第六日•午
正午的廣場，二十多人頂著烈日曝曬，熙熙攘攘、七嘴八舌、指手劃腳，為的就是想看我這個殺人狂如何被賜死。然而此刻我卻格外開懷，正期待著代行者被我推翻，各人群龍無首、驚惶失措、難以置信的表情。
「各位靜啲！」代行者終於現身，然後宣告對我的控訴：「呢個犯人11號，根據調查同證據顯示，佢涉嫌接連殺咗24號、28號、34號、45號、49號、51號、72號、81號、94號同96號一共十人，所以我哋今日舉行公審，進行一場訴訟，最後由大家全民公投嚟決定佢有罪定無罪。而今次嘅公審，我哋都已經畀咗時間疑犯做搜證，為自己做好辯護，以免殺錯良民，咁我哋而家正式開始。」
「唔駛審喇，一睇就知佢係兇手！」
「而家都可以投票喇！」
「死不足惜，快啲去死喇人渣！」
「好眉好貌生沙蝨，好嘔心！」
「唔想聽佢講廢話，快啲殺咗佢，殺人填命，天經地義！」
群眾群情洶湧，一面倒的認定我是殺人兇手，這更顯得有趣，當他們最終知道真相時，他們的表情反應一定很棒。
「大家肅靜，我都好明白大家嘅感受，好想為死者、為你哋嘅朋友、為你哋嘅弟兄姊妹討回公道，但我哋係文明人，點都要畀機會疑犯為自己辯護，寧縱勿枉。」代行者試圖控制群眾的過激言行，但效果不太明顯。
「我哋係行有罪推定，即係由你自己證明自己清白，說服大家放過你，而家時間就交畀你。」代行者說完便坐好。
我冷笑一聲，站起來，開始與在場的所有人交鋒：「我好想問吓，你所謂嘅證據，其實係啲咩？點證明到我係兇手？」
「根據我哋調查，十位死者都有同你接觸交流過，而且你都承認自己有夢遊，所以你喺夢遊期間，將自己想贏呢個遊戲而要殺人嘅諗法執行咗，將有同你交流過嘅人誘騙出嚟再打沉，打沉完之後你醒咗，發覺打沉咗人，為免被懷疑，故意將兇案現場佈置到好似宗教儀式咁，之後急急腳返房，而你之前沾滿泥濘嘅腳板同褲腳就係最好嘅證明！」代行者說。
「殺人兇手！」
「惡魔！」
「魔鬼！」
「想插贓嫁禍，可恥！」
群眾又再怒不可遏，而我依然以笑回應，不過這笑容目的是恥笑他們的無知。
「聽完你嘅指控，我真係笑而不語，喺聽完我之後嘅推理之後，你哋就會知邊個先係最恐怖自私嘅兇手。呢次兇殺案有三個好重要嘅疑點：第一個係兇手點可以喺休戰期期間打沉人而安然無恙；另一個就係點解死嘅人都係同我有交流過先死；最後就係點解死嘅人都手握『神洛基的感召』嘅紙條同鞋左右調轉嚟著扮苦行扮殉教。」
群眾聽完一時鴉雀無聲，因為他們並沒有想得這樣深入，而且有些細節更是他們聞所未聞，不過這也是我預計之內。
「我想傳召一個專家證人上嚟。」我望向代行者，以眼神懇請他批准，而他也點頭答應，我向他鞠躬道謝，接著說：「我想請法醫學生上嚟。」
法醫學生被我突然的召喚，起初有點愕然，後來也上了來，於是我便問他：「呢十具屍體，你都有親眼見過、親身驗過，可唔可以講吓佢哋嘅死亡時間同致命原因。」
「好，無問題。根據我初步驗屍得出嚟嘅結果顯示，佢哋十個嘅死亡時間都係喺夜晚八點到十點之間，身上無其他傷痕，致命原因都係被人打沉爆頭而死。」法醫學生如實作答。
「佢哋都係九點之後先死，我好肯定！」
「係囉，我哋一齊傾偈傾到九點強制返房先分手，點會九點前就死。」
