第一回: https://post.shikoto.com/posts/82483
第二回: https://post.shikoto.com/posts/82765
一年前，喺我結婚當日收到個電話，係我十年前失咗蹤嘅女朋友婉澄打嚟，後來我同林頌明漏夜趕到西貢，由嶂山出發，途經蛇石坳時侯先發現婉澄好大機會已經死咗，後來同林頌明誤闖「結界」，最後得返我一個無事走返出嚟。
一年後嘅今日，當我返屋企踏出Lift門時侯，竟然收到阿明嘅電話，但因為我怕事所以無接聽到。
但隨即Whatsapp提示響起，我順勢望一望，係阿明嘅Whatsapp，唔通佢已經無事出返嚟?
我即刻打開Whatsapp一睇，見到一句說話
" 救我。點解唔聽我電話? "
正當我好開心咁打字想問佢點解無事時侯，阿明隨即Send張相嚟，我睇完後，心入面股寒氣湧上嚟。
張相係一張合照......張相影住......林頌明同婉澄呆呆咁望住我......
" 叮 "
身後嘅Lift門聲響起，然後打開道門。當我轉身一望後，Lift內燈光照明系統並無著到，變得漆黑一片，顯得非常恐怖。我緊握手機，吞一吞口水，似乎一切都變得異常，於是唔理咁多，收埋部電話急急腳咁行返屋企。
用鎖匙開門時侯發覺我隻手喺到震緊，遠望走廊，總覺得盡頭地方會有人會撲出嚟咁。呢種驚恐感覺自從上年喺西貢感受過之後又再一次出現。
入屋後，攤喺梳化回下氣。我膽粗粗咁拎返部電話出嚟，打開阿明嘅Whatsapp，狀態一欄顯示為成
" 最後上線於今天 上午03:15 "
我喺到思考緊點解阿明會事隔一年後打比我，如果佢無事出返嚟照計新聞會報導或身邊朋友會通知我，但如果呢個係求救電話就更加唔合理，喺山上失蹤一年一定唔會生存到，姐係話呢個電話根本就同上年收到婉澄電話一樣，係鬼來電。
望返佢Send比我嘅合照，雖然我唔敢放大張相仔細咁睇，因為總覺得相中兩個人會突然向我微笑，我亦唔想睇到相中嘅阿明同婉澄係以咩表情嚟對於我嘅不顧而去。既然婉澄失咗蹤十一年，如果佢地合照，就更加證明佢地兩個已經死咗。
算!唔好再諗，呢家嘅我有咗穩定嘅家庭，生活總算過得去，我唔想再涉及任何關於婉澄同林頌明嘅事，一諗起當晚同阿明喺西貢山上面嘅經歷，我就毛骨悚然，永世都唔會再行山。
「老公，仲坐喺到? 快啲沖涼瞓覺。」老婆從睡房走出嚟，似乎被我開嘅燈整醒咗，只怪我太過驚。
「係呢，最近有冇咩特別事發生?」我想知道老婆會唔會被我嘅事影響到。
老婆望一望我，似乎覺得呢條問題好似問得有啲奇怪，但佢諗咗幾秒，就走到張枱拎咗份報紙比我睇。
報紙頭版標題寫住 " 再有二十名港人失蹤 "
「呢份報紙係講緊琴日，岩岩電視又講今日有三十四人失蹤。由上個星期開始幾乎每一日都有人失蹤，而且數量仲愈嚟愈多。」老婆坐喺我身旁，然後慢慢挨落我度再說
「上年你同你朋友喺我地結婚當晚去咗西貢......雖然我唔知你地因咩事要上山，但最後得返你一個無事，我真係有啲驚失蹤嗰個人係你。」
「對唔住......嗰晚辛苦你。」我內疚地說。結婚大日子竟然老公走咗佬，留低一個女仔喺到面對親朋戚友，呢樣我一直都耿耿於懷。
老婆拍一拍我膞頭笑說:「我提返呢件事唔係話要埋怨你，而係真係擔心你。好喇，你快啲沖涼瞓覺喇。」說罷，老婆就入返房。
而我，望住份報紙細心閱讀一次，失蹤呢件事我早幾日都有留意到，但估唔到事情發展到每一日都有人失蹤。喺香港失蹤本身已經一件難以想像嘅事，而每一日都有咁多人失蹤就肯定有問題。係集團式綁架定係巧合? 定係好似阿明咁喺西貢失蹤? 但望返失蹤人士好多都喺市區內唔見，同西貢一帶遠遠扯唔上任何關係，究竟發生咩事?
我敲一敲額頭，可能已經太夜關係，頭有啲痛。今晚比阿明個電話同whatsapp攪到心神恍惚，雖然心入面覺得有嘢發生，但我已經唔想再諗，再諗落去遲早諗壞腦，於是快快手沖涼瞓覺聽日返工。
......
