聖誕節，喺外國係一個講家庭溫暖嘅節日。
一家人去食大餐，傾下計講下心事，互相交換禮物，呢啲都係家庭成員之間互相分享愛嘅方式。
去到夜晚，總有啲有心人扮聖誕老人、Carol Singer，四出奔走到唔同地方送禮物。
禮物可以係一本書，一件棉褸，都可以係一首歌，咩都有。
一切一切，都係為咗更多人能夠感受聖誕節象徵嘅溫暖。
但係唔知點解，聖誕節去到香港會變晒味。
聖誕節變咗另一個情人節，所有人都係計劃點樣同男/女朋友過一個難忘嘅一日。
經商家同傳媒包裝之下，聖誕節「街上情侶一對對」好似變咗理所當然咁。
仲有一班高登巴打不斷叫春，好似聖誕節冇囡同自己過就係人生嘅失敗。
事實係咪咁？
曾經，有一個朋友，有一段聖誕節失戀嘅故事。
去年嘅十一月，Brian同Ann開始咗一段為時兩個月都冇嘅戀情。
快來快去，可能好多人都唔當係拍過一次拖，但係佢status得A2，梗係多一次好過少一次啦，貪A1麵包好食咩。
咁熱戀期梗係想plan得好啲啦，但係學生哥又無咩錢，之前成個月死慳死抵都係慳到五百蚊budget出嚟慶祝。
五百蚊可以做咩？一餐好好睇睇嘅晚餐加一份睇落貴貴地但係實際唔貴嘅禮物，得咁多。
(實際點plan梗係唔講啦，比啲朋友起到底咪大鑊)
不過點plan都唔緊要啦，其實去到尾都係用唔著。
原來聖誕節喺女生眼中，就好似玩飛行棋果陣有個得「六點」嘅骰仔咁，永遠都係佢話事，男仔注定輸到一仆一碌。
你問點輸？即係人哋四隻飛機去晒終點，你仲等緊葉劉淑儀幫手起機呀。
你嘅budget會由五百蚊變成無上限，你嘅節目會由行街睇戲食飯變成睇人行街幫人俾錢請人食飯。
見住Ann喺潮特睇嚟睇去都買唔到嘢嘅時候，Brian有一刻仲以為佢行完新之城買咗幾袋嘢之後終於肯收手。
點知...
「Brian我哋去朗豪坊買accessories好唔好？」
成個銀包空晒咪可以成個拗彎囉，真係bend晒架。
朗豪坊大家都去過啦，但係你哋又知唔知佢最恐怖嘅地方係咩？
就係搭完兩條長電梯之後，之後對上幾層都係好似遊花園咁，一直兜圈再兜圈。
路又窄，樓梯又多，事實上你係好難有決心一口氣走到上最頂。
所以每一間舖頭你都會行過，每一間舖頭你都會有更加大嘅衝動走入去。
平時同朋友去都幾好嘅，邊行邊吹水，總有一間啱心水。
但係當俾錢同攞嘢果個都係你嘅時候，身痛心更痛呀！
「Brian你無錢喇？有冇攪錯呀，聖誕節都唔帶多啲錢出嚟，識唔識do架？」
Ann一路攞住個Mastermind銀包，一路喺自己銀包攞緊錢出嚟。
可能Brian曾經有一刻以為：Ann係買緊一個新銀包比我。
佢最近先話而家諗返起都覺得on99。
後尾先知道原來佢由頭到尾只係當佢係兵，銀包係用嚟派第二隻兵嘅軍糧，不過呢個係第二段故事了。
行完街就梗係食飯啦，正當去緊大滿屋食放題嘅時候，媽媽突然打電話比Brian。
「爸爸腸胃炎入咗醫院呀，你快啲襯探病時間未到去QE探佢啦。」
比你係當時嘅Brian，你會點做？佢就揀咗屋企人了。
「之前講好咗聖誕節要留比我架喎。」
「屋企人有病，唔通唔交人咩？」
「我唔理呀，你應承咗我就要陪埋我食飯！」
......
「咁你陪屋企人囉，以後唔使搵我啦。」
十二月二十六日，Brian重新成為pool中嘅一份子。
可能係因為俾Ann發現食餐放題都要AA制，都可能係真係覺得個男仔覺得自己唔重要。
你問Brian係咪做錯咗，可能唔同人會有唔同嘅答案。
但係你問我？我唔會話Brian完全做得啱，好多嘢可以做得更加好。
最好嘅梗係冇開始到，冇開始嘅時候就唔會有相處嘅憂愁。
但係我會覺得好多嘢只要跟隨住自己個心去做，不論結果好壞，都係值得。
有啲人會覺得愛情大於一切，都有人會覺得其他嘢比愛情更重要。
既然當初Brian選擇咗同Ann開始，作為外人，唔通唔尊重佢嘅選擇咩？
而聖誕節Brian同Ann分開，都係一件件事件使然。
如果你覺得為咗女朋友可以犧牲時間、金錢、家庭等等嘅嘢，just go ahead。
如果你覺得為咗一個港女做咁多嘢唔值得，咁咪唔好迫自己繼續落去。
甚至覺得寧願自己一個都不願有個女朋友，都無問題。
無論你嘅選擇係點，只要隨心而行，點都攞到啲嘢走。
女朋友無啦啦發嬲嘅理由係好on9，然而當初男生追求女朋友嘅理由都可以好on9。
愛情本身就係唔講理由只講感覺。
點解你會鍾意佢？
點解你會打幾份partime賺錢溝佢？
點解你會一見到佢偷食就會唔諗自己當初幾鍾意佢點樣溝佢，一句「分手吧」就飛咗佢？
因為...「值得」，就係咁簡單。
聖誕節冇女朋友可以點過？
搵班朋友出嚟唱一晚K，同屋企人食餐飯傾下計。
又或者好似啲外國人咁，做義工向有需要嘅人送上溫暖、慰問。
Single All the Way，唔代表要過一個孤獨寒冷嘅聖誕節嘅。
總有方法令聖誕不再冷。
都係果句，最緊要值得。
