完結
終於嚟到最後嘅最後，喺呢幾個月入面多謝大家嘅支持鼓勵，令我可以唔怕死咁向大家公開香港政府背後嘅秘密，雖然過程入面有好多驚險事發生，但有驚無險咁去到呢1篇我已經死而無憾。
我穿過門真正恢復意識嘅時間係7月16號，我記得1張開眼除左見到雪白嘅天花板之外，就係3個著住Men In Black咁嘅裝束嘅人圍住我。我feel到我全身插住唔同嘅喉管同儀器，間房雖然佈置得似病房，但唔知點解我完全唔準嘅第6感話我知嗰度1定係研究室。
3個MIB見我醒咗想問我話，問咩我無咩印象，只記得我無答過佢哋，我用咗大約30秒了解自己處境之後，開始掙扎想逃走，但係我4肢連腰同頸都被人綁實，完全動彈不得。佢哋見我咁大反應，就對住身後塊大鏡做咗個手勢，於是兩個身著白袍貌似醫生嘅人衝入嚟喺我手臂上吉咗1針，我好快就4肢無力，昏昏欲睡。
喺半夢半醒間，我個腦閃過零碎畫面，我喺個無咩裝修、成個洞穴咁嘅地方，而呢個洞穴有好多電腦、裝置，仲有1個好大嘅球型裝置，外面有個圈圍住佢轉，而我瞓喺地上，有好多人跑過嚟圍住我，個個戴哂口罩唔知咩樣，只知有男有女，有華人有西人。
到我再次清醒嘅時候，我仍然身處白色研究室，MIB仍然守候，但我今次無再發難，反而問返佢哋我喺邊、點解綁住我、同我1齊返嚟嗰個老人家喺邊呢啲問題，但佢哋完全無答過我，只自顧自問我係邊個、發生過咩事。
「睇嚟我唔答佢哋，我係永遠唔會得到我嘅答案。」我心入面出現咗呢個諗法，但我要確保自身安全先，於是我開口答佢哋問題前，問咗佢哋1句：「我憑咩相信你哋？」
佢哋好似1早預咗我會咁問咁，喺心口內袋拎咗個pass show畀我睇。
「特殊事件應對部？」讀GPA嘅我自問對政府架構倒背如流，但呢個部門我真係第1次聽。
「無錯，我哋係直屬特首，完全獨立於行政、立法、司法3權嘅存在，只有特首知我哋存在。所以你大可以放心將你嘅事講畀我哋知，我哋會保護你嘅安全。」唔知點解我聽到「保護你嘅安全」呢6個字時會覺得有弦外之音。
不過既然佢哋咁講，我就如實咁答：「我叫麥啓超，香港人，喺2007年5月19日夜晚8點左右，同啲friends去完海洋公園揸車返屋企嗰陣時，喺香港仔隧道遇到交通意外，之後……」
我將我喺另1個世界生活接近兩個月嘅事一五一十咁同佢哋講，佢哋1面聽1面錄音，直到我講完之後問咗我1個問題：「你喺呢個穿越實驗入面有咩發現同身體有咩變化？」
「我發現兩個世界嘅事物有1定程度嘅連繫，可能過程唔同，但結果都係1樣，特別係人物關係。至於變化……好似無咩，身體無咩不適同變化。」我答完之後先覺得條問題有古怪，「實驗」？唔係用「意外」或者「事件」更啱咩？「發現」同「變化」令我感覺自己似實驗對象多過意外受害者，唔通成件事都係設計好？
當我開口想問清楚嘅時候，佢哋搶先我1步再講：「你話同你1齊返嚟嗰個曾灶財我哋喺香港仔隧道實驗室無見過。不過我哋收到消息，佢喺琴日已經死咗，等我哋驗完佢條屍調查完先會對外公布，所以大約喺10日之後報紙先會登。呢段時間你喺度好好休息，我哋都要監察住你身體1段時間做數據收集。」
講完佢哋就走咗出房，得返我1個喺度消化成件事──九龍皇帝曾灶財因為要畀機會我返原來世界而犧牲咗自己……
成件事係意外定係實驗我不得而知，亦無可能會得到官方答案，但就佢哋可以控制到傳媒報導車禍事件同九龍皇帝過身嘅事嚟睇，應該偏向係實驗多；加上我小時候同18歲穿越呢兩件事可以有能力令我家人同老死封口，我諗佢哋勢力真係好大。
當我離開研究室時，嗰3個特殊事件應對部嘅西裝友對我進行過催眠令我無咗呢段經歷嘅記憶，仲1直暗中監視我，可能怕我會亂講引起恐慌掛。
我今次之所以記得返成件事同可以講到出嚟，都係因為我2015年時學催眠，試過1次做示範畀阿sir催眠返以前，咁啱解除咗嗰3個人嘅催眠先揾得返呢段記憶出嚟，而且佢哋見隔咗咁耐對我嘅戒備有所鬆懈，再加上網絡小說嘅盛行，集合天時、地利、人和先有咁千載難逢嘅機會。
當我有返呢段記憶嘅時候就開始上網睇相關報導、都市傳說之類，發覺有啲都唔係咁正確，最少實驗1定唔係凌晨先開始，但香港仔隧道實驗室仲有無運作我就不得而知，但可以肯定嘅係政府已經將實驗範圍擴大同增加實驗地點，西貢、將軍澳、康城、太子、荔景等等都市傳說絕對唔係傳說咁簡單。
如果有1日你都穿越咗，我恭喜你，你會有1次難忘嘅冒險之旅，不過到時記得話我知嗰面世界歷史發展成點。
