荒廢村屋

我坐的鋪總共有兩條Team共用，但大家並不存在惡性競爭的關係，反而是十分友好，會一起吃喝玩樂。

我們有一個群組，是相約大家一起玩的，透過這個群組，我們組織了數次的籃球活動。而最近，鄰Team其中一位同事阿佑便邀約大家一起去他的家舉辦燒烤大會，大家也一致答應出席，很快便約好了時間、分配了工作，期待著燒烤大會的到來。

「阿佑，其實你住邊？」Fion問。

「佢有錢人嚟，住清水灣。」阿佑的同事兼好兄弟Kelvin搶著說。

而另一位同事兼好兄弟Terence也接著說︰「啱呀，你唔見佢成日唔駛返工咩？有錢仔唔駛成日返工。」

這是他們三人的相處之道，因為由中學已經認識，所以已經很熟悉，互相搶白是家常便飯，經常吵得很兇，但原來都是互相開玩笑，我們也司空見慣。

「唔係喇，咪聽佢哋亂噏，我住清水灣啲村屋，無錢嘅。」阿佑澄清道。

「咁你要畀定地址我，到時我揸車入去。」Alex說。

「無問題，其實好易去，我一陣喺Group send個地址出嚟，小巴的士都去到。」阿佑邊說邊按電話。

「我哋有九個人，男仔多，嘢食嘢飲都要準備多啲喎。」Rita提醒大家。

「我嗰日會放假，我負責買肉買海鮮，之後早啲入去幫手Set up先。」Justin第一個承擔責任。

「我嗰日有客，可能會遲啲，到時睇下有咩唔夠我再買入去。」我也立即申報當日安排。

「咁我買嘢飲喇。」Chris說，然後再問︰「有無人同我一齊買？我一個拎唔到咁多。」

「我幫你喇大師兄。再順手買啲麵包、綿花糖之類，Rita一齊。」Fion對著Rita說，Rita也爽快答應。

「咁我哋都買多啲炭，同埋都買啲肉同腸丸嗰啲。」Kelvin搭著阿佑和Terence的膊頭說。

「Justin，我都幫你一齊買肉同海鮮，之後一車過車埋入去。」Alex也找到自己的工作。

「阿佑屋企隔離有棟荒廢咗無人住嘅村屋，聽講有鬼嘅，我哋可以去探險。」Terence壞壞的笑笑口說。

「喂，唔好嚇我哋喇。」Rita掩著耳說。

「唔好聽佢亂講，邊度有鬼，我住咁耐都見唔到。」阿佑推了一推Terence，然後說︰「雖然我住咁耐佢荒廢咁耐，但好肯定無鬼。」

「正喎，可以去逆權侵佔佢，香港買樓咁難，咁樣霸返間返嚟幾好。」Kelvin說。

「咁即係到時一齊去探險喇。」Terence雙眼發光。

「贊成！」在座所有男性成員也同意，畢竟人多勢眾，也沒有什麼需要害怕。

時光飛逝，很快便來到約定之日，這天鋪內的同事不多，只餘下我、Admin同事和鄰Team比較年長的同事，其餘的人都去了為晚上的燒烤大會做準備。

「你好，小姐，有咩幫到你？」我對著剛推門進來的女士問。

「我想揾陳小姐。」女士問。

「啊，許太，哩面哩面，過嚟坐。」陳小姐，即是鄰Team的Evelyn立即起身迎上來。

原來是她的熟客，我便繼續坐著發呆，心不在弦的查看電腦。

「Charles，今日你嗰面又無哂人，得返你一個嘅。」Admin Koey問。

「哦，係呀，一陣去阿佑度BBQ，佢哋去哂買嘢準備。」我答道。

「哦，難怪喇，聽講阿佑住村屋，佢嗰面好似好猛嘅喎。」Koey煞有介事的說，還壓低了聲線。

「係咩？你又知嘅？」我好奇的問。

「梗係知喇，我住哩度幾十年，多多少少都知啲。佢嗰面夜晚無咩燈，行返去馬路搭小巴聽講永遠行唔到，要行到有太陽先行到。」Koey把她聽過的都說出來。

「咁驚？唔係啩……」我真的被她所說嚇倒了。

「不過最恐怖係荒廢嘅村屋，聽講入面有殭屍添！」Koey邊說邊伸出雙手，學著殭屍跳。

「Oh shit！你講笑喳？有殭屍咁大件事？」此刻我腦內正想著如何完美缺席今晚的燒烤大會而不失霸氣。

「哈哈，講笑啫，唔駛咁驚，哩啲都係傳聞，都無人真係見過，如果真係有，實上哂新聞喇。」可能Koey看到我被她嚇得面青口唇白，覺得場面惹笑又有點歉意，於是向我闡述她的見解。

「唔係呀，我真係信係真嘅，始終哩啲嘢真係好難講，空穴來風，未必無因。」我害怕的結束這回合。

隨著時間一分一秒的過去，樓看完了，客人最後沒有簽約，推卻說要再想想，也沒差，反正也習慣了，我也沒有放在心，畢竟真正令我擔心的是阿佑家旁的荒廢村屋，他們真的打算去探險嗎？我晚了這麼久才去，可能我已逃過一劫，他們已經自行探險完了。

想著想著，我已經下了小巴，帶著他們要求補充的飲料，往阿佑家走去，到他家要先穿過「之」字型斜路，兩旁種滿參天大樹，一走進去，多大的太陽也顯得無力，只有少許光線能排除萬難擠進這大樹造成的通道。穿過通道後，終於看見一些二、三層高的村屋，根據阿佑先前的指示，走下十分陡峭的斜路，這坡度應該超過四十五度，幸好不是很長，否則肯定會滾下去。走完斜坡後，阿佑的家就在眼下，無錯，還要下一條過百級的樓梯，真的十分艱辛。

這是一棟兩層高連天台的村屋，前面有一空地，對著大海，看著日落，就像一幅畫般美麗。而荒廢的村屋就在眼前，在阿佑家的右面，夕陽映照之下，這屋份外陰森可怖，雜草叢生，還傳來野鳥叫聲，而剝落的石屎外牆被噴上了塗鴉，玻璃窗戶被砸碎了，典型鬼片內會出現的鬼屋模樣，各種各樣的佈置彷彿跟其他人說︰「我就係鬼屋，快啲嚟探險喇。」欠的就是一個當地傳說或者是關於這屋的故事。

