波子聲
廖先生跳樓沒有引來很大的迴響，畢竟住在這裏的人已經司空見慣，報章也只有二百多字的極小篇幅報導，大概除了我以外，沒有甚麼人會留意。
其實我也沒有特別去留意，只是剛好免費報章上有報導而去看而已，畢竟第一次在如此近的距離發生這麼震撼的事，我也害怕得不想再去回憶，可是這一看卻徹底改變了我的命運。
「頸部有瘀痕」、「窒息致死」、「死因有可疑」這三句句子率先影入眼簾，深深刻進我的腦內。
「無可能，窒息有可能，因為被啲血嗆親，但點會頸部有瘀痕？當時明明得我一個人喺度，都無其他人。」我百思不得其解，好自然又聯想到靈異之談。
「大哥哥，你睇緊咩？」阿曦和阿晴天真無邪的笑着走過來問道。
「睇緊報紙之嘛，無咩特別。」我笑着回答，同時將報紙隨手翻到第二版。
「大哥哥你快啲睇吓。」阿晴拿着一枝鉛筆說︰「係老師讚我乖送畀我嘅。」
同時，阿曦也不甘示弱的展示手中鉛筆說︰「我都有，都係老師送㗎。」
「咁叻嘅，咁以後要用呢枝筆寫字寫靚啲啦喎，唔好辜負老師送畀你哋嘅筆。」我讚賞同時不忘鼓勵他們。
「我哋用枝筆畫咗一幅畫。」阿曦說。
阿晴不知何時已經拿着畫紙，展示着說︰「你睇吓，靚唔靚？」
畫紙上畫了三個人，兩男一女，一個男躺在地上，指着另外兩個站着的人，男在前女在後。
「呢個係大哥哥，」阿曦指着站着的男對我說，然後再指着躺在地上的男說︰「呢個係叔叔，兩個都係我畫，靚唔靚？」
接着阿晴指着站在「我」身後的女說︰「呢個你話識玩魔術嘅姐姐係我畫㗎，係咪好叻？」
經他倆解說，這圖畫不就是昨天廖先生躺在血泊中的一幕嗎？但Tracy怎會在我身後？不過廖先生的確曾指着我，難道是指我身後的人？但我身後沒有人啊，難道真的是……想到這裏，我背脊發涼，雞皮疙瘩，汗毛直豎。
我陷入了驚恐當中，忘記了回應他倆，直到阿旻走過來拍我，我才回過神來，稱讚他們道︰「好叻喎，畫得咁靚，畫到大哥哥咁靚仔，不過你哋點解會有咁嘅構圖？」
「我哋琴晚見到囉。」他們異口同聲說。
「見到？」我嚇呆了，不過不是因為他們看到不存在的一幕，而是因為他們看到血淋淋的畫面。
此時阿旻補充說︰「佢哋琴晚同我一齊睇動畫見到，所以畫咗出嚟。」
他們猛點頭，我這才鬆一口氣。接着阿旻故意支開他倆，湊過來說︰「聽講琴晚你遇到啲好爆嘅嘢，講多啲嚟聽下。」
「琴晚我拎咗張相落四樓自己查單嘢，中間發生咗好多事，但最後就以廖生自殺告終。」我用兩三句便把事情總結了，可是阿旻明顯不買賬，追着我要更詳細的版本。
我敵不過她不屈不撓的追問，最終一字不漏、原原本本將昨天的事如實相告，包括那個神秘的印記、黑眼小孩和廖先生跳樓的細節，當然最後那一指也沒有刪減，還有那莫名奇妙的「游水堂」。
「綜合埋廖生嘅說話，個組織應該有某種神秘力量，可以復活死人，所以佢話梁女無死，佢屋企有呢個印記，可能佢都係其中一個成員。」我邊說邊拿出照片給阿旻看，然後她很快便找到這個組織──一個高智商人士才能加入的組織。
「我都揾到，但就係唔明呢個組織點解會同呢啲事有關。」坦白說，我有點期望她能給我一個答案。
