鎮魂塔
盧老太的事件，我一直都沒有勇氣說出真相，每次面對她的家人，我也會莫名害怕，同時也會很愧疚，生怕他們突然知道真相然後對付我，久而久之，每次看到他們，我也會不自覺的垂下頭，避免與他們有眼神接觸。
可是，對於井型屋其實是鎮魂塔這件事，我始終念念不忘，特別是盧老太的詭異表現，更加使得這件事真實。既然她到死也不願作答，那我只好找另一個知情人士──江叔。
我再一次來到二零零二室前，與上次一樣，未待我敲門，江叔便說︰「曉哥仔，你都熟架步，自己入嚟啦，門無鎖。」
我一臉尷尬的推開門，江叔依舊坐在廳中，他把玩着電話，沒有正視我，只是隨便說︰「隨便揾個位坐就得，我而家唔得閒住，生死關頭。」
我沒有聽他的話坐下，而是在他家中逛了一圈，仔細查看他的擺設和裝飾，而在他層層疊疊的水松板上，我發現了一張江叔和Tracy的合照，照片中的江叔身穿校服，短髮有瀏海，有我半點帥氣；Tracy則與現在無異，只是衣着變成了校服而已。
「估唔到原來佢哋係同學。弊！咁即係Tracy都同江叔差唔多大？難怪佢話我係細路喇……不過年齡完全唔係問題，年齡只係數字，佢睇落後生，大家溝通到有話題就得，我完全唔介意同姐姐一齊，嘻嘻。」我想着想着，不自覺下流的奸笑起來。
「喂，曉哥仔，做咩笑淫淫咁呀你？諗咩衰嘢？」江叔冷不防從後拍了我的肩膀，把我嚇了一跳，他依我的視覺方向望去後再說︰「咸濕仔J 紙巾？諗都唔好諗呀你，你J唔起佢，代價好大㗎！」
我立即吸回差點掉到地上的口水，正經八百的說︰「乜都無諗，我邊有，就算有都唔駛同你交代。我嚟係想問你，你上次話呢度其實係鎮魂塔，係咩一回事？」
江叔瞄了我一眼後嘴角露出微笑，回到座位後示意我坐下，然後說︰「上次我咪講過，不過你聽完之後唔多信，而家點解又想知？係咪終於見到鬼所以信喇？」
「係咪見到鬼我都唔確定，只係我諗唔到有咩更好嘅解釋，所以想問清楚。」我環視了四周，確保沒有其他人，便湊到他耳邊小聲問︰「你知唔知大廈互助委員會室有本秘密文件夾？」
「喂！」江叔聽到後很大反應，頓時用力摀住我的嘴，然後小聲但凶惡的說︰「你點知呢件事？呢樣嘢唔可以喺度講你唔知㗎咩？畀啲惡鬼聽到就麻煩。」
「睇嚟同我推測嘅一樣，佢哋真係唔知本嘢喺邊。」我心想，然後問他︰「呢樣嘢同鎮魂塔有咩關係？盧老太嗰時又懶神秘唔講，淨係話『王』想得到佢揾返啲人報仇。」
江叔看着我，冷笑一聲，然後說︰「睇嚟紙巾揾到個好幫手。曉哥仔，你究竟知道幾多？」
於是我便一五一十，把由十四樓吸煙男開始，直至盧老太的死，期間發生的所有事情，毫無保留全都告訴他。
江叔聽完後搖頭說︰「睇嚟你今次已經走唔甩，唯有試吓幫你保住條命仔。其實紙巾一直都揾緊人幫佢查單五狼案，但咁耐以嚟都無幾個幫到手，你已經算係進度比較好嘅幾個之一，不過根據之前經驗嚟睇，你嘅速度都係唔夠，最後都係會以失敗告終。」
我不解，於是問︰「又唔會有時限嘅，假以時日實查到㗎喎，點會失敗？」
江叔一副「少年，你實在太年輕了」的表情看着我，然後說︰「不聽老人言，吃虧在眼前。Anyway，鎮魂塔嘅嘢我上次已經講哂你知，至於本嘢，你最好忘記佢，唔係你會畀啲鬼折磨得生不如死，因為佢哋唯一可以離開呢度去返輪迴嘅辦法就係記得返自己係邊個同點死。鎮魂塔只會鎮住啲惡鬼，一般鬼會有十二個時辰走盞，等佢哋可以見埋屋企人最後一面同食餐飯，如果超咗時就要留喺度走唔到，而生前嘅記憶都會同時消失。」
