「小明路不拾遺，最終得到咗國王嘅讚賞，仲許配咗公主俾佢，佢開開心心咁同公主生活落去⋯⋯」強叔強裝溫柔地為佢可愛嘅孫仔講完孫仔本幼稚園教科書入面，孫仔最鍾意聽嘅故事。
但係提到結局佢就忍唔住。強叔好大力合埋本書，扯晒火：「一日到黑聽埋啲不切實際嘅童話故事！呢個世界邊度有啲咁好嘅事？行出街執到錢？發夢啦你！條友仲要執到錢乖乖地交返出去？佢唔係智障就係燒壞腦啊佢！」
發表完偉論之後，強叔隨手就掉咗本書埋一邊。
見到強叔突然發脾氣，孫仔即刻嚇到喊。
「哎吔你唔好喊啦！我唔得閒氹你啊！我要返工啊！」強叔最唔擅長就係湊細路：「伯爺婆你喺邊呀？睇住你個孫仔啦！」
「你做咩又搞喊你個孫呀！」強嫂又攞返本書起身，攞畀孫仔：「孫仔乖！唔好喊。我哋睇書書⋯⋯」
強哥見冇佢嘅事，就嗱嗱臨出咗門返工。
傍晚，天色昏暗。強哥着返件着咗好耐，污糟邋遢嘅清潔工制服同反光衣，開始佢夜間打掃街道嘅日程。
強哥其實覺得好沉悶。而且人工又低，又冇機會升職，如果可以轉工佢一定轉。只不過佢又無學歷，又冇經驗，咩選擇都冇。
強哥嘅唯一嘅慰籍就係工作嘅時候抱怨。佢今日就一路抱怨佢嘅孫仔，一路打開佢今日要清嘅第一個垃圾桶。
「呢個世界邊度有童話架。嘥時間讀呢啲不如好好做⋯⋯」
強哥呻到一半，忽然停晒手。
佢見到垃圾桶裡面有一個公事包，幾新淨，仲好似係名牌子嘢。咁靚嘅嘢，點解會就咁dum咗㗎，浪費！
佢一路抱怨，一路攞咗個公事包出嚟，擺係垃圾桶頂。佢諗住打開個包check吓有冇爛，冇嘅話攞返屋企用都幾好。可能佢個仔會需要，出去見工都係帶住個靚袋體面啲。
但係當佢打開個包嘅時候，佢當堂嚇一跳。
「哇！成箱錢嚟嘅！」
只見眼前放滿了一疊疊鈔票，閃閃發光。可能呢度嘅鈔票數量多過強叔佢一世人所摸過嘅所有鈔票嘅數量，當然都多過佢做一世清潔工嘅收入。
佢攞咗一張紙幣出嚟，對住路燈驗一驗水印。
「係真錢嚟㗎！呢個世界真係有童話㗎！」見到係真嘅之後，佢開心到傻咗。
佢小心翼翼咁將啲錢收返埋落公事包度。諗住帶返屋企。
「雖然開頭一模一樣，但係我先唔會路不拾遺。我先至冇咁智障。哈哈！今次打跛腳唔洗休喇！」
打工？唔使啦！捱窮？唔使啦！我依家係有錢人啦哈哈哈！
唔係喎，呢筆錢會唔會係唔知邊個有錢人被人標參，交嘅贖金？雖然強叔唔關心嗰個肉參會唔會就咁死咗，但係佢擔心另一樣會影響佢嘅嘢。
但係強叔都係唔放心，就算唔係連號嘅，可能啲警察都已經全部鈔票號碼mark低晒？佢哋可能好得閒，而且為咗拉人可能佢哋咩都會做呢？
咁嘅話唔單止要Check啲紙幣，仲要Check埋有冇跟蹤器，附近有冇人監視之類之類。
強叔環顧四周，呢條街本身冇馬路，淨係行人嘅，所以冇車。而且呢度附近連人影都冇。加上呢度附近啲樹太茂盛，應該都冇機會由附近嘅民居遙距監察。咁應該有追蹤器啦！