「的確，我都唔明……」阿旻仔細研究我手提電話照片內的印記和那個組織的會徽，忽然驚呼︰「喂！唔係喎，你睇真啲，個地球係唔同㗎，呢個會徽嘅地球同你手機張相個地球係鏡像反轉，佢哋唔係同一個組織嚟。」
阿旻果然沒有令我失望，但我還是不能輕易相信她，質疑道︰「會唔會係咁啱印刷問題喳？」
「一個咁大嘅國際組織，會咁兒戲？仲要全部高智商人士喎，你覺得咁講得通咩？」阿旻鄙視我說。
的確，我這說法真的站不住腳。
「而黑眼小孩……」我還未說完，阿旻便打斷我道︰「之前咪講過，係你眼花，今次啲花生友嘅反應絕對證明我無講錯。」
「咁廖生跳樓嗰吓唔自然嘅頭向後岳，同埋報導講嘅頸有瘀痕，仲有最後嗰一指又點解釋？而家諗起，我覺得似係畀人推咗個頭一嘢之後跌落去，再畀人摙住條頸搞到窒息，最後指住我身後睇唔到嘅兇手，即係鬼。」我自己分析道，同時把這難題拋給阿旻解答。
「又係鬼，好心你喇阿哥，唔好三句唔埋兩句就話係鬼，其實科學都唔係咁難，點解唔學吓？」阿旻尖酸的說︰「你話你淋完佢凍水，咁凍之下仲淋凍水，暈一暈好合理；瘀痕其實喺佢瀕死咁唔穩定嘅情況之下，被血嗆親呼吸唔到，自我催眠畀人摙住條頸形成瘀痕都唔奇，大把催眠實例已經證明咗催眠可以令一個人無中生有唔同嘅傷痕；至於最後指住你，究竟係指住你定指住你身後你都未分得清就唔好提。」
阿旻的解釋我也有想過，但不知為何，由她說出特別有說服力，大概她已經成為我心目中推翻鬼神之說的權威了。
「但我始終諗唔明佢最後講嘅『游水堂』係咩就真，好地地究竟關咩事呢？」原來阿旻也有疑惑的時候。
「可能我哋搞清楚嗰個組織係咩就會知呢。」我試圖從這個意思不明的遺言中找個開脫的藉口。
阿旻同意後，我們便分開行動，用各自的方法尋找答案。我把照片發給AI，很快便有答案，可是全部都是關於那個高智商組織。
「唔係呢個，個會徽唔同，我要揾嗰個組織嘅會徽個地球係鏡像翻轉嘅。」我對AI說。
「我找不到『會徽個地球係鏡像翻轉』的結果，你是不是想找這些組織？」AI回答並列出了數個會徽中有地球的組織，但這些都不是我想找的。
「滴……滴……滴……」
我再輸入「神秘組織」、「復活死人」這兩個關鍵字，配合那張照片讓AI再搜尋，但結果依然不理想，只是增加了一些復活死人的方法。
「滴……滴……滴……」
「啊！好煩，啲波子聲嘈住哂，搞到我乜都諗唔到。」我煩躁的說。
「滴……滴……滴……」樓上傳來的波子聲，由疏到密、由大聲到小聲，使得我不能集中精神。
「咩年代？而家仲有人玩波子？啲細路隨時連波子棋都唔識捉喇！」我吐槽道，可是樓上的波子聲並沒有因而減少，反而越來越多，令人忍無可忍。
「妖！我要上去鬧鬼佢先得！」我坐言起行，懷着滿腔怒火，一鼓作氣衝上十六樓，可是去到一六二二室門前卻開始害怕，怒火也澆熄了一半。
但事情往往就是如此巧合，我還在猶疑及模擬之際，門已經開了，出現在我面前的是一位年青婦人，目測二十多歲，手抱着一個剛出生、正在酣睡的嬰兒。
我和她四目交投，她率先開口問︰「點解……請問有咩事？」