「間屋你哋係咪已經去咗探險喇？」我弱弱一問，期望他們說已經去了，沒有任何特別。

然而，世事又怎會盡如人意呢。

大師兄Chris搶著說︰「梗係未喇，點都要等埋你先一齊去，而且日光日白去邊夠刺激，等一陣太陽落山，食飽之後就去。」

「關於間屋，你哋有無聽過關於佢嘅傳聞？」阿佑問大家，大家紛紛搖頭，見狀，他便續說︰「聽講之前曾經有人想買咗佢，但一直揾唔到業主，於是就夾硬搬入去住，打算霸咗佢，逆權侵佔。但點知住咗幾日，個老婆成日話聽到怪聲，同埋喺廚房煮飯成日都有嘢撩佢個頭搞到好痕之類，老公當然唔信，仲話老婆疑神疑鬼，點知有一晚……」

「喂，阿佑，你確定真係要咁講嚇我哋？我哋一陣仲要入去嘅。」Kelvin打斷道。

「咪生人唔生膽喇，有啲背景故事一陣先刺激。」Terence回答。

於是阿佑繼續說︰「點知有一晚，老婆約咗班朋友出去玩，得返老公自己一個喺屋企，佢自己叫咗外賣食，食食吓聽到樓上傳出腳步聲，佢覺得好奇就上去望，但咩都無，咁落返樓喇，就見到有四個半透明但無腳嘅人喺度向佢招手，叫佢快啲食飯，佢嚇到傻咗，即刻跑出間屋，點知一出門就撞到佢老婆，佢老婆見到就問咩事喇，老公講完之後打算拖住老婆就走，但佢一拖就覺得老婆隻手好冰凍，之後望清楚啲，老婆個身都係半透明，同埋係無腳嘅，之後個男嘅就嚇到自己跑走咗。」

「嘩！好恐怖呀！」Fion和Rita攬作一團，十分害怕。

Justin則比較冷靜理性，開口就問︰「咁個老公最後點？去咗報警？」

「應該都係喇，唔係點會傳到哩件事出嚟。」Alex說。

「無人知個老公點，哩單嘢我都係聽啲鄰居講，好似話嗰時喺間屋隔離嘅樹下面揾到條女屍。」阿佑回應觀眾問題。

「即係話個老婆喺屋企附近死咗？唔係話去咗玩咩？又會喺屋企隔離嘅？」我都忍不住發問。

「哩層我都唔知咁多，或者一陣去探險會揾到答案呢，哈哈。快啲食飽就出發。」阿佑說完便大口咬了一條廚司腸。

一輪狼吞虎嚥過後，眼見眾人也飲飽食醉，Terence便站起身跟大家宣布︰「今日探險活動正式開始！」各人聽後也十分興奮，除了Fion、Rita和我。

「真心，係咪可以唔去？」我率先發問。

「你唔係驚呀？咁大個男人都驚？一齊去喇Charles。」Chris用激將法，可惜對我作用不大。

「係囉，我哋都唔想去。」Fion摟著Rita說。

「唔駛怕喎，我哋咁多人，而且男仔咁多，陽氣咁足，咩鬼都怕咗我哋喇。」Kelvin笑著說。

「係囉，一齊去喇。」Justin也加入遊說。

在群眾壓力之下，不，應該說是大眾落力哄之下，Fion及Rita也終於上鉤，而我也因為再沒有盟友而被逼跟上，最終一行九人浩浩蕩蕩的出發。

走上過百級樓梯後，沿路而下，不足五十米便到荒廢村屋前，近看更覺恐怖。雜草叢生又帶點破舊的籬笆緊緊鎖著，不過只有半身高，所以很輕易的可以跨進去。村屋前的空地很大，大約有半個籃球場般，但疏於打理，原本的石路小徑也被雜草遮著，還不時傳來青蛙「呱呱」的叫聲，更添詭異感。更甚的是，自從進入村屋範圍後，就感到特別寒冷，而且天也更黑，但當時的我並沒有對這些事物有足夠的敏感度，導致之後的事件發生。

「好似凍咗好多咁。」Rita的聲音打破靜寂，雖然聲線很小，但特別響亮。

「我都覺，早知著返件褸先嚟。」Fion也認同。

「應該係因為哩面空曠啲應風啲所以先感覺凍啲啫。」我嘗試解釋，完全將之前所學忘記了，現在回想，那股寒氣最少是「四房」級別的，甚至有機會是「地花」級，我們能活著出來真是奇蹟。

我們沿著那條被雜草湮沒的石路小徑走到門前，這是雙門設計，門被鐵鏈鎖著，大門半掩，其中一道門更因日久失修，有一個門鉸脫落，令門搖搖欲墜。

「睇嚟唔可以由大門口入去，我哋揾吓有無其他地方入到去。」Alex提議。

於是大家兵分兩路，沿著村屋左右兩面前進繞個圈，看看有沒有後門或是窗戶可以爬進去，幸好皇天不負有心人，終於找到一個被砸爛的窗戶可以進去，大家亦紛紛循這個入口進內。

屋內的感覺跟屋外截然不同，十分暖和，雖然鋪滿灰塵，十分殘舊，而且有些東西被惡意破壞，但仍舊看得出前住客是十分講究的人，從那些擺設和裝潢可以知道他的品味非凡，雖然外表是破舊村屋，但內裡卻比得上三千呎豪宅的氣派。