聽完法醫學生的口供，在場的部份人又再起鬨。
「無錯！」我大喝一聲，全場也安靜下來，然後我繼續說：「我都覺得佢哋全部都係九點之後先死，但問題就嚟喇，九點明明係休戰期，點解可以打沉人而無人受罰？原因我搲爆頭都係諗到兩個：一係佢地十個互相打沉，一齊爆頭受罰；一係佢哋被打沉嗰時根本唔係休戰期！」
我此番言論一出，群眾又再嘩然，但我無理會他們，而是選擇繼續說我的推理：「第一點我會一陣再解釋點解無可能，而第二點，大家望吓地下就知道。」
大家聽我說完，紛紛望向地下，部份人立即恍然大悟，但更大部份的人是完全看不出什麼端倪。
為免被轉數不足的人連累，我只好不厭其煩的解釋一次：「而家係十二過啲，理論上太陽喺正我哋頭頂，我哋個影會喺正我哋腳下，但而家……」我故意不說下去，讓群眾接下去。
「係喎，個影點解斜嘅？」
「點解個影唔係喺正腳下嘅？」
「因為而家只係十一點幾，你哋個影係喺西面！」我打斷他們的討論，因為我還有話要說：「呢度嘅時間係比出面正常時間早咗一個鐘，所以法醫學生推斷嘅死亡時間，真實時間應該係七點至九點，即係話佢哋根本唔會因為互相打沉而受罰，所以唔會係自殺，即係點都最少有一個人執手尾，而最後我會講畀大家知點解佢哋唔係互相打沉，而係被人逐一打沉。」
全場也靜心聽我的推理，我也不想賣關子，接著說：「大家記唔記得我哋本身有嘅錶，我一直都好奇怪點解要收起，原來目的就係要唔畀我哋知正確時間，從而控制我哋嘅作息，同埋可以做謠，用都市傳說嚟控制大家，更甚嘅係將附近嘅官方喇叭電源都切斷，等我哋唔知出面發生緊咩事，可惜佢無論幾神通廣大，始終控制唔到大自然，而做到呢啲嘢嘅人，只得一個──代行者！」
群眾看到我把矛頭直接代行者，紛紛反對，本身還懷疑這個時間控制陰謀論，但現在又變成「代行者永遠是對的」的狀態，看來我低估了人們在絕境之中盲目擁護信仰的威力，我要拿出更有力的證據才行，幸好我早有準備。
「既然大家覺得控制時間都唔係一樣好有問題嘅嘢，咁我就再攞啲實質啲嘅證明，同時都回應到對我有夢遊嘅指控。」我自信的說。
「不過可能要大家跟我走一趟，代行者，得唔得？」我目光投向他，他依然胸有成竹，點頭答允，更第一個起身請我帶路。
我帶著大伙來到我的房，對他們憶述睡夢中聽到水聲和洗擦聲的事，然後領他們查看沾了少許泥濘的書枱，並請其中一人打開機關，果不其然，牆緩緩打開，一條窄窄的通道顯現在大家眼前。
「大家可能會好驚訝，不過我都係，因為我都係第一次見佢開，啱啱返嚟搜證時都無開過，你唔信可以問吓代行者隔離嗰位彪形大漢。」我指著他說，而他也耍手擰頭表示不知情。
眾人顯然不滿他的答案，但也沒有什麼怨言，於是我便提議：「呢條秘道通去邊我都唔知，不過我覺得會係廁所，不如大家一齊行一次。」
未待他們回答，我已率先走入去，而人們也一個跟一個進入秘道，大約走了十米，是掘頭路，我胡亂摸索嘗試找出開關，最後也讓我找到並開了門，出口正正是廁所，和我的推理如出一轍。
「咁證明咗我嗰次聽到水聲同洗擦聲係透過呢條秘道傳嚟，而亦都有人用呢條秘道嚟捏造我有夢遊嘅事，搞到我腳板同褲腳有泥濘嘅人，就係知呢條秘道存在嘅人，亦即係安排我住呢間房嘅人──又係你呀，代行者！」我又再次將矛頭指向他，而他依然從容不迫，無他，因為他的支持者依然認為我誣陷他。
