我叫阿言，今日係我結婚嘅大日子。曾經聽過有一句說話，話結婚對象並唔係最愛嗰一個，以前我唔認同，既然結得婚，點會唔係自已最愛? 但呢一刻，我開始有啲認同，至少今日我老婆並唔係我最愛，我心入面，仲掛住一個失蹤咗十年嘅女朋友，佢叫婉澄。
十年前，我同婉澄參加咗學校遠足活動，去咗西貢行山，期間婉澄就失咗蹤，警察同有關部門足足搵咗一星期都無任何發現。至此，婉澄一直音訊全無，而佢父母仲控告學校疏忽令到佢個女唔見咗，呢件事對我地身邊嘅人都係一件唔敢提起嘅事，始終我地無好好睇住佢。
事隔十年，我都需要過返屬於我自己嘅生活，身邊嘅人都開始忘記婉澄嘅存在，就好似婉澄從來都無出現過咁。
「嘩! 新郎哥今日好型喎!」林頌明打開化妝室道門入嚟。
我對住塊鏡，整理一下衣著，然後說:「阿明，今日開始我就成為人地嘅老公，我以後個人生就會踏入另一個階段。」
「所以我咪話囉! 咁早結婚做咩嘢呀? 遲早你就後悔。」
「我老婆唔細架喇，係時侯要比個名份佢。」
「咁又係，拍咗咁耐，通常得兩個結果，一係分手，一係結婚。」
我諗咗一諗，笑說:「唔講喇! 我地出去。」
當我同阿明轉身正想離開化妝室時，褲袋裡手機響起，我拎出嚟睇來電顯示時侯，我完全呆咗。
一個十年內從來無出現過嘅電話號碼，一個十年內從來無出現過嘅名字 - 『婉澄』。
阿明見我呆哂咁望住電話，好奇地問:「做咩呀? 邊個打比你?」
「婉澄佢打比我......」我對住阿明呆呆地說。
阿明係我中學同學，雖然當日佢無參加遠足活動，但佢都認識婉澄呢個人。
「唔係呀嘛? 攪咩呀?」
我吞一吞口水，然後聽咗呢個電話。
「喂阿言!?阿言!我好驚呀阿言!我盪失咗路呀!我走極都走唔返出去!阿言!點算呀?」
電話裡傳來一把十年內無聽過嘅聲音，我緊緊地握緊部手機，眼淚湧現，心裡頭一時之間唔知講咩好。
「婉澄? 你係婉澄?」
「係呀!係我呀!我呢度打極都打唔到出去，我想報警都唔得，但唔知點解可以打到比你!」
「婉澄你去咗邊呀!你呢家咩位置呀?我過嚟搵你丫!」
「我就係唔知我自己喺邊!我仲喺山到呀! 西貢呀!」
我即刻望一望阿明，然後說:「係婉澄，佢仲喺西貢呀!佢仲喺西貢呀!」接著，我再對婉澄說:「婉澄!你呢家咩都唔好去，留喺原地知唔知?我即刻嚟搵你!」
「嗯!我咩都唔去!我等你呀!阿言!我好驚呀......」婉澄崩潰地喊咗出嚟，可以想像得到佢呢刻係幾咁無助，幾咁孤單.....
「放心!我呢家嚟搵你!你記唔記得你行咗去邊? 你身邊附近有啲咩嘢?」
「呢度....嘟嘟嘟......嘟嘟嘟」婉澄話未說完，就掛咗線，傳來一陣死寂嘅嘟嘟聲。
阿明見到我咁，就問:「點呀? 發生咩事?」
「係婉澄打嚟，佢喺山到盪失咗路!佢叫我去救佢!」說罷，我隨即收恰一下行裝，換上較輕便嘅衫，準備上山救婉澄。
阿明即刻阻止我，捉住我說:「你傻咗咩!你今晚結婚呀!你唔係呢家想走呀?」
我指住部電話激動地說:「婉澄佢仲喺到架! 佢等緊我呀!」
「十年喇! 婉澄佢唔見咗十年呀! 你清醒啲得唔得呀!」
「我好清醒! 我係佢男朋友呀! 唔通我會連佢把聲都聽唔出咩!」
「有咩事都好! 過咗今晚先再處理OK?」
「婉澄佢呢家出咗事等緊我呀! 佢隨時捱唔到今晚呀!」
由於我地嗌得好大聲，攪到好多人都走入嚟睇下咩事，連我老婆都入咗嚟問咩事。
我望一望佢地，望一望我老婆，我緊緊地握緊電話對大家說:「對唔住。」說罷，我就拎咗套衫奪門而出。
我好清楚我咁做會有咩後果，亦都對身邊嘅人造成麻煩，特別係我老婆，但事實嘅係......電話入面的確係婉澄把聲，呢點我可以百分百肯定，我唔理婉澄究竟發生咩事，但我知道如果我今日咩都當無聽過，咩都當無事發生，我心入面嗰道結，永遠都解唔開。
我行出酒店門口，一路等的士，一路打返電話比婉澄，但奇怪嘅係，一如以往都係播放住『你所打嘅電話號碼已經停止服務，請你查清楚再打過嚟啦!』但點解婉澄會用呢個號碼打到比我?