「睇吓，哩度邊忽似有鬼？我話真係值得逆權侵佔就真，入面咁有氣派，裝修都慳返，清潔一吓，買返啲傢俬就住得。唔好同我爭，我要咗。」Kelvin打趣道。

「好呀，咁等你快啲搞掂，下次就嚟你『屋企』BBQ。」Justin指著地下說。

當眾人輕鬆說笑時，樓上傳來了急促的腳步聲。

「殊，你哋聽唔聽到樓上有腳步聲？」我小聲的問。

「無喎，邊度仲有人啫，我哋九個喺齊度，咪生人唔生膽喇Charles。」Chris說。

「唔係呢，我都好似聽到。」Fion也加入討論。

「Fion你啊，咪畀Charles影響喇，邊有聲啫。」Chris繼續堅持。

「咁你試吓上去睇吓。」Rita也幫口。

「啊，你個Rita呀，哩個時候就加把聲，你唔出聲無人話你啞㗎。」Chris感到被圍攻。

「你話無，咁怕咩上去睇，你唔係驚呀？」我以其人之道，還治其人之身，以激將法對付他。

「好，Charles同我一齊上去。」Chris打算找我陪葬。

「點解要捉埋Charles？你自己上去咪得囉。」Fion為我解圍。

「你個Fion呀，It's okay，我自己上去。」Chris戰敗，只好無奈的答應。

未幾，樓上便傳來Chris的慘叫聲，眾人聞聲立即跑上去查看發生什麼事。

樓上的第一感覺是嚴寒，就像進了冰箱一樣，而光景跟樓下也截然不同，樓下雖然殘破但還看得出品味，但樓上完全是破爛無裝修，就像最初建成到現在都無翻新過一樣，果然都只做門面功夫，客人看到的都富麗堂皇，看不到的都隨便處理。露出鋼筋的天花板、石屎剝落的牆身、滲水浸泡發脹的牆腳、甚至因風吹雨打而破掉的屋頂，你能想像到的惡劣情況，這村屋也會有。

而最不想遇到的事，正正是由我們登上二樓開始。

「大師兄，你喺邊度？」眾人都不願亂走，待確認Chris位置才出發，然而一直沒有回應。

眾人面面相覷，不知如何是好，最後還是阿佑打破沉默︰「啱啱大師兄點解會自己走上嚟？」

「佢話聽到有腳步聲，所以想上嚟睇吓，本身想叫埋我哋，不過我哋唔肯，所以佢自己上咗嚟。」Fion以顫抖的聲音回答。

「腳步聲？」阿佑聽到後先是詫異，後來變得害怕起來︰「你哋記唔記得我啱啱講嗰個傳聞？個男人就係聽到樓上有腳步聲，之後就出事。」

「啊，唔好再講，我哋快啲揾埋大師兄就走，哩度好得人驚。」Rita緊閉雙眼，掩著雙耳高聲說。

「我都覺有啲寒，我哋一齊逐間房揾喇，哩個時候分散會好危險，睇戲嗰啲都係因為分散先出事。」Kelvin提議，眾人也點頭和議。

如是者，大家往最遠的一間房走去，根據電影經驗，要尋找的人往往都是在最後的房間和廁格，所以我們利用逆向思維，由最遠最尾的房間先開始，希望能一擊即中。

房門打開，房間很大，放了一張King size雙人床、訂造的入牆大衣櫃、典雅的梳妝枱，還有一張放滿書的書枱。

「一眼望哂，唔喺度，去第二間房再揾喇。」Justin說。

「咪住，睇埋床下底同衣櫃先，有可能匿咗喺入面。」Terence連忙補充。

「床下底我睇咗無，至於衣櫃應該唔駛睇，你見到佢用符封住，都無畀人搣過，佢唔會喺入面，我哋去第二間房喇。」我試著對大家解釋，大家也很受落，但也變得更害怕。

「點解會有符嘅？」、「係咪有鬼呀？」由他們的表情能得知他們都有這些疑問，但為免其他人恐慌，所以沒有問出口。

我們依序去第二間房、洗手間、第三間房，全都沒有發現，最後只餘下最近樓梯的最後一間房。

這間房緊緊閉上、重門深鎖，沒有誇大，因為足足有五個外加的鎖把門牢牢鎖上，而這五個鎖頭現在還是鎖著，絕對沒有可能進去。

「哩間房佢都唔會入到去，我哋揾哂都唔見，佢係咪玩嘢嚇我哋，呃我哋上嚟之後自己偷偷走咗？」Alex懷疑道，的確有這想法也很合理，畢竟這間房是常人無法進內的。

「其實仲有天台，不如我哋上去睇埋？」Terence再度提出有用的建議，而大伙亦贊同。

我們一行人上到天台，發現門已打開，想也沒想便走出去尋找Chris。天台並沒有什麼特別，只有電視天線和水箱，並沒有任何可以藏匿之處。

「無料到嘅，佢肯定已經走咗喇，收隊返去阿佑屋企。」Alex說。

「等陣先，反正上到嚟，不如Check埋水箱，唔係一陣變『藍可兒』香港版就大鑊。」我提議，眾人也同意，於是集眾人之力打開了水箱，果不其然，內裡除了水以外是空空如也，沒有任何異物。

「好，結案，大師兄玩嘢走咗，大家返去屌柒佢。」Alex語帶憤怒。

如是者，我們再次回到二樓，而詭異的事終於發生，本身被五個鎖穩穩鎖上的房間竟然開了門，而Chris正躺在地上一動也不動。各人見狀也顯得很驚訝，大家都目定口呆，而率先打破沉默的又是兩位女生。

「啊！死咗人喇，快啲報警！」Fion嚇得花容失色。

而在旁的Rita也跟著大嚷︰「有鬼呀！救命！大師兄畀鬼殺死咗！」

當大家都呆若木雞之際，阿佑冷靜的走去檢查躺在地上的Chris，然後安慰大家︰「冷靜啲先，佢只係暈咗啫，無死到。」各人聽到後都鬆了一口氣。

「咁快啲抬埋佢走先，此地不宜久留。」我走近並扶起他，Alex和Justin見狀也連忙跑來幫忙，畢竟一個昏迷的人是特別重的，一個人很難扛得起。

「嘭」！在無風之下，門被大力關上。阿佑、Alex、Justin、Chris和我被關在房內。我們立即去嘗試開門，但無論我們如何用力，門都是不能打開。

「喂，唔好玩喇，快啲開返門。」Justin對著門外喊，但沒有回應，於是隔門怒罵︰「屌！快撚啲開門，咪撚玩，一啲都唔好玩，仲唔開門一陣你哋就知味道。」但依然沒有反應。

「喂，好似有啲唔對路，佢哋雖然貪玩，但哩啲時候絕對唔會亂嚟，係咪有啲咩事？」阿佑依然表現冷靜。

「你哋覺唔覺好似凍咗？」Alex冷得發抖，不斷摩擦自己取暖。

我放下大師兄，然後凝重的對大家說︰「今次唔係咁簡單，大家冷靜聽我講，咁凍嘅係因為啲陰氣，根據哩個温度，個『住客』應該最少係『四房』級，甚至係『地花』級，坦白講，『四房』我都仲勉強應付到，但『地花』的話就超出我能力範圍……同埋我諗佢哋係聽唔到我哋嘅求救，因為似乎我哋已經去咗另一個空間，你唔覺間房好似無咁殘舊咩？」