「大家有無發覺代行者同平時有咩唔同？」我突然提出此問題，群眾立即將目光集中他身上，但均沒有答案。
「大家望吓佢件衫啲鈕。」我給了提示後，終於有人發現了，我也不慌不忙的說：「佢粒鈕就喺我個櫃後面條橫樑上，你揾吓，呢個就係最好證明。」
有一人遵循我的指示找到該鈕扣，我得意的對代行者說：「今朝你入嚟嘅時候就係想揾佢，係咪呢？可惜佢跌咗喺櫃底，你唔痞低係唔會揾到，而呢個亦都係你嘅敗筆，鎖咗嘅門，點解你粒鈕會出現喺我房？因為你夜晚偷偷哋由秘道入嚟捏造我夢遊嘅證據，想嫁禍畀我！」
「哈，笑話，我點解要咁做？我係神洛基指派嚟帶救大家嘅代行者，點解我要殺人？」代行者終於開口回應，而根據不同的推理小說、推理動漫和推理劇集的慣例，這是兇手感到威脅想脫罪的開端。
「因為你所謂神洛基係假嘅，只係你虛構出嚟，利用人嘅恐懼心理同想得到心靈慰藉嘅心態，等你可以穩坐打沉第一位唔駛死嘅手段！你呢個計劃本身都進行緊，不過我嚟咗之後你加速咁解。之前曾經有過嘅公開處刑同出咗去揾嘢食無再返過嚟嘅人，恐怕都係被你嘅計劃殺害。」我將之前24號、49號、72號和96號告訴我的事也一併計在代行者頭上。
「荒謬，你由啱啱喺廣場中央辯護開始講嘅嘢全部都好荒謬，全部都係你嘅憶測，我收起大家啲錶只係唔想大家觸景傷情，話我控制時間咁無稽嘅嘢你咁都講得出？個影嘅問題只係因為我哋所在嘅經緯度唔同平時所以先會咁。我受大家愛戴，點會打沉佢哋，我喺度所得到號尊重係喺出面從來都唔會有，點解我要一手破壞？」代行者發難。
「再講，我更加懷疑法醫學生係你同黨，所以佢係唯一一個同你接觸而倖存嘅人，你哋夾埋一齊想屈我、想推翻我，所以先特登故弄玄虛，整到好似宗教儀式咁，你哋根本係揶揄我代行者個位！」代行者試圖將指控轉移到我和法醫學生身上，法醫學生頓時嚇得跌坐在地上。
「哈哈哈！」我大笑了，因為我知道我的推理全部都正確，我決定將最後的部份也說出來：「你嘅計劃由見到我開始加速，係因為你驚死，你驚我嚟到呢個畀你養到肥肥白白嘅魚塘之後，會打沉哂啲魚，令你血本無歸，仲會賠埋條命，所以你想將呢個罪名推哂落我度，等自己依然站喺道德高地上面，表面愛民如子，暗裡殺人如麻。」
代行者瞪大雙眼，沒有反駁，我未有放過他，繼續連珠砲發：「所以你會留意我接觸過咩人，跟住夜晚九點，即係正確時間嘅八點，趁你之前散佈嘅都市傳說令人唔敢出街嘅時候，你就用代行者嘅身份呃佢哋出去廣場中央海賊旗度，跟住打沉佢哋，再嫁禍畀我，但你要我都覺得自己有殺到人，所以你就做咗好多嘢令我誤認為自己真係有夢遊。至於放過法醫學生係因為佢仲有利用價值，可以幫你誤導所有人死者嘅死亡時間，令成件事可以變為不可能殺人事件，更加撲朔迷離，必要時仲可以入Slender Man數。」
聽到我這樣說，群眾開始對代行者有所懷疑，但代行者極速調整好情緒，再次用權威自信的聲線對大家說：「各位Paradise嘅弟兄姊妹，魔鬼最鍾意用言語嚟誤導煽惑你哋嘅信仰，千祈唔好中計，夢遊就係佢係魔鬼嘅證明，十位受害人好似儀式咁嘅死亡都係受佢迷惑，法醫學生因為信仰堅定所以先幸免於難，大家因為無同佢有交流所以先安全。佢就係魔鬼化身，我哋要請神洛基淨化佢！我哋而家返去廣場中央進行公投！押佢走！」
