三隻小豬的啟示

要改造飛翔城，第一個想法便是把木屋變成磚屋，再把那些高科技發明放進屋內，令生活更方便；其次是將那些日常用品作為入伙禮物送給新業主；最後便是問亞骨多它還有甚麼欠缺，看能不能做到。

可是曬仁鐵士最後的條件是要有一半的柯卡族人接受，若正常宣傳，他們大概不會接受搬到磚屋，由亞骨多它當初的反應便知，屋對他們來說僅僅只是一個睡覺的地方，沒甚麼價值。

「要點先可以提升到佢哋對房屋嘅要求，追求更加優質嘅住屋體驗呢？」這個問題是我接下挑戰後一直在想的，或者要親身去訪問村民才能有更深入的了解。

臨行前，我告訴了樂蒙、亞旺努和亞骨多它關於我的想法，並請他們替我準備所需材料，然後我便出發到城內做街訪。

我第一次獨自使用傳點，由於不知道有哪些地點，所以只是傳送到亞骨多它帶我去過的地方，不過即使不是第一次經傳點傳送，我依然覺得很神奇。

一眨眼，我已抵達目的地，滿天的柯卡族在飛翔，真不知道應該從何入手，仿佛截停任何一個人都是阻礙了他們。

「或者應該兜個圈，熟悉吓環境先。」我心想，於是便滿天飛，把飛翔城的大街小巷都大致看了一遍，並選了一間餐廳降落。

「歡迎光臨，請問係咪一位？」侍應恭敬的問。

「係，唔該。」我簡單回答，下一秒我便被傳送到座位上，而餐枱就像茶餐廳一樣，餐牌放在玻璃之下，唯一分別是這裏的是顯示屏，而且是意念控制的。

我選好了食物後，侍應拿了一塊布鋪在餐枱上再拿起，食物便出現在我眼前，而且是熱呼呼的。

「真係好方便，你哋生活喺一個咁先進嘅城市入面，一定好開心，要乜有乜。」我搭訕侍應，他有點錯愕，整個人定格，時間仿佛靜止了一般。

良久他才回答︰「同以前比起上嚟的確係幾方便，只係大家就疏遠咗。」

「哦？點解呢？」我像在深淵中找到救命繩索，緊緊捉實不放。

「科技咩都做到，已經唔似以前咁要大家齊心合力、守望相助，所以交流都少咗，而家基本上連隔籬屋住咗咩人都唔知。我堅持唔執呢間餐廳，繼續下鋪上居，係我想可以見吓人。不過你見啦，都無咩人嚟幫襯，因為大家都有美食枱布，想食咩講就有，唔似以前要大廚先煮到。」侍應，不，老闆說，言語間帶點淡淡的憂傷。

「即係之前成個飛翔城都好熱鬧、大家都成日交流？」我好奇的問。

「係，呢度以前仲係叫柏仕村嘅時候，大家生活得好簡單，所有嘢都親力親為，雖然辛苦但好開心。」老闆回憶道︰「不過自從曬仁鐵士當選之後，佢大力推動科技發展，開初大家都覺得幾好，生活係方便咗好多。但漸漸地，隨住科技越嚟越進步，人與人之間嘅關係反而疏離咗，雖然我哋族係強大咗，但我一啲都唔覺得開心。」

「係咪得你一個咁諗喳？」我不自覺的把心聲說了出來。

「可能係啩，我都唔知，哈哈。」他尷尬地回答。

「咁……你可唔可以親手煮一餐畀我食？」我大膽的問，他聽到後又呆了。

「但味道唔夠美食枱布好喎……」他腼腆的說。

「人手煮嘅嘢就係次次都有啲唔同，可以根據客人口味或者廚師手勢而變，咁先有驚喜同人情味，次次都一模一樣，冷冰冰咁嘅話，要廚師嚟做咩？」我不知為甚麼能說出看似如此有道理的說話。

聽完我的大條道理後，老闆便到廚房準備，而我則靜靜的回憶剛才的對話，思考該如何做才能在科技與人情味當中找到平衡。

不知不覺，老闆已經煮好食物並端到我面前，我已經很久未吃過熱呼呼的正常食物，吃了一口之後，更感觸流淚，這道菜無論色和香都跟現世界的無異，至於味卻是差天共地，我哭正是因為它的味道，實在是太過難吃了。

