第一回: https://post.shikoto.com/posts/82483
「喂阿言!?阿言!我好驚呀阿言!我盪失咗路呀!我走極都走唔返出去!阿言!點算呀?」
電話傳來嘅聲音的確係婉澄，但呢一句無論聲調、語氣、字句都同岩岩打嚟嘅婉澄係一模一樣。
「婉澄?」我問。
「係呀!係我呀!我呢度打極都打唔到出去，我想報警都唔得，但唔知點解可以打到比你!」又係咁回應，點解咁奇怪?唔通呢個係電話錄音?但又跟到我所講嘅野去回應嘅?
阿明見我好似好苦惱咁，於是示意叫我比佢聽，我就將部電話交比佢。
「喂喂!?我係林頌明呀!婉澄你喺邊呀?」阿明認真地問，但佢都發現唔多對路，不斷:「喂喂?!聽唔聽到?喂!?」
之後阿明無奈咁遞返電話比我，佢話佢聽唔到任何聲音。但係當我聽返電話時侯，我又再一次聽到婉澄嘅把聲。
「阿言?喺唔喺到呀?阿言!」
「開擴音!」阿明細細聲響我耳邊講。
我隨即開擴音同婉澄繼續通話，我話:「我喺到丫!婉澄!你喺西貢邊個位置?我地到咗蛇石坳喇!」
「我唔知呀我真係唔知呀! 我好驚呀!」
「你冷靜啲先!你附近有啲咩呀?」
「附近......好多樹，好黑呀!咩都睇唔到呀!我行前啲睇下!」
「喂喂!唔好呀!停呀!唔好郁呀!你留喺原地等我!我同阿明嚟咗搵你!」
「你快啲....嘟嘟嘟......」婉澄話未說完，就斷咗線。
整個黑暗死寂嘅環境底下，擴音播放住呢啲嘟嘟聲，令我心都寒埋，即刻關咗佢。
我呆呆咁望住部電話，然後望一望阿明，佢眼神話比我聽佢好疑惑。我問佢咩事，佢話由頭到尾都聽唔到任何聲音，只有我一個人喺到唔知同邊個講緊嘢咁。我碌大對眼望住佢，嚇到我個心離咗一離，開始感覺到自己個身震緊。
「頭先我咪同婉澄講緊嘢囉......你聽唔到咩? 佢話附近好多樹，我仲叫佢留喺原地唔好亂走!」
阿明無出聲，帶點疑惑嘅目光搖搖頭。我知道事態嚴重，我一直以為婉澄仲生存緊，但呢刻無論情感上同理智上我都開始唔認同婉澄仲生存緊。我再望下周圍，一片死寂，間中有大風吹過，吹到附近嘅樹"發發聲"，唔知點解感覺到好似好多人望住我咁，而最恐怖嘅係......呢度無任何燈光，我連阿明個樣都睇唔清楚，只係見到一片模糊嘅樣，只有將部手機嘅電筒功能照住先無咁驚嚇。
我開始驚，我開始後悔，我點解會嚟到呢度搵婉澄?我今日結婚，本來可以開開心心舒舒服服同老婆擺酒，點解我會嚟到呢度? 點解會咁傻仔嚟到呢度?
「阿言! 阿言呀!」
點解? 我好驚，好想走.....係!不如走!不如當咩事都無發生過!婉澄佢死咗!佢十年前一早已經死咗!個電話有問題!無理由只有我聽到......無錯!一定係咁!
「喂呀! 阿言呀!」阿明拍一拍我膊頭，我嚇到即刻甩開佢隻手，驚嚇地望住佢。
「你咩事呀?」阿明似乎都比我呢個行為嚇親。
我吞一吞口水，定一定神，然後口震震咁問:「點.....點解得我一個聽到嘅?」
阿明冷靜地將地下部電話執起，按咗幾下制，諗咗幾秒後就再放喺我手中，慢慢地說:「可能佢最信任嘅人就係你。只有你先可以搵到佢，而佢亦都只可以搵到你。」
「咁呢家點算?我地仲搵唔搵佢?」雖然我心入面有萬個唔願意，但我都問一問阿明意見。
「我留意到一樣嘢，婉澄第一次同第二次打嚟嘅時間都係得大概只有一分鐘，一分鐘後就自動收線。」
「但係......但佢次次講野都一樣喎!」
「話唔定佢真係入咗結界，佢不斷原地重覆行緊，所以你要把握每一次傾電話，盡量確認佢位置。」
「但係......」
阿明扶我起身後，拍一拍我身上嘅樹葉，然後說:「婉澄個電話只有你先可以聽到，咁姐係代表佢最信任嘅人，就係你。我知道你呢家好驚，我亦都唔係好清楚發生咩事，但我相信你都好重視佢，係咪?至少過咗咁多年，你仲Set佢電話落手機到。」
我聽完之後有啲慚愧，特別聽到婉澄最信任嘅人就係我，但我呢刻竟然驚死驚鬼而想走......於是我就死死氣繼續靠住電話燈光照住行，而阿明就緊貼住我。
我一路行成身一路震緊，心入面成日覺得有啲野好似會彈出嚟咁。霧亦都開始大返，黑暗之中加上濃霧，完全覺得前面好似有陣白煙周圍飄咁，而且我真係覺得周圍都有人望住我地，仲時不時聽到 " 沙沙 "嘅聲音。呢一點似乎阿明都聽到，而佢索性搭住我膊頭行。
「喂阿言!你點呀?你成身震得好勁呀!」阿明忍唔住出聲問。
我呢刻真係頂唔順，我好坦白咁講:「我好驚呀......我好後悔呀，我唔係唔想搵婉澄呀!但我真係好驚呀......」
阿明見到我咁，就話都覺得行落去都好危險，提議離開然後聽早再報警處理。於是我就急急腳沿路帶住阿明行返轉頭。
但係我行行下發現!條路好似唔同咗咁，本身一直行緊嘅都係平地嚟! 但呢刻周圍都遍佈住好高嘅灌木叢同埋巨石，完全唔係我所熟悉嘅蛇石坳。於是我開始急步咁行，行極都好似行唔到出去大路咁，周圍都係好高嘅樹!