佢搵咗一搵，又冇喎。不過為咗安全起見，強叔決定都係唔好直接攞返屋企。佢收埋喺自己㗎手推車度，搵過籮裝住，然後用黑色垃圾膠袋遮住，咁就冇人會察覺。等收工嘅時候先至進一步處理。
然後強叔若無其事咁繼續佢嘅清潔工作。只不過諗到手上突然間多咗咁多錢，佢嘅步伐都難免輕快咗。
街尾垃圾房就係強叔嘅「基地」。除咗清潔用具之外，佢仲收埋咗其他執返嚟嘅，佢覺得可能有用嘅嘢。譬如話櫃啊、檯啊嗰啲傢俬，或者風扇之類嘅電器，同埋掛喺牆上面做裝飾嘅畫。
強叔泊低架手推車之後，趁四下無人，連忙攞返個公事包出嚟，打開佢。見到裡面啲錢金光閃閃，心裏被幸福嘅感覺填滿。不過問題依然未解決：要點樣處理呢舊錢先得呢？
「擺銀行？唔得啦。銀行職員見到咁大疊錢，絕對會起疑心。尤其是係呢啲鈔票號碼嘅問題⋯⋯」見無人係附近，強叔開始自言自語。
佢擺底個公事包，開始來回踱步。
「攞去洗？但係都冇可能現兜兜攞住大疊錢去買嘢，啲Sales可能都會懷疑⋯⋯慢慢搣呢？但係咁大疊錢慢慢搣咪嘥晒？梗係一炮過好似土豪咁躉喺人哋面前先夠威架嘛！」
「但係一次過洗又引人懷疑，續啲續啲洗又唔夠爽皮⋯⋯哎吔好煩呀！」
強叔對「有錢人的煩惱」有咗全新嘅體會。
但係諗完一大輪都係冇結論。佢決定都係放住喺基地先，睇吓風聲幾時冇咁緊先至算。佢攞返起個公事包，又望一望啲錢，露出滿意嘅微笑，然後塞袋錢入個櫃度，搵個鎖鎖起，然後再三確認已經鎖好，先至離開。
之後呢一排，強叔每日都好留意新聞。日日同屋企人搶電視。
老婆話：「我要煲劇。」
強叔話：「依家啲電視劇咁冇營養，睇新聞啦！」
阿仔放工返嚟話：「睇吓National Geographic先。」
強叔話：「獅子老虎覓食咁血腥，教壞我個孫仔啊！睇新聞啦！」
孫仔話：「我要睇卡通！」
強叔話：「睇卡通無益嘅，睇新聞啦！」
不過佢睇咗咁多日新聞，都冇關於綁架、贖金之類，同佢手上嘅錢相關嘅信息。
然後佢每一日返工都會去望下袋錢，聞吓財富嘅味道。佢點算過，呢度應該有三千萬。佢每次收工都會趁無人，喺度數銀紙。一路數一路笑。呢個moment係佢一日裡面最開心嘅時刻。
但係佢一蚊都冇攞過出嚟用，亦都冇因為有錢而辭工或者去邊度揮霍。佢依然如常返工放工，食平價嘢，着穿窿衫。即使咩都冇變，佢仍然感覺自己好富有。
直至有一日，佢返到垃圾房，見到佢啲嘢被放上垃圾車。
有幾個同為清潔工嘅人夾手夾腳將佢嘅「家當」逐件搬上車。一個着恤衫，望落高級啲嘅男人就企喺旁邊指指點點。
強叔好嬲咁衝埋去攔住搬嘢嗰幾個：「喂！做咩啊你哋！做咩搬走我啲嘢啊！」