我被彪形大漢押回廣場中央，代行者隨即宣告公投開始，不連我和代行者，整個Paradise的二十三人都有投票權，而我的命運也繫於他們身上。
我目光掃視在場所有人，人數是二十三人無誤，代行者也在此，我決定孤注一擲，兵行險著，一切也看我是不是命不該絕。
「各位，投票之前聽埋我最後呢段說話，亦都係證明佢哋唔係互相打沉，而係被一個人打沉嘅最有力證據！」我盡最後努力，賭上自己的性命，向在場的人說：「你哋試吓喺度打沉我，即管打沉我，我係唔會有事。」
在場的人將信將疑，議論紛紛，代行者試著維持秩序但無果，我繼續大聲說：「你哋邊個都打沉唔到我，就算代行者都一樣，因為我係神洛基，我今次嚟嘅目的就係要清理亂用我名嘅人。」
「佢講大話，佢呃人，唔好信佢，佢係垂死掙扎。」代行者急忙的說。
「我講真定講假，你哋試吓打唔打沉到我咪知。」我將最後的自信也拿出來充一次大頭鬼。
「好，我試吓。」其中一個人走上前，摸著海賊旗大叫：「打沉11號！」
全場立即安靜，期待下一秒會發生什麼事，結果當然是什麼都沒有發生，而整個Paradise的人看到後也哄動起來，紛紛上前測試。
「各位，我係神洛基，而呢度有個假代行者冒用我名義招搖撞騙，為咗證明我係真正嘅神洛基，我決定為大家施行一次神蹟，你哋幫我捉住假代行者，我會行遠啲，去到廁所入面收埋自己，喺唔望住佢嘅情況之下懲罰佢。」我說完後，群眾立即行動，我亦慢慢向廁所走去。
「佢係假，呢個世界根本無咩神洛基，所以佢係假嘅！」代行者垂死的控訴根本無人理會，我亦對這班人對信仰的盲從感到心寒。
我走到廁所內，摸著窗上的海賊旗，說了一句：「打沉63號。」
代行者的頭應聲爆炸，其餘的二十三人嚇倒了，但旋即回過神跑來廁所對我頂禮膜拜，認為我真的是神洛基。
「各位，呢個世界係無神，我都唔係神洛基，只係我拆穿咗佢嘅詭計，佢殺人手法係點同點解要扮到好似儀式咁，其實好易理解，因為佢想維持對大家嘅統治，想繼續用宗教控制你哋，想美化佢哋嘅死係神洛基嘅安排，咁你哋就會乖乖哋咁畀佢打沉，我估計如果今次佢成功造到我嘅話，遲啲佢會同大家講有類似嘅儀式係去神洛基度，咁就可以安全提升打沉數。」我解釋說。
「咁殺人手法呢？海賊旗都打沉唔到，唔係神庇祐係咩？」有人突破盲腸問到關鍵問題。
「呢個亦都係點解我話佢哋唔會係互殺嘅原因，因為真正嘅海賊旗喺哩度，嗰個只係假嘢，試問假嘢點會打沉到人？」我解說完後，露出笑容，續說：「所以謎底全部都解開哂，你哋知道真相，知道呢個世界根本無神，係咪好失望呢？雖然代行者講隻game嘅bug係真係幾有道理，但我相信主辦單位見唔對路都會有所行動，更何況根本無人會咁大愛。」
「所以……」我的笑容變得詭異和瘋狂起來，手按著海賊旗，對他們說：「所以你哋準備好畀我打沉未呢？打沉4號、8號……」
一瞬間，整個Paradise也成了Hell，屍橫遍野、血流成河，全部二十三人也被我無情的打沉了，我也成了打沉二十七人的最大戶，連我在內，如無意外，應只餘下八人，只要我埋舟便可以等待被動勝利，但我選擇主動爭勝，所以最終決戰要開始了。
