訪客
一月的時間過得很快，可能是因為每天放學後也要補課的緣故，時間總是覺得不夠用，回過神來的時候已經是一月尾，農曆新年快要到來，大廈也充滿節日氣氛。
大門入口掛了春聯，升降機大堂貼滿揮春，還放了一盤桔，連保安員的座頭也放了水仙花和攢盒，小孩也特意過去拿糖果吃。
「唉，咁快就新年，之後就mock，然後就DSE，時間真係過得快。」我抱怨時光這個壞人太冷酷，停留耐些也不許。
這段日子裏，Tracy也識趣的沒有出現，可是我她越不出現我便越掛念她，自從江叔過身後，我便沒有見過她了，不知道她現在在做甚麼呢？
而不速之客，往往就在最意想不到的時間出現。
在人人也大掃除的年廿八，早已不住在這的王先生出現了在我們的面前。
「小朋友，你哋仲記唔記得我？」只是數個月不見，之前還是腰板挺直的王先生，現在已經老態龍鍾，要撐着拐杖走路了。
「王生？點解你會知我哋住喺度？請問有咩事？」我問。
「係我叫佢嚟嘅。」剛從洗手間出來的阿旻說︰「佢而家都無人無物，獨居老人，我咪叫佢嚟，等佢感受吓人間温暖。」
「你有咁好死？」我質疑，但她只報以一個意味深長的微笑便去招呼王先生。
心水清的我很清楚，只要王先生出現在這大廈，便會招來殺身之禍，所以我立即拉阿旻到一旁跟她說清楚，怎料她說這正是她的計劃。
「呢個世界有無鬼，今次我就證明畀你睇，王生都係想從呢件事當中解脫，所以先肯嚟。」阿旻壓低聲線說︰「單案佢同我承認咗佢當時係有份，只不過佢係提供場哋同收埋條片嗰個。」
「收埋條片？咩片？點解佢會同你講呢啲嘢？」我驚訝的問。
阿旻笑而不語，再次走到王先生身邊跟他閒聊，然後從房中拿出那本文件夾，王先生也同樣在袋中拿出了一張記憶卡，這刻我大概猜到王先生會向阿旻坦白的原因離不開這本文件夾。
「嗱，開電腦睇睇，記得幫王生徹底delete，要還㗎。」阿旻故意大聲說，充滿默契的我立即明白她的意思，連忙關上房門儲存在電腦並播放。
由於影片是十年前，所以解像度不高，高清畫面肯定是沒有，影片中人的樣貌也比較糢糊，但大概還是能猜得出來。影片中有一女生躺在沙發上一動也不動，由髮型能得知這位是死者梁紫茵。而五個男人，包括拿着攝影機的王先生、徐先生、萬先生、廖先生和夢到過的最後一位不知名男人圍着她，正對她毛手毛腳，除了廖先生。正如他臨終前所說，他正竭力阻止其餘四人侵犯她，可是雙拳難敵四手，他最終還是徒勞無功，更被其他人趕走，沒有再出現在影片裏。
影片繼續，他們已經漸漸不再滿足於毛手毛腳，開始有進一步的侵犯行為，第一個嘗試的是徐先生，他直接撲上去，然後很快又驚慌的跌坐地上，指着梁紫茵說︰「佢全身都好凍。」
其餘的人蜂擁而上，一論測試後，最終得出她已過身的結論。眾人慌張起來、六神無主，怎料那位不知名男說︰「反正佢都死咗，唔好嘥，你哋唔上我上。」
影片就此結束，雖然之後的部份沒有影片，但已經想像得到發生了甚麼事，只是不知道是不是所有人也有份，以及誰提議偽裝成自殺。
有這影片為證，我頓時覺得廖先生無辜枉死成代罪羔羊最淒慘，至於其餘四狼最多只能證明他們猥褻屍體，這是否真的有罪我也不清楚。
此時，阿旻正好進內查看我的進度，我把影片重播一次，看過後她義憤填膺、憤怒的罵道︰「呢班堅係仆街嚟，雖然香港無猥褻屍體同姦屍罪，但佢哋肯定中非法處理屍體，點解嗰時咁都告佢哋唔入？無天理！」