他們聽完後顯得有點驚訝害怕，但整體還是表現得很冷靜，還四處張望，發覺房間真的發生了變化，本來殘破的房變得新簇簇。

「咁我哋點算？同埋咩係『四房』同『地花』？」Justin問。

「『四房』同『地花』都係『住客』嘅Level分類，『住客』即係指鬼，最理想嘅辦法就係揾出個『住客』，叫佢帶我哋返去，不過……」我欲言又止，不知如何說下去。

「不過事情唔會咁順利簡單，個『住客』唔會咁順攤，係咪呢？」阿佑推理出我接著要說的話。

「嗯，無錯，的確唔會咁輕易，以哩度嘅陰氣嚟睇，佢應該有好多怨氣積埋，唔係咁容易解決，可能要徹底『翻新』先得，不過我真係唔Sure得我一個應唔應付到。」我抱歉道。

「咁加埋我呢？」Alex問。

「加埋你？乜你都係？」我驚奇的問。

「係啊，不過一直無講，馬生話唔好四圍同人講嘅。」Alex淡然的說，而Justin跟阿佑則完全聽不明白我們的對答。

「原來係咁，但係……」我突然想起，於是帶點絕望的說︰「我無頸繩喺身，而且身上得銀包嗰一張卡片，恐怕未必夠。」

「我都無頸繩，但卡片就有幾張。」Alex在口袋中拿出三張卡片。

「卡片我都有幾張。」Justin和阿佑異口同聲的說，好像終於盼到希望的曙光般，之後分別掏出三張和兩張卡片。

「我諗你哋啲卡片未必有用，會唔會有馬生同Patrick嘅卡片？馬生嗰張可以，Patrick嗰張要睇睇。」Alex問。

「我無馬生卡片喺身。」Justin又再次重回深淵。

「我都無Patrick嗰張。」阿佑也跌回地底。

「咁唯有靠我哋兩個。」我望向Alex，然後對大伙說出我的計劃︰「我哋一人拎一張卡片保護自己先，至於大師兄就無辦法，我哋盡量圍住佢保護佢喇。喺哩度對我哋好不利，始終係個『住客』嘅地頭，所以我哋以逃出哩個空間為目標，但要逃出去，都要揾到個『住客』先得，我哋被困哩間房，我相信哩度一定有啲蛛絲馬跡。」

「腳步聲。」阿佑突然想起了什麼，衝口而出︰「我之前講嗰個傳聞，同啱啱大師兄上嚟嘅共通點就係聽到二樓嘅腳步聲！哩間房可能就係最先有聲嘅地方。」

「都有機會，咁我哋快啲摷吓有咩線索。」Justin說。

「我諗唔駛。」Alex冷靜的說︰「你哋睇吓床下底。」

眾人同時望向床下底，發現有團黑影，而黑影發現有人找到它時，便慢慢爬出來，在燈光映照下，黑影真面目漸漸顯露，原來是一個小男孩，他正興高采烈的笑著。

「小朋友，你玩緊伏匿匿？我哋揾到你，你輸咗，講我哋知點離開哩度。」我對小男孩說。

「唔制唔制，我都未玩夠，陪我再玩多陣。」小男孩撒嬌，但在其他人耳裡只聽到不明的聲音。

「咁玩完你要話我哋知點離開哩個空間喎。」我跟他討價還價。

「唔得唔得！贏咗畀你哋離開哩間房就得，如果唔係媽媽會打死我。」他邊說邊揉搓雙臂，就像剛被人打完要呵一樣。

「但哥哥趕時間，最多同你玩多一次，下次先再同你玩過。」我嘗試哄他，盡量減少浪費時間。

「唔得！」他突然變臉，樣子變得嚇人，同時怒道︰「一定要贏咗我先走得！」Justin和阿佑看到自然地後退了兩步。

「係係係，同你玩同你玩，贏咗先走，唔好咁嬲吓小朋友，咁你想玩咩呢？」我安撫道。

他頓時變回原來的樣子，童心未泯的說︰「我想玩捉伊因。我做鬼，你哋匿埋。」

「捉伊因好啊，不過哩間房咁細，好易揾到唔好玩㗎喎，不如我哋將個範圍擴大到成間屋，咁先多啲地方匿埋，好玩好多。」我借題發揮，希望可以離開這間房。

「都係，好喇，咁就開門畀你哋，但如果畀我捉到，你哋以後都要喺度陪我玩，好似嗰個哥哥咁。」他指著Chris說。

「原來佢陪緊你玩，點解唔見佢嘅？叫埋佢一齊玩，多人好玩啲。」我們終於得知Chris不省人事的原因，我嘗試哄小男孩釋放Chris的靈魂，好讓他有機會返回自己身體。

「嗯……好喇，多啲人係好玩啲，哥哥你都講得啱。」他想了想，最後還是答應了，於是吐出了Chris的靈魂，無錯，是吐，由口裡吐出，非常嘔心，但總算是釋放了。

「大師兄，快啲返去自己身體先，我哋要玩捉伊因喇。」我指著他躺在地上的身體說。

「我數一百聲，你哋要快啲匿埋。我數喇，一、二……」小男孩已經開始遊戲。

「我諗佢應該係數緊，不如趁機做低佢喇。」Justin小聲說。

「唔得，點可以咁無口齒，我哋要同佢玩，仲要贏，我諗Alex都Feel到，佢唔係始作俑者，佢只係一個小朋友，無惡意。」我試著跟大家解釋︰「我哋陪佢玩完之後，仲有機會幫到我哋逃出哩個空間。不過我知你哋無人聽得到佢講咩，所以無論聽到咩聲都唔好出嚟，除非我叫你哋出。」各人沒有更好的方法，也只好照我意思去做。

我們離開房間，在屋內各自尋找藏匿的地方。我根據過往跟妹妹在家捉迷藏的經驗，選了房內開門後跟牆形成的三角空間，這正是「最危險的地方是最安全的」，而且我還抱膝坐地，把自己最小化。

