火海飛翔

熬了一晚夜，我終於將設計圖畫好，這次的屋比之前的更仔細和複雜，隨樓附設的傢俱和電器比之前更多，全因飛翔城的科技能配合到我的設計，使它能與現世界的樓睇齊。

「早晨。」亞骨多它已經起床，看見我便走過來問︰「呢啲就係你嘅設計？好靚，同我哋而家嘅好唔同。」

「要襯得返呢度嘅形像，點都要cyber啲，所以我一口氣畫咗三種唔同嘅屋，高、中、低配都有，我哋要起哂出嚟，畀佢哋自由選擇。」我自豪的說。

「Cyber？」他聽不明白，但也沒有深究，因為他更在意的是三款設計的各自特色。

「等樂蒙同亞旺努醒咗先一次過講，不過需要嘅建材，你有無辦法揾到返嚟？」我憂心的問，畢竟沒有建材，所有設計都只是空口講白話。

「都係啲簡單基本嘢，無問題，包喺我身上。」他信心十足的承包了所有建材。

「你成晚無瞓，趁而家瞓陣先，我去準備需要嘅嘢。」他貼心的說，我也不好拒絕。

才剛閉上眼，便聽到樂蒙和亞旺努的聲音，連忙張開眼，睡意已經全消，我準備好向他們解釋這次的設計，但天色卻開始轉黑。

「乜呢度天黑得咁快嘅？啱啱合埋眼，都唔夠一分鐘就天黑。」我擦着眼說。

「梗係唔係啦，你已經瞓咗成個晏晝喇。」樂蒙洗好手，坐下來說。

「你仲瞓緊嘅時候，我哋已經起好咗間屋，你出去睇吓。」亞旺努沾沾自喜的說。

「吓？我都未講解就起好咗？今次同之前嗰啲完全唔同，真係掂？起得唔好好要拆咗再起㗎喎。」我疑惑道。

「唔好睇少我睇設計圖嘅能力，而且你都解釋得好詳細，我敢講一定合你心意。」亞骨多它說。

我被他們你一言我一語的自信喊話圍攻，決定親身去看一次，於是簡單梳洗後便去到他們的「製成品」前，外觀上完美還原我的設計，而內部也跟我的設計一模一樣，那些電器也與我所想像的如出一轍，在各個細節上也一絲不苟，有些部份更改善了我空想時的盲點，可以說是上中下路毫無破綻。

我懷着興奮的心情回到亞骨多它的家，毫不吝嗇的讚美他們︰「真係太還原喇，甚至青出於藍㖭，成間屋起得咁靚，今次成功賣出之後分大份啲畀你哋。」

「咁而家我哋要製造危機，令佢哋買我哋嘅屋。今次絕對唔可以賣得平，發達係呢鋪。」我的全盤大計已經蘊釀多時，今日終於可以成真。

我拿出紙，邊說邊畫︰「琴日我去咗街訪，問咗一個餐廳老闆，佢覺得而家柯卡族無哂人情味。然後我又誤打誤撞飛咗去城中心，有張通緝令，話有個人散播謠言，又四處塗鴉宣揚危險思想，後尾有個細路話科技殺死咗生活。兩件事，你哋有咩睇法？」

