有一晚，我同一大班朋友食完晚飯之後想搵個唔使比錢又有得坐嘅地方傾計。於是，我哋去咗附近嘅公園，圍圈坐咗係地下傾計。坐係我對面嘅朋友後面就有一個用黎做引體上升嘅設施。
我班朋友都傾得好開心，但我嘅視線就從來無離開過嗰個用嚟做引體上升嘅設施。因為我見到一個女人，坐咗喺上面，然後用隻腳一下一下咁踢落我其中一個朋友啊蚊嘅馬尾上面。無錯，佢唔係人，而係一隻鬼。而因為我有陰陽眼，所以見到佢。
「你望緊咩啊？心不在焉咁，都唔見你出聲嘅。」呀儀留意到我冇講過野。
「冇啊！啊蚊，咩你左留長頭髮咩？」事出必有因，趁呢個機會我問啊蚊。但，我問個一刻，個女人就即刻另過黎，用凌厲嘅眼神望向我，嚇到我呢！
「嘻嘻！靚唔靚先？假髮嚟架，我最近喺泰國旅行買架！我一見到就勁鍾意，摸上去嘅質感勁似真髮囉！於是我就即刻買咗啦！」
「咦！又幾襯你喎！」
「咦！你唔講我都唔知係假髮喎！」
「又真係幾靚嘅。」
啲朋友聽完啊蚊講，就附和住咁讚啊蚊。
但係我已經嚇到完全唔掂，相信大家都估到，嗰個根本就唔係假髮，而係真嘅頭髮，仲係連埋頭皮。因為，我見到個個女人係冇頭皮嘅。佢頭既外圍全部都係血紅色既肉。可能啱啱先咁多個朋友對啊蚊嘅稱讚已經激嬲左佢，我慢慢望上去佢到，佢個頭慢慢滲出血水，一滴一滴咁滴落地下。而只有，我一個人見到。而佢都好似發現到我係見到佢既，於是佢對住我，笑。
走嘅時候，我一路都好掙扎，究竟應唔應該同啊蚊講。佢會唔會當我癡線，所以就算講都唔可以當住大家面講，如果唔係大家都當我癡線，我又會變返孤獨一個人，就好似以前咁。
升上高中之後，我就同自己講過：「我唔要再做怪胎，我唔係怪胎。」
我哋繼續行，要到地鐵站，我哋要先行上一條樓梯。
「啊蚊，你好攰咩？做咩行個樓梯都行到左搖右擺咁呀？」呀儀見到啊蚊行得勁唔穩陣，於是問佢。
「可能係啦！返屋企抖下就冇事架啦！」啊蚊笑笑口咁講。
但我只見到嗰個女人扯住啊蚊條馬尾，完全放鬆，任由啊蚊將佢拖上樓梯。而係呢個過程入面，個女人依然望住我笑。就好似向我炫耀佢嘅能力咁。
我地分開之前我都冇同佢講到件事。但我返到屋企whatsapp佢。
「啊蚊，可唔可以唔好再戴個假髮呀？」
「點解呀？唔好睇咩？」
「唔係呀！我睇新聞話泰國d假髮勁污糟，戴得耐會敏感架！」
「真架?但我買返黎有洗過先戴既，一係我覺得唔舒服同痕就唔戴啦！」
「蚊，唔好令我擔心你。」
「知啦知啦！長氣。」
啊蚊個頭最後變到同個女人一模一樣，佢走黎搵我，問我：「點解唔救我？」
之後我個頭變到同啊蚊同埋個女人一模一樣。
「呀～」
我醒左，原來只係發夢，但係好真實。我摸下心口個塊玉，仲係到。呢塊玉係我父母係我細個發現左我有陰陽眼，成日受到陰靈滋擾，苦苦哀求華山高僧救我，而高僧可憐我所贈既。
高僧贈呢塊玉比我既時候，我只有6歲，佢同我講：「冥界既鬼魂每當發現你可以見到佢，就好似係苦悶既生活中搵到一件玩具，於是去糾纏你甚至傷害你。但你要知道，呢塊玉可以保護你，亦同增加鬼魂對你既好奇心，唔甘心既感覺，佢地好可能等緊一個機會，去接近你，所以一旦你除左呢塊玉落黎，你就會好危險，係比而家危險好多。所以，無論發生咩事都好，都唔好除佢落黎。」
以前我細個唔太聽得明高僧既意思，人越黎越大，亦經過一d事既洗禮，諗返起先開始明白。
今朝得我同呀哥係屋企，我地一齊係廳食早餐。佢見我精神唔太好，小心翼翼問我：「做咩呀？又見到d好恐怖既野？」
我冇答佢，反而問佢：「個天賜予呢個能力比我，我係咪有d責任要去做d咩？」
「我知你諗緊咩！你講既呢個責任好可能要用你條命做代價，你究竟明唔明？」佢語氣好重咁同我講，但我知道係因為擔心。
