今日約咗班中同一齊食飯。
ㅤ
自從六月畢業後各走各路，外國去的去香港留的留，已經有一年沒見了。偶爾在IG看到他們何等精彩的生活，左擁一金髮妞右擁一黑髮娘，是稍微能猜到他們的近況，但是這次一見還是有點尷尬，像是一個在火星一個在水星，兩個不同的世界強行擠在一起，就是為了吃一頓飯。
ㅤ
「唔係飲茶咩？」來到這間餐廳，看它有格調的裝橫，看它黯暗而寧靜的氣氛，跟我世界裡吵吵鬧鬧，擠到爆炸，熙熙攘攘的茶樓差十萬九千公里遠，一看就知道這裡不簡單。
ㅤ
「哈哈哈唔好啦食好啲啦，呢間法國高級餐廳我食過幾次㗎喇。」阿明默默一笑，徑自走到一張桌子坐下。也不用特意走太遠，整間餐廳空着呢。
ㅤ
我咬了咬牙，早響啦咁我咪帶多啲錢，唔通陣間唔夠俾你又會肯我咩，沒法，都上了刀山還能退麼，只能坐下。隨行的阿強一臉平靜，彷彿這裡就是他家。「服務員，」他飄然地抽出一張閃亮亮的卡片，「我係呢度嘅會員。」
ㅤ
哇屌！這真的是中學的時候飯盒也要叫最少最平，偷偷摸摸夾其他人飯菜的阿強嗎？我稍微的刮了他一眼，雖然是染了一頭金髮，但還是阿強沒錯。
ㅤ
卻現在我來不及想這些了，為了今天兩點多的下午茶我都把午飯省掉，肚子早就餓扁了。桌子上的菜單彷彿有種魔力，不打開不行。一翻，眼睛差點沒啪啦啪啦掉在地上，我沒看錯吧，一道牛排要300蚊，就一道牛排？憑甚麼？我偷偷數一數錢包裡的錢，一百，一百二十，一百五十，沒了？沒了…這一秒我腦中閃過很多念頭，甚麼急屎走先，上堂走先，屋企無鎖門走先，不然我怕是連啃一根牛排骨的資格都沒有，不對的，就算能吃一根牛排骨也怕是丟臉丟到我媽家了。
ㅤ
「唔係呀阿日，嗰個係dinner menu 黎，lunch喺呢度呀。」我心裡暗叫一下萬幸，再看一下，裡面一碟意大利麵88蚊，心裡嘀咕真貴但好歹還是吃得起，暗自抹掉額頭上滴滴冷汗，好險，差點露出馬腳，差點讓他們知道我窮，是閃閃發光的月亮族。
ㅤ
麵來了。我咬一口，嚐不出甚麼味道，耳邊只有一聲聲叮叮，荷包裡的錢飛走的聲音，一叮，心就揪一揪。
ㅤ
我們邊吃邊講。
ㅤ
阿明說：「我喺英國識咗個男model，人哋一輯相賣成一萬蚊呀。」
ㅤ
阿強說：「仲講，我喺嗰度都識左好多女。」
ㅤ
阿明又說：「超！我而加日日落Bar同frd開party，邊個大學d committee 的都識哂。」
ㅤ
我：「係咩？」
ㅤ
阿明又道：「琴日我哋30人包場包咗成間bar，入場四舊水識咗幾個SU大佬。」
ㅤ
阿強：「琴日我俾人隊啤差d暈咗喺廁所度。」
ㅤ
阿明：「…」
ㅤ
阿強：「…」
ㅤ
阿明：「…」
…
我靜靜地做一名稱職的旁觀者。偶爾附和，偶爾哦一下，答一句真係㗎？係咩？偶爾望着他們，談着他們世界的事。
ㅤ
就像他們是在火星，我是在水星。看似伸手可及的距離卻是如此的遙遠。
ㅤ
阿明：「喂阿日，你呢，最近搞咩呀？」