「我開始捉喇。」小男孩宣布遊戲正式開始，我亦控制呼吸，盡量避免發聲，畢竟他就在我眼前翻箱倒櫃，一會後，他便離開房間到其他地方尋找。

不知過了多久，可能是十分鐘，也可能是一小時，畢竟在這情況下，每秒鐘也過得很慢，也不知其他人有沒有被找到，四處也很寧靜，就像恐怖電影般，在鬧鬼的屋內，下一秒突然有鬼出現的Jump scare前夕一樣，無錯，我知，我的確在鬼屋內。我吞下一口口水，在窄小的門縫看出去，沒有任何動靜，安靜得很詭異。忽然，我想起另一個恐怖電影的情節，我倏地向上望，我不知道是恐怖電影真的很清楚鬼的習慣，還是鬼向恐怖電影學習嚇人方法，這一刻，我只知道小男孩在上面一直看著我，不知看了多久，接著的事我也不太記得，大概是靈魂被他吸走，在一個伸手不見五指的濕漉漉空間，我想這就是Chris之前被困的地方──小男孩的肚。

而在這裡，我聽到Chris和阿佑的聲音，即是他們也已經被捉到，現在只剩下Alex和Justin兩個希望。

隨著時間的推移，不知過了多久，這個肚子囚室再沒有增加人數。之後不知又過了多久，我們被吐出來釋放了。

「哥哥你哋真係好勁，我完全揾唔到你哋，你哋贏咗，我畀你哋離開哩間房。」小男孩低著頭，心有不甘的說︰「但可唔可以話我知你哋匿埋喺邊？」

「我唔知佢哋肯唔肯講喎，但係等我叫佢哋出嚟先。」我邊摸著小男孩的頭安撫他，邊大喊︰「Alex、Justin，完咗喇，我哋贏咗喇，可以出嚟喇！」聽到我的呼喚後，他們也陸續現身，在向他們表達小男孩的意願後，他們也很大方的說出藏身地點，然後小男孩便消失了，我們也離開房間到下層。

「我記得你講嗰個傳聞係個男屋主上完二樓落返樓下之後，見到四個半透明人影，但我哋咩都見唔到……淨係Feel到好凍啫。」Chris對阿佑說，阿佑搖頭攤手表示不知道。

「Charles，睇嚟Boss喺哩度附近。」Alex對我說，我也點點頭，但不知躲藏在何處。

「廚房！」阿佑忽然叫道，我們也順勢看過去，以為有什麼發現，但什麼也沒有，接著他才補充︰「傳聞入面個太太喺度煮飯，成日有嘢撩佢個頭，應該廚房有啲嘢，可能係……吊頸？」

「喺廚房吊頸，所以隻腳撩到個頭？」Chris問。

「都可能係，記得以前聽過個鬼故，講大學宿舍有個學生夜晚温書個頭都係畀啲嘢撩到好痕，最後發現係之前個學生喺度吊頸。」Justin說。

「去睇吓先。」我跟大伙說，然後帶頭走去，赫然發現廚房內有一女人背對我們吊著，而事情發展亦如電影橋段般，屍體慢慢轉向我們，最後清楚看到樣貌，是一個馬姐，綁著馬尾長辮，舌頭伸得很長，全身血肉糢糊，她突然張開眼睛，嚇得我們後退數步、摟作一團，慶幸的是她不能離開這條吊頸繩，所以只要我們不走近便很安全。

由於吊頸死是不能說話的，所以我們正苦惱如何才能跟她對話，就在此時，她身體開始亂動，伸手指向我們身後，明顯有訊息想表達。我們亦不敢怠慢，立即望向後方。

只見寒光一閃，一把用天山寒鐵所鑄成，淨重七七四十九斤又十六兩零四安士的菜刀迎面襲來，手起刀落，把地板輕易劈開，要不是我們反應敏捷，便已成刀下亡魂。未待我們回神，菜刀便再次來襲，我們左閃右避，好不容易才用椅子把菜刀擊飛，此時才看到施襲者原來是一位雍容華貴、年約三十出頭的太太。

「係佢喇！」Alex大喊︰「佢就係終極Boss。」雖然眾人都知她是關鍵，但如何對付她我們還是無徹。

「啱啱畀大家嘅卡片，係時候盡地一煲。我哋無EA證收唔到佢，所以我諗我哋要試吓限制住佢行動同佢講數，不過……」我的說話被Chris打斷了.

「咩卡片？我無嘅。我完全唔明要做啲咩。」Chris非常疑惑。

「啱啱我哋分咗畀Justin同阿佑一人一張我哋嘅卡片，而你暈咗而我哋又無多，所以你無。」我邊解釋邊拿著卡片對著「住客」太太，以防她突襲。

「好彩我都有自己卡片。」語畢，Chris從他自己的卡片盒拿出卡片。

「無用㗎大師兄，你啲卡片唔Work，除非你有馬生卡片，同埋唔好打斷Charles講嘢先。」Justin說。

「我有喎，要幾多張？」Chris說完便從卡片盒拿出數張Kerry的卡片，我們像看到救星一樣，雙眼發光，而「住客」太太則後退數步，顯得有些避忌。

「快喇，多多都要！」Alex對Chris說，Chris便拿出全部十張Kerry的卡片交到Alex手上。

Alex接過卡片查看，確定是可用便把卡片平均分給每個人，然後說︰「有埋哩啲會更加容易。」

「好，既然哩刻人人都手揸幾張卡片，咁個策略可以容錯高啲，聽住，我哋要用卡片圍住佢，個圈越細越好，封住佢嘅行動我哋先有得同佢傾。」我把計劃告訴大家，他們也點頭同意。

我們人人手拿兩張卡片向著「住客」太太進逼，把她圍在牆角，接著慢慢放低卡片，形成一個籠牢令她不能離開，然後便開始跟她談判，就在我們把卡片都放下、放鬆警戒的瞬間，她突然發難，刮起一陣大風把卡片都吹飛，之後趁亂叉著我的頸，然後不知在哪拿出一條麻繩綁著我的頸，再把我像吊頸一樣吊在風扇上。

我不能呼吸，但為免浪費尚餘的珍貴氧氣所以無作無謂的掙扎，只是默默的嘗試解開繩結，可惜完全解不開，快要休克之際勉強用最後一口氣喊叫︰「Peter！」

「嗖」，一個黑影從Kerry的卡片飛出來把繩切斷，然後接著掉下的我，再幫我把繩一手斬斷，我立刻大口吸氣，好好回復因剛才缺氧造成的休克，而「住客」太太明顯對這突如其來的鬼有所避忌，沒有輕舉妄動，只是在觀察。

