「你根本就唔明！屋企人，係唔使你對佢好，你都可以肯定佢會一直陪住係你身邊。」

以前曾經諗過，如果我要出本書叫「我的港女家姐」，入面會有好多野可以寫。

佢係一個好怕曬既人，其實係好怕曬黑。有一次同佢一齊去附近食野，冇帶到遮，但沿路好曬。佢行左一陣就開始發癲咁呻：「好曬呀！咁曬你都唔帶遮架！你知唔知我唔曬得架！曬到黑曬！呀～嬲呀！」
「知啦！知啦！下次會帶架啦！」我安撫佢。
但佢另過黎，對住我燦爛一笑，講：「岩岩，我係咪好似港女呢？」
我笑左，但之後家姐又秒變臉：「好曬呀！下次再唔帶遮，我就砌你，真係想曬死我咩！」

仲有，佢好憎食蛋黃，於是我就要食佢食剩既蛋黃！但，我都唔中意食蛋黃。
「又比我食，好高膽固醇架！」
佢就笑笑口咁講：「你後生，唔驚啦！但我老啦！」

但我只係細佢3年，真係⋯⋯

仲有，佢好怕夜晚一個人去外面既廁所，幾次去露營，都要我係廁所門口等佢。
「喂喂！你出句聲啦！我要知你係到我先唔驚架！一係你唱歌啦！唱歌啦！」佢係廁格入面大聲講。
我心諗，你咪玩啦！比其他營友見到，我仲使見人既。
但：「銀河唯一⋯⋯的秘密，天際⋯最強⋯人物⋯」我練成左用氣音唱歌。

仲有，我，今次係我，我好唔擅長燙衫，個啲領位，袖位，骨位都成日燙唔好。我家姐擅長燙衫，但都好憎燙衫。有時我要上台攞獎，或者要制服檢閱，我就會求佢幫我燙。每次，佢都會鬧爆我，但，都會幫我燙。
「家姐～」
「攞黎啦！」

但佢一面燙，就會開始講粗口。
「挑，你條仆街！咁大個，燙件衫都燙唔好！下次唔幫你架！」等佢調整緊件衫既位置，佢就會靜幾秒，之後就再鬧過。「我唔理呀！你欠我一個人情呀！唔係！係十個至岩！你諗住點還？你講！」
而我就安心咁瞓返上床，一面禁手機，一面聽佢碎碎念，一面等佢燙好件衫。
等佢燙好，佢就下火架啦！拎住佢既結晶品（好直既衫）笑住咁同我講：「燙好啦！收野啦！衰仔！」
「係！」

此為長篇故事（我發現左我呀哥成日對住部電話講一種我聽唔明既語言）內其中一章，如有興趣，可讚黑柴Facebook
https://www.facebook.com/黑柴-879053098899020