我係一個asso 岩岩畢業既後生仔，asso畢業可以搵到咩工呀！做文員又得個萬一二蚊，做sale同待應又辛苦，可能成日遇到啲西客。唉！最後我都係去咗考個保安牌，諗住去做保安。成日見啲保安都係行行企企咁，好似好輕鬆，返啲私人住宅都有萬三四蚊，去試下都好，反正個保安牌好易考，上幾日堂就可以考到。可能啲人會覺得我冇大志，我都認，我就係冇大志。學歷底又冇父幹，我都唔知道努力有的咩用，不如搵份輕鬆既工，hea住咁過好過啦！
考咗保安之後，我就去咗搵保安既工，一搵之下，我先知道原來保安都幾渴市，好多地方請人，根據唔同既位置同埋時間又會有唔同既人工。咁我就簡咗個近近地附近既商埸既早更保安做，人工雖然冇出面咁高，但如果做出面個啲，連埋車錢同埋我搭車出去既時間，其實同我留係到做差唔多。而且我個人比較懶，唔想周圍走，於是就簡咗做呢間既商埸保安。然而返咗幾日，發現做既野都係手板眼見功夫，冇咩難度，巡下坐下咁，冇人見到既時候咪禁下手機囉！唯一麻煩既就係個到其他同事都係呀叔，姨姨，成日撩我傾計。大佬呀！我同佢差成十幾廿年呀，好心佢地就慳返啖口水啦！我真係冇嘢想同佢地講呀！仲有好多勁多事既姨姨叔叔，成日問我做咩做保安，唔正正經經搵份工做。正經？請問咩叫正經呢？呢份工又有幾唔正經呢？我又唔係你地仔女，可唔可以唔好對我人生指手畫腳呀！就算係我父母，都唔可以對我既人生指指點點，以後既路係我要行既，就由我自己簡，唔好多多意見。我估佢地係怕我搶佢飯碗多啲囉！我做嘢又快過佢地，又醒過佢地。算啦！算啦！我都係「正正經經」做返自己嘢，唔理佢地咁多！
我日覆日咁做，星期六日放假既時候我都好小出去玩，係屋企睇下書，賺得唔多都係控制一下使費好啲！直到有一日，我係到處理緊一啲過期失物，如果件失物過咗一個月都冇人認領，又唔係啲咩貴重物品就可以丟。我係到整理緊既時候，發現到一枝鋼筆，好靚好新，上面刻咗個N字，唔知係咪主人英文名既縮寫，我見枝筆咁靚，就冇丟到，自己keep起咗嚟返工用。到咗一星期之後，我發覺啲呀叔呀姨同事好似俾說話我聽咁。見到面就同我講︰「做咩咁勤力呀！」我聽到之後呆咗，咩準時返工都叫勤力架，真係冇嘢搵嘢嚟講。我都只係無奈咁笑，唔識答佢地。係呢時候，另一個呀姨又講︰「梗係啦！人地後生仔，年輕力壯，點同我地呀！」其實我唔太明佢地既言下之意係啲咩，但我都唔係個啲任人講又唔反擊既人，於是我附和咁講︰「係呀！如果你做到都可以做既！」佢地聽到之後個面口就黒咗。我都唔知道我最近有邊到得罪咗佢地。
到我返到屋企樓下，就連樓下個保安都問我做咩咁勤力。咩事連你都知，你都講埋一份呀？
「吓！」我吓咗出聲，問佢︰「啫係點？」
「讚你勤力咋麻！」
「咩意思？我唔明你講啲咩！」
「你一日返兩更保安，仲唔叫勤力呀？」
「唔好玩啦！全世界都知啦！呢幾日晚晚11:50我都見你著好制服落樓。」
「吓！你係咪認錯人呀！我11點就上床瞓覺架喎！都冇出過門。」
「冇可能！你當我傻既咩！其實打兩份工又有咩好隱暪呢！咁捱得，我覺得後生真係好呀！」