「嘻，又要我出馬，你哋啲後生真係無用。」Peter開玩笑道。

「Sor呀Peter，不過幫幫手先，哩個『住客』應該係『地花』級，我哋咩都無真係搞唔掂。」回答的是Alex，我已經無力回答他。

「哈，濕濕碎喇，我幫你哋限制住佢行動，你哋趁機收咗佢喇。」Peter下達指示。

「但……咳咳……但我哋咩都無喺身，收唔到佢。」我喘著氣說。

「點會？用你哋自己咪得，無人同你哋講過咩？」Peter此言一出，我和Alex不約而同的搖頭，Peter見狀便說︰「你哋以為點解咁多地產人肚腩咁大？咪就係封哂啲鬼喺肚入面既負作用囉。操作好簡單，㩒扁佢再用口吸就得，想再容易啲就用卡片造飲筒吸。」

我和Alex神同步，表情一致，大家都「擘大個口得個窿」，Peter見到也嘆了一口氣，再補充︰「哩個本身係E牌先會學嘅方法，因為風險太大，隨時反噬，但而家無計，只得哩個辦法，不過我諗你哋兩個Share應該都可以應付到。」我們心知這是唯一的方法，所以只好見步行步。

「等等先……」我想繼續說下去，但被「住客」太太的進攻所阻。

「小心！」阿佑大聲說，不知何時，「住客」太太取回菜刀並擲向我們，幸好有阿佑的提醒，否則我肯定已經成為刀下亡魂。

鋒利的菜刀把地板當豆腐般切開，深深陷入其中，要拿出來好比拔出石中劍，然而對於菜刀主人來說，這是毫不費力的一件事，她甚至不必用手拿起，菜刀也自動飛回她手上，難怪剛剛看不到她去取菜刀，原來是自動導航。

「把菜刀有啲棘手，要諗諗計點拎走佢先得。」Peter說。

「聽我講先，我哋而家喺佢嘅空間入面，基本上佢係無敵咁滯，除非我哋實力強佢N倍，如果唔係就唔夠佢嚟，況且我哋喺度真係搞得掂佢都好，我哋之後點離開？我哋應該要帶佢返現實世界再收咗佢先係上策。同埋我同Alex吸咗佢之後，佢成世都喺我哋體內共存，唔可以拎返出嚟再收返？」我趁空檔一口氣說出我的見解及疑問，以免「住客」太太又再襲來。

「要捉佢離開哩個空間其實唔係唔得，只要揾到條連接嘅通道就唔難，至於你哋吸咗入肚之後當然都可以吐返出嚟，不過吸咗入肚會令你能力提升，對你之後『翻新』有幫助，吐返出嚟就無咗㗎喇。」Peter解釋道。

「咁都得？不過我寧願唔要哩啲Buff。」Alex一面嫌棄，我也表示同意，並說︰「哩啲Buff唔駛預我哋兩個，我哋只係想快啲走。」

就在此時，「住客」太太趁我們討論時的空檔，拿著菜刀衝向Chris他們，眼見他們沒有任何防備，就像待宰的羔羊般驚慌失措，我和Alex立即跑去救援，但始終趕不及，「住客」太太向橫一砍，一顆新鮮頭顱便隨即掉在地上，我們眾人也只懂失聲大叫，腦袋當機，不懂其他反應，而當「住客」太太拿著頭顱向我們示威時，我們更加是完全喪失鬥志，陷入絕望，眼睛完全看不清眼前事物，直至該頭顱說話，我們才清醒。無錯，那被砍下的頭顱竟然會開口說話，這絕對可以拍成世界奇妙物語。

「你哋班食濕米，咁就無哂鬥志，仲話想走返出去，真係無鬼用，睇清楚邊個畀人斬先喇！係本大爺Peter呀！我點會有事？」原來被砍的是Peter，他在「住客」太太出手前的一刻趕及保護Chris他們。

Peter的頭顱雖然緊握在「住客」太太手上，但身體依然活動自如，他從背後對「住客」太太用關節技，令她手上的菜刀和頭顱先後掉下，然後再用纏身鎖牢牢鎖住她的行動，之後焦急的道︰「仲睇戲？我封唔到佢幾耐，快手將啲卡片貼喺佢身上面，削弱佢再吸咗佢喇！」

「哦……哦，係，知道。」Alex和我都如夢初醒，立刻上前把手上的卡片都貼在「住客」太太身上，分別只留一張作飲管用。

「啊……好惡，放開我，你班垃圾！」「住客」太太邊扭動身體掙扎邊喊道，可是只得我和Peter聽得明白她的說話，但隨著卡片越貼越多，她掙扎的力度和叫囂的聲音也越來越弱。

「機會嚟喇，飛雲！」Peter突然說出著名台詞，我們也條件反射的說出︰「絕招，登龍劍！」之後把卡片捲成吸管，準備把「住客」太太吸入肚，但我突然想起漏了一個步驟，於是開口問Peter︰「我哋要點樣先㩒扁到佢？」

Peter被我們這問題氣得雙眼翻白，無好氣的道︰「咁簡單都要我教？乜你哋平時『翻新』單位唔駛接觸『住客』？用頸繩或者卡片喇！」

我做了一個「原來係咁」的表情，便拿著手上的一張卡片，跟Alex配合，把「住客」太太慢慢壓成球體，而她因為被卡片及Peter鎮壓著，除了樣子可以表現凶狠外，根本沒有任何反抗能力。最終，我們花不了多少力氣便順利將她壓成籃球大小的球體，我們也立即將卡片捲成吸管把她吸進肚內。

「嚓」，整層的燈突然熄掉，伸手不見五指。

「哎呀……」各人也紛紛哀鳴，我也確切感覺到左臉和下腹被狠狠打了一下。

「嗡……登」，燈再次亮起，各人也倒在地上，而「住客」太太卻不見了蹤影。

「頂，發生咩事？佢去咗邊？」Justin問。

「仆街，唔記得咗哩度係佢話哂事，佢啱啱做戲扮嘢，我哋畀佢過咗一棟！」Alex恍然大悟。

「咁佢而家去咗邊？」阿佑問。

「喺上面！」Chris指著天花板說，眾人也抬頭看，卻什麼也看不到。

「啊！」正當眾人看著天花板之際，Justin發出了悲鳴，大家循聲看去，只見Justin跌坐在血泊中，雙手摀住肚，而Chris則手握菜刀，滿身鮮血，一臉迷茫，不知發生什麼事情，就像電影裡被誣陷的人一樣，直至意識到自己手握凶器，才惶恐的拋下它，並連忙小聲、不斷重複說︰「唔關我事，唔係我做，我咩都唔知……」

