狙擊黃軍
隨著PPRP Jasmine的逝去，參加者剩下十六人，而殘忍無情的殺戮遊戲在生者之間依然進行著。
黃燈使餘下的人們感到更加焦慮，加上未知何時會找上門的死神，生者絕不比逝者好過，這種對生命不能靠自己雙手掌控的無力感，幾近令人崩潰。
然而，要活到最後，學懂勇於對抗這種無力感是必修的課題，不只在這遊戲中，真正人生也是如此。
「警隊雖然一次過損失兩位精英，但係對於佢哋忠誠勇毅對抗黑暴，嚴正執法使用適當武力係完全無影響嘅。」傳媒透過小丑的口說出這番撐警言論，但突然話鋒一轉，開始表揚起黃營人士來︰「不過黃營手足人數眾多，Idea多到滿瀉，就算幾天馬行空，最後只要可行，基本上都會實行。所以喺二零一九年六月二十七日，G20峰會期間，利用眾籌所得嘅六百七十萬，喺全球十九份報章刊登公開信反修例，成功吸引國際目光，令戰線正式蔓延至國際層面。」
「咳咳……」傳媒乾咳兩聲，清一清喉嚨，續說︰「香港政府被人落哂臉，喺維尼眼中成為家醜，喺國際眼中成為削弱強國嘅缺口，究竟我哋嘅柒婆會點做呢？」
話音剛落，柒婆Vanlee的眼罩隨即打開，未待傳媒指示，她便指向Annie，然而Vanlee故意把動作做得很大，令坐她右面的PoPo Ray哥意識到她是柒婆。
Ray哥雖然身份是PoPo，但畢竟不是毅進畢業，而是堂堂天之驕子香港大學畢業生，當她意識到Vanlee是柒婆的瞬間，已經想好下一步行動。
「阿Moon，你唔好郁身郁勢喇，撞到我。」Ray哥誣蔑坐他右面的阿Moon。
阿Moon一時之間反應不及，小聲既無辜的回應︰「吓？對唔住……但我無郁喎。」小聲得只有Ray哥能聽到。
「得喇，我知，你唔駛講，一陣畀人聽到你就麻煩，我會幫你保守秘密。」Ray哥故意高聲回應，生怕其他人聽不見。
隨著Vanlee知道了Annie的身份之後，MC便問起底組︰「籌旗加登報嘅始作俑者係你哋嘅網軍，而家到你表演。」阿Moon的眼罩打開後，無獨有偶，她也指向Annie。
而此時，醫護Harry也按捺不住要發聲了︰「你哋班友搞咁耐先死得嗰幾丁友，幾時先完？快快脆脆係人都投贊成，我唔想拖咁耐喇。」Harry每次的發言目的也是差不多。
「Annie係維基。」阿Moon得知這個資訊後，便乖乖的合上眼。
「僭建驊，而家班友公然落你面，講哂畀全世界知你哋連個殺人犯都搞唔掂，你諗住點算先？」傳媒繼續扮演一個挑撥者的角色。
當僭建驊偉傑一開眼，映入眼簾的第一個畫面是Vanlee指著Annie，雖然偉傑有半點懷疑Vanlee，但回憶起之前她的種種行徑，最後都選擇了跟隨她的指示。
「被人落面嘅又點止僭建驊一個？成個警隊都畀人當無到，啱啱仲要損失咗兩位精英，今Round你哋諗住點報仇……啊，唔係，應該話係點執法先啱，哈哈哈哈……」伴隨著傳媒魔性的笑聲，PoPo跟一哥的眼罩都打開了，這次他們的選擇不再像上一輪般一致，而是出現了三個不同的選擇︰高軒選擇阿Moon，阿傑選擇Vanlee，Ray哥選擇Shirley。
「今次警隊諗住大包圍咁喎，可惜警力有限，只能夠捉一個埋牆角，一哥，請選擇。」傳媒指示著遊戲進行，而一哥也很迅速的決定了再次揀選Shirley，畢竟她剛才帶給自己太大的麻煩。
「我哋嘅共通點會唔會係同今次主題有關？」Andy繼續鍥而不捨的猜，全場基本上只餘他一人仍然堅持著。
「慳啲啦，咪再理呢啲嘢，而家根本都唔重要，快啲死淨一條友完咗佢仲好。」Harry怒吼。
「Andy，我都覺得揾共通點係好，不過唔好淨係執著喺呢方面，遊戲關乎生死，點都重要啲。」鄺神Shirley語重心長的勸說。
傳媒見他們的對話完了後，便繼續說下去︰「因為鄺神用咗技能，變返黃絲，所以已經無佢嘅事，而家Skip到去醫護。醫護，雖然之前你一直都留住技能唔用，但今次你會唔會用呢？」
Harry憑之前的形勢，推斷自己還不是目標，於是繼續省著技能不用。
「因為岳義士上一Round都用咗技能救人，所以都已經變成普通黃絲，亦都唔再有佢嘅事，而國際戰線嘅序幕亦告一段落。」傳媒宣布後，各人的眼罩也打開了，燈光已經轉為藍色，然後傳媒續說︰「今次被殺嘅人係鄺神Shirley，上Round走得甩，呢Round無咁好彩，好好珍惜尚存人間嘅十五分鐘，你嘅犧牲隨時都可以幫助黃營走向勝利，啱啱你哋講㗎嘛，一換一，嘻嘻嘻嘻，哈哈哈哈；而今Round被告嘅係Annie，你會點為自己辯護呢？我都好期待；到最後，武肺依然肆虐，更加造成PoPo群組，Ray哥，Sayonara。」Ray哥來不及說再見，鮮血便已經從十數個在頭殼的洞內傾瀉而出，然Ray哥已經一早知道其結果，故顯得異常安靜，體温由於血液的流失而漸漸冰冷，生命一點一滴的消逝，默默的死去。
「You have fifteen minutes. You may start now.」黃燈再次亮起，討論時間開始。