「所以佢哋個個都想要本嘢，難怪盧老太唔畀我帶走。」我如夢初醒，同時想起一個人，於是問︰「咁毛全彬佢投咗胎未？」
「哈，毛全彬？」江叔不屑的笑道︰「佢本身走到，不過因為你問米，所以最後佢畀班惡鬼捉走咗當玩具，而家咪留咗喺度走唔到。不過佢都唔係第一個，亦都唔會係最後一個，唔駛咁介意，反正你都幫佢唔到，佢而家乜都唔記得仲幸福。」
不知為何，江叔這段話我聽完後總覺得有弦外之音，是衝着我而來，心裏有點不是味兒，但又不能反駁，畢竟真的是我一手造成。
我尷尬的說︰「咁我嗰時又唔知會咁……」
「所以我咪話你唔駛介意、唔駛自責囉，同埋你都無咁嘅時間。」江叔立即回應，並說︰「你而家好應該快啲去幫紙巾查單嘢，你唔係得返好多時間。」
說完後，江叔強行把我推出屋外並鎖上門，不讓我進內。不一會，我隔着門便聽到裏面傳來「啊」、「嗯」、「呀」、「喔」、「吖」等引人遐想的聲音，我暗裏罵了句髒話後便離開。
在二十樓的升降機大堂，我遇到了Tracy，她對着我咧嘴而笑，這笑容令我有點心寒，她對我說︰「江叔應該同你講哂，你而家知我想點喇？」
我點點頭，她便續說︰「咁你有咩頭緒？」
「上次十四樓個男人，佢應該有份。」因為我不太肯定，所以小聲道。
「咩話？可惡！」不能不稱讚Tracy的耳朵真的很靈，我這麼小聲她還是聽得到，但她的反應令我不知該怎樣作回應，大發雷霆的Tracy繼續怒道︰「估唔到隻煙鬼係其中一個，佢仲要已經死咗，我無仇報，太可惡！」
「死咗？」我疑惑道︰「即係我唔係中咗佢催眠睇錯，而係AI嘅情報係真，佢真係二零年肺癌死咗。」
「可惡，畀佢死得咁舒服！」Tracy繼續發放怨氣︰「無得親手報仇，我要佢做鬼都唔靈！」
語畢，一陣莫名的狂風襲來，我被吹得摀着臉，狂風過後Tracy也消失不見了。
「又會走得咁快嘅？」我自言自語。
「你都唔好喺度久留喇。」我身後突然傳來一把陰森的聲音，害我汗毛直豎。
我回過頭，這不是王太嗎？為甚麼她會在這裏？又在老人院偷走出來嗎？
「王太，你做咩喺度嘅？王生都搬走咗，你係咪蕩失路？你偷走出嚟王生會好擔心你㗎，王生電話幾號？我幫你打畀佢等佢嚟接你。」我邊說邊掏出電話，腦中本來斷了的線這刻竟然接上了，原來是王先生！
我抬頭望向王太，但她已經無聲無息的離開了，可是多得她出現，我終於知道那人是誰了。不過王先生本來已經搬離這裏了，為甚麼又要冒險回來呢？難道他藏了甚麼秘密？可是現在單位都已經裝修完了，要是有甚麼秘密的話，他都已經拿走或已經被清理掉了。要知道真相的話，看來只有親身找王先生問個明白，不過應該怎樣才找得到他？我毫無頭緒，但這發現還是先告訴Tracy好了，可能她會有辦法。
我走樓梯回到十五樓，可是王太的說話依然在我心中久久未能忘懷，她的說話背後有甚麼含意嗎？我想得入神，沒有留意梯級，被甚麼東西絆了一下，在樓梯間摔了個四腳朝天、人仰馬翻，幸好梯級不算多，未有嚴重受傷，只是扭傷了腳裸。
我整理完畢，架好眼鏡後便徑直走回家，等等！好像有點不同，是哪裏變了嗎？感覺總跟平時不太一樣，對，是燈！這層的燈變得柔和了，而牆身的「十五」字樣也變得鮮艷不少，四周還傳來歡笑聲，有一種繽紛快樂的感覺。