我剛才的怒火已經全滅，只能結結巴巴的答︰「吓？無……無，係咁嘅，我呢，住你樓下，一五……一五二二，啱啱就聽到你呢度有好多……好多波子聲，所以話想上嚟……上嚟一齊玩咁囉。」說完後我也想掌自己一巴，這麼爛的理由我竟然能說出口，在現今社會活像一個變態。
「吓？」少婦的反應很正常，她既疑惑又憤怒的罵︰「一齊玩波子？你黐線㗎？變態佬你好快啲走，再唔走我就報警！」
她說我是變態是意料中事，但說到報警就未免有點小題大做，我緊張起來，終於回復正常。
「唔好意思，講錯，其實我上嚟唔係想玩波子，係想同你講唔好再玩波子。啲波子成日跌落地好嘈好應聲，成日滴滴滴咁，嘈到我都集中唔到精神。今次上嚟係想先小人後君子講聲，再有波子聲我就同保安投訴，扣你分，等你公屋都無得住。」我反客為主，嚇得她無言以對。
「我哋都無波子，而家仲邊有人玩波子㗎……」少婦的答案出乎我意料，但又同時在預料之中。
「無波子？咁點解會有波子聲？」我質問她。
少婦無奈的答︰「我點知……」
我偷偷看進屋內，單位裝修以簡約和玻璃為主，整間屋一覽無遺，還放了各種模型和動漫周邊作裝飾，如此年青的設計，的確不像有波子這種上古時代玩意。
「咁可能係你隔籬屋啲聲傳過嚟，我去問佢哋，唔好意思，打攪哂。」我道歉後便到隔壁一六二三室尋找答案。
「滴……滴……滴……」清脆的波子聲此時由一六二二室傳出，少婦立即驚慌的回望空無一人的屋，我也回到少婦面前。
「啲聲的確喺由你呢度傳出嚟，你都應該聽得好清楚，仲想抵賴？」我以高八度的聲線問。
「……」少婦支吾以對，一臉尷尬。
「你唔解釋清楚咁我就只好同保安講，之後扣你分。」我凶狠的說，但心底裏其實我十分膽怯。
「唔好唔好，我講。」少婦面有難色的說︰「其實啲波子聲係我個大仔整嘅，佢最近鍾意咗玩波子。」
「大仔？咁麻煩你教好佢唔好丟落地，又或者你墊張墊。」我以凌人的眼神盯着她。
「……」少婦有口難言，張開口又合上，只點點頭。
我看得出她有難言之隱，但當下我沒有多加理會，只想盡快離開現場，畢竟第一次便獨自直接找上門的我比她還怯。
回到家後，我頓時安心下來，繼續搜尋關於那個組織的資料。
「滴……滴……滴……」坐下不夠十分鐘，樓上又再傳來波子聲。
「真係唔識死㗎喎，當我亂噏嚇佢？唔發火當我病貓，就畀啲顏色你睇吓。」我心想，然後撥了電話向樓下保安投訴，並要求他跟我一同上單位告誡少婦，雖然言語間他有點不相信，但還是陪我去了一趟。
數分鐘後，我和保安兩人便在一六二二室前，這次有保安在旁，也幫我壯了膽，而且已經事先警告過她，所以可以更加理直氣壯。
按下門鈴後，應門的是一位老婦人，她有禮貌的問我們來意，我火氣十足的答︰「問你個女定新抱，啱啱我同埋講得好清楚！」
老婦聽完後依然保持禮貌，並微笑回答︰「小朋友，我老伴早死，一直獨居咗十幾年，膝下無兒無女，邊度咁有福氣有個女或者新抱先得㗎，你係咪揾錯門？」
此時保安也插嘴道︰「刁太，唔好意思啊，打攪哂。我都同佢講咗無可能係你，但佢死都唔信，點都要拉埋我上嚟。」
「唔緊要，」刁太始終都笑面迎人，甚有修養，禮貌的問我︰「究竟係發生咩事，搞到你要嬲爆爆咁走上嚟揾我？」