亞骨多它第一個有感而發︰「我明佢哋，因為以前我哋好純樸，樣樣嘢親力親為、互相幫助，人與人之間關係好好……」

樂蒙卻持相反意見︰「社會係會進步，我反而覺得科技幾好幾方便。」

亞旺努也表達自己想法︰「我都鍾意大家親密啲。」

我笑着對他們說︰「你哋講嘅嘢全部都啱，所以呢次我係賣設計，唔係樓，我要佢哋自己起，而我哋提供嘅係材料同埋入面嘅傢俬電器。」

他們聽到後擺出一個Nick Yeung經典Meme「黑人問號」的樣子。我嘴角上揚，在紙上寫了「三隻小豬」四個大字，他們看着卻不解，我忘記了他們根本不懂中文字，只認為他們猜不出我的心意，便加以解釋︰「《三隻小豬》入面，豬爸媽要三隻小豬親力親為自己起屋。故事開始時佢哋係各自起屋，而到故事最後，佢哋就一齊起磚屋，互相幫助，唔係好符合我哋嘅目的咩？而中間轉折位係因為大灰狼搞破壞，令佢哋團結，唔再互相取笑。我哋今次就係要做醜人，令佢哋重拾呢種人情味，揾返人同人之間嘅連結，唔再孤單。另一方面，間屋要用返多啲科技，令你哋柯卡族知道，科技係可以用喺住方面，唔會嘥。」

「哦……」他們異口同聲道。

「知道嘅話，我哋就開始做嘢，我哋要喺唔搞出人命嘅情況之下火燒連環船。」我望向亞骨多它，認真問︰「有無咩時間，或者方法，可以令到屋入面係完全無人？」

他想了想，肯定的答︰「曬仁鐵士節。真係只有呢一日，全城人先會出去唔留喺屋企。」

「咁幾時先係曬仁鐵士節？」我立即問，而樂蒙和亞旺努都以期待的眼神同時望向他。

「上個月啱啱完咗。」亞骨多它以失望的答案回應我們的期待。

「咁即係無哂辦法。」亞旺努失落的說。

「仲有無其他辦法？」樂蒙問。

「我哋自己搞返個咪得，呢度啲人對科技咁有興趣，我哋整啲發明出嚟，搞個展覽咪得。」我心生一計，高聲宣布︰「就叫『現世界科技博覽』啦！」

「好主意，我都想見識吓，救世主大人果然諗到啲我哋諗唔到嘅嘢。」亞骨多它興奮起來，整個人向我靠攏。

「得喇得喇，唔好成日咁讚我，我會囂。呢個展要大家一齊幫手。」我又在紙上寫了很多，壓根忘記他們根本不懂得看。

我把在飛翔城看到所欠缺的東西都寫下來，再逐一解釋，看看集大家的智慧能否把它重現。經過兩晚的討論，最後大大小小一共有十六種東西能夠重現，甚至乎能把「大灰狼」的角色直接交由他們自己所扮演，我則能由始至終飾演救世主的角色，拯救他們，引領變革。

「距離同曬仁鐵士所訂嘅七日期限唔係得返好多時間，我哋要快啲行動先得。喺城中心廣場棟塊牌宣傳吓應該夠，之後靠佢哋一傳十，十傳百，我哋反而集中用一日時間整好哂啲嘢先最重要。」我指揮道︰「亞旺努，你整塊牌先，之後棟喺城中心。樂蒙，你整展示櫃。亞骨多它，同我一齊整嗰十六樣嘢，你哋搞掂手頭啲嘢都嚟幫手。」

大家各有工作後便立即行動，爭分奪秒，務求可以於明天舉辦博覽。

「嚓」、「哇」、「噠噠」。

這三個聲音於兩秒內發生，全因打火機的製造完成。

「哈哈，無事嘅，唔會燒親。」我拾起地上的打火機，取笑亞骨多它，因為他被打火機嚇壞了，驚慌的把它丟在地上。

「救世主大人對唔住，有無丟爛咗？我咁大個人都係第一次咁樣生火。」亞骨多它感到愧疚，連忙道歉。

我笑笑口說︰「無咁易爛，不過睇你啱先嘅反應，呢樣嘢比我想像中更有用。之後我哋整埋火藥，對我哋嘅計劃好重要。再整埋風扇，可以扇風點火，加大火勢。最後整埋滅火筒，咁所有嘢就一應俱全。」

我們埋首於製作，十六樣展品在我們四人齊心合力之下，不用一日已經全數完成，這些都是現世界隨手拈來的東西，但異世界卻未曾出現，例如剪刀、紙袋、手套、指南針、間尺、太陽眼鏡等等。