「細佬，」一把既熟悉又陌生的聲音在我後方傳來，不用回頭便知道是盧老太，她對我說︰「幾難先拉到你入嚟，呢度係鎮魂塔入面，我喺度得返兩個時辰，所以時間緊逼，快啲跟我嚟。」
等等，盧老太不是已經過身了嗎？怎麼可能出現在我面前？肯定是幻覺！還要我跟她走？她是要報仇嗎？還說我現在身處鎮魂塔內，鎮魂塔是這麼愉快的嗎？跟我想像的有很大出入，這幻覺真的是太夢幻了吧！
「仲唔行？一夠鐘我就再幫你唔到。」盧老太催促道。
「咁急唔通真係想報仇？」感到事有蹊蹺的我連忙下跪道歉︰「盧老太，你係咪打算向我報復？對唔住，我唔係有心殺你，我錯手㗎喳，你大人有大量，請你原諒我。」雖然是幻覺，但這樣賠罪過後最少我會變得心安理得。
「你噏乜呀？做咩無啦啦要報復你？唔好講咁多廢話，行咗先！」盧老太再三催促。
啊？真的不是報復嗎？那就太好了，我即時站起來，再好奇的問︰「鎮魂塔咁愉快，點解仲要走？」
「細佬，好多嘢唔可以齋睇表面，我哋邊行邊講喇。」盧老太飄着說︰「不過都多得你我先再次認真正視返呢個有鬼嘅世界，我嘅死係『王』害嘅，唔關你事，雖然你無閂好門就走的確係有啲責任，不過嚟到鎮魂塔入面都算係意外收獲，就當你將功補過，快啲行！」盧老太道出她的死亡真相令我如釋重負，不過我相信事情並非這樣單純。
「唔閂門都有關係？『王』點害你？點解呢度咁多單位都有個保護罩咁嘅？」我不解的問，不過她再沒有回答，只是一直往前飛到一五零八室──罕有沒有保護罩的單位，我也只好跟着她，一拐一拐的走過去。
「王太！」盧老太對着單位大叫，然後門便自動開了，王太從中探出頭來，向我招手着我趕快進內，然後匆忙的關上門，還連防盜鏈也扣上，生怕有人，不，生怕有鬼闖進來。
「放心坐啦細佬，呢度好安全。」盧老太說。
我看到眼前的王太，心不禁寒起來，剛才還看到她在我面前活生生，怎麼在鎮魂塔內她又會出現？是因為她早已不在人世了嗎？是何時的事？但江叔不是說留在這裏的鬼都會失去生前記憶嗎？怎麼她會知自己是王太？
「我知你查緊五狼案。」王太率先發聲，我還未弄清現在究竟發生甚麼事，她便繼續說︰「我有重要嘅線索畀你，你聽清楚，信就得，唔駛問。」
「喂喂喂，等等先，究竟係咩事？你點會知？而且你點會有返記憶？」我認為有必要先弄清楚整件事，縱然這只是非常逼真的幻覺。
「講咗時間無多都仲要問，而家啲細路真係，我都唔知點講喇。」王太沒好氣的說。
「唔好勞氣，我答佢。」盧老太安撫道，然後轉身對我說︰「細佬聽住，呢度嘅時間流逝同人世唔同，好似平時瞓覺咁，你好似瞓咗一陣但其實已經過咗幾個鐘，我哋而家得返嘅時間唔係好多，長話短說，唔係就唔夠時間。」
「吓？哦！」我似懂非懂，不過還是先聽她們說好了。
盧老太續說︰「王太其實都過咗身一段時間，本來無哂記憶要留喺度，而我咁啱探索呢度時遇到佢，講返佢知生前啲嘢，佢記憶就返嚟，仲有樣關於五狼案重要嘅線索，我估你而家係被『王』纏住，所以先特登帶你嚟幫你。」
「吓？我邊有被咩『王』纏住，我只係幫個friend查之麻，我個friend唔係嗰啲妖言惑眾之王。」我連忙否認。
「唉，細佬，阿婆都係好心提醒吓你，『王』就正如你上次估咁，係鎮魂塔之『王』，所以你唔好同佢有任何瓜葛，點都好，件事就係咁，之後就交畀王太。」盧老太苦口婆心的說。
果然，我的推理正確，那我更加沒有可能會遇過他了。
