心動，但幸好我有多年看電影的經驗，理智尚在，面對她的軟攻我選擇與她保持安全距離。
我收起雙手，禮貌大方的說︰「我都係盡力而為，只係咁好彩佢哋肯聽我講，所以先成功到，不過以後都係交畀你哋去管治，因為搞掂哂啲嘢之後我會返去現世界。」
聽到「現世界」三個字，夏娃和亞當露出了詫異的表情，但轉瞬即逝，常人很難察覺得到，只是偏偏被我看到，我不解的問︰「做咩聽到我話會返現世界你哋會咁詫異？你哋係咪知道啲乜？」
夏娃維持大方得體的語氣說︰「唔知你有無聽其他人講過，嚟得女母嘅人係無一個返到去現世界，其他族或者唔清楚點解，但嚟呢度係單程路，有去無回，而且現世界已經無你嘅容身之所……」
「無我嘅容身之所？」我雖然聽得很清楚，而且每個字都認識，但加在一起我卻不太明暸這句說話的意思︰「我有交租，點會無我嘅容身之所？」
「我指嘅係你靈魂嘅容身之所。」夏娃凝重起來，令書房的氛圍變得沉重。
我吞了一大口口水，問︰「你意思係我而家係靈魂出竅，肉體仲喺現世界？」
「類似，不過唔係靈魂出竅，而係你已經死咗。」夏娃說︰「女母係死後嘅世界，當然呢個只係對你哋現世界嘅人嚟講係咁，對我哋本身喺女母生活嘅人嚟講，女母係我哋生存嘅世界。」
「但我會痛會餓會渴會攰會眼瞓，死咗又點會有呢啲感覺？」我始終不能相信，嘗試反駁。
「你有呢啲感覺好正常，因為女母都係一個生存嘅世界。死亡只係換咗一個繼續生存嘅地方，每個生命初始嘅地方都唔同，但最終大家都會去到同一個終點，分別只係每個生命經歷嘅世界數量會唔同，所以死亡其實唔可怕，死亡唔係乜都無哂，相反，死亡係喺另一個世界繼續生存落去。」夏娃解釋道。
夏娃的說話我能夠理解，但我不相信，這必定是她的陰謀，她這樣說，背後一定有古怪，或許是要利用我去達成甚麼目的，所以才要留住我，我不會輕易中計！
「你呢個理論都幾完美，令人唔再恐懼死亡，咁就會有班唔怕死嘅人任你差遣，如果我定力差啲都信咗。」我自信已經猜得出她的陰謀，故闡述我的推理︰「我諗你都係想用呢個無稽之談嚟打謝我，等我留喺度幫你唔知做啲咩。可惜我已經識破咗，你死咗條心，我係唔會中計。」
聽到我已經猜得出他們的用意，亞當惱羞成怒，氣沖沖的走到我身邊想把我抓住，但夏娃及時制止了他說︰「亞當，停手。你夾硬帶佢走都無用，佢唔信我哋都無得逼，只有等佢慢慢接受。」
「搞笑！」我毫不畏懼，指着他們說︰「我係點都唔會畀你哋利用，受你哋擺布，我會揭穿你哋，攻擊妖星嘅真相、條片嗰一秒嘅跳格，我會拆穿你哋嘅陰謀，將你哋拉落神枱，然後再用勝利者嘅姿態返去現世界。」
「救世主大人，你唔駛咁激動嘅，冷靜啲。」夏娃開始害怕，打算勸說我︰「你想知真相，我可以而家講你知，不過你唔好同其他人講，佢哋接受唔到。」
我態度囂張的說︰「係佢哋接受唔到你哋係騙子，定係你哋接受唔到佢哋反你哋呀？」
面對我的百般挑釁，夏娃始終謙恭有禮，相反亞當早已面露不悅，一副想把我置之死地的樣子。
夏娃繼續冷靜的說︰「無論係邊種情況，我哋女母都係接受唔到。」
我白了她一眼，沒有說甚麼，靜心等待她解釋，再從中抽秤她、找出她的破綻。
夏娃看到我沒有回答，便開始解釋︰「我哋嘅祖先其實都係救世主，應該話我哋葛族都係由歷任救世主同女母人結合所生，所以我哋嘅祖先都一樣試過消滅妖星，亦都好早已經知道魔法陣無辦法發動，於是就不斷研究其他方法，直到上次妖星又嚟嘅時候，我哋嘗試用科技炸咗佢，結果造成好大嘅反噬。」
「係點？一秒跳格又係咩事？」我立即問。
「我唔明你講嘅跳格係咩意思，不過嗰次個反噬強到直接將成個女母重啟。」夏娃憶述︰「當時嘅夏娃大人仲即刻引咎辭職，傳位畀上一任夏娃大人。」
「可唔可以講多啲係點樣反噬？我畀條片你睇，你解釋吓。」我邊說邊拿出容器七十，並示意她把頭伸前。
就像八達通，把容器七十放到她額頭前，裏面的內容自動讀取，她透過我的指示，直接查看那條跳格片，起初她有點疑惑，但看了數次後，她像想起了甚麼，驚訝的說︰「呢條片我細個睇過，嗰時我都問過夏娃大人同樣問題，我記得佢話條片無咗嘅畫面，就係粒妖星化身無數細小嘅分身襲擊女母，令到當時女母嘅文明毀於一旦，之所以剪走咗，係唔想睇到條片嘅人有創傷後遺症。」
細小的分身？不就是被擊中後散落的碎片變成的隕石嗎？這證明科技其實是有用的，只是威力不夠、位置不對、知識不足而已，誤將隕石認為是妖星的分身。
「有無條原片可以睇？」我問︰「我有啲嘢想確認吓，如果我無估錯，就可以徹底解決粒妖星。」此時的我已經將葛族要把我留在女母的陰謀拋到九霄雲外，一心只想着消滅妖星，再返回現世界。
「對唔住，原片已經銷毀咗，我都無睇過。」夏娃用充滿歉意的眼神看着我，完全不像說謊。
沒有了原片，只有她的片面之詞，雖然不像說謊，但始終存在風險。如果我猜對了，整個女母便一勞永逸；萬一是我猜測錯誤，全個女母便要陪葬，是all or nothing的局面，我下不了決定。
夏娃一眼看穿了我的顧慮，單刀直入問道︰「你想再試多次用科技消滅妖星，但又驚失敗要全部人一齊犧牲？」
我有點錯愕，她竟然能把我的顧慮一語道破，我只好點頭示意。意想不到的是她竟然笑着說︰「我哋女母人無一個會驚死亡。正如我之前講，我哋好清楚死亡只係由呢個世界轉咗去另一個世界生活，除咗重新適應環境之外就無咩嘢問題。」
夏娃再次搬出了女母人的死亡觀，但這真的是女母人的死亡觀嗎？還是只有葛族才有這想法？我沒有回答她，她也沒有再追問。
「救世主大人，你可以再慢慢諗吓想點做，係要消滅佢定同佢共存。我估你都知道其實粒妖星係唔會墜落，只係會引發自然災害，而喺而家身處嘅呢個地方，基本上已經唔受自然災害影響；但相反，如果你估錯，妖星消滅唔到，仲會為女母帶嚟滅頂之災，你要好好考慮清楚。」夏娃客觀的分析，但我始終認為她在威脅我。
隨着我們的對話結束，我離開了啲悲的府邸，可是夏娃的說話始終令我耿耿於懷，當中有很多問題我都要找三位族長求證。