「以你哋柯卡族嚟講，你嘅廚藝算唔算得上係好？」我勉強擠出笑容，裝作感動流淚的問，這樣會令他沒有這麼難堪。

「做咩？係咪好難食？都話用返美食枱布好啲……我都知我嘅廚藝好差㗎啦……」他像看穿了我，還是他已經不是第一次被投訴？

「又唔好咁講，只係同我食開嘅味道唔同啫，我食唔慣女母風味。」我試完一口後便借故談其他話題︰「我啱啱諗到一個方法，或者可以令到大家有返人情味，不過都係搏一次，要置之死地而後生，有啲風險，你敢唔敢搏？」

「係咩方法？講嚟聽吓先。」他問。

「三、隻、小、豬。」我從口中慢慢吐出這四個字。

「咩嚟？」他不解，但這也正如我所料，我已經有心理準備要跟他說故事。

「《三隻小豬》呢個故事其實係咁嘅，係好耐好耐之前……」我把故事簡短扼要的告訴了他。

「哦……原來係咁，即係叫哋唔好怕辛苦，要勤力啲，凡事做到最好，同埋要齊心合力，互相幫助。」他聽完故事後得出這些結論，的確不能說他錯，但他說的都不是我想提的重點。

「你講嘅都啱，但都唔係重點，成個故事嘅重點係要不斷進步。」我接着說︰「成個飛翔城各方面都咁先進，唯獨啲屋竟然係木屋，好似係上幾個世紀嘅產物咁，同咁先進嘅飛翔城格格不入，而且安全性都好不足，好易有意外發生，隨時GG。」

「咩叫GG？」他搔着頭問。

「即係玩完，有咩意外，好似妖星降臨咁，到時你哋嘅屋實頂唔住，所有心血就付諸流水。」我瞪大眼看着他說，他明顯被我所震懾，退後了數步。

「唔係喎，以前咁多次都好安全。」他反駁道。

「今次妖星係前所未有咁近女母，你哋科技咁先進，呢啲嘢實計到，亦都預料到會有咩影響。」我意味深長的說︰「究竟喺《三隻小豬》入面你仲領悟到啲咩呢？呢樣係今次拯救飛翔城嘅關鍵。」

他並沒有回答我，只是靜了下來沉思，我也沒有說甚麼，只是叫他想清楚再找我，留下石幣和聯絡資料便離開了。

離開餐廳，我漫無目的的飛，不經不覺飛到了城中心的空地，這裏有很多居民圍着一塊板在議論紛紛，好奇的我亦趨前查看。

「通緝令，此人多次在城內散播不當言論擾亂民心，更四處塗鴉破壞城市整潔，如有此人消息，請盡快通報，舉報屬實者有賞金一千。」

「原來係通緝令，但無相無名，點知係邊個？定官方都唔知係邊個做？同埋究竟係散播啲咩不當言論呢？」這則通緝令使我很好奇，於是我問身旁的一位女士︰「你知唔知係邊個散播乜言論？」

可是她連忙搖頭並迅速離去，死心不息的我又再問其他人，但他們的反應也很一致，看來他們是知道一些內情的。

「影低佢返去問亞骨多它先。」我掏出手提電話，才猛然記起電話已經一早無電，只好打消這念頭。

「係想消滅科技，返璞歸真。」在我身後傳來一把天真無邪的聲音，我回頭看去，整個空地只餘下一個小孩。

「咩話？科技唔好咩？點解要消滅佢？」我不解的問。

他以無邪氣的笑容和天真的聲線，輕鬆的說出沉重的內容︰「因為科技殺死緊我哋嘅生活。」想不到一個小孩竟然會說出這麼深奧的說話，我確實有點震驚。

「啲大人係咁講。」他不忘補充。

「原來咁多人都覺得有問題，不過錯不在科技。」我心想︰「既然咁多人唔滿意現狀，咁我嘅改革實掂，基本上當佢香港樓咁起就得，不過今次sell idea，起一間做示範單位就掂哂，賺到笑。」我嘴角不由自主的上揚。

