Plan B
地下的對戰暫告一段落後，阿月跑經一樓的一刻，樂哥他們已經意識到自己所在的樓層屬於高危之地，經商量過後，他們也一起跑到三樓，隨即看到躺在地上的阿月。
「我哋啱啱傾嘅plan b，而家係好機會去實行。」野仔小聲說。
「咁就照計劃行事。」樂哥一聲令下，大家各施其職，把阿月牢牢壓實、動彈不得。
「你班廢柴想點？」阿月只有嘴巴是自由的。
「你都有今日喇仆街仔，整斷我隻腳？今日我哋要搶走哂你啲錦囊同埋地圖。」老鬼眼見大仇得報，不禁興奮起來。
「錦囊？地圖？哈哈……」阿月瘋了似的笑起來，然後說︰「錦囊你哋搶得走都無用，我已經記哂入腦，而家嗰啲對我嚟講都係廢紙一張，所以去哂回收筒。至於地圖，揾到有地圖麻煩畀多份我㖭。」
面對阿月的虛張聲勢，老鬼立即以行動回應，他立即搜阿月身，但在他身上只找到一個裝着小鐵球的紅色錦囊，以及他手持的鐵筆，紙條和地圖都找不到。
「呢啲嘢有咩用？佢之前同我哋組隊嗰時有好多錦囊㗎，最衰我唔記得哂。」一直在把風的Maria媽媽突然插話。
「你問我我問個鼻呀？不過呢條仆街攞得嘅一定有用，搶咗先講，至於佢口講嗰啲，唔知堅定流，唔信好過信。」老鬼二話不說便把東西搶了過來，之後還打了他一頓，直至樂哥出聲制止才停下來。
「哈哈，打囉，我有嘅錦囊一定係出去嘅關鍵，但全部都喺我個腦度，我死咗就會失傳，到時你哋咪喺度等死囉。」阿月歇斯底里的喊。
樂哥聽罷，冷靜的回答︰「我啲teammates全部都唔想同你合作、想你死，但我認為要贏呢隻game，一定要齊心協力、互相幫助、交換情報、集思廣益先得。只不過得我咁諗都無用，只要當中有人唔係咁諗就唔會成事，而係之前我已經知道你唔係咁諗，所以我都認為唔可以再拉攏你做隊友。不過聽佢哋講你殺咗幽幽，我認為佢身上一定有啲值得你郁手嘅嘢你先會殺咗佢，而殺咗佢你就可以得到嗰樣嘢，咁或者啲錦囊係可以繼承？邊個殺咗擁有錦囊嘅人就可以繼承佢嘅錦囊，我推斷有錯？」
阿月聽完後繼續一臉狂妄，沒有露出任何破綻，繼續說︰「你試吓咪知囉，但如果唔係嘅話，咁你哋就永遠離開唔到，最後淪為遊戲嘅犧牲品！」
樂哥雖然對自己的推理很有信心，但始終不是百分之百肯定，萬一錦囊真的不繼承，那麼他們便只有輸的結局，他承擔不起其餘三人的命。
「算喇，放咗佢。」樂哥率先鬆手，其餘三人同時作出反應。
「樂哥！」野仔說。
「乜春話？」老鬼說。
「吓？」Maria媽媽說。
「我話放咗佢！」樂哥重申。
雖然不甘心，但他們都明白樂哥的苦衷，所以只好放手讓他離開。
「哈哈，你班廢柴，永遠都唔會成到大事，到最後你哋都係會喺度死哂！」阿月繼續躺在地上大叫，但樂哥他們沒有再理會他。
「我哋而家應該去邊先好？呢層我哋揾哂，留喺度都係嘥時間，一樓又高危，落去揾錦囊好危險，點算好？」野仔問。
「安全起見，我認為留喺度好啲，我哋唔知阿雲佢係針對阿月先咁，定徹底變咗做鬼，對所有人都係咁，搏唔過。」樂哥說。
老鬼聽罷不同意，堅持說︰「我覺得唔可以再喺度嘥時間，我要落返一樓，我驚都無驚過，隻鬼啱啱捉過老子一次我都無死！」