我依然覺得佢講既嘢好荒謬，我邊有可能自己打兩份工，自己都唔知呀！於是我冇理到佢，就返咗屋企。但係到咗第二日我收工返到屋企樓下既時候，樓下個保安又捉住我，俾咗條片我睇，我係條片入面見到自己著住制服係大廈門口行出去，唔通呢個大廈有個同我好似樣既人？個時我對佢講既嘢都係半信半疑！到第二日返工，我開返一啲當值既CCTV嚟睇，又真係見有個好似我既人係到當值夜更，究竟呢個人係邊個呢？同我咁似樣既，攪到其他同事都誤會埋。但我覺得我自己都係唔好辯解，佢地遲啲就會知道自己攪錯架啦！但到咗下個月出糧既時候，我發現自己竟然出咗3萬蚊。明明我得萬三蚊人工架！於是我走咗去問我老細，但佢問返我轉頭︰「做咩呀？你返早夜更，早更萬四，夜更萬六，夾埋咪三萬囉！定係你想分開出！」
就係因為咁呢種日子持續咗半年，我亦因為咁錢銀鬆動咗，可以儲到小小錢。係呢期間，我又買個筆既cam仔，等自己隨身帶住，有時可能開返嚟睇自己夜晚做咗啲咩！但都係一啲正常工作，於是漸漸我就冇再留意發生咩事。
然後有一朝我起身既時候發覺自己屋企成地都係泥，我就覺得好奇怪，唔通尋日落雨嚟？所以踩到成腳泥！本來諗住今晚睇返啲錄影睇下癹生咩事，但個晚返到去又因為懶所以冇睇到，之後就咁不了了之。然後又過咗一個月，一日我收工既時候樓下個保安問我，做咩逢星期五佢收工都唔見我返到屋企既？
呢個佢唔問我，我都係唔知喎！咩我逢星期五都好遲先返到屋企咩？不過我星期六日唔使返工，所以會遲啲起身，所以我自己遲咗返屋企我都真係唔知道，咁個晚我上返屋企就即刻開返我星期五既錄影嚟睇，我發覺自己收咗工之後所行既方向真係唔係返屋企，而係去咗屋企附近既一個山頭，我見到自己準備行上山既時候，心入面諗︰咩料呀？而家都天都未光喎！你行上山做咩呀？我呢啲咁cheap既錄影筆根本就睇唔清楚周圍既情況，亦都唔明白點解影片入面個個自己係咁黑既情況下都唔使開電筒咁行落去，我就咁睇都已經有啲驚，驚無啦啦會有啲嘢彈出嚟！直到我聽唔到自己既腳步聲，我就知道自己停底咗，我隱約見到鏡頭既水平低咗，冇再郁到，咁我應該就係坐底咗，就咁過咗15分鐘到，我又企返起身開始落山。我對於自己呢個舉動有啲疑惑，有啲擔心，又覺得有啲恐怖，去到呢刻我先開始懷疑自己究竟係咪撞邪！但我又可以點樣阻止自己呢？我又唔想冇咗筆錢，又唔想自己出事，真係好矛盾。所以我唯一諗到既辨法就係校一個逢星期五我收工既時候響既鬧鐘，等自己可以醒返唔好上山。但係之後個幾個星期都唔work，我都係冇俾個鬧鐘整醒，上咗山。然後有一日，我終於俾重覆響既鬧鐘整醒咗啦！但個時既我已經行到山腰。哇頂！好驚呀！咁Q黑！點返屋企呀！我係完全唔敢望周圍，只係望住地下啲樓梯，不停跑不停跑，中間都唔知仆咗幾多之先落到山。自此以後，我唔敢再校鬧鐘，我真係寧願由自己上山，都好過半夜上上下山醒返，真係攪到我有心理陰影。至少暫時上山呢件事對我都有咩迫切既影響。