朝早七點半，大圍站如常擠逼咗好多返工返學嘅人，通常呢個時侯我都會聽歌塞住對耳仔，因為音樂有助幫我離遠呢類壓逼嘅生活節奏。正當我排緊隊等火車時侯，有個婆婆將個細路仔塞到我身旁，睇佢動作似乎想打尖，不過我見無影響到我就算。
入到火車內，望住窗外景色，雖然係朝早但今日天氣似乎麻麻地，估唔到準備入冬後都會想落雨。
突然，身邊嘅人開始向我趺趺撞撞咁，我轉身一望，只見一班人好似圍住睇嘢咁。我除低耳機睇下咩事，只見婆婆不斷大叫
「宏仔你喺邊呀！有冇人見到個細路仔呀？」
呢個咪岩岩打尖嘅婆婆? 佢做咩咁緊張周圍叫? 佢走失咗個孫？
「宏仔！你喺邊呀！出嚟喇！」婆婆急得好似想喊咁。身邊嘅人都忍唔住問佢：「阿婆！個細路仔咩樣架？」
「著住校服，揹住個書包仔！細細粒架！」說罷，婆婆視線望到我後，隨即衝住過嚟捉住我手袖，我亦扶住佢叫佢小心唔好趺親。
「呢位哥哥！頭先企喺你隔離個細路仔就係宏仔呀！你見唔見到佢呀！」
周圍嘅人都抱住一個無奈、懷疑嘅目光望住我。而我亦安慰婆婆：「我知道你講緊邊個，我同佢一齊入嚟......但係，照計佢應該無落到車?」確實我係同佢地一齊搭車，而我一直都企喺車門前，如果個細路仔走出去我一定會知。
「婆婆，我頭先都見到你個宏仔，不過我就唔係好知佢去咗邊。」有位熱心女仔關心地問。
另一個人亦查問婆婆說:「婆婆，佢會唔會走咗去第二卡呀?」
「我唔知我唔知......我明明拖住佢架!轉過眼就唔見咗佢!」婆婆邊講邊喊，場面令人心酸。
此時有人都讓座比婆婆坐，亦有人自發到其他車廂到搵一搵個細路仔。不過計算埋我在內，有4、5人係見到個細路仔，但都無人知道佢去咗邊，以咁擠逼嘅車廂入面，就算一個細路仔跑去其他車廂都好難唔會比人發現。
由於我需要喺九龍塘站落車，我最後都無了解成事件就走咗，不過婆婆嗰副好似痛失仔女嘅臉容就深深咁刻落我腦海之中。
返到公司後，見到班同事圍住阿晨部電腦，我好奇咁問:「做咩!? 睇緊咩?」
各人神情有啲凝重，只係用手指指部電腦示意我自己睇。我行埋去時已經聽到特首把聲。原來佢地睇緊Facebook轉播新聞，只見特首連同警察一哥佢地召開特別記者會。特首神色有點迷茫，但仍對住大家說：
「對於近日失蹤個案，琴日保安局局長都強調會將咁多單失蹤個案結合埋一齊調查，我地會盡我地最大努力去調查。同做任何案件調查一樣，我地都希望有關人士同所有能提供消息嘅人士能夠接觸警方提供線索，警方只能夠喺掌握一啲線索情況底下先可以盡快將案件嘅關鍵同情節籌併起嚟，我同埋特區政府非常重視呢件事，咁所以過去嗰幾日我地都同各個相關單位取得連繫，但係同處理所有案件一樣，包括人口失蹤嘅案件，無論當事人失蹤嘅背景或者情節係咩嘢，我地唔夠能將所有同案件有關嘅情況公佈，避免防礙警方嘅調查。」
「我地喺到重申多次，香港係世界公認最安全嘅城市之一，而香港嘅治安安全係我地香港社會整體安全嘅一個重要組成部分，市民無需感到驚慌，特區政府同警方一定會盡快將所有失蹤案件調查，並盡最大努力搵出失蹤人士。」
睇完呢個記者會，我開始感受到呢件事所帶來嘅影響有幾大，連政府都開聲調查呢件事，證明呢單嘢引起咗社會好強大嘅輿論。
「喂喂......咁撚恐怖嘅，呢幾日係咁有人失蹤呀!」
「係咪比人捉咗上大陸咋?」
「痴線......好得人驚囉!」
「喂阿言，你話會唔會佢地入咗結界失蹤丫喇?」各同事都紛紛轉到我身上，當年我同阿明喺西貢件事都引起身邊好多人討論，連社會向傳媒同網絡故事都有提到西貢擁有結界嘅事。但我通常都話純粹迷路，當晚所發生嘅事我無同任何人透露過。
「傻喇，你無睇新聞咩? 失蹤嘅人都唔喺西貢唔見，佢地喺市區呀!關結界咩事。」我說。
「唉，早知呢排大家出門小心啲喇。」說擺，各人都返番自己位繼續做嘢。
而我內心隱藏住嘅不安感覺亦都開始蠢蠢欲動，呢幾日阿明突然搵返我同近日香港失蹤嘅事會唔會有關?