我立即把刀踢開，並用皮帶和衣服替Justin止血包紮，而Alex和阿佑則把Chris制伏在地，並用衣服把他雙手反綁，以免他再度施襲，而他並沒有反抗，只是不斷唸唸有詞︰「唔關我事，唔係我做，我咩都唔知……」

「你哋講得啱，哩度係佢地頭，憑你哋而家嘅能力，喺哩度係搞佢唔掂，佢直情當我哋係玩具咁玩。」Peter看了一眼Chris和Justin後繼續說︰「好明顯啱啱佢畀『住客』上咗身，但問題係喺哩度連我都睇唔透佢而家喺邊個身上，佢係想令我哋大家猜疑對方，再將我哋逐一擊破。而家除咗我之外，你哋個個都有機會畀佢上身，雖然有啲危險，但我覺得最好嘅辦法係將你哋全部都反綁雙手，咁就唔會襲擊到大家。」

聽到Peter的說話，眾人本身都覺得很合理，打算互相反綁雙手，直到阿佑突破盲點︰「等陣先，即係唔係話想猜疑你，但你啱啱先講完佢會上我哋身，你轉頭就叫我哋綁住自己，唯獨唔綁你，如果係上咗你身，咁我哋咪GG？」大家聽到後也停下手，覺得挺合理。

Peter見狀，沒好氣的說︰「你哋個腦裝屎㗎？你哋幾時見過鬼會畀鬼上身？」

「咁又啱喎，今鋪我撐你，又真係未見過。」Alex說完，便繼續替我綁上雙手。

然而阿佑依然不罷休，繼續辯駁︰「未見過唔代表無，哩度係佢嘅空間，佢想點就點，咩都有可能。」

「又好似幾有道理喎。」Justin和應，接著停了下來不再綁。

「各位冷靜啲先，我哋咁樣籠裡雞作反就正中『住客』太太下懷，不如咁，我哋用紅筷子夾吓大家中指咪知囉！」我提議道，大家點頭同意後我便在廚房尋找紅筷子，然而尋遍整個廚房，也只找到白筷子。

我靈機一觸，拿著白筷子到Justin跟前，禮貌的說一句︰「唔好意思，借啲血嚟用吓。」然後未待他答應，便用染血的止血衣服抹了抹筷子，白筷子頓時變成紅筷子。

「得，禮成，邊個第一個夾？」我問。

「我！」Alex第一個舉手走過來，遞出左手，我右手拿筷子夾住他的中指，左手輕輕扶著他右面膊頭，順利過關。

「跟住到我。」我把筷子遞給Alex，同時伸出左手握著他的左手，並語重心長的說︰「我嘅清白就交畀你喇。」

說完後Alex意會到，便夾我的右手，並用右手扶我的左膊，也是安然過渡。

接下來我們走到阿佑跟前，Alex照辦煮碗，但也沒發生什麼事。下一個是Justin，Alex也是搭著他膊頭夾中指，起初他也沒有什麼反應，但數秒後便滿頭大汗，最後昏倒臥地，同時「住客」太太也摀著左膊由Justin身上彈了出來，我和Peter立即飛身封住她的行動，但她發難把我們都擊飛，然後不解的問︰「可惡，明明對筷子無用，點解會搞到我飛咗出嚟？」

「筷子無用我哋點會唔知，但卡片有用就得喇。」我喘著氣說完，Alex也撲上去試圖制伏她，但結果跟我一樣，殊途同歸，都是被擊飛。

「你班垃圾太過可惡，我唔玩喇，我要一次過殺哂你哋！」她異常忿怒，樣子變得非常猙獰，完全是惡鬼模樣，雖然其他人聽不懂她的說話，但從她的語氣和容貌的變化，大家也猜到她非常忿怒。

她隨手一揮，整間屋也刮起大風，把我們所有人也吹到貼著牆不能移動，風壓把我們壓得接近窒息，連Peter也只是勉強站著，但完全奈何不了她。

「媽咪。」一把清脆的小男孩聲由樓梯傳來，惡鬼模樣立即變回雍容華貴的樣子，大風也停了，並慈祥的說︰「做咩啊寶貝，媽媽嘈親你？」多得這位小男孩，我們有了喘息的空間。

「你同哥哥佢哋玩緊啲咩，好似好好玩咁，我又要玩。媽咪我同你講呀，佢哋超勁呀，啱啱同我玩捉伊因連我都揾唔到佢哋，佢哋仲好好人咁講咗我知佢哋匿埋咗喺邊。」小男孩天真的說。

「係呀，我哋同佢玩咗好耐先落嚟。」阿佑說，奇怪，為什麼他會聽得明白鬼話？

「小朋友，快啲同你媽咪講我哋無惡意，淨係想離開哩度。」Alex對小男孩說。

「你哋無惡意？你哋同嗰啲人一樣，擅自闖入嚟仲強姦埋我同三個姊妹，連善姐都唔放過！我唔會信你哋，擅闖嘅人都係仆街，善姐已經畀你哋害死咗，我要親自保護我自己嘅屋企！」她怒氣衝天，把我們都震懾住。

「冷靜啲先，我哋無咁嘅意思，我哋只係嚟廢屋探險，無諗過會闖入咗你個空間。」Justin說，看來大家都能聽到鬼話了，證明大家都已經死過一次。

「咩廢屋？我哋一直都住喺度，點會係廢屋？」她暴怒了，整間屋也震動搖晃著，小男孩也嚇得抱著欄杆哭，「住客」太太見狀頓時停止，變回慈祥的母親安撫她的小寶貝。

「太太，而家係咩年份？」我問。

「咪七三年，咁都要問？」她沒好氣的答。

「喺哩個空間係七三年，但現實世界已經係二零二二年，哩間屋已經荒廢咗好耐，我哋真係嚟探險。」我試圖告訴她真相，不管她接不接受。

「無可能，班人先啱啱走，善姐先啱啱斷氣，點會係咩二零二二年，你哋唔駛呃我！」她選擇不相信。

我拿出電話展示給她看，並說︰「哩部叫手提電話，可以隨時隨地都打到電話，邊行邊傾，唔駛企定定喺屋企先傾到電話。」她看著我把玩電話，開始有點動搖。

「傳聞話之前曾經有對夫婦搬入嚟住，最後太太離奇死亡，先生就不知所蹤，仲話先生聽到樓上有腳步聲，然後喺屋入面見到四個半透明體，我諗你哋就係傳聞中嘅夫婦。」阿佑綜合傳聞和「住客」太太的說話推理︰「咁嗰四個半透明體應該就係你個仔同你三個姊妹，你先生係見到佢哋嘅靈體所以嚇到跑走，再喺門口撞到你，諗住同你一齊走，點知發現你都係靈體，之後自己跑走咗不知所蹤。」

