我叫阿明，讀緊中學嘅時侯，我就已經串柒柒，周圍同班男仔串人地，所以好多人都叫我做「賤咀」。而我亦樂於享受呢個稱號，每一日返學都係享受，每一日我都盡情過我嘅快樂校園生活。
好多人以為我天不怕，地不怕，但我其實好驚一個女仔，佢叫阿靜，佢身型比較細粒，留住長長頭髮，皮膚白裡透紅，可以話係一個幾ok嘅女仔，班入面有唔少男仔都對佢有興趣，但係我就無，因為佢同樣都有一副賤咀，好鐘意串人，我暗地裡幫佢改個花名，叫『毒舌女』。
女人狠起上嚟真係好狠，加上好男不與女鬥，鬥起上嚟都好唔著數，所以我都盡量唔同佢有任何接觸。
直到有一日，班主任屎忽痕話要調位，將我嘅惡夢打開咗序幕。因為佢將我調到個『毒舌女』隔離，我嗰刻心諗:「今次大檸樂!」雖然身邊嘅朋友用一個羨慕嘅眼光望住我，話我可以坐喺個靚女隔離，但我完全無任何自豪感覺，反而有點淆底。
當我坐埋位時侯，我慢慢咁將我枱上嘅書一本一本咁放落櫃桶到，由於我太多書關係，令到張枱一時之間好多書積咗喺到，『毒舌女』佢睇唔過眼就一手將我所有書一野放落我櫃桶入面
然後好霸氣勁大聲講句:「你係咪男人嚟架!執書都執咁耐!咁咪得囉!」說罷，班上隨即引來唔少笑聲，攪到我勁尷尬。
我望住我櫃入面亂七八糟嘅書堆埋一齊，我更感到無奈。
有一次放學，『毒舌女』突然話:「喂!劉啟明!聽日你帶個膠袋嚟掛喺我地張枱度做垃圾袋!」
為咗挽回男性嘅尊嚴，再比佢食住上我仲洗出嚟行!? 於是我主動提出猜「包剪揼」嚟決定邊個帶膠袋返嚟。點知佢又肯同我猜!心諗呢獲你死梗，果然皇天不負有心人，最後我猜嬴咗! 佢就死死氣咁離開班房。我望住我手上嘅"包"，非常有滿足感，今日係男人嘅勝利日!
到咗第二朝出門時，我喺到諗個『毒舌女』會唔會唔記得咗帶? 於是我索性自己帶一個返去。點知佢真係無帶膠袋返嚟，我就好型咁喺書包入面拎個膠袋出嚟，話:「知你實無帶!你睇!我一早帶咗喇!」
點知佢完全唔覺得型之外，仲露出一副不屑嘅眼神望住我，好唔耐煩咁話:「你肯帶嘅話就一早帶嗡!猜咩鬼呀!多鬼餘!拎嚟喇!」說罷，就一手搶咗我個膠袋然後掛上。
我望住個膠袋，我更感到無奈。
有一次情人節，作為毒撚嘅我當然呢啲日子係唔關我事，但上堂時侯，『毒舌女』突然同我講:「喂，陣間lunch出去買朱古力比我食。」
我碌大對眼望住佢，然後講道理咁講:「喂咪住! 點解要我買比你丫? 仲有丫!今日2月14日呀!唔係應該女仔買咩?」
佢望一望我，然後好認真咁講:「你係咪唔買呀? 你唔買嘅話我呢世都唔會理你!」然後佢即刻將張枱拉開，呢個時侯全班嘅目光都望住我地，但佢竟然毫無在意繼續上堂，同時間，佢班狗公開始話我蝦佢，叫我睇路，我心諗:「頂你個肺!今次我忍得你嘅話我仲係男人嚟嘅?」
然後我就死死氣求佢將張枱比推返埋嚟，我答應佢Lunch一定出去買比佢食。佢聽到後，態度180度轉哂，成個細路女咁，好似摸狗仔咁摸我個頭話:「咁就乖喇!」
往後日子我都一直比佢食住，每一日都處於一個緊張狀態。有時侯無啦啦話唔想郁但又肚餓，叫我去小食部買野比佢食。每次小測考試前，佢都會串我今次一定低分過佢，打擊我自信。每次佢上堂眼訓時侯，就會好兇狠咁叫我專心上堂，幫佢抄筆記，然後佢就安心訓覺。每次我同班同學傾計時侯講粗口比佢聽到，佢就當我透明30分鐘。每次一唔聽佢話，佢就話絕交，之後將張枱拉開，然後由我哄返佢。
直到有一日，唔知係咪我比佢折磨得多，今日好似有啲渾身唔聚財，原來今日『毒舌女』佢無串我，因為佢病咗。成隻小貓咁伏喺張枱到，見到佢咁反而有點可憐，都主動幫佢落小食部買水。排緊隊時侯，我仲諗緊自己做咩對佢咁好。
「阿明，你鐘意咩類型嘅女仔架?」『毒舌女』邊伏喺張枱邊問我。
「都係嗰啲喇!大波!皮膚又白又滑喇!」我隨口亂講，實在唔想回應佢。
點知佢拍一拍我膊頭，笑住叫我加油。唔知點解覺得佢呢刻幾可愛，於是我就問佢:「咁你呢?」
「我呀? 我希望第時個男朋友，係一個關心我、鍚我、對我好好、唔會對我發皮氣嘅男人。」『毒舌女』慢慢說。從佢眼神可見，佢真係好似有憧憬咁。
咁我當然玩下野，我就指住自己話:「咁咪姐係我?!」然後佢笑了。
呢次應該係我同佢最平和，亦都係最舒服嘅對話。
第二日，班主任又調位，將我同『毒舌女』分開咗，加上會考漸近，大家都各有各溫書，就開始無咩接觸。有時侯上堂悶悶地時侯，我都偷望佢，腦海諗起比佢恰嘅日子，唔知點解好想再試多次，唉!睇嚟我真係犯賤，但我發覺自己可能對佢有感覺，話唔定已經鐘意咗佢，因為我開始在意佢。
由於我成績過低，所以唔夠分升讀原校，轉咗另一間讀書，自此就正式同『毒舌女』無聯絡。
人大咗，亦都開始咗唔少戀情，但唯獨最令我記掛住最回味嘅，竟然係『毒舌女』。有時侯都會諗下佢呢家究竟做緊咩? 唔知佢呢家過成點呢?