社會上亦都因為咁出現好大輿論，各大社交媒體，甚至外國傳媒都紛紛洗版報導，而Yahoo首頁更有即時更新失蹤人士專欄，呢種情景令我諗起2003年沙士疫潮，每日新聞報導有幾多人感染沙士，如今每日新聞卻報導有幾多人失蹤。
「嗯!?」當我點擊即時失蹤人士個欄時侯，見到有個報導寫住 " 再有一名懷疑失蹤個案，失蹤人士名字叫謝卓宏，就讀旺角一間小學五年級，今晨與婆婆一同上學時，在大圍站列車內不見蹤影，警方觀看其閉路電視，並無發現該失蹤人士曾離開車廂......"
我吞一吞口水，謝卓宏係咪今朝見到大圍站個細路宏仔? 同時間，我睇返過去幾日失蹤人士嘅事情
2016年12月6日，二十三歲張嘉倩，任職船務公司文員，當日下午一時離開公司出外午膳後，之後再沒有她蹤跡。
2016年12月6日，四十八歲陳家正，歷奇活動導師。於當日早上八時離開住戶後，從此一去不回。
2016年12月6日，三十六歲徐偉俊，於當日下午三時被家人發現於屋內不知所蹤，其家人表示兒子並無外出痕跡。
過去呢幾日嘅案件非常奇怪，我隨即上高登論壇睇下網民點討論，估唔到一上去就見到好多POST已經講緊呢類案件，令我成日喺公司都無心機做嘢，而掛住上網睇佢地點討論，大部份都將所有案件靈異化，種種因素底下都不合常理同邏輯，亦有人幻想有人得到本「失蹤筆記」而將名字摘下......
過咗大半個月之後，事情發展得愈嚟愈嚴重。
警方公佈呢一個月嘅失蹤個案高達六千宗，足足係過去兩年嘅總和，而且失蹤人口好似有擴散跡象，每日以倍數增加。香港機場、各大關口都塞爆咗出國嘅人，佢地都紛紛認為香港出現問題，離開呢個地方。
而事件亦影響到外國遊客對香港嘅觀感，都唔願來港觀光，令本港無論股市、旅遊業同各行經濟都受到好大影響，連教育局都考慮停課處理。街上好多熱門地方都變得冷清，有人認為多人嘅地方容易比人擄走，所以好多人都情願留喺屋企避免「失蹤」。
直到今日為止，政府即使面對社會激烈輿論同經濟蕭條打擊，仍然強調調查當中，對案件一概不回應。
「老公，一陣你話包幾多利是奶奶呀?」老婆問。今晚正值係我阿媽生日，我地決定到西貢食海鮮，雖然我有反對到西貢食，但阿媽想懷念以前後生同老豆食海鮮嘅日子，加上老婆話又唔係上山，唔通一世都唔踏足西貢咩......既然係咁，所以我都決定咗喺西貢食。
「其實唔洗喇，阿媽都唔至在呢啲嘢。屌!前面架車可唔可以駛快啲呀?」今晚約咗八點食，但我仍然渣緊車入緊西貢市中心。
喺架車入面煩惱緊時侯，我望到對面線不斷有警車由西貢入面出嚟，數目都幾大規模咁，會唔會發生咩事?
我泊好架車後，就同老婆去咗間酒樓同父母家人一齊食飯。可能受到失蹤案件影響，以往星期六係逼爆場，如今卻冷冷清清。
「你阿媽就係想回味當年晚晚逼爆場嘅氣氛，估唔到時代唔同，人都無件。」老豆感概地說。
我隨即幫老豆倒酒，然後笑說:「咁咪仲好，好似我地包場咁!今日開開心心食餐好喇!」
雖然我把口咁講，但我仍然留意到酒樓部電視仍然不斷有失蹤人士數量增加嘅走馬燈公佈......
食到咁上下，我想叫侍應再加啲酒時侯，於是離開貴賓房。當我出到大廳時，竟然得返經理同一個侍應，其他人呢?
「請問，我地想加多幾罐啤酒。」我問。
突然間，有個侍應跑入嚟同經理帶有口音講:「封路呀!出面有警察封路呀!唔比走呀!」同時間都聽到出面好嘈，於是我同經理都走出去睇下發生咩事。
只見整片道路都塞滿車，紛紛響起安，好多司機都落車鼓燥，似乎出口位被塞死?!
「逄逄逄.......」天空傳來陣陣直昇機聲音，抬頭一望，只見四、五架直昇機喺我地上天盤旋，究竟發生咩事?
《失蹤》外傳 (第三回)
(再一次無限期待續)