ㅤ
這個問題終究要來了。我僵了一僵，暗自吸了一口氣，說道：「吓無呀…咪又係溫下書頹下…自摺。」
ㅤ
阿強哦了一哦：「無落bar咩？」
ㅤ
「我都唔飲酒嘅。」
ㅤ
阿明和阿強相視了眼，輕笑幾聲。
ㅤ
「咁好啦…喂話樣嘢俾你哋聽，有個印度妹好正呀，我roommate黎，你哋睇佢ig…」阿強掏出電話，有好嘢一齊益。
ㅤ
「嘩嘩嘩成個明星臉咁…」
ㅤ
「…」
ㅤ
話題繼續。我看了看手錶，怎麼今天時間好像過得很慢？聽着他們東說說，西說說，近自香港，遠自英國，一年沒見，大家的距離變遠了。大家都往前走，探索更遠的地方，而我的一年呢，好像也只是站在原地，望着他們的背影，在濃霧中，愈來愈小，愈來愈白，最終與背景融為一體，消失了。
ㅤ
我想要錢。一個奇怪的念頭萌生。我想要錢，有錢，就可以做咩都得，周圍去又得，去英國嘅倫敦橋遠眺美景，去美國大峽谷瞓七日七夜，去法國巴黎睇鐵塔。有錢，食嘢又得，就算高貴餐廳，食buffet，望見餐牌300蚊一塊牛扒，眉頭也不會皺一下。有錢，我中意點樣享受生活都得，就像來一次話飛就飛嘅旅行，就算即興去英國探frd玩，來回一萬蚊機票我又何難之有？
ㅤ
有錢，我可以見識廣啲，我可以落多啲club識多幾個frd，我可以唔駛俾frd睇低，可以同佢哋喺同一個世界，我就可以向前走，追上他們的步伐。
ㅤ
好羨慕佢哋可以自由自在咁喺天空飛翔，天空一日可以俾佢哋飛，一日都係佢哋嘅世界，唔似係陸地上望住佢哋兩個小黑點嘅我，因為我仲未長出一對翅膀，飛唔起。
ㅤ
但是回頭諗下，可能咩？真係得咩？人哋靠父幹，靠母幹，而我只是普普膏通的廢J一個，人哋可以出國留學見識下，而我只是在住了18年的家不斷探索，原本便是兩個不同的世界，又何能比較？即使自己如何追如何跑，他們穿上父母的火箭鞋，即便跑步強人保特也是望塵莫及。
ㅤ
諗返起自己中學嘅作文，篇篇都係寫夢想，篇篇都係寫自己唔想成為眼中的大人，日日覺得錢係萬能，為錢付出一切，為錢而放棄夢想，甘願作錢嘅奴隸。頭先嘅自己有一刻係咪成為細個眼中嘅大人？既然現實嘅自己無咁嘅能力，又何必強求自己過咁高檔嘅生活，係咪高檔嘅生活一定會幸福快樂？錢換到有用嘅嘢先叫幸福。
ㅤ
既然喺一條跑道上，大家嘅裝備都唔同，有人着火箭鞋有人着草鞋布鞋，大家嘅終點都唔同，與其着住雙草鞋妄想要跟火箭鞋一戰高下，倒不如跟內心的自己來個鹿死誰手，用自己喜歡的節奏一步一步地跑，悠然踏出一個個充實的腳印，即便只是幾步，連人哋車尾燈都見唔到，未到人生嘅終點又點知邊個贏邊個輸？
ㅤ
致嗰個有一刻嫉忌人哋生活，想要追上佢哋嘅我，你都係收皮啦，我係唔會俾你影響到㗎，我要過自己中意嘅生活，有錢無錢，我一樣係輕描淡寫咁過，一樣係喺自己嘅跑道，用自己嘅節奏跑出屬於自己嘅快樂。
ㅤ
更何況，嫉忌有用咩，做啦。
ㅤ
ㅤ