「我無可能揾錯，我自己樓上點會錯？啱啱明明係一個抱住BB嘅少婦應門，間屋仲要新裝修，簡約風同玻璃為主，放咗好多模型同figure做裝飾。」我偷偷瞄了一下屋內的裝潢，老舊的板間房，傢具都是木製，還有神台，當然少不了一桌的生果、一壺茶、吃了一半的餅乾和麵包等食物，標準的老人屋擺設，隱約還嗅到那陣酸醙的老人味。
正所謂輸人不輸陣，我繼續維持憤怒的聲線說︰「我唔知你變咩把戲，但無論你係少婦定阿婆都好，你唔好再玩波子，啲波子跌落地好嘈，嘈住我温書！」
「噢！真係唔好意思，雖然我無玩波子，啲聲唔係由我呢度傳落去，但我都為你嘅遭遇感到難過，我幫你留意吓會唔會係隔籬左右，我見到幫你講聲。」刁太慈祥的道。
「好喇，阻住你唔好意思，我帶返佢走先。」保安恭敬的說，然後轉身對我說︰「你都見，邊有人玩波子，唔好阻住佢老人家，你跟我落返去先。」
無證無據，而且不知為何連人和屋也變了，我也只好無奈離開。
「滴……滴……滴……」波子聲不定時出現，我也不堪其擾，既然進攻拿他沒轍，那只好選擇務守。我拿了兩團棉花塞進耳內，再戴上耳機，外面已經甚麼聲音也聽不到，我可以專心去調查組織之事。
突然，一隻手搭在我肩上，我嚇得立即跳起來準備迎擊，幸好只是阿旻，她不明所以的問︰「阿哥你搞乜？」
「咩話？」我甚麼也聽不到，直至阿旻示意我脫下耳機，我才聽到她的問題，於是我便把剛才的遭遇一五一十的跟她說。
「咩波子聲呀，嗰啲只係水管變動傳嚟嘅聲。因為水龍頭突然開閂，連接嘅水管入面嘅水壓會突然變動，就會產生水錘作用，水錘作用大嘅時候就好似波子聲同拉櫈聲咁，科學現象嚟，唔好又衝出去柒得唔得？真係唔想被人知你係我阿哥。」阿旻翻着白眼說。
經她這樣一說，我終於明白為何沒有波子也有波子聲，所以這真的不一定跟一六二二室有關，而且這是建築結構上的問題，真的怪不了別人。只不過，一六二二室的人和屋瞬間不同的問題又應如何解釋？
「你去錯第二個單位。」阿旻輕描淡寫道。
但真的是這樣嗎？我對此抱有懷疑，因為我真的十分肯定我兩次都是去了一六二二室，可是，我真的去了同一個空間的一六二二室嗎？對於兩次進入鎮魂塔的我來說，這真的有商榷的餘地。
「喂，唔好講呢啲住先，關於個組織，你揾到啲咩？」我把一六二二室的事先放一邊，問了更重要的事。
「啱喇，我就係想同你講呢件事，你過嚟睇吓。」阿旻說完轉身便回到自己的房間，我跟過去後，她便播放一條影片，這是一個專門講述都市傳說、神秘學、陰謀論、超自然科學、未解之謎的頻道，是一對夫妻檔主持，非常之受歡迎。
這條影片開頭播了一段數分鐘的短片，是一班人在大屋內追逐躲藏，被捉到的人會死亡；緊接着再播放另一段短片，這段同樣是一班人，這次在足球場上，正在玩數字球，然後突然有一個參加者頭的爆炸，非常血腥。影片播放完後，男主持便進行解說。
綜合這影片的解說，這個組織最少有七百多年歷史，最早見於文藝復興時期的歐洲，它每個時期都有不同的名字，推動了世界上很多大大小小的文化、經濟、科學和宗教事件，令世界進步不少。不過，它每次運用的手法都不甚光彩，難以被世人接受，只是它勢力極大，往往也能把這些不好的名聲在歷史長河中抹去。