「聽日嘅博覽好重要，大家今晚早啲休息。」我說完便去睡覺。

翌日，我們準時到達城中心，想不到已經人頭湧湧、水洩不通，我們拿着各種物品，千辛萬苦才能進到博覽場地，要不是昨日樂蒙和亞旺努把展示櫃提早放好，恐怕今日的博覽要移師其他地方舉行。

「好喇咁多位，首先多謝你哋支持今次呢個現世界科技博覽先，我係嚟自現世界嘅救世主，江尚奢，另外仲有三位助手，分別係佐呼族嘅樂蒙同亞旺努，仲有柯卡族嘅亞骨多它。我大大話話嚟咗女母都已經有個幾月，見識過呢度嘅科技，今次我為大家帶嚟咗好多我喺度見唔到，但好實用嘅發明畀大家，絕對可以令你哋大開眼界。知你哋等咗好耐，我急不及待已經想宣布正式開始，不過我見到人群入面有一位重量級參觀者，雖然無事先夾定，但我都想佢上嚟同大家講幾句，有請曬仁鐵士！」我在台上大力鼓掌，利用群眾壓力讓曬仁鐵士幫我站台，好讓整個博覽更有認受性。

曬仁鐵士的出現在我預料之內，利用群眾壓力逼他上台也是我的計劃，只是他在台上會說些甚麼，這完全不在我控制範圍之內，但是作為一個如此崇尚科技的地方的領袖，大概也不會說出一些對博覽有負面影響的說話。

「多謝救世主邀請，的確我哋係無夾埋，所以我都無準備，唔知講咩好。」曬仁鐵士面帶尷尬，但很快便回復正常，既談笑風生又慷慨激昂道︰「救世主佢嚟自另一個世界，我一直都好好奇佢嘅世界有咩令我哋眼前一亮嘅科技，難得今次救世主肯搞呢個博覽，正正可以畀我哋見識見識。大家仲記唔記得，我哋而家擁有咁多先進科技幫助生活，都係全靠葛族嘅指點。而家有機會吸收其他地方嘅科技再令自己進步，我哋更加應該好好去學習。我，曬仁鐵士，今日出現得喺度，唔係純粹因為好奇心，更多係因為我想柯卡族、想飛翔城更加進步，抱住學習嘅心態嚟，希望可以將唔同世界嘅科技都應用到喺我哋身上，令我哋成為最強大嘅一族！各位，我哋要好好向救世主學習！我今日講嘅係咁多，交返畀救世主。」

他說完後，台下的人掌聲如雷，每個參觀者的眼神也變得認真起來，不再是純粹參觀，果然有曬仁鐵士站台的效果就是不同，只有他們越認真，我的計劃才越有可能成真。

「多謝哂曬仁鐵士，我臨時揾佢上嚟，佢都可以講到咁精彩嘅分享，證明佢想大家進步嘅心係真嘅。我都唔阻大家，今日嘅博覽正式開始。今日所有嘅展品都可以隨便試用，我哋都會駐場教大家點用同回答你哋嘅問題，希望大家可以交流學習，一齊進步，拯救女母於妖星之中。」我最後不忘把拯救女母的種子撒在他們心內。

博覽正式開始後，居民們都十分踴躍，無論是發問的，還是拿上手把玩的，大家都非常有秩序，排隊人龍有如買演唱會門票一樣長。

「呢樣點用㗎？」是最多人問的問題，我一共回答了十六個版本，合共過百次，示範次數也不下三百次，但現場人士情緒依然高漲、氣氛仍然熾熱，而我知道現在是最佳時機了。

「各位，我哋而家有個中場示範，請大家嚟到博覽場地右邊。」我在台上宣布，樂蒙、亞旺努和亞骨多它亦立即去清場準備。

場地右邊是靠近民居的地方，而且亦早已被我們澆了易燃液體，只要有丁點火舌便會燃燒起來，若未能及時滅火，整個飛翔城便會成為一片火海，熊熊燃燒。

「今次中場示範係比較特別，我會示範呢啲發明嘅進階用法之外，仲會揾人上嚟親身體驗。」說完後我把外置鏡片掛在太陽眼鏡上，然後說︰「首先，我會示範太陽眼鏡嘅進階用法，除咗戴住唔會畀太陽掁到對眼之外，仲可以加塊鏡片，令佢變成近視或者遠視眼鏡，有近視或者遠視嘅人都可以一副眼鏡搞掂哂，唔駛戴兩副。」

