是咁的，我幫個客張八達通增多咗錢。
其實之前都有前輩提過我，喺收錯錢嘅層面嚟講，增值八達通係最難搞。第一，個客張八達通貼實部機，我㩒個製「嘟」一聲就搞掂。第二，個客拍完卡就九秒九閃人，單都唔攞。第三，增值八達通每次都係100蚊上落，賠得最甘。
而喺增值八達通嚟講，增多咗就最賴嘢。增少還好，可以再增多次。增多呢就仆街喇，個客俾唔俾返錢就睇佢心情，咁啱佢手頭無錢嘅話，我嗰半日糧就喺咁先（我份糧每小時＄45）。
所以頭嗰一日企收銀我都好小心，每次都碌到隻眼大一大嚟㩒，加上隔離有個店員阿姨睇住，佢眼明手快，有幾次我㩒錯都俾佢大嗌一聲：「咪住！！！」嚇到我郁都唔敢郁，而我次次喺懸崖邊都會俾佢拉番上黎。所以我都係好佩服佢嘅反應能力。
呢日就唔同喇，呢日坐我隔離嘅係老細，佢全程篤機。而我幫人增咗廿次錢都有，＄500蚊又試過＄1000蚊都試過，篤機嘅速度都快好多，覺得自己做到熟哂。
但係，件事就突然發生喺一個平凡嘅黃昏，像極了愛情。嗰日係晚上7點49分，點解我會記得咁清楚，因為我仲keep住張單。
有個廿五六歲，着深綠T-Shirt卡奇短褲，戴黑框眼鏡，插住耳機聽歌嘅男仔一入舖頭就走埋嚟櫃台。
嗰刻我已經知佢想做咩，果然佢望一望我，遞出一張五百蚊大紙，話：「增值＄500蚊吖唔該。」
我睨咗佢一眼，接過張500蚊，重覆多次：「增值500蚊嘅，無問題！」然後頭也不回，嘟嘟嘟就是一輪亂按，動作一氣呵成：「先生請拍卡吖！」
「嘟！」
我微笑。又一張單，話咁易。
「咦！等陣！」
我笑容僵住，暗叫不秒，一臉疑惑咁望住佢。佢一臉疑惑咁望番我：
「我話增值＄50蚊，唔係＄500喎。」
「吓？」
嗰刻，原本坐喺隔離，低頭篤緊機嘅老細抬起咗頭。我呆了呆，再露出個尷尬而不失禮貌嘅笑：「先生你頭先唔係講＄500咩？」
屌你吖，你嚟嚇9我啫係咪呀，快d同我講其實我講下笑咋，最多我大人不計小人過冰釋前嫌原諒你，仲去隔離M記請埋你食返包薯條。
「唔係吖，我話增值＄50呀，你要找返＄450蚊俾我。」嗰位男仔望住我。
屌你咩，增值＄50蚊仲比咩鬼＄500蚊呀？根本存心想伏9我啫！
嗰刻，我心入面計咗條好複雜又無懸念嘅數：個客俾＄500蚊話增值＄50，啫係要找番＄450蚊俾人，我收錯錢嗰＄450緊係要我賠番，喺我人工度扣，一日先搵嗰三百五，咁啫係我白做咗一日半...
但係無事嘅，俗語有話天無絕人之路吖嘛，我大話話都扶咗幾次阿婆過馬路，好人有好報啦。我將最後一絲願望寄託喺男仔身上：「先生，唔好意思，你而加銀包有無＄400蚊？有嘅話可以俾返我哋...」
個男仔若有所思。
「無喎...」我心口一沉。
男子雙手一攤，輕笑道：「咁而加點搞呀？」
「係囉，仲可以點搞，你咪賠番＄400幾蚊俾個客囉。」隔離嗰個平頭老細附和道，放低部電話，企咗起身：「你找返＄450蚊俾人先啦。」
「哦，好」我無意識地往收銀機抽出＄450，交俾個客。然後一邊自言自語道：「咁樣，但係我而加無＄400喺身...」
我雙目放空，標哂冷汗，心諗今次仆街了，早知頭先就唔好咁快㩒，問多幾句先啦。琴日仲同隔離個阿姨開玩笑咁講，如果收錯錢要賠嘅話，嗰日我就即刻quit job cut哂所有電話卡嗰d嘢唔撈。估唔到今日就俾老細喺隔離捉到正一正，仲要大拿拿4舊水，中哂頭獎，唔止添，jackpot都中埋。
之前上網睇話做sales點都要經歷一次收錯錢先知痛，我仲心諗邊有咁易邊有咁快吖，點知返工唔夠3日就瀨嘢，仆街啦仆街啦而加點收科......
嗰刻時間凝固咗，我相信我係可以成粒鐘企喺收銀前面呆咗唔識郁。
「啪」一聲重重響起，餘角見到老細喺店架攞咗七包香煙出嚟，轉身擺喺收銀枱上面，過機：「嘟。」
「？？？」
「呢度＄420蚊，八達通拍卡吖。」老細對住個男仔講。
有種難以形容嘅默契，個男仔又真係肯拍卡俾錢：「嘟。」
然後佢就攞住七包香煙，轉身離開7-11，揚長而去。
「？？？」就係咁？咩玩法？點解要俾咁多包煙佢？咁我駛唔駛賠錢？
腦海中一時浮現出十萬個為甚麼。
老細從容不迫咁喺印出嚟張單，用原子筆加返句「欠7包香煙」。我發覺佢遲遲唔肯講係想吊我癮，原本我想問佢，但係一諗起我收錯錢佢就開口埋口講賠錢，所以我淆底唔敢問。
終於佢話：「好小可d後生字可以咁正義，你要多謝阿珍個男朋友。」
「吓？？？」我都仲喺一頭霧水，佢哋識嘅？邊個係阿珍？有無人可以話俾我聽發生咩事...
喺隔離偷偷哋食足咁耐花生嘅燒賣魚蛋阿姐終於開聲：「係吖人哋呢d有為青年，原本係可以唔出聲咁走咗去...」
「阿姐，Can you speak chinese?」我心諗。
「咪係，仲要難得咁有義氣買幾包煙頂番條數...」老細一唱一和附和道，然後語重心長道：「嗱下次收錢，特別係收八達通嘅時候要小心d喇，好多客一拍完卡就走咗，收多錢嘅話都追唔番。」
我雖然get唔到發生咗咩事，但係我都點哂頭話：「我會㗎喇我會㗎喇，下次增＄500蚊我會問佢哋兩次...唔係，三次先增！」
事情就糊里糊塗咁告一段落，後嚟返夜更嘅時候我發現，每當有個客買完煙之後，個店員auntie 就會喺寫住「欠7包香煙」嘅單上面劃一劃，寫個「正字」咁，我好奇咁問佢點解要咁做。
佢話：「咩好似公司之前收錯錢差7包香煙呀嘛，而加要賣夠補番條數呀。」
嗰刻我先知道，原來老細幫我賠番舊數...我真係差d眼淚鼻涕馬尿都流哂落嚟。仲有阿珍＆阿珍個男朋友，多謝你哋，多謝你哋媽咪生咗對賢仔能囡出嚟，下次有咩江湖救急嘅話我幫你哋揹個450年。
老細之前仲話收錢好好玩，我挑，下次唔敢再掉以輕心。
完
中意嘅就俾Like 同埋Follow我ig @islandofblessing，我有時間都會講d唔同嘅嘢㗎～