Maria媽媽附和道︰「係喎，我親眼見到，而家佢都仲生歐歐，可能隻鬼唔係人人都殺得死，有啲人係例外，我寧願搏吓好過喺度等，我都跟埋佢落去。」
「冷靜啲，我哋係一team人，唔好分散行動好啲，不如咁，我哋投票決定。」樂哥提議。
經過簡單多數制的投票後，結果以兩票前往一樓，一票留在三樓，一票棄權，最後決定大伙一起動身返回一樓繼續搜索錦囊。
「喂，條仆街呢？有無人見到佢去咗邊？」老鬼突然大叫，其他人才赫然發現阿月已在不知不覺間溜走了。
「佢一陣突然出嚟襲擊我哋咪死……幽幽都係咁畀佢殺死，唔知佢有咩辦法可以殺到人……」Maria媽媽擔憂道。
「唔駛擔心喎大媽，佢條仆街啱啱畀我塞咗兩鎚，受咗傷，無之前咁Q易出到手嘅。」老鬼自信的說︰「佢條粉皮都半死，我哋唔駛擔心咁多。」
「小心駛得萬年船，大家多加留意就得，記得互相提場，有事就大嗌，無論係遇到阿雲定阿月都一樣。」樂哥提醒眾人。
接着大伙便步步驚心的往一樓進發，不過落到一樓也沒有發生任何事。
「咁我哋而家就分頭行動，盡量留意細節，因為呢棟大宅有好多我哋意想唔到嘅機關同暗格。」樂哥下達指示後便走到最高危的五間套房逐一搜查。
他率先進入離樓梯最近的第一間房，他一打開門，便聽到「do」的聲音，他不以為意，只集中精神在尋找錦囊一事上。
這間房只是一間普通的套房，掛了一些畫作，並沒有任何特別的主題，就像一間有品味的睡房一樣。樂哥浸淫在這藝術氛圍之下，精神特別爽利，效率也上升不少。
經過一番搜索，終於在床頭上的一幅畫後方找到一個夾萬，但密碼卻不得而知。
「密碼會唔會係同幅畫有關？呢幅係梵高嘅《向日葵》，前後一共有十一幅，中間有一幅喺二戰時燒毀咗，而啲花有啲得幾枝，有啲有十幾枝，作畫年份又有唔同，全部都係數字，應該邊個先係密碼……」樂哥獨自在苦惱着，一時間也想不到答案。
另一方面，由於樓梯下來第一間房是當初他們醒來的房，除了四面牆就甚麼都沒有，所以他們都直接將它無視，Maria媽媽獨自去了放着幽幽屍體的冷藏庫，老鬼則負責大廳，野仔則去了第五間套房。
冷藏庫裏面放的都是滿滿凍肉，雞、牛、羊、豬、魚、馬、駱駝，連鱷魚也有，除了食材種類繁多外，並沒有甚麼特別，要在如此冰冷的地方逗留並尋找錦囊，對於衣着單薄的Maria媽媽來說完全是地獄體驗，可是她又不希望其他人會騷擾到幽幽長眠，所以才自告奮勇選擇這間房。
可是，待在裏面超過一分鐘的她已經冷得不能動彈，要走出冷藏庫讓體温回暖。在等身體再冷暖和起來的時間，她想到了一個問題︰「如果畀人反鎖喺入面咪凍死，趁而家研究吓點樣唔會畀人反鎖先。」之後她便又忙了起來。
在大廳的老鬼把整個廳也翻轉了一次，但並沒有甚麼發現，他甚至仔細得連每個咕𠱸也拉開拉鏈檢查一次，但始終苦無收穫。
突然，他想起阿月曾經在這裏找到過兩個錦囊，於是便心灰意冷起來︰「頂，係喎，唔記得條仆街喺度攞咗兩個錦囊走，佢仲要有地圖，有錦囊佢都已經揾哂，而家呢度肯定乜都無，揾嚟都嘥gas，歇一歇好過。」之後他便躺在沙發上稍作休息。