在場的人看完後都躍躍欲試，我隨意叫了兩位參觀者上台試過後便再介紹另一樣發明。

「跟住示範第二樣，就係較剪同間尺。想剪絕對直線其實有個更易嘅方法，用呢兩樣工具就得，有無人知點做？」我向台下發問，有人舉手作答，但始終距離正確答案還是差了一點。

「其實只要打開把較剪咁樣揸，用間尺做輔助咁樣劃一下，」我即席示範，之後拿着一分為二的紙對大家說︰「咁樣就可以有完美嘅兩張紙喇。」台下的人都嘖嘖稱奇，只有我覺得非常普通，但還是要裝作興奮，好感染台下的人。

眼看這兩個熱身項目都已經把他們弄得如此興奮，接下來的重頭戲定必能引爆全個飛翔城，我指的是真的引爆飛翔城。

「第三樣同大家示範嘅係打火機、火藥同風扇。火藥係爆炸性好強嘅危險品，不過如果好好控制，就會係一種好方便同多功能嘅工具。佢嘅應用性好廣泛，今日我會示範佢娛樂嘅一面。至於風扇，佢除咗可以令我哋更涼快之外，仲可以用嚟滅火，只要用佢吹住着火嘅地方，咁啲火就會熄。我會逐一為大家示範。」語畢我便點燃了滴滴金，雖然在白日之下，但耀眼的金黃火光還是很漂亮。接着我點燃了一枝火棒，再放在風扇前吹，火焰跳舞抵抗了數秒便體力不支，然後熄滅。

「好喇，而家到你哋上嚟試，我準備咗大型煙花畀大家欣賞，算係我送畀你哋嘅禮物，邊位想上嚟做放煙花嘅人呢？」我掃視全場，在場人士都十分踴躍，但是在人堆當中，我一早便已經有了心儀人選，而他也不負我所望，很積極的舉手。

「就嗰位，請你上台。」我指向了那個熟悉的面孔、那個覺得柯卡族失去了人情味的餐廳老闆。

他被我點名後，露出了無法相信又興奮難耐的複雜表情，三步併作兩步，快速的跑過來。我教了他用打火機的方法後，便着他點燃煙火，大型的煙火便不斷發射上半空，爆開成讓人驚艷的美麗花朵，全個飛翔城也能清楚看到，並且全城也只剩下「砰」、「嘭」和「嘩」的聲音。

正當全場人都沉醉在日間煙火匯演之際，我跟樂蒙、亞旺努和亞骨多它打了一個眼色，然後大家迅速走位，把藏好的風扇都拿出來放在台上，一同等待天降火雨。

煙火接近尾聲，經計算之下，尾聲的煙火爆開的高度會更低，火花落到民居的時候還是燃燒狀態，正好碰到易燃液體，火便會燃燒起來，我們都期待着這一刻的來臨。

終於，在最後數發的煙火爆開後，天空下起了漂亮的火雨，全場人士都目不暇給、讚不絕口，而我們也目不轉睛、引頸以待。

無數火雨落到民居上，但一直未點燃起易燃液體，我們顯得十分焦急，火雨不夠點燃嗎？火雨下偏了嗎？計劃要失敗了嗎？

一時之間，無限的懷疑與疑問都湧上心頭，直至終於在一間屋的屋頂看到搖曳的火光，火勢以此作為契機，乘着易燃液體的路徑，瘋狂的蔓延開來，直到有人發現時，已經有三間房子遭殃了。

