當一段關係發展到情侶時候，身邊嘅人都會加自己主觀諗法喺呢對情侶身上，例如佢地可以拍幾耐? 佢地襯唔襯? 佢地夾咩?
我朋友軒仔岩岩同佢女朋友正式拍拖時候，佢個樣係好開心，同時又有啲擔憂，因為佢地要承受比人一般情侶更要多嘅閒言閒語。
好多人話結婚係兩個人之間嘅事，其實係幻想嚟。結婚係要顧及好多人眼光，雙方家人等等......絕對唔會做到「兩個人」嘅地步。
即使係拍拖都唔例外，軒仔年紀比佢女朋友阿May細四年，亦都因為咁而比好多人「睇死」呢段關係
每個人聽到年紀差距四年，而且仲要係男方細對方，各人臉色都好似皺一皺眉頭咁，好似呢段關係違反咗大自然物理定律咁
雖然軒仔有拖拍係一件開心事，而且仲要食「大姐姐」，從男人幻想世界之中呢件係一件光榮幸福嘅事，但現實世界之中，男方竟然比對方細四年，又真係幾令人擔心。
「其實大家介意啲咩同埋諗啲咩，我同阿May都有諗過。我地兩個唔係玩玩下，我地既然決定咗一齊，就相信我地會一齊捱到落去。」當晚軒仔以一副堅定不移嘅心釋除大家嘅疑慮。
事隔四年，積聚咗落嚟嘅問題終於爆煲。
一直以來，阿May屋企人都唔鐘意軒仔，覺得佢太細，即使軒仔成功升到大學而應阿May邀請同佢屋企人慶祝呢份開心事時，對方家人有意無意咁比說話比軒仔聽
「阿May今年就大學畢業，而你就岩岩升到大學，要等你出嚟賺錢仲要等多四年!難免咗阿May呀.......」
即使軒仔多番表示會喺在學期間打多幾份Part Time，希望可以拉近阿May嘅距離，但對方家人就不斷回應
「Part Time又點可以同Full Time比呢!? 咪啦咪啦! 你都係專心讀好啲書，一陣畢唔到業又累咗阿May!」
面對住屋企人句句插心怨言，軒仔話唔介意就呃你，但都無計，唯有硬食。即使全世界嘅人都反對佢地，只有一個唔反對就得，就係佢女朋友阿May。
好景不常，阿May自畢業出嚟做野後，成個人都負面咗好多，經常唔開心，每次同軒仔呻返工幾咁辛苦，搵錢有幾咁難搵時候，軒仔都盡量安慰佢同埋表現得關心佢，但阿May都一一聽唔入耳，因為喺佢眼中軒仔都仲未出嚟做野，返工嘅辛苦佢識條鐵?
喺香港打工真係慘過做奴隸，阿May得到一個機會需要到外國工作，薪金將會係呢家嘅兩至三倍，而代價就係長住外國。
軒仔當然反對，佢表示佢嘅感受同擔憂，但阿May話呢家交通發達，如果軒仔想見佢可以隨時買機票搵佢，而呢個係難得嘅機會，佢唔想放棄。
「隨時搵買機票搵佢。」
呢句說話出自係阿May把口，佢係以時間角度去諗。但以軒仔角度嚟睇，呢個唔係時間問題，而係金錢問題。出嚟社會打滾咁多年嘅阿May當然可以輕易買到心儀機票，但對於仲係學生軒仔嚟講，機票係一件極奢侈品。
最後，阿May去了外地工作。
昨晚，軒仔亦宣佈佢地終於分手了。
我地心知呢個係遲早嘅事，但都扮哂傻仔同埋好可惜嘅樣咁去問佢點解。
「佢去咗外國後，不斷話外國生活幾咁美好，啲人質素幾高，同香港比真係天堂同地獄咁。哈......可能佢喺香港打工打到有陰影喇，但最重要嘅係，佢識咗個男仔，個男仔對佢好好，而且仲幾有錢，最後......」
我地就聽到有啲火滾，於是話:「屌你Come on james現實版? 洋腸大哂? 有錢仔大哂? 你係佢男朋友喎!」
「我係佢男朋友，呢個先係問題所在。佢唔想比對方知佢已經有男朋友，佢一直都隱瞞住呢段關係，怕嚇走對方而錯失呢個機會。前幾晚同我討論呢個問題，因為紙包唔住火，個鬼仔遲早知，既然係咁，不如同我有共識地分手。」軒仔說罷就飲幾淡酒，呆呆搖搖酒杯感概地說。
「你唔撚係真係分手呀? 條女咁狗閪，你就玩野啦!」兄弟們都按奈不住，可能大家都好討厭輸比洋腸嘅感覺。
軒仔再接著說:「你地有冇聽過Eason首人來人往? 閉起雙眼你最掛念誰嗰首呀!」
我地作為Eason死忠，當然聽過喇，但就唔明關首歌咩事。
軒仔就話:「有句歌詞係『感激車站裡 尚有月台能讓我們滿足到落淚』，之前一直都唔係好Get到個意境，呢家終於體會到當中意思。因為車站本來就係一個離別嘅地方，呢句可能諷刺緊離別都要感激第三者，可能首歌主角除咗接受之外，根本做唔到啲咩去令女朋友回心轉意。」
雖然軒仔講到好有浪子Feel，但我地腦海只係諗起王傑首歌:「哭泣聲絕無意義 它不會扭轉分開的心意」
最後我地問軒仔究竟阿May篇野講緊咩。
軒仔就話:「篇野來來去去都係解釋佢點解咁樣選擇，同埋......對於佢提出分手，問我有冇嬲佢。」
「咁你點應佢呀?」我地緊張地問。
軒仔拎咗部手機出嚟，打開Whatsapp比我地睇佢同阿May嘅MSG，只見軒仔回應咗佢一句，睇完我地都不自覺地暗嘆了。
軒仔最後一句回應係
「你只係做返25歲應該做嘅事姐。」
那一夜，軒仔看似表現得好瀟洒，但當佢不斷講不斷飲酒後，我地眾人都靜靜地坐喺佢身邊，腦海不斷浮現軒仔最後回應嘅一句，內心只係有一種無奈，唏噓既感覺。
《完》