" 沙沙" " 沙沙 "
又係呢啲聲，我拎住個電話慢慢咁去外周圍照，慢慢......慢慢.....咁照。仍然係黑暗一片，但比人望住嘅感覺仍然存在。
阿明見到我周圍照，於是急問:「阿言!冷靜啲!發生咩事呀?」
「我發覺條路唔同咗呀!」
呢個時侯，電話又響起，來電顯示又係婉澄，我嚇到隻手震哂唔敢接。阿明見到我咁，叫我快啲聽!盡量叫婉澄講佢位置喺邊同埋問佢呢家究竟係咩年份。我吞一吞口水，就接咗嚟聽。
「喂阿言!?阿言!我好驚呀阿言!我盪失咗路呀!我走極都走唔返出去!阿言!點算呀?」
「婉澄，你冷靜啲! 你慢慢睇下周圍除咗樹之外，可唔可以形容一下仲有啲咩呀?」
「好好......呢度.....呢度好多好高嘅樹同石頭!」
當我聽到後，我再望下周圍，佢口中所講嘅『好高嘅樹同石頭』，會唔會係我眼前見到嘅灌木叢同埋巨石?姐係我同婉澄位置距離愈嚟愈近，但係咁樣.....即係話我同佢都盪失咗路? 但我無理咁多，於是再問:「婉澄，你呢一日係咩年份?」
「吓?做咩咁問呀......?呢家咪2006年囉!」
我呆咗，然後對阿明講:「2006年.....」
「婉......婉澄，其實我地呢家已經係......」我實在講唔出口已經過咗十年，唯有一直拎住個電話任由呢一分鐘過去。
「嘟嘟嘟......」再一次斷咗線。我聽住呢啲聲，除咗有種心寒嘅感覺之外，仲有一種失落感。我期待咗十年，等咗十年，就係想聽到有佢嘅消息，如今佢打嚟，但係我就......有一種唔想再聽到佢把聲嘅想法。
「阿言!我地要快啲走!你睇下地下!」阿明指住地下。
我順勢望下，發覺周地都係樹葉小石，無咩特別，究竟要望咩?
阿明急著解釋，仲帶住我行說:「結界範圍內係絕對唔會有任何動物出現，你睇下地下!一隻螞蟻都無!咩都無!連垃圾都無!你唔覺得奇怪咩?」
唔講唔覺，佢一講起又真係一隻螞蟻都無，平時喺山到勁多小動物同埋垃圾，如今咩都無!完全唔係我平時行嘅山。唔通我地真係入咗結界?
「咁......咁點算?」我完全唔知道點做，我只能夠依賴住阿明，我仲話自己一個上嚟搵婉澄，如果無阿明陪我，我呢刻真係唔知點做。
阿明吞一吞口水，然後示意我地要冷靜啲，佢拎出三個銀仔，似乎又想占卦。
「弗遇過之，飛鳥離之，凶，是謂災眚。」阿明呆呆咁講咗呢句野，我問佢呢支卦解咩。佢無回應我，收返起堆銀仔，然後話盡快離開呢度。我唯有聽佢講。
阿明用電話燈對住山坡照咗幾下，佢話:「西貢嘅山靈氣極大，加上有好多鬼怪，例如山魅、樹精、先人憤墓。呢堆都會吸引咗好多修道嘅人嚟，佢地會設下結界修行，但往往呢類結界對人造成影響。不過呢類結界通常都有個範圍，離開咗自然走得返出去，而向下走就係出路。」
「向下?好斜喎!同埋下面黑到咁點行呀!」
「咁你覺得應該點做呀!?你講丫!」阿明開始燥燥地，佢呢句令我完全無地自容，覺得自己原來咁懦弱。但佢捉住手，然後話:「唔好講咁多，我地一齊衝落去，去!」說罷，我同阿明就衝咗落眼前嘅山坡。
由於環境實在太黑，加上衝落去嗰一刻好難用手機向前照，所以我地索性收埋部機，唔理前面有啲咩，一直去下衝。
突然間，阿明停低咗，仲捉住我唔比我再向前衝，我即刻問佢做咩。佢叫我唔好出聲，然後眼睛示意我望去左邊。我一望之下，嚇到想大叫，腳都軟埋。只見左邊遠處有一堆白煙向我地慢慢飄埋嚟，我好清楚知道呢啲煙絕對唔係霧氣，因為我見到堆煙中間好似有堆人喺入面。而且 " 沙沙 " " 沙沙 "不斷由遠處慢慢傳來。
我同阿明慢慢行去挨住棵樹，我坐低抱腳縮埋個頭，我咩都唔想理咩都唔想知。我連吸氣聲都唔敢發出，心入裡不斷亂叫阿彌陀佛，希望唔好攪著我。
"沙沙" "沙沙"
聲音愈來愈近，我感受到一股寒氣慢慢飄近，我成身震到好誇張，我亦受感受到身邊周圍都有人企喺到望住我，我聽到好多竊竊私語，但我聽唔明佢地講緊咩。我唔理，我內心不斷叫阿彌陀佛......