「火……火燭呀！」大家回頭看過去，根本不敢相信眼前景像，於是有人大喊︰「快啲救火，用風扇吹熄佢！」於是他們紛紛衝上台把所有風扇拿走，飛到屋頂用風扇對着火滅猛吹，真想不到他們這麼快學以致用。

可是任憑他們怎樣吹，火勢都沒有減弱，反而變得更旺盛，無他，因為我只說出了事實的一部份，但他們正在做的卻是事實的另一部份──適當的風會加劇火勢，亦即是扇風點火的原理。

有他們的助燃，很快地，着火的屋由三間變成六間、六間變成十二間、十二間變成二十四間……每燒着一間，木材提供的能量都使火勢更加猛烈。最終，整個飛翔城都淪為火海，成為巨大火爐，人們紛紛逃走，一個高度發展的先進城市，因為一場被精心策劃的火災，最終天火焚城、推倒重來、毀於一旦。

「大家，呢度危險，跟我嚟，我有個地方絕對安全，唔怕火燒。」亞骨多它大喊，人們聽到後雖然不捨，但生命寶貴，只好跟着他飛走，飛到我們的磚屋前。

「呢間係……豬細佬間屋？」餐廳老闆一看到便問。

「識啲嘢喎，難怪救世主大人揾你上台點火，睇嚟你就係嗰個餐廳老闆。」樂蒙恍然大悟。

「係，呢間就係我哋一齊起嘅磚屋，唔怕火燒，亦都唔怕風吹，仲將好多科技嘢放埋入去，方便日常生活，佢係我哋今次博覽嘅第十七個隱藏展品。」亞旺努搭嘴道。

「間屋真係好正，令我對屋改觀哂，你快啲入去睇吓就知我無亂講，我覺得我哋要試吓將科技融入住屋入面先得，呢樣都係我哋嘅領袖曬仁鐵士一直想做嘅嘢，呢個係佢特登聯同救世主大人合力建造嘅示範單位。」亞骨多它極力推薦，而當中提到曬仁鐵士的名字，使說服力大增，令人更加期待。

同一時間，在城中心，有一個人遲遲未離開火海，試圖用自己的方法，獨自滅火。

「咁係無用㗎。」我對他說。

他沒有回頭，只是苦笑了一下，而這苦笑，彷彿是看透了世事般，然後繼續獨自滅火。

「等我幫你啦，拎住。」我遞了一個滅火筒給他，簡單教了用法，然後說︰「作為一城之主，我明你想保護哂成座城，所以淨係靠呢兩枝嘢實唔夠，要拯救火海中既飛翔城，一定要大量嘅水或者沙，又或者……」

「又或者啲咩？燒乾燒淨，之後重建？呢度係我成世人嘅心血！」曬仁鐵士憤怒的說︰「我真係估唔到你會用呢啲方法，救世主？呸！我話你係欺世盜名，係破壞者先真！我唔駛你喺度假好心，我哋嘅輸賭取消，我唔會幫你消滅妖星！」

很明顯，他誤會了我，而且不領我的情，不過我並不介意，因為到最後他便會知錯怪了我，而我本人亦很喜歡和享受這種反轉的劇情。

「你認為我係咁邪惡嘅話，咁我只好做醜人做到底喇。」我拿着滅火筒往他的後腦打下去，他立即應聲暈倒，然後我便拖着他飛往磚屋，任由飛翔城在火海中燃燒殆盡。

「點呀，啲人睇完個示位，有咩感受？」我一邊把曬仁鐵士放在飛碟的醫療床上，一邊問亞骨多它。

「佢哋全部都有讚無彈，好想要返間。」他興奮的回答。

「Good！呢個係我最想聽到嘅答案，等我去同啲災民傾吓偈先，曬仁鐵士就交畀你，唔好畀佢咁快醒，廢事阻住我哋嘅行動。」我留下了命令之後便離去。

亞骨多它簡單的回答︰「知道，我知點做。」之後目送我離開。