佢見我聽完成個人沉曬，苦口婆心繼續講：「你仲記唔記得你中三發生個件事？你差d冇左條命呀！我只想你平安，唔好要我擔心你。」
我中三個年去一個天文營，因為我平日好在意我塊玉，唔比人掂，d同學話想睇，但我死都唔肯除落黎。而小朋友就係咁，越唔比，越想挑戰，佢係我瞓覺既時候偷偷地剪斷我戴塊玉係頸個條繩，比左「佢地」一個機會。由塊玉離開我身體個一刻，我即刻就比個隻我成日都見到既女鬼上左身，我所有既關節都向「相反」既方向屈。個班同學嚇到跑曬走去搵老師，老師即刻送左我去醫院，我父母同呀哥見到瞓係病床既我冇戴到個塊玉就即刻知道發生咩事。個時仲係中六既呀哥，逐個搵個班一齊入營既同學，恐嚇佢地拎返塊玉出黎，將塊玉戴返係我身上我先冇事。個次我差d冇命，關節違反生物學既屈曲，令我係事後用左好長既時間去復原，無論係身，定心都好。
出院之後，呀哥親自帶我去首飾店，叫人幫我打一條鋼鏈，係無開口既鋼鏈，我將塊玉戴左係頸之後，d師傅先將佢焊接起黎。確保無論人地定我自己都好，都無辦法將塊玉除落黎。
打左條鋼鏈之後，為保安全，呀哥帶我去搵多次高僧。高僧話要單獨同我傾，所以呀哥唔知佢曾經同我講過呢d野。
「好在及時戴返塊玉，如果唔係後果不堪設想。是福不是禍 ，是禍躲不過。」
「唔緊要，而家我呀哥打左條鋼鏈比我，而家無論人地定我自己都冇可能拎走塊玉。」我扯一扯條鏈示意比高僧睇條鏈有幾堅硬。
高僧聽完，好似聽到個笑話咁笑左笑，講：「千奇唔好低估呢塊玉既威力，由我將佢轉贈比你既時候，你就已經係佢既主人。只要你想，塊玉就除得走。」
直至個日，我先明白佢既意思。
個日，啊蚊男朋友打比我，話啊蚊出左事。我趕出去搵佢。
啊蚊男朋友好擔心咁同我講：「自從個日我地同你地食完飯，佢就變得好奇怪。個假髮越戴越耐，甚至而家唔肯除。又困埋自己係房唔肯出門。我知你同佢好好，唔該你幫我勸下佢。」
「好，交比我。」
我上左去啊蚊屋企，敲佢房門，講：「啊蚊，係我呀！比我入去啦！」
入到去，我見到啊蚊佢坐咗係電腦凳上面，背對住我。而嗰個女人，佢坐咗係啊蚊張床上面，依然對住我笑，唯一唔同既係佢個頭有返頭髮，唔再血淋淋。
「啊蚊！」我細細聲叫啊蚊。
「加喂，我⋯應該一早就聽你講，唔好再戴⋯個個假髮。」佢震住咁講，慢慢轉過黎。
好在，佢個樣仲同以前一樣。
但佢慢慢遞隻手去個假髮到，想拎走個假髮，打開個下，我見到既係假髮下既血肉，個假髮同啊蚊個頭已經開始連結起黎，我隱約見到佢地之間血管既連接。
「冤靈通常依附係一樣野到，如果個野樣野徹底咁同在生既人結合，佢就會完全佔據個個人。」
呢刻我記得高僧咁講過。
「救我！」啊蚊絕望咁望住我。我見到佢頭同假髮之間既血管繼續以肉眼可見既速度生長緊。
呢隻野猛到可以真實咁影響啊蚊頭皮血管既生長去融合個假髮，佢既威力一定唔簡單。我肯定，如果今日，我除低條鏈比啊蚊救佢，我一定會死，仲要係死得好慘。
呢刻，呀哥把聲出現係我腦海。
「我只想你平安，唔好要我擔心你。」
我扯左一下條鏈，扯唔斷。
堅定d，我知道今日如果我走左去，見死不救，我會後悔一世，係一世。我唔想成世都咁，如果遇到下一個呢? 我都要視而不見？今日，我肯定，個天賜予我呢種能力，我就有一種責任。
我行去啊蚊面前，輕輕咁扯左下條鏈，斷左，我將塊玉放左係佢手上。
「呀！」
我瞓醒之後，坐左係鏡前面梳頭，呀哥就咁開左門入黎。
我笑住咁同佢講：「我把頭髮係咪好順好靚呢？」
呀哥飲泣咁講：「我叫你唔好要我擔心，你諗住咁樣做就令我以後都唔使擔心你。」
佢係我既遺照面前放左一朵花。