一次校友回校聚會，我地都返咗去母校一齊BBQ聚舊。過咗咁多年，終於見到『毒舌女』，佢化咗妝，打扮得很成熟，好靚。我都把握今次機會，主動同佢Say hello，仲坐佢隔離BBQ。
「劉啟明! 我想飲可樂丫! 同我去拎返嚟!」『毒舌女』突然用命令形式對我說。
我聽到後，完全無嬲，反而笑笑口對佢講:「係嘅係嘅!即刻拎比你!」呢下舉動引來一班同學仔噓聲，但亦哄得我幾開心。
過程之中，我仲同佢玩野，撞下佢支燒烤叉，又串下佢，佢又串下我，又蝦下我，喺雨天操場追嚟追去，好小朋友咁。我見佢燒咗幾條腸仔用麵包夾住包起佢，我就笑佢係咪咁肚餓呀!竟然想拎返屋企食? 佢仲笑說唔關我事。
完場後，各人都開始散，我就同佢慢慢步出校門。我決定要追佢，唔想再錯失呢段關係，我知道自己鐘意嘅人就係佢，阿靜。
「係呢，聽日你得唔得閒? 不如聽日一齊去睇套電......」我未講完，佢就指住前面話:「我男朋友嚟咗接我丫。」
「男朋友?」我腦海突然間一片空白，但為咗唔想比佢知道我個驚訝表情，我就即刻話:「咁好丫!有男朋友接!」
佢男朋友渣住架私家車喺門口接佢，佢男友吸一吸口煙，然後不耐煩咁望住阿靜行埋嚟。
「同你介紹丫!佢叫阿明!係我中學同學!」阿靜同佢男朋友介紹，而我都死撐住同佢Say 個Hi!
佢男朋友望一望我，然後一副不屑嘅樣點下頭，完全唔想理我，就問阿靜走未。
阿靜喺書包拎出頭先BBQ整嘅腸仔包，話專登整比佢男友食。點知佢男友好大反應話:「咩嚟架?唔食喇!成陣味!整臭我架車呀!掉咗佢喇!」
阿靜聽到後，嚇得左望右望，似乎想搵一個垃圾筒，但周圍都無，最後送咗比我食。
我接過腸仔包後，呆呆望住佢地上咗車，然後駛走了。
晚上一陣冷風吹來，我望住架車慢慢消失喺我視線之中，腦海有好多畫面，亦都閃到以前阿靜曾經同我講過:「我希望第時個男朋友，係一個關心我、鍚我、對我好好、唔會對我發皮氣嘅男人。」
阿靜，你搵到嗎? 你愛你身邊嘅男人嗎?
我望住手上嘅包，咬咗啖......好好味，真係好好味。同時間，眼淚亦不自覺地流下了。
因為我知道，我呢世人都好難再遇上好似呢種毒舌女仔。
《毒舌女》
完
相信大家都等緊我寫嘅《失蹤》，不論正傳又好，外傳又好，我都多謝大家嘅支持。
《失蹤》呢幾日引來好大回響，所以將來可能會有一系列嘅破天荒嘅野比到大家睇，但至於係咩，咁就繼續留意住我嘅動向。
但利申: 我到呢家仲未寫的。
喺大家等緊《失蹤》同時，其實我仲有好多好多故事想分享比大家睇，大家要繼續支持我寫故事，比下like比我知道有人睇。
希望你地鐘意《失蹤》同時，亦都鐘意孔明所寫嘅故事。
亦希望我可以為你地生活之中帶來點娛樂。