「其實你已經過咗身好耐，而家喺度淨係得返你哋三個仲未投胎，但你先生同三個姊妹都已經唔喺度，你唔發覺咩？時間到，佢哋已經去咗投胎，你記返起初初個個都喺度嗰時，佢哋係有人接走，憑空消失，唔係自己開門走㗎。」Peter一語道破︰「你哋之所以仲喺度，係因為恨想報仇？係因為未知或者未信自己已經死咗？定係因為陽壽未盡？我唔清楚，但除咗陽壽未盡下面未收得你之外，其他任何原因都會令你哋永遠投唔到胎要做孤魂野鬼。太太，如果你真係錫你個仔，痛心善姐嘅話，就放手畀佢哋走，唔好再留佢哋喺度受苦。」

「嗚……」「住客」太太雙眼不斷滴下淚水，獨自飲泣，小男孩見狀，立即走上前摟著她。

「我知，我知我哋都已經死咗，我一直都知，只係我真係好唔捨得哩個家嘅一切，我想努力維持住，即使每日要我受一次嗰種痛，我都想繼續維持。」她哭著說。

「咁做對佢哋公平咩？你有無問過佢哋想唔想？你咁樣係自私呀！」Alex義正詞嚴地責備她。

「住客」太太聽後哭得更厲害，我即時上前安慰她，以免她一時想不開，化悲憤為力量，把我們一網打盡，畢竟我們在這空間真的無力對抗。

幸好，小男孩是她的解藥，她緊緊摟著小男孩痛哭一輪後，終於收拾心情，決定面對現實。她帶著小男孩、善姐以及我們到樓上，徑直走到尾房，來到本應被封印的衣櫃前，然後跟我們說︰「只要我哋大家入哂去個衣櫃入面，閂門再開門，咁就返到去你哋所講嘅現實世界，大家快啲入去喇。」說完她先扶小男孩進去，然後自己也進了去，善姐則打算待我們都進去才進入，然而我們猶疑了。

「個衣櫃咁細，我哋應該唔可以一次過入哂去再閂到門喎。」大師兄把我們的猶疑說出。

「機會得一次，我過咗去之後，哩個世界會崩塌，留喺度嘅實無救，但我唔入去，你哋無論開開閂閂幾多次個衣櫃，都依然係哩個世界。」「住客」太太解釋。

「咁即係點都要塞哂入去喇……但哩個衣櫃只係普通雙門衣櫃，要塞哂我哋九個人，真係無咩可能。」Justin面有難色的道。

「好似日本人搭鐵咁塞哂入去，盡量用盡哂啲空間，上面都唔好放過，而家入得幾多得幾多，入唔到嗰啲再諗辦法塞。」我說完便走進去衣櫃，而Chris、Alex、阿佑和Justin也相繼擠進去，但已經非常擁擠，我們的手腳和身體已經用非一般人類所做到的角度扭曲。

「差你喳善姐，快啲入埋嚟，仲塞得落。」「住客」太太對站在衣櫃外的善姐痛苦的喊話，她身旁的小男孩也附和︰「快啲喇善姐，好好玩㗎。」

但善姐依然站著不動，嘴巴一開一合，像是有話想說但只得「咿咿呀呀」的聲音，她說著說著，雙眼通紅還流下淚，最後對「住客」太太鞠了一個躬，便衝上前大力把衣櫃門關上。由於整件事來得太突然，「住客」太太也未能及時反應過來阻止善姐關門，但她在門被關上的瞬間便立即再打開門，相隔不足五毫秒，然而門外迎接她的，是已經破舊不堪的房間，善姐已經一去不返了。

「終於……終於返到嚟現實世界。」Chris開心得跳起來。

「太太，哩個就係真正嘅世界，你唔好再被過去縛住喇。」我對著她說。

「嗰幾個闖入屋嘅人都已經被警察捉到，新聞都有報，你睇吓。」阿佑一回來便用電話上網尋找相關新聞，然後遞給她看。

「你哋跟我哋走，我哋會幫你超渡。」Alex對他倆說，她哭著點頭，Alex便和我一人一個，把他們都吸進肚內，留待明天回到鋪再處理。

「咁都無我嘅事喇，我閃先，希望唔駛再有我出場嘅機會，拜。」Peter說完便走，我們五人都跟他道謝和道別。

在Peter剛走後，在現實世界的大伙聞聲趕至，看到我們無事也不禁鬆一口氣，Fion第一個開口，帶點不悦道︰「好玩唔玩玩門都有嘅，嚇我哋都唔係咁玩喇，開唔到門又無哂聲咁。」

「啱呀，阿佑你條仆街，揾啲咁嘅嘢玩，好彩我哋熟你，唔係以為真係有鬼。」Kelvin作狀賞阿佑一拳。

「不過你哋都犀利，識魔術㗎？喺嗰面鎖咗門之後，唔到一分鐘就喺哩面出返嚟。」Rita傻裡傻氣的問。

Terence也不忘挖苦一番︰「阿佑最叻係閃，一定係帶埋佢哋閃咗嚟哩面。」

雖然被老朋友們賞了一拳及挖苦，但阿佑並沒有反擊，反而衝上前擁抱他們，這真像經歷完生死之後的大團員結局，當然Kelvin和Terence不知就裡，不過也深深的摟著他。

「好喇好喇，好基呀你哋，我哋快啲離開哩度先喇。」Chris心有餘悸，只想快點離開，各人也紛紛同意，特別是跟「住客」們交過手的我們。

後續雖然Fion和Rita不斷追問、旁敲側擊，但我們也沒有透露半句，生怕嚇壞她倆。而和我見識過「樓上傳來的聲音」的Fion其實也猜得到，只是我們不承認，她便假裝不是遇見鬼罷了。