而本來在第五間房開始尋找錦囊的野仔，卻被開門時發出的「la」聲所吸引，認為開門時會發出這聲音絕對有玄機。
「開過咁多門都無聲，唯獨呢道門就有，究竟有啲咩秘密？呢間只係一間普通嘅房，有啲動漫figure做裝飾，同『la』有咩關係？」野仔不斷思索兩者間的關係︰「呢啲figure嚟自唔同嘅動漫，但佢哋之間又無關係，我估都係純粹個人喜好先放埋一齊，定其實佢哋全部都同『la』有關？」
就這樣，在一樓的四人都各自在忙自己的事，連危機逐漸接近都懵然不知。
+×+×+×+×+×+×+×+×+×+×+
此時在二樓，一度失蹤的阿月再次現身，此時的他正躲在健身室休息並重新計劃下一步行動。
「我而家手頭上嘅武器無哂，得返啲唔知乜意思嘅錦囊，雖然應該都係離開嘅關鍵，但諗極都諗唔明背後係乜意思，佢同我講過嘅錦囊都差唔多揾哂，差一個喺外面花園，但都出唔到去，知道有都無用。」阿月坐在一角整理現在的情況，他深知自己已經成為眾矢之的，所以目不轉睛的看着門，慎防突然有人闖入而自己來不及反應。
「或者喺度拎啲嘢做武器防身。」可是這想法一閃即逝，無他，皆因這些健身器材均十分沉重，拿來作戰絕不方便。
怎料就在他放棄選擇武器的一刻，竟然讓他找到了一個被鐵餅重重壓着的錦囊，他拿起這個黃色錦囊，裏面有一張紙條「V，一」。
「V，一？」阿月興奮起來，他暗自竊笑道︰「睇嚟天未亡我，有何有V，今次想輸都難。」
「而家我要警戒嘅係全部人，錦囊有得代捉，就有機會有其他令玩家都可以捉人嘅錦囊，無人信得過，只有自己先最可靠。而家我有三個何一個V，但唔敢保證有人會解我，無人解我嘅話即係用咗等於認輸，一定唔可以隨便用，除非有自解，但會唔會有呢？」他冷靜分析如何最有效使用這兩個錦囊，最後得出結論︰「V一定要用咗先，唔可以將自己條命交喺呢班廢柴身上，到真係無辦法先用何，但用完之後要諗計令班廢柴嚟掂我幫我解。」
「但呢啲都係防守，進攻先係最重要，嗰啲紙條上嘅句子，究竟代表住啲乜？『目視光明』……呢度嘅光明係指盞吊燈？望住佢點『衝破困局』？『填滿再填滿』即係填滿啲咩？『讓我肉身重現人間』係咪即係整個公仔塞啲棉花入去？咁樣有咩用？用佢嚟望住盞吊燈？另外仲有無其他藍色錦囊？有嘅話又講啲咩？感覺呢啲藍色錦囊係指示我哋要做嘅任務咁，而紅色錦囊就係啲道具，黃色錦囊好似係啲技能咁，綠色錦囊就係捉伊因嘅規則，仲有無其他顏色？」阿月憑自己尋獲的錦囊總結出不同顏色錦囊的作用。
「喂，係唔係度？有嘢要問你。」阿月透過耳機，跟他的handler聯絡，可是沒有得到回覆，眼下他只能依靠自己行事了。
休息也休息夠了，氣也回完了，是時候再次行動了。
他走到門前，透過門中的玻璃查看外面的情況，確認安全之後便走出去，作為單獨的第三勢力，再次興波作浪，為自己爭取最後的勝利。
「如果係機關，咁一定唔會係由參加者去做，而係由本身大宅入面有嘅物件嚟做，先會發動到機關。『目視光明』首先要要『目』同『光明』，假如『光明』真係盞大吊燈，咁就要揾有『目』嘅嘢望住佢先得。如果講到有『目』又可以望到『光明』，又會似係機關嘅，唔通係嗰樣嘢？」阿月猛然想到些甚麼，之後便野心勃勃的查看下方，目光落在那個「地方」，剛好眼尾餘光看到阿雲從廚房拿着平底鑊走出來。