「阿言!阿言!」只見阿明氣喘喘咁追出嚟。
「我唔想同你嗌，我知道自己做緊咩，我唔會跟你返去。」我去意已決。
「我唔係叫你返去，我係嚟陪你去，西貢好猛鬼架!」阿明說。
我望住阿明，然後拍一拍佢膊頭衷心咁講:「好兄弟!」
接著，我就同阿明兩個人出發去咗西貢搵我十年前失蹤嘅女朋友-『婉澄』。
喺搭的士期間，我再次向阿明講返岩岩電話聽到所發生嘅事。而阿明亦講咗西貢行山好多古怪事，佢唔會阻我去搵婉澄，但件事太奇怪，所以都唔想報警住，等我地睇情況後再決定。
落車後，開始落住微微細雨，而且霧氣極大，眼前所見嘅景物都遍佈濃霧，好似踏入仙境一樣。但深夜一片黑暗，微弱燈光似乎發揮不到任何作用，顯得這個仙境頓時變得好似地獄般一樣。
「點? 雖然夜晚行山出事率提高咗一半，但既然行到呢一步都無計，你呢家諗住點搵?」阿明問。
「我好熟當日行山嘅路線，當日行程係由西貢嶂山出發，沿路會途經石屋山、蛇石坳、南山洞及白沙澳，至海下路為終點。而婉澄就係蛇石坳到唔見咗，我地可以沿住呢條路線再行一次。」我解釋說。
「真係唔後悔?」阿明再問，但呢條問題我覺得佢應該問返自己。
「如果我今日無視呢個電話而去結婚，我先會後悔。」說罷，我地正式出發。
由於行山裝備缺乏，我地連電筒都無一支，主要靠手機電話嘅燈光幫我地開路，但我同阿明都發現我地手機電量只有45%，連一半都唔夠，而且電話訊號開始慢慢收得好弱，所以我地有個協定，當用電量只有20%時侯，無論發生咩事都好，一定要離開呢度。
當我地行緊時候，霧氣好勁，周圍都好潮濕，空氣變得好混沌，令人有一種窒息嘅感覺。連我都開始感到辛苦，何況婉澄?
「吓? 咁近點會走失呀!? 唔洗怕喎!」
阿明搖搖頭認真地說:「山入面其實有好多結界。而所謂結界大概分成三種，第一種係符印結界，結界範圍透過符同埋印記而做出嚟。而第二係膜狀結界，但一般嚟講好難發現同入到去。而第三就係無形結界，呢類結界係最危險，因為呢種結界冇辦法破壞，而且入咗去都唔知自己入咗。所以我地盡量跟貼咁行，如果唔係隨時入咗結界......到時就麻煩。」
「結界? 點解山入面咁多結界?」
阿明再解釋說:「結界形成原因有好多，不外乎地理、天氣同埋環境有關。因為山入面人少陽氣少，令到磁場轉變，形成所謂結界。其實我地住緊嘅公屋有時侯都會有結界出現，公屋大廈有咁多住戶，每戶都有大量電器輻射而令到磁場不斷改變，最有機會出現嘅結界就係後樓梯，因為一直都好少人行，特別係十幾至廿幾樓嘅後樓梯，所以結界唔一定只有山到先有。」
「後樓梯? 咁入咗結界會點?」
「咪假如你住24樓，你行上行落都會停留係24樓......點都走唔返出去。」
「唔係化.....咁」我話未說完。
突然間，阿明碌大對眼望住我，我嚇咗一嚇問佢咩事。
阿明摸一摸地下，再望下周圍，再睇下電話訊號。佢吞一吞口水說:「霧氣開始無咁勁，地下都無咁濕，電話亦都無訊號......呢度喺邊到嚟?」
我再望下周圍，就答:「大概我地行到蛇石坳。婉澄就係呢度唔見咗。」
阿明個臉色好似如臨大敵咁，即刻拎出三個硬幣放喺我手到。
然後認真地說:「呢三個一蚊銀仔，公為陽，字為陰。呢刻你要講出你今次嚟嘅目的，然後擲六次，再紀錄返每次嘅陰陽數目。我要同你卜支卦!」
我認識嘅阿明係一個易經占卜師，平時佢好少用易經占卜，我記得佢講過易經係講求命運掌握喺自己手，唔到有危機困難時都盡量唔會用。但呢刻佢咁緊張，似乎佢感覺到有問題將會發生。
「好!我就問......我可唔可以搵得返婉澄。」說罷，我擲足六次，再由阿明幫我紀錄。
問: 我可唔可以搵得返婉澄
公字代表: 公=陽 字=陰
- 陽陽陰
- 陰陽陽
- 陽陽陰
- 陰陽陰
- 陰陰陰
- 陽陽陰
阿明望一望啲硬仔，沉思咗一陣。然後說:「呢個係困卦第五爻 ，『劓刖，困于赤紱，乃徐有說，利用祭祀。』前句就話你所用嘅方法好難達到目的，欲速則不達，一定要心平氣和咁冷靜處理，以能夠讓祭祀順利進行，祈求福祉，達到目的。」
「哈!咁最終姐係會達到目的? 咁呢支卦都唔錯喎!」我鬆了一口氣。
但阿明仍然苦思中，似乎佢對呢支卦有點質疑，佢說:「但呢支係困卦.....通常困卦.....」話未說完。我電話突然響起，電話鈴聲劃破整個死寂環境，嚇得我同阿明個心都離咗一離。
最重要既係，電話左上角寫住 " 沒有服務 "，姐係話呢度根本就收唔到電話。而最靈異嘅係，來電顯示正正就係婉澄打嚟。我同阿明對望後，佢示意叫我聽，而我就聽了。
「喂阿言!?阿言!我好驚呀阿言!我盪失咗路呀!我走極都走唔返出去!阿言!點算呀?」
電話傳來嘅聲音的確係婉澄，但呢一句無論聲調、語氣、字句都同岩岩打嚟個婉澄係一模一樣。
「婉澄? 」我問。
「係呀!係我呀!我呢度打極都打唔到出去，我想報警都唔得，但唔知點解可以打到比你!」
又係咁回應，點解無論聲調、語氣、字句都同岩岩打嚟個婉澄係一模一樣? 唔通呢個電話......
《失蹤》外傳
上集完。