「咁即係佢用呢棟大廈做據點，又唔知想推動啲咩世界大事，令世界進步？咁我哋咪應該要好光榮？」我反諷道。
「滴……滴……滴……」樓上又再傳來這煩人的聲音。
「你聽吓，又有喇，每次開水龍頭都有咁真係煩死。」我抱怨道。
「係咪光榮，係咪令世界進步我就唔知，我淨係知呢啲都係睇完當笑話就算，都係穿鑿附會、斷估無痛苦。」阿旻明顯不太相信影片中的內容，然後她一臉認真的說︰「至於波子聲，正常唔會成日有，水龍頭開完，水壓正常返，咁就唔會再有，要等一排，好耐無人開水喉，水壓唔正常先會出現。」
聽完她的話，我頭頂就像有一個燈泡「叮」一聲亮了，突然彈出一個想法，便對阿旻說︰「即係啲波子聲咁密係唔正常嘅，好可能係個組織控制緊，唔知要做咩實驗。」
「又懶叻，一定唔係囉，唔好上腦啦，實有解釋嘅，可能真係啲用料太差所以成日水壓唔正常呢！」阿旻堅持用科學解釋。
「我就話一定係有陰謀，我再上去調查吓先，睇吓有無咩線索，你一唔一齊？」我問，但正如我預計一樣，她拒絕了。
我隻身一人第三次上到一六二二室，此刻單位木門開着，鐵閘則緊閉，綁了一塊絲質布遮擋。我小心翼翼的把布掀起，偷偷望向屋內，依舊是陳舊的木系裝潢，那陣酸醙味也沒有變，但就是看不到刁太身影。我快速掃視單位每個角落，試圖找出那神秘的印記，可是很快我便被單位內的神台吸引着目光。
我拿出電話，開啟相機，對着神台上先人的照片放大再放大，我嚇呆了。無錯，相中人正是那位少婦！但除了她之外，旁邊還有另一張男士的相，這個完全出乎我意料，此人正是萬先生！
我立刻縮回雙手躲在一旁，試圖用我那還未弄明白的腦去思考他倆的關係。
有兩人的相說明兩人已經過身，即是我第一次是見到女鬼，這一切就說得通了。而老婦人是刁太不是萬太，即是萬先生不是她的丈夫，但若兩家人沒有關係的話是不會拜祭他的，難道萬先生是刁小姐的丈夫？雖然也有可能，只不過年齡差距確實有點大，而且一直以來的情報都沒有說萬先生是有家室之人，究竟是甚麼一回事？
正當我還在苦惱之際，單位內傳出刁太的聲音︰「權仔，唔好咁百厭再玩波子喇，晏晝嗰時差啲就穿煲，畀人發現嘅話，婆婆同媽咪都救你唔到㗎。」
「權仔？婆婆？果然係波子聲而唔係咩水錘作用，今次你仲唔斷正畀我？人贓並獲無得抵賴啦啩？」我極之雀躍，轉身掀起那塊絲質布便大聲說︰「哈，周秀娜，你今次仲唔死？」
刁太面對我的突襲還未反應過來，顯得有點慌亂之時，我已經意識到自己衝口而出說錯了話，正想更正之際，我對眼前的景像也變得啞口無言了。
刁太一人蹲在地上，從她的動作、姿勢、角度來看，她的確是在撫摸一個兩、三歲左右大小的小孩子，但問題是我完全看不到那個小孩子！
「刁太，你……無事吖嘛？你係咪有幻覺？」我發誓，我是出於關心才問的。
然而刁太還是處於驚惶失措的狀態，對我的關心置若罔聞，看得出她正盤算如何向我解釋。
「其實……」刁太一開口，便被我打斷。
「唔駛夾硬諗理由，照直講就得，我好開通，唔會歧視你。」我本身只預期她會說自己有精神病之類，豈料她的答案比我所預期的還更震撼。