「咁就fit哂，佢上嚟就係我落去嘅最好機會，有足夠時間畀我去驗證吓我嘅推測正唔正確，而且佢拎住個煎pan，喺一樓撞到班垃圾嘅時候肯定開戰，咁就為我爭取到唔少時間。」阿月歪着嘴的笑了起來，躲起來暗自監視阿雲的一舉一動，等待最佳的下樓時機。
+×+×+×+×+×+×+×+×+×+×+
阿雲拿着平底鑊走到一樓，雖然看不到人影，但已經適應並承認做鬼這個身份的他，對獵物的敏感程度幾何級數的上升，直覺告訴他這一層會有獵物。
他走到第一間房前，隨着「do」聲，門開了，正在苦思夾萬密碼的樂哥回頭看到阿雲立即大叫通知其他人︰「阿雲嚟咗，大家小心！」
「死到臨頭仲得閒關心其他人而唔係向我求饒，死刑！」阿雲狂妄的說，接着便衝着樂哥跑去，不過這次不是伸手去捉，而是舉起平底鑊就打過去！
樂哥嚇得大叫，連忙跳下床，與阿雲隔床對峙，中途不忘循循善誘︰「嘩！咁樣唔啱規舉喎，點可以用武器㗎？你唔好畀做鬼呢個無限大權力嘅身份腐化自己！你係參加者，唔係隨便操控他人生死嘅殺人兇手呀！」
「咪煩！條命係我嘅，我鍾意點就點，你憑咩畀意見？」阿雲一躍上床，再跳向樂哥，用全身的力量加上體重和位能向樂哥使出普通平底鑊攻擊。
「砰」！聲音大得震耳欲聾，地磚都碎裂了。
而樂哥則倒在三米外，看着全力一擊的阿雲露出滿意的笑容，就像看到一個以殺戳為樂的屠夫，無錯，就是雨夜屠夫！驚恐使樂哥的呼吸越見急促，此刻的他已經清楚知道，此阿雲已經不是彼阿雲，他已經徹底成為「鬼」。
要如何赤手空拳對抗鬼？在遊戲機制下，除了躲避外根本無其他方法，但躲避的地方亦只限於這房間內。一旦離開房間，其餘三人都會成為他的目標，因為他見識過阿雲的攻擊，清楚知道他們面對這個版本的阿雲只有死路一條，而他自己是唯一有可能拖延時間的一個，但亦僅限於拖延時間，而非戰勝他。
「一味避有用咩？最後都係會畀我捉，倒不如乖乖就範，慳返大家啲時間啦！」阿雲看穿了樂哥的想法，站起來以勝利者之姿朝樂哥邁步走去。
樂哥也趕快站起來，迎接阿雲的下一波攻勢，同時輸人不輸陣的回答︰「或者你覺得而家我左閃右避係無用，但你永遠唔知道幾時會因為今次我避開咗而帶嚟連鎖反應，一舉逆轉，所以我都會選擇繼續避，直到形勢起到變化為止！」
「哼！垂死掙扎，無聊！」說完阿雲一個箭頭衝到樂哥面前，樂哥身後已經是牆，沒有躲避後退的空間，只能横移，阿雲看準這一點，用平底鑊的邊向横一揮，樂哥雖然已經閃開，但仍走避不及，被阿雲的反手重擊直接擊中右面肋骨，骨頭斷裂的聲音即時由樂哥身上傳出。
「啊！」樂哥痛得即時大叫出來，這叫聲大得隔着房門也傳到了其餘三人耳裏。
「我都話你點避都無用，不過都算你好彩，咁都中唔哂，淨係打中少少，但下一擊你就唔會咁好彩，下一招就收你皮！」阿雲極度亢奮的說。