「因為嗰時係告我哋強姦同謀殺，而唔係非法處理屍體。」王先生突然搭話，我們也嚇了一跳。
「我哋唔係咁嘅意思，我哋只係……」我慌忙解釋，以免引起他的殺意。
但王先生卻打斷我道︰「唔緊要，我都睇化哂，活咗咁多年，日日都孭住呢個秘密生活，都真係幾辛苦。而家得返我同阿棠，一個殘一個癲，都真係報應，有時我寧願死咗一了百了。」
「咁又唔駛咁灰，非法處理屍體都係坐幾年，無咩嘢嘅，應該仲出得返嚟呼吸自由嘅空氣。」阿旻又發揮毒舌本色︰「一係我幫你報警？」
「喂！」我喝了她一聲，她才無癮的收聲。
「王生，」我語重心長的對他說︰「雖然你可能唔係兇手，但單憑非法處理屍體呢單我都應該要恨你，不過都見你年時已高，又多病痛，已經係活受罪，我勸你以後都係唔好返嚟，唔係你都會好似徐生、萬生、廖生咁，被『王』捉去跳樓死。」
「呵呵，小朋友，多謝你關心，我作孽太深，茵茵係咪我殺都好，我而家都會話係我殺，我今次返得嚟都預咗，我已經無人無物無牽掛，早啲死咗去陪伯爺婆仲好，佢自己一個會好唔慣。」王先生稍稍抬頭望向窗外的天空，雙眼無限嚮往與王太團聚。
我正糾結要不要將王太已經去了投胎的事告訴他，但阿旻已經搶先一步說︰「王生，其實人呢，死咗就係死咗，唔會有咩慣唔慣、陪唔陪㗎。」
「呵呵，世界之大，你未死過又點知呢？就當係我老一輩嘅浪漫囉。」王先生笑呵呵說。
「咁王生，啲剪報你就睇完，有無咩發現？」阿旻認真的問。
王先生也收起笑容，樣子嚴肅起來，氣氛一下子變得很凝重。他字字鏗鏘的說︰「好彩剪報夠齊，呢幾年跳樓死嘅人，好多都係呢度嘅鄰居或者係舊住客，但我唔清楚佢哋同茵茵嘅關係。」
「王」的力量明明只能在這裏發揮，一離開就甚麼都不是，為何她能把不是這大廈的人也帶來殺死？之前Nicole的姐姐又好，我身上的背後靈又好，為何在離開大廈後仍能跟着我？
「咁點解搬走咗嘅你，之前仲會出現喺一五零八？明明有個雲生住緊。」我突然想到這個問題。
王先生聽到後淡然的說︰「我只不過入去攞返條片，而個雲生佢而家都仲係住緊喺入面。」
「吓？」我和阿旻異口同聲道︰「個單位而家打拆完仲丟空緊喎！」
「無錯呀，佢仲係住緊喺『入面』。」王先生重複一次，不過這次他特別強調了「入面」兩字，這令我產生了一種不寒而慄、兇殘血腥的想法。
「等等先，你話攞返條片，點解有人住緊你都仲認為可以攞返而無被人丟咗？」我嘗試轉移話題好使我能忘掉那恐怖的想法。
「因為我將佢放喺牆入面。」王先生露出得意的眼神，為自己的小聰明而沾沾自喜。
放在牆中？這手法不就是與廖先生家中的錄音機同樣嗎？難道也是出自他的手？難道他是那個神秘組織的一員？
「你話雲生仲係單位入面，唔通佢又被你封咗喺牆入面？」阿旻難以置信的問，本想着試探他，豈料他直認不違，絲毫沒有辯護的打算。
眼前的這個人，我剛才還說放過他，實在是太過天真了，他簡直不配做人，他是惡魔！
「點呀，小朋友，係咪覺得我罪無可恕、罪該萬死？」王先生以挑釁的語氣問︰「但係我一直都逍遙法外，係咪覺得好唔公平？哈哈哈哈……」
「我要報警告發你！」我忍無可忍，拿起電話，但阿旻阻止了我，她在我耳邊理性的說︰「佢講呢啲你唔覺得係特登想挑釁我哋咩？佢背後唔知有咩陰謀，冷靜啲，睇定啲先。仲有，如果真係有鬼，佢而家乜都認哂，啲鬼肯定會拉佢去跳樓，所以可以等多陣。」