「乜嘢啊？我啲嘢擺喺度邊度阻住啊？你哋班pk⋯⋯搬啦搬啦，搬飽佢啦你哋！以後唔好問我借地方擺嘢，借地方瞓覺⋯⋯等陣先，我個櫃呢？」強叔諗起佢袋錢仲喺櫃入面，但係個櫃就已經唔見咗。
高級男人：「有一堆啱啱已經運走咗喇⋯⋯」
「！？」強叔即刻衝咗出去想搵返啱啱走嗰架垃圾車。
「啱啱走啫，冇理由走得咁快掛！」強叔喺街上左顧右盼，終於畀佢見到街頭好遠嘅位置，有架等緊交通燈嘅垃圾車。
但係佢啱啱想跑住追上去，架車就開車走了。然後強叔執咗架擺喺路邊嘅單車，追住架垃圾車。
多得呢段路交通燈比較多，垃圾車冇脫離到強叔嘅視線。但係亦都係礙於交通燈，強叔始終同垃圾車維持3個街口嘅距離。強叔想衝紅燈但係佢唔夠橫街啲車快。
「去⋯⋯去到下個垃圾站⋯⋯我唔信⋯⋯你唔停車！」強叔喘住氣同自己講。
但係㗎垃圾車冇向下個垃圾站方向開，佢轉左個彎，直接上咗高速公路。
「唔係掛！」強叔崩潰地大叫：「唔好走呀！」然後跟住踩單車上高速。
於是喺高速公路上面就出現咗一個奇景：一架垃圾車後面追住一架單車。踩單車嘅男人不斷嗌：「停車呀！停車呀！」但係因為隔太遠嘅關係，垃圾車司機完全聽唔到。
「我啲⋯⋯錢呀！」強叔已經攰到講唔到嘢，但係佢仍然搏命追住架垃圾車，最終嚟到堆填區。
堆填區門口有道閘，只有符合資格嘅車先可以進入堆填區。垃圾車開咗入去之後，職員正想閂閘，忽然見到遠處有架單車高速衝緊過嚟。
閘門閂到一半，得返條罅。強叔冇諗過剎車，仍然全速朝職員衝去。職員走都走唔切，嚇到即刻踎低。而強叔施展兔跳特技，直接跳起，喺職員頭頂飛過，安全落地。
強叔唔得閒理會氣急敗壞地追嚟嘅職員，喺彎道做個瀟灑嘅漂移，逕自追上架垃圾車。即使架車喺啲砂石路上面好顛簸，震到強叔屁股酸痛，但係佢都唔理咁多。因為佢睇住垃圾車打開後閘，將裡面啲垃圾，連同佢個櫃一齊倒出嚟，然後施施然開走。
「唔！好！呀！」強叔大聲嗌。佢劈低架單車，自己跳入個垃圾堆度用雙手掘開面頭啲垃圾。
職員帶同兩個警察嚟到，警告強叔：「啊叔你好快啲返上嚟喇！你唔入得嚟呢度架。」
但係強叔一路掉啲垃圾出嚟，啲蕉皮爛菜跌晒落佢哋個頭度。警察只好舉槍：「咪喐！再掟我哋，我哋就開槍！」
呢個時候強叔終於掘到櫃門嘅位置，可以打開佢個櫃，攞返袋錢出嚟。
佢成身都係垃圾嘅臭味同污跡。但係對強叔嚟講，攞住袋錢，勝過一切問題。佢舉高袋錢，開心地大笑：「袋錢⋯⋯無事！」
「係之前嗰袋失蹤嘅贓款！」一個警察伸手接住強叔舉起嘅嗰袋錢：「唔該晒你幫我哋搵返呢袋贓款！路不拾遺，今年好市民獎係你架喇。」
於是強叔失去咗嗰3千萬，但係得到咗個好市民獎。
「吓⋯⋯」強叔喺大會堂接受頒獎嘅時候，一臉茫然地望住全世界為佢鼓掌，屋企人都為佢驕傲。強叔目光呆滯地望住手上嘅好市民獎，心裏默默地流淚。