樂哥摀着痛處，斷了的肋骨壓住肺部，幸好未有刺穿肺部，但疼痛也使得他呼吸困難，已經沒有餘力回應阿雲。然而阿雲未有怠慢，攻勢一浪接一浪，連續的攻擊使樂哥節節後退，慶幸的是雖然他身體受傷，但腦袋依然靈活，縱然不斷後退躲避，卻沒有被逼入死角，永遠還有路可逃。
「可惡，你呢隻老鼠喺度四圍竄，硬係唔肯乖乖受死。」阿雲開始有點怒氣，攻擊更不講理，越來越密集，樂哥躲避顯得越來越吃力，而手腳亦中了多次攻擊。
「哐」！
夾萬被平底鑊擊中，立即凹了，門也打開了。樂哥看到後苦笑着說︰「哈，估唔到用蠻力就開到，我諗咁耐密碼把鬼。」
阿雲並未加以理會，只集中要取樂哥的命。而不知不覺間，樂哥已經逃到門口附近。
「你唔係諗住走出去呀？」阿雲挑釁道。
「哈，以你嘅聰明才智，你應該一早估到我唔打算出去。」樂哥毫不掩飾的道出自己的計劃︰「我嘅目的係盡量拖住你同消耗你嘅體力，等佢哋盡可能揾到多啲錦囊同埋離開呢棟大宅。」
「真係諗得完美，乜你真係認為有得出返去咩？就算真係有，都係畀我打殘捉哂之後，我一個走返出去。」阿雲神氣的說。
「再走我都真係頂唔順，横又死掂又死，我都要搏一搏，隨時單車變摩托。」樂哥下了決心，隨手拿了一盞枱燈作武器，準備決一死戰。
「終於認命唔避，準備受死啦咩？」阿雲興奮的說︰「可惜太遲，滿身傷痕嘅你可以做到啲乜嘢出嚟？」
「你睇吓咪知我可以做到啲咩。」樂哥繼續與他舌戰唇槍。
下一秒，阿雲垂直一擊，樂哥看準機會，側身躲開，然後舉起枱燈揮向阿雲的頭。
「掂，打中喇！」樂哥心想。
「嘭」！
擊中了！
樂哥被擊中了！
樂哥的肚皮被平底鑊鑊底重重擊中，應聲飛到牆邊。
原來阿雲早已預料到樂哥會側身閃避，故垂直攻擊是幌子，横擊才是真身，而樂哥以為阿雲只有一擊的準備，沒有料到阿雲有此一着，硬吃了他的重擊，立即吐得一地都是，已經奄奄一息。
「哈，天真！不過玩得痛快，而家賜你一死！」阿雲走近樂哥，伸手捉他。
「do」。
「樂哥！」野仔、老鬼和Maria媽媽同時在門擠進來，阿雲也嚇得停了下來，退後了兩步。
「你哋做咩……」樂哥看到他們的出現，心情十分複雜，可以用悲喜交集來形容。悲的是他的犧牲正式宣布白費﹔喜的是他們有情有義，明知有性命危險還前來襄助。
作為對比，阿雲則顯得萬分吃驚，特別是他看到某人的出現︰「你……點解？」
「做乜春？老子我唔會因為畀你捉而死，係你天生剋星，問你怕未？」老鬼大無畏的說。
「無可能，點會無事？」阿雲十分詫異的道︰「我明明捉到你……無可能會無事。」
「所以我唔驚你，因為你殺我唔死，受死啦你！」老鬼舉起鐵筆，忍痛跨出一大步，連同自己一路以來的委屈所累積而來的怨氣、怒氣，揮出重重的一擊，驚魂未定的阿雲雖然及時回神，奈何已經為時已晚，走避不及，身上再次被鐵筆劃上一道長長的血痕，又一次栽在鐵筆身上。
「死未？記住我，我係你嘅剋星，唔想死就乖乖聽話，否則我對你唔客氣。」老鬼趾高氣揚的對暫時失勢的阿雲說。
再三被鐵筆劃傷的阿雲因痛楚的關係暫時恢復理性，他的腦突然蹦出了一個計劃用來對付阿月。