過下過下，夢遊既情況仲有兩個星期就夠一年啦！我聽到有啲同事講下個月既更份，佢地係到傾話唔想係下個月既15號返工，因為之前有個同事係上年既個日收工之後，去咗跳樓，原因好似係因為佢女朋友失蹤咗半年都搵唔返，下個月15號就係佢既死忌，啲同事都怕撞邪。但我啲時間係定好曬既，我個日係要返工。然後因為舊個本簽到簿就嚟用完啦！我開始準備定另一本，舊個本用完就會丟！我睇返舊個本簿既時候，我就係到諗，我自己返夜更都要簽到架！但點解唔見自己個名既？咁我對返自己返工既日子，發覺個幾日既簽名都係一個N字。點解我夢遊個時唔係簽自己個名架？我心入面其實知道有啲間題，但我真係唔太想面對。我再向前翻嚟睇，竟然俾我發覺之前都有人用N字嚟簽名，我即刻問同事個個係邊個？同事就支支吾吾咁講話係之前自殺既同事。我即刻嚇一跳，因為我記得我手上枝筆上面都係刻咗個N字，唔通就係因為我執咗枝筆先會發生呢啲事。話口未完，我就即刻丟咗枝筆佢。但第二朝枝筆竟然又出現咗係我個袋入面，我先肯定自己係撞邪！依家既我真係好後悔，如果我知道啲錢係死人賺返嚟既，我一定唔會要。為咗擺脫呢個狀況，我開始上網調查佢既事，亦都查下我依架算係啲咩情況。我查到有啲鬼會唔知道自己死咗，然後不停重覆自己死之前所發生既事。咁應該就好似我咁，佢用我身體係同一地方返工放工。然後我又查到佢自殺前半年女朋友失咗蹤，佢女友失蹤前，佢同佢女友係最後一個見，佢話個晚佢地鬧完交之後，女友就負氣走咗，從此就失咗蹤。其實警察有懷疑佢對佢女友做咗啲咩，但礙於冇證據就不了了之。咁樣令我諗返起，幾個月前既一日，我發覺屋企成地泥，之後我就逢星期五收工會上山。唔通都同呢件事有關？咁我即刻拎返個日既錄影出嚟睇，睇完之後嚇到我癲。原來個條友真係殺咗自己條女，個日我就係上到山挖返條屍出嚟又埋返佢。我一面睇，一面喊咗出嚟，心諗佢點可以用我雙手做埋啲咁既嘢！雖然已經相隔多時，但個晚我都係忍唔住沖咗好耐涼，覺得好污糟。但更令我覺得恐怖既係，我觀察到佢呢一年重覆緊佢上年做過既事，而下個星期就係佢既死忌，咁係咪啫係代表佢會用埋我既身體去跳樓自殺呀！咁我應該點做至好呀。我又唔敢報警，因為我已經郁過條屍，如果警察唔信我，我分分鐘要坐監架！於是我即刻同老細辭咗夜更，老細好唔高興，但我都冇理佢。我逼自己夜晚唔好瞓住，但好死唔死我竟瞓著咗，朝早睇返錄影我又走咗出去返工，而我老細就好開心。我真係好驚呀，我唔想咁快死住呀，我真係好後悔自己當初咁貪心，唔早早處理呢件事。
事到如今，去到個個人死忌既前一晚，我為補住自己條命仔，去咗個朋友既屋企到瞓，叫佢睇住我。我地係好好既朋友，個晚我地一齊瞓，佢誓神劈願咁同我講話唔會俾我死，個下我真係好感動。個晚佢將我隻手同佢隻手綁埋一齊，等我唔會走佬。第二朝醒返既時候，天已經光咗，我好開心好感動，我冇事呀！我避過咗啦！我開心到同我個friend攪埋咗一齊。
但，我突然覺得個心口同個胃好痛，然後就吐咗好多血出嚟！我望望台面個樽吉咗既安眠藥，我先意識到，佢係跳樓加服藥自殺既！
#有興趣可讚黑柴Facebook
https://www.facebook.com/黑柴-879053098899020