這個突如其來的通緝令使我的街頭訪問可以提早完結，於是我找了一個坑渠蓋便傳送回亞骨多它的家附近。

「今次入完城有咩啟發？」亞骨多它看到我回來，劈頭第一句便問。

「嘻，我出去之前同你哋講嘅計劃，有少少微調，不過方向唔駛變，只係大家做嘅嘢會再少咗。」我把新計劃告訴他們之前，也不厭其煩的問一次︰「《三隻小豬》你哋聽過未？」

果不其然，他們的反應都很一致，同時搖頭表示未聽過，於是我便簡短的跟他們說一遍︰「喺好耐好耐之前，有一家五口嘅豬家庭。有一日，豬媽媽對大哥、二哥同三弟講，話佢哋都大喇，要自立門戶，唔可以再黐住屋企，佢哋三個聽到就離開屋企，出去揾咗塊空地自己起屋自己住。大哥花咗幾日用稻草搭好咗間屋，自己喺屋入面他他條條咁嘆世界；二哥就用木材花咗幾個星期亦都起好間屋，又喺入面自得其樂；三弟就用磚頭慢慢砌間屋，用咗好耐都未砌好，大哥同二哥見到就笑佢話佢真係蠢，咁辛苦起間屋起咁耐都未住得，三弟無回答，只係笑笑口繼續起，終於幾個月之後，佢終於砌好有屋住。」

「咁三弟都真係幾蠢，喺住方面用咁多時間，明明只係用嚟瞓，求其有瓦遮頭就得啦！」亞骨多它發表個人見解，他的見解跟我的預期無異。

「雖然我唔明點解救世主大人叫我哋準備啲石頭同埋要切成一舊舊長方形，但我諗同呢個故事有關？」樂蒙舉一反三，猜想到我的用意。

「做呢啲功夫好辛苦，不過救世主大人叫到，一定有佢嘅用處，雖然我聽完都仲未好明個計劃係點，起啲現代化嘅屋即係咩意思？」亞旺努也滿腦子疑問。

「聽埋我講落去就會明，故事仲有下半部份。」我對三位聽眾說，他們都安靜且專心的期待故事的後續。

「三隻小豬過咗幾個月開心愉快，食飽瞓、瞓飽食嘅生活，而危機就喺呢刻降臨佢哋身上。有一隻飢腸轆轆嘅大灰狼嚟到空地，見到三隻小豬，就想食咗佢哋醫肚，而三隻小豬見到大灰狼，就嚇到即刻跑返自己屋企匿埋。肚餓嘅大灰狼首先去到大哥間用稻草整嘅屋前，大力一吹，成間屋就吹散咗，大哥嚇到即刻飛奔去二哥間屋躲避。大灰狼去到二哥間屋前，又大力一吹，木屋無散，兩隻小豬都好開心，但估唔到幾分鐘之後，成間屋就燒着咗，佢哋就即刻奪門而出，跑去三弟度。大灰狼去到三弟間磚屋前，再次重施故技，又用口吹又用火燒，但間屋就係絲毫無損，呢個時候，佢見到間屋原來有煙囪，就二話不說爬上去打算嚟個天降橫禍，點知『你有張良計，我有過牆梯』，三弟一早已經料到大灰狼有呢一着，所以一早就喺煙囪下面煲定煲滾水，大灰狼一落到嚟就淥死咗。大哥同二哥都唔敢再笑三弟，大家都起咗間磚屋，一齊過住幸福美滿嘅生活。」我一口氣說完故事的結局，再問他們從中得到甚麼啟示。

這次他們三人均異口同聲道︰「要將飛翔城嘅屋由木屋升級成磚屋，同埋唔好有煙囪，避免有可能發生嘅危機。」

「答啱一半，成個故事帶出嚟嘅意思好簡單，就係要循序漸進，唔可以一步登天畀最好嘅嘢出嚟。一嚟咁唔可以賺到最多錢，二嚟消費者唔會覺得嗰樣係最好。咁當然之後都要不斷改良，每次改些少，咁先可以長揾長有。而飛翔城而家的確係要由木屋升級做磚屋，不過佢哋覺得木屋已經係最好，所以佢哋要經歷一個危機先得，而個危機係要由我哋創造出嚟，咁先可以令佢哋知道木屋嘅不足。」我像無良奸商一樣說。

「今晚我會整好個設計圖，聽日就一齊起好佢，之後先再做下一步。今晚你哋早啲休息，聽日會好忙。」我對他們下達指令，然後便埋首於設計圖上。