「咁好喇，」刁太深呼吸，冷靜下來，心平氣和的對我說︰「其實係我個孫仔，係佢玩波子。」
「其實我都明白事理嘅，小朋友係貪玩，我都明，不過你鋪張墊畀佢玩，唔好嘈住我就得。」我向她釋出善意。
「對唔住，我做唔到。」刁太答。
果然無改錯名，真是刁蠻，竟然敬酒不喝喝罰酒。
「因為佢唔係人，係鬼。」刁太繼續解釋。
甚麼？鬼？
「我諗你都見到個神台，上面係我個女同冥婚嘅對象。我個女死得早，好唔容易先揾到人同佢冥婚，而家佢哋生咗兩個，我就養緊佢哋一家四口，你當我係養鬼仔咁理解就得。」刁太說着說着，忍不住流下了眼淚。
冥婚？養鬼仔？一個如此精瘦的老婦還用自己的陽壽去供養四隻鬼，跟現實的啃老族根本無異，這就是母愛的偉大。
「萬生……我指你個女冥婚嘅對象，佢早兩日救過我兩次。」我如實相告。
刁太聽到後很驚訝，因為終於有人願意相信她而不是嘲笑她，而她亦對我坦白，我終於知道第一次的一六二二室原來是她燒給女兒的家。
可是為甚麼當時我會去到刁小姐的家呢？我又不知不覺闖入了鎮魂塔內嗎？不過根據之前兩次進入鎮魂塔的經驗，現實中有人住的單位都會有保護罩，所以她無可能住在這單位內，而且環境也與平常的世界無異，況且留在鎮魂塔內的鬼魂都是沒有生前記憶的，怎會還能跟刁太如此親密呢？唯一有可能的原因就是那裏並不是鎮魂塔，而是另一個空間。
「我想問，我第一次上嚟係見到你個女同佢屋企，點解嘅？嗰度唔係鎮魂塔，係咩空間嚟？」我大膽發問。
「鎮魂塔個傳說你都聽過？」刁太驚訝的說︰「你究竟知幾多？」
於是，我便原原本本將我兩次進到鎮魂塔內的事都告訴她，她便告訴我一件驚人的事。
「我個女同十年前四狼案個女死者梁紫茵係由幼稚園已經同班，直到初中先讀唔同班，但一直都好好朋友，點知佢遇害之後，過咗一、兩年，我個女都同佢一樣跳樓自殺。我當時一直都察覺唔到佢嘅異樣，如果我當時留意到佢多啲，發現到佢情緒嘅變化，揾到專業人士幫手，佢就唔會……」刁太越說越激動，兩行眼淚不自覺的流下，已經泣不成聲。
「或者你個女唔係自殺，而係查唔出兇手而被『王』所殺。」我很想告訴她真相，但我還是忍住衝動，轉為安慰道︰「唔好咁自責，你而家已經補償哂，做多咗好多㗎喇。」
「但係點解會揾萬生同佢冥婚？年紀睇落都差好多。」我懷疑她不知道萬先生是其中一隻狼。
「哦，其實係有次搭lift，有個住二十樓嘅後生仔同我講嘅。佢好準㗎，講得出哂我啲嘢，亦都講中哂我個女啲嘢，仲幫我問米，等個女可以同我講聲再見，最後仲教我養鬼同冥婚，我先可以繼續同佢哋一齊生活。當然佢有同我解釋過個風險嘅，但試問人世間有邊個媽媽會介意用自己條命去換個女嘅開心幸福？所以我無後悔過。」縱然刁太身體瘦弱，但意志卻驚人的堅強。
原來是江叔的主意，那他一定知道萬先生是其中一隻狼，因為萬先生正是被江叔揪出來的兇手！可是這個操作是有甚麼玄機嗎？看來我又要再拜訪他了。
最終，波子聲的問題始終沒有解決，但當我知道背後原因那一刻起已經不再介意了，反而更慶幸自己因禍得福，找到新的線索，使我的調查有一個飛躍式的進展。
.JPG)