「無問題咁我就講喇，」王太再次確認後便說︰「五狼案我係其中一個受害者。」
甚麼？這個訊息量有點大，五狼真的那麼飢渴，連一個其貌不揚的中年婦人也沾污嗎？
我聽到後眼睛瞪得很大，眼珠也差點掉下來，估計王太看到後也吃了一驚，即時糾正道︰「我知你諗乜，但唔係你諗咁，因為成單五狼案其實同報紙報導嘅好唔同，報紙為咗賣紙，將煽情轟動嘅部份報出嚟，但事件原整始末就隻字不提，甚至連警察都無深入調查，後來證據不足，成單案就不了了之。」
「咁成件事始末係點？有咩涉案人士？」我馬上追問。
「個女仔係抵死！」王太突然爆發，整個人冒煙，她周圍的空氣也有點扭曲，是那種因為太熱而造成的空氣扭曲。
我見勢色不對，立即後退兩步以防被她誤傷，幸好她很快便調節好自己，整理好心情，然後再說︰「個女仔喺我哋座樓嘅開心果，由細細個開始已經好乖巧可愛，好得人歡心。亦因為咁，所以件事發生之後都無人懷疑過佢，哪怕係一點點都無。」
「佢越大越靚，居民越嚟越鍾意佢，而佢難得都仲係咁乖巧，變成一個完美女孩，拜倒佢石榴裙下嘅人不計其數，當中更包括有婦之夫！」王太情緒又再波動。
「佢表面係乖乖女，但暗地裏就不斷收兵，而且專收有婦之夫，佢雖然矢口否認，但我知佢一定係咁。一個由細到大都被全世界當係掌上明珠嘅人，點會一直咁乖？佢一定被人縱壞哂，當中五狼係縱得佢最多嘅人。」王太說話話語中有點恨意。
「會唔會有一種可能性係嗰班人真係自……」我話還未說完，王太立即制止我，她已經主觀的認定了，沒有商量餘地。
「我有證據嘅，我偷睇到佢哋嘅對話，嗰種曖昧，一定係有嘢！所以最終佢嘅死係自己攞嚟，邊個叫佢玩男人，仲要玩五個！」王太陷入了瘋狂狀態，越說越偏頗，已經完全失去了理性。
「聽你講，你話會唔會係……」我嘗試拉她回到理性層面再探討，可惜還是失敗告終。
「一定、肯定、絕對唔會，全部嘢都係佢玩男人嘅後果，五個男人都以為自己係唯一，直到嗰日中秋節佢最後東窗事發，紙係永遠都包唔住火，五個男人終於知對方嘅存在，但佢估唔到嘅係嗰五個男人竟然無為佢爭風呷醋、大打出手，反而好冷靜咁坐低傾，最後仲傾掂咗，想畀個教訓佢，點知錯手就變成五狼案。」王太始終如一的向我演繹她所知版本的五狼案，最後終於道出重點︰「嗰女仔雖然死不足惜，不過我都唔會掩蓋事實，個女仔被跳樓前已經死咗，係一個意外，但五狼係撇唔甩呢個責任。」
「究竟係發生咩事？點解你知得咁清楚？」我越聽越覺可疑，不禁再次發問。
「殊！咪講咗唔好問。」王太生氣道。
「Sorry sorry，一時情不自禁。」我連忙道歉。
「喂，王太，要走喇，時間差唔多。」此時，盧老太在旁催促，窗外也透進了一道白光，直射到她倆身上。
「總之，呢五隻狼係……」王太未來得及說出最關鍵的部份便被吸走了，而盧老太也留下一句︰「小心，保重。」便一併隨光消失，而我則被光的反作用力彈開撞在牆上暈倒。
「啊……痛……」過了不知多久，我在樓梯間醒來，燈光回復正常，「十五」字樣是熟悉的黑色標楷體，四周也沒有了歡笑聲，一切已經如常，是我平時身處的十五樓。我想起了剛才鎮魂塔的事，拿出手提電話一看，時間只是過了兩分鐘。
「睇嚟頭先嗰啲真係幻覺，而且我而家喺樓梯度又唔係喺一五零八室入面，唔駛問阿旻都知係我碌落嚟撼親個頭暈咗時嘅夢，不過又真係幾逼真，有趣。」我微笑着搖搖頭，整理好衣裝便拖着扭傷的腿回家。