我稍為冷靜下來，的確，這樣的話我便可以解除咀咒，不再面對死亡威脅。而且再想深一層，他的說法與日前刁小姐的說法有出入，是因為他一心求死所以順應別人的版本，抑或是他所說的才是真相？可是當年的報導他明明堅稱自己無辜，王太之前也說他是無辜，甚至有不在場證明，那麼他現在堅稱自己是兇手確實有點奇怪。只是，這段影片又的確是涉案的數人與死者，雖然是低清，但勉強也能認得出，這不就是最好的證據了嗎？他一定就是兇手之一！
「做咩呀？唔係要報警拉我咩？仲等乜？唔夠膽？」王先生用激將法刺激我們，可是阿旻好像早有準備，早料到他有此一着。
阿旻笑着對王先生說︰「如果你真係想被人拉，大可以自己自首，唔駛咁激我哋。你而家咁做，我覺得只得一個原因，就係證明自己真係無辜，同埋順便隊個替死鬼出嚟。」
「吓？證據確鑿，有片又講埋殺人藏屍，仲點無辜？同埋咩替死鬼？」我把雙眼瞪大得差點掉下來，完全猜不透她此番說話的根據。
「唔係，你試諗吓，條片一嚟咁朦，都睇唔清邊個打邊個，點做證據？就算可以高清修復到，成條片你有邊個鏡頭見到王生？係無，咁點做證據隊死佢？反而會幫佢更加清脫嫌疑，唔好中佢計。」阿旻冷靜分析，又的確有道理，而王先生則在旁陰險的笑。
「而佢啱啱提過一個人叫阿棠，呢個就係佢揾嘅替死鬼，但我相信佢係片中人之一，即係嗰個你唔知佢係乜水嗰個，而阿棠，你有無諗起啲咩？」阿旻引導我思考。
「阿棠？無喎。」我甚麼也想不到。
「有無搞錯，咁都唔記得，」阿旻沒好氣的說︰「『游水堂』，阿棠，你記得未？你話廖生臨死前提起過嘅，睇嚟『游水堂』係一個人名。」
「哦，係喎！我記得喇！原來係個人名嚟。」我像被阿旻打通任督二脈般，所有記憶都回來了。
「咁條片無用啫，殺人藏屍有啦啩？」我繼續問。
阿旻搖搖頭，又再解釋︰「你仲信佢嘅說話？你諗吓，一個老人家，點夠力去對抗一個年青力壯嘅人？就算係埋伏都唔可能全身而退，但我哋見佢嗰時佢似有傷咩？好明顯佢講緊大話，想挖個坑畀我哋踩，令到我哋無人信，之後有咩實證都無人理。」
「乜係咁？估唔到王生你下緊盤咁大嘅棋！如果唔係阿旻夠清晰，我真係中咗你計。」我對王先生表示出佩服。
至於王先生，他聽過阿旻的推理後，不禁鼓起掌、由心的讚賞道︰「精彩！出色！準確！你講得好啱，呢個就係我今次應約嘅目的，估唔到畀你呢個妹妹仔識穿，真係英雄出少年。」
雖然明知眼前人是殺人兇手，但礙於證據不足，我們對他也束手無策，心有不甘是一定的，可是甚麼也做不了，只能眼白白的放虎歸山。
王先生取回記憶卡後便離開，我問阿旻︰「呢刻你係咪好想呢個世界上有鬼，可以殺咗佢呢？」
「佢雖然罪該萬死，但都要受法律制裁，唔可以行私刑。」阿旻異常冷靜的說︰「但怨魂索命就不在此限。」看來此刻的她也希望世上有鬼。
突然，刮起了一陣大風，強得我倆睜不開眼，直至聽到「嘭」的一聲巨響從井底傳來，風才停下，我們也立即出外查看井底發生了甚麼事。
無錯，又一起的跳樓事件發生，是連續第二起不在十月發生的跳樓事件，而死者正是王先生，我們是從他的衣服判斷出來的，因為他的頭已經撞得稀巴爛，可以說是脖子以上的部份都消失了，我想連技術最高超的法醫和死人化妝師也不能把他還原。
我望着井底，問阿旻︰「咁你而家仲信唔信有鬼？」
「我唔會信我無親眼睇到嘅嘢，啱啱都可能係陣風太大，王生一時企唔穩先跌咗落去，」阿旻依然堅持自己的想法，但聽得出有些少動搖，因為她最後很小聲的說了一聲︰「我估。」
