夢想成真之時
「各位女母嘅倖存者，好歡迎你哋嚟到界。界係一個界乎於女母同下一個世界嘅地方，喺安全、無災難嘅理想世界，你哋喺度絕對可以安居樂業。」我開始了我的演講︰「目前為止都係葛族專用，但經過我同佢哋交涉之後，佢哋都同意大家一齊喺呢度生活。我知各族族長同好多親人、朋友喺啱啱嘅妖星墜落嘅時候遇難，本人都深表遺憾，我哋為佢哋默哀一分鐘。」
雖然我不清楚他們知否默哀為何物，但我還是低頭靜默了一分鐘，然後續說︰「女母喺未來一段長時間都唔適合居住，所以界會係你哋嘅居所，我會喺度建設一個五族共融嘅城市，等大家可以好好生活。」
「騙子！」人群中有人突然大叫，然後陸續有人附和，甚至有人想衝來我面前，場面幾近失控，幸好有部份人制止才沒有釀成流血衝突。
面對這場面，我完全反應不過來，只能站在原地呆若木雞。不過當場面受控，我腦袋恢復運轉後，我第一時間要做的便是表現親民以獲取民心，所以我即時說︰「我絕對歡迎大家對我有意見，我會改進，所以我想問清楚啱啱點解話我係騙子？」
「你同大家講妖星唔係呢個世界嘅嘢，唔會墜落，唔會造成破壞，但而家呢？點解會搞成咁？你仲唔係騙子？」聲音在人群中傳出，我花了很大的勁才發現原來是咪啦。
我知道原因後，便對大家解釋︰「的確，妖星本來唔會造成任何破壞，但你哋嘅光線將成件事改變哂，妖星由現世界傳送咗過嚟，所以先搞到咁。」當然，我只將部份事實說出來，以免背禍。
我解釋完後，他們都安靜了，而且面露慚愧，看來我的解釋已經說服了他們,於是我繼續擔起好人的角色說︰「聖人都有錯，大家都唔好咁慚愧，我哋可以生存都係因為佢哋犧牲，所以你哋更加應該努力活着，連佢哋嘅份活下去。」
我一番鼓勵後，他們都釋懷了，於是我便宣佈接着的計劃︰「界呢度葛族已經事先幫大家試驗咗，亦開發咗一部份基建，呢度係絕對安全，所以我打算喺度幫大家建立一個現代化嘅共融社會，藍圖都已經有哂，只係欠人手幫手。」
聽完後大都議論紛紛，我也不賣關子，將本身的伊甸園擴展計劃改成界發展藍圖，照辦煮碗說一次，果然全場的人也很受落，而且我亦順利招聘到一大班人手。
然後，我再宣佈發行新的錢︰「石幣喺呢度好難生產，所以我會用新錢虛幣代替，佢無實體，只存在喺大家嘅虛包入面，攜帶方便。用處同石幣一樣，如果大家有石幣嘅，歡迎一陣嚟揾我換做虛幣，十石幣換一虛幣。」
隨着我的說話，亞當等五人將虛包逐一派發給在場人士，我也繼續介紹道︰「每個虛包入面都有十個虛幣送畀大家，等大家可以應付到基本生活開支同埋揾我買樓，之後陸續都會有職位空缺提供畀大家賺錢，大家望吓左面嗰兩塊招聘版同人才板，分別係僱主請人同僱員推銷自己用，等大家都揾到合適嘅人同工。」
接着我指着身後的空地說:「未來呢度會有個全息影像地圖，方便大家揾路，因為界係乜都無，要揾某個地點有時未必有地標，有地圖之後就可以睇清楚點行，唔會蕩失路，未來仲會研發埋導航功能直接帶路，敬請期待。」
最後，我對倖存者許下了承諾︰「我會持續監察女母情況，嘗試搜救，同埋用科技改善環境，盡快令大家可以重返女母。我今日要講嘅係咁多。」
說完之後，我頭也不回的離開，將建設界的任務交給亞當等五人，我只負責監察品質，以及專心於拯救女母的工作。
時間過得很快，界也日漸繁榮，人們生活安穩，妖星墜落的傷痛恍惚已經消失無蹤。
現在界的領導人是亞當，我的父系社會革命很成功。由於女性在日常生活中不斷的變成下位之後，她們心裏也產生了自己不及男性優秀的想法，於是在界完工的一刻，夏娃便宣佈把領導之位傳給亞當，自己退居幕後，專心相夫教子。歸功於我的教導得宜，亞當用人不論男女，只論能力，使得整個社會非常和諧，沒有權力鬥爭，發展亦一日千里。
而我本人則被捧為界之父，所有界的發展建設上都會詢問我意見，擔當顧問角色，看似舉足輕重但實際上徒具虛名，並無實質權力，甚至連財富也積累不到，現在都是靠社會援助勉強渡日。
為何大業主會淪落到這樣？因為拯救女母使我千金散盡。我當初提倡的拯救女母計劃良久也沒有大進展，但資源消耗卻異常龐大，經常使得亞當的政府捉襟見肘，於是在他的忍痛公投之下最終被中止，只有我和數個有志之士私下進行，亦因為這樣，全個界那些本屬於我的房地產都被我悉數變賣作為經費，可是進展依然未見起色。
我，作為異世界地產霸權的時間很短暫，亦始終未享受到那無限金錢、呼風喚雨的感覺，無論在現世界還是異世界都是窮人一名，只是我在現世界是夕夕無名的窮人，在異世界是街知巷聞的窮人兼救世主，這也算是一種成就吧！
$$$$$$$$$$$$$$$$$$$$
「歡迎收睇十一點半晚間新聞，今日嘅新聞提要有︰今早因升降機墜落而受重傷的三十四歲男子，延至晚上九時搶救無效宣佈死亡，政府發言人稱會進行一次全港升降機檢查。香港樓市進一步下跌，再有發展商以低於成本價賣樓……」
