二佬覺得好無奈，屋企都已經換左鎖頭，仲使物搵前女友拎返條鎖匙。不過為左我，佢都去行左一轉。佢之前聽到我同大佬投訴，佢女友成日上黎個陣時就已經打過比佢，想叫佢唔好再上黎，但電話冇人聽。二佬覺得不以為然，佢做啲咁既事，想避自己都唔出奇。於是，二佬就whatsapp佢，叫佢唔好再上黎，但句野過左幾日都未轉藍剔，咁二佬就認為佢係突登唔睇，都冇太在意。
佢前女友因為做野既地方距離屋企遠，所以佢一個人搬左出黎住。二佬之前都試過係佢屋企到過夜，咁既然聯絡唔到佢，二佬就直接走上佢屋企。但一去到佢屋企，就見到有一班人圍住左係到，有幾個佢認得係前女友啲鄰居，佢見到有消房員係到撬開緊前女仔屋企道門。佢問其中一個鄰居：「發現咩事呀？我係佢朋友！」二佬指住門口講。
「入面臭左成十幾日，拍極門都冇人應，又好耐都冇人見到入面個女仔，咪搵消防員黎爆門囉！真係臭到頂唔順，我地先報警！」
聽完之後，二佬表現得有啲擔心，企係到同大家一齊等。但當道門被打開個一下，眾前都被眼前既景象嚇到呆左。個女仔係屋入面吊頸死左，佢著住雪白既連身裙，但此刻裙擺染成血紅色，地下上亦有由佢身上流落黎既血。佢佈滿血絲既眼，正正就係望住門口，係門口打開既一剎那望住左二佬，眼神之中充滿怨恨。二佬嚇到跌坐左係地下，又內疚又恐懼。佢實在唔敢相信佢前女友會就咁就自殺。佢腦海入浮現出前女友一個前係佢面前苦苦哀求唔好分手既景像，痛哭起上黎。警察見佢係死者，都捉住佢問左啲野。幫手通知左前女友既父母後，佢就走左，但冇即刻返屋企。佢唔知點樣面對呢件事，亦唔知應該點樣同我地講。因此，一個人盲無目的咁係出面行，直到深夜先返屋企。

但我同大佬仲未瞓，坐係廳到等佢。
大佬：「細佬！咁夜先返既，鎖匙呢？」
二佬聽到先驚醒，佢完全唔記得左件事。
佢低頭支支吾吾咁講：「佢死左！」
「係咪一屍兩命？」
二佬呆左咁望住我，奇怪我點解會知。其實係因為我見到姐姐既下體流左好多血，因而推斷出黎。
「佢死左幾耐？」我問。

「兩星期左右。」
我開始分析：「一星期前，大佬都話見到姐姐上左黎，咁姐係我冇睇錯，但我地見到係佢既鬼魂。」

「吓！細佬！你到底做左啲咩攪到佢自殺？仲要死左都纏住你！」大佬問。
「我⋯佢話佢有左，我⋯叫佢⋯落左佢，佢唔肯，我就同佢⋯分手。」
我聽完之後暴怒，佢係我呀哥，但作為一個女仔聽到呢啲事都會好嬲：「吓！你究竟做左啲咩！你係咪男人黎？你叫你條女落左你地個bb，點解？你點可以咁對佢。我真估唔到我呀哥竟然係個渣男，係個人渣。你唔想負責，咁你就唔好攪佢啦！」我一面鬧，一面用拳頭打向我二佬。我對二佬既語氣好硬，其實由細到大我對二佬都係咁，佢成日做事馬馬虎虎，又唔夠成熟，係我眼中一D都唔似呀哥，似細佬多D。因為我成日因為佢D蠢事而教訓佢。
二佬：「我就係想負責，先唔想個bb 出世！咁樣對我地都唔好！」
「你放屁，垃圾！」
「我只係唔想個BB出左世好似我地咁！」二佬大聲叫出黎。
我呆左。佢繼續講︰「我地唔夠相愛，我完全冇心理準做爸爸，個BB生出黎都要會變到好似我地咁！」
我聽完冷笑左一聲，望住佢講︰「你真係夠狠…….」
我個句「你真係夠狠」唔係鬧佢冷血，而係佢真係夠狠，講個咁既原因出黎，令到我冇辦法再鬧佢，令我心軟。父母離婚對我地既童年造成好大既影響。我地係寄住既社福機得到有限既資源，但我地得唔到一丁點既愛。冇大人既疼惜同愛護，有咩事都要自己頂，過得好苦好苦。諗起個段日子，我就鼻酸酸，已經鬧唔落去。

我地都沉默，其實我會咁嬲都係因為擔心佢，唔明點解佢成日做埋D蠢事？但始終佢都係我呀哥，我都唔想佢有事。諗深一層，成件事既責任都唔係全在二佬身上，姐姐咁就輕生都唔岩，佢對唔住個BB，對唔住佢父母，亦對唔住佢自己。為左我二佬呢D咁既人，又何必呢！我可憐佢，同時又不屑佢既軟弱。

而家知道姐姐係來者不善，即使我知道係二佬有負於佢，但我都要保佢，因為佢係我屋企人。而家唯有等佢出現，再同佢談判。

「呀！」第二朝我比眼前既景象嚇到尖叫，我個肚大到好似有左8、9個月咁，我捧住大大既肚行出廳，大佬二佬都因為我既叫聲行左出黎。我望向塊鏡，見到姐姐企左係到，今次大佬二佬都見到佢。而鏡上面慢慢浮左D血字出黎 「生佢出黎」
「發夢！冇可能！」我對住佢鬧。
血字繼續寫落去「或者…….佢….死」，之後塊鏡投影住二佬個頭個部份迅間裂開。
「呀！」二佬個頭就出現左個傷口，係到流血。塊鏡照住佢膝頭既地方都接住裂開，二佬就痛到跪左係地下。於是我即刻衝去二佬面前，擋住佢，令塊鏡照唔到佢。而家我終於明白佢既目的，我有兩個選擇，一係生左佢個BB出黎，二係佢拎走二哥條命。我好掙扎，如果個BB真係出左世，我個良心一定唔容許我唔理佢，會努力將佢撫養成人，咁我成個人生就毀左啦！我應該為左我呢個仆x呀哥犧牲自己嗎？唔咁做，唔通眼白白睇住二佬比佢整死？
「你要攪就攪我，唔好攪我個妹！」我都未諗清楚點做，二佬就係我後面衝左出黎講。
「死開！」但我就一野推走佢去鏡照唔到既地方，為免佢再受傷。同時心諗我二佬都仲有D人性，諗住自己承擔返。不過，要用條命去承擔，我唔會比佢咁做。
我反應好快咁拎起旁邊既剪刀，衝向塊鏡插上去，期望可以傷到佢。
「呀……..你個八婆！」當把剪刀刺穿塊鏡個下，剪刀落點正正照住既正正係我個肚，我就感覺到個肚好痛好痛，而姐姐對我微笑左一下就係鏡入面消失左。
而我就被送左入醫院，生左個bb女，我好絕望。係育嬰室外，我透過玻璃見到入面既BB女，佢真係好似⋯姐姐。
自此以後，我都有再係屋企見過姐姐，只有個BB女係屋企跑跑跳跳。