望咩望啊!話你啊不孝子，其實你對屋企人係唔係比普通朋友更差?

擁有既時候，你唔識得珍惜，失去既時候，你只識得後悔。其實唔單止可以應用係男女朋友上面，更應該用黎描述同家人既關係。好多時同你血緣最親既人，現實上同佢就最為疏遠。咁樣唔係好可笑咩?其實正正係大多數香港人同屋企人既生活寫照。

屋企人同你講幾句，你會覺得佢煩，覺得佢好長氣，但朋友呢?就算係一個普通朋友，你都可以同佢傾足成晚都唔會厭多。有時家人只係善意提醒「記得關好哂門窗先出門口啊!」、「今日天氣涼左啊，記得著多件衫啊!」、「你依排有咩做啊?做咩成日唔番黎食飯?」。每一句只係出於家人對自己既關心，但你就愛理不理。相反，同一個普通朋友就可以咩都傾，咩都講，女仔又傾，同學又傾，明星又傾，無所不談，唯獨係自己既家人，就咩都唔講，佢地就連普通朋友既地位都不如，但對你既愛依然係不變。

面對挫折同失敗，相搵人傾訴既時候，你永遠都唔會搵屋企人。當你只係想有人同你分擔痛苦，關懷下你，安慰下你，你就會盡量搵身邊所有既朋友去傾訴，當冇一個朋友理你，你就只會上facebook同ig到出負能量既文，將痛苦收收埋埋，自己獨自承受。但身邊有一班永遠會為你解難，分擔不快與痛苦既家人，你往往就唔會理會佢地，唔會將心入面既說話同佢地講，美其名係代溝，實際上係唔想同佢地講，因為係你心目中，家人根本連朋友都不如，家人唔重要，最重要係建立同朋友既關係。

當你生日、升職或者加人工果時，第一時間係會同朋友分享，而唔係同養到你牛高馬大既家人分享喜悅。作為學生哥，個個都希望生果日時有成大班朋友同你慶祝，唱生日歌，當朋友真係咁樣做，你就會好感激佢地，係facebook到出哂文，tag哂人。但屋企人呢?想係生日約你果陣真係難過登天，幫你慶祝完之後，你都唔一定會係facebook到出文感謝佢地，因為你覺得佢地對你既愛係必然，係與生俱來。朋友唔幫你慶祝生日，你會亂諗野，唔開心，屋企人唔幫你慶祝，反而冇咩所謂。升職加人工果時，你就第一時間同身邊既密友或者老婆講，父母呢?永遠都唔會第一個知。

睇到呢個位，各位讀者不妨做一個小統計。首先諗下自己屋企人點樣對你，為你付出左幾多，第二諗下自己又為屋企人做左幾多，第三諗下朋友點樣對你，之後再諗下你自己點樣對朋友，到最後比較下係唔係朋友相比家人對你既付出較少，但係你對朋友比對你既家人更好。如果係既，咁你就要反省下。

點解唔可以將家人當作你既朋友呢?有咩事都可以同佢地分享，或者你會覺得家人同你諗既野完全唔同，佢地唔明白你，但起碼比佢地知道你係到做黎咩野，等佢地可以了解下你。朋友A會同家人講下自己點樣同女仔相處，媽媽就比下意見佢，母子好似親密友咁。朋友B會同老豆講下身邊既朋友仔，笑下D女或者讚下靚女，父子就好似朋友一樣。

與其咁辛苦要扮到自己好外向，去認識新朋友，不如留番小小時間關心下你既屋企人，千奇唔好等失去之後先知道傷心。對待家人唔同對待你既暗戀對象，千奇唔好留有任何既幻想空間，因為你同家人保留既，理應係回憶，而唔係空空既幻想。

如果你認為自己係一個情深既人，或者太過睇得起自己，因為真真正正既痴心情長劍，正在係屋企等你番黎飲湯食飯，為你分擔生活既不快，做你既樹窿，成為你既避風港。

當然如果你屋企人對你好差既就另計。