過咗唔知幾耐，身邊開始靜咗落嚟，我都開始好累，體力下降咗好多，我慢慢抬起個頭望，見到個天開始光，令到周圍附近唔需要電話燈光都可以睇到，我拎部手機出嚟，原來已經六點幾，但感覺由上山到呢家好似過咗幾個鐘咁，但既然天光，我就有信心可以搵到路出去，於是我就叫阿明一齊走。
「阿明!天光喇!」我起身一問。但發覺只有我一個人，阿明呢?
「喂!阿明!你喺邊呀?喂!阿言呀!」我唔敢大叫，細細聲咁邊行邊叫。我開始聽到有車聲行過，但阿明佢.....但我唔理，最緊要自己無事先，於是我放棄繼續搵阿明，急急腳咁再向下衝，發現原來我離馬路只有百幾米，隨時拎起手機報警，但電話已經無電自動關咗。於是企喺馬路等車過，然後等路人報警。
呢一個朝早，引起好大件事，警察、消防同搜救隊都出動喺山到搜索，雖然我好清楚指出係蛇石坳同埋沿住我岩岩落下嘅位置比佢地聽，但都無任何發現，隨即佢地正式發出新聞犒，顯示一名行山人士，林頌明，於西貢山上失蹤。
呢一次，無論傳媒定身邊嘅人都追問我當晚究竟發生咩事，我只係交代咗幾次後就絕口不提了，雖然咁樣好似好對唔住阿明，但我實在唔想再去諗呢件事，而且佢失蹤都唔可以怪我丫?當日係佢自已要求陪我去!我無逼佢!我感謝佢為我付出，但我都唔想佢失蹤， 係咪? 所以，我都開始過返自己嘅生活。
事隔一年，我同老婆都結咗婚，亦擺返酒，一切都回復正常，而婉澄亦都無打比我，所有野好似無發生過一樣，連林頌明失蹤呢件事都無人再提起。但係有一樣野，我係改變咗，就係永遠永遠都唔會再行山。
凌晨三點鐘，岩岩返完工嘅我帶住疲勞嘅身驅返到屋企樓下，一入大堂成地都係水，潮濕得非常嚴重，我見到大堂部吹風機又熜鬼咗，我望一望個看更，佢瞓著咗，有無攪錯? 於是小心咁行去搭電梯。
由於大廈為咗慳電，所以凌晨時份都唔會開燈，有人按Lift先會著，所以開Lift一刻我都會閉上眼幾秒先，避免見到Lift入面黑暗嘅畫面，因為我見過一次，非常恐佈。
搭到去17樓後，踏出Lift門，我發現地下竟然一啲潮濕都無，同時褲袋部電話隨即響起。我心諗咁怪? 岩岩出Lift，電話明明無咁快有訊號架?
我一望之下，嚇到個心離咗，全身發軟，因為手機來電正係林頌明。一年前腦海所發生嘅事一一浮現，唔通阿明同婉澄一樣，入咗結界?
我呆呆望住電話，於是把心一橫按上拒絕收聽呢個制。我咁難得先可以過返正常生活，咁難得先跳出陰影，我唔可以再比呢堆事影響到。對唔住阿明，你失蹤咗咁耐，你已經死咗，唔好再搵我啦好唔好。
正當我想行返屋企時侯，Whatsapp提示響起，我順勢望一望，見到 "林頌明Whatsapp我"，咦!? 唔通阿明真係無事!?
我即刻打開Whatsapp一睇，只見阿明Whatsapp咗一句比我 " 救我。點解唔搵我電話? "
正當我好開心咁打字想問佢點解無事時侯，阿明隨即Send張相嚟，我睇完後，心入面寒氣湧上嚟。
張相係一張合照......張相影住......林頌明同婉澄呆呆咁望住我......
" 叮 "
身後嘅Lift門聲響起，然後打開道門。
我慢慢轉身一望......竟然......
《失蹤》外傳 (續)
第三回: https://post.shikoto.com/posts/117279