「唔好意思，之前我畀阿月焫着咗，無哂理性，其實要對付阿月，都唔一定係要我自己一個去，你哋都畀阿月跣過，其實我哋可以合作。」阿雲提議。
「你又知我哋畀佢跣過？」Maria媽媽反駁。
「詳細係點我真係唔知，但單憑你哋而家無同佢一齊行動，我再傻都會估到。」阿雲自信的道。
「你都真係搞笑，呢頭打捉完我哋，嗰頭又扮內疚之後話同我哋合作？憑乜要我哋信你？」老鬼依然保持警戒，不相信阿雲。
「冷靜啲，之前我哋同佢有合作過，知佢本性係點，所以我信佢。」樂哥倚着牆勉強坐起來，痛苦的問︰「你想點合作？」
「喂！你畀人打懵咗呀？」老鬼怒吼。
「我決定咗。」樂哥肯定的說，老鬼只好別個頭走到一旁，自言自語道︰「無你咁好氣。」
阿雲伸出自己的手，將電子手環展示給眾人看，螢幕顯示着「幫捉，二」，在確認各人都看清楚後便說︰「佢唔知我有呢個技能，我想揾兩個人幫手，每人一次機會，幫手趁佢無防備捉咗佢，等佢消失。」
「我哋憑咩信你？」野仔立即說。
阿雲看着野仔，內心一酸，深呼吸一下然後說︰「的確，你哋係無咩理由相信我，但我哋都一樣咁憎佢，一樣想佢死。俗語話『敵人嘅敵人就係朋友』，單憑呢一點，我認為我哋可以合作愉快。老實講，呢個本來唔係我嘅計劃，但見到你哋，我諗用個plan b都唔錯。」
「即係趁條仆街無防備未意識到之前隊冧佢？都好，值得一試，我做。」老鬼聽到後反而第一個支持，跟剛剛的反應完全不同，只能說他對阿月真的恨之入骨。
「Maria媽媽都要幫幽幽報仇。」Maria媽媽也毛遂自薦。
「你哋兩個自薦就好，本身我都想揾你哋兩個，因為樂哥同野仔無咩說服力。」阿雲說。
「等陣先，大體要點樣操作？」樂哥問。
「我估只要我用呢個技能分別掂佢哋兩個，佢哋就會變咗我嘅分身咁。」阿雲其實也未試過，所以也只是瞎猜。
「估？萬一唔係咁點？佢哋咪死得好無辜？」樂哥反應很大的說。
「等我睇吓。」野仔自告奮勇上前查看，一輪研究後肯定的說︰「只要每次㩒確定再捉人就得。」
「好，老子先，我恨不得而家就睇到條仆街嗰個吃驚同求饒嘅樣。」老鬼心急如焚，阿雲也率先替他完成，接着也幫Maria媽媽啟動了幫捉一次的身份。
「記住，你哋得一次機會，捉到捉唔到都會變返普通人。」出發前阿雲再三警告。
「啱啱佢喺三樓，我哋上返去三樓揾佢！」Maria媽媽得到新武器，意志高昂。
「等陣先，」樂哥冷靜說︰「我哋都要有個故仔，如果唔係你兩個貿貿然上去，佢實起疑。」
「一個同我哋反目，又投靠返佢嘅故仔。」野仔說。
「求其啦，話我哋意見不合咪得，呢啲嘢邊個會理。」老鬼着急的說。
野仔立即反對說︰「遊戲越後期越唔可以咁馬虎！尤其是你哋之間咁多嫌隙，突然又話投靠返佢，正常人都會有戒備，何況呢個仲要唔係正常人？無周全計劃等於自殺。」
「有道理，Maria媽媽都同意。」Maria媽媽說。
「麻Q煩，咁快啲講，要點嘅故仔？」老鬼不耐煩的道。
「如果話嫌我哋一老一殘廢，佗手褦腳？」Maria媽媽提議。
「唔work，佢同我哋合作過，知樂哥唔係咁嘅人。」野仔一口否決。
「挑，最簡單，照事實講，話見到樂哥畀阿雲打殘，但條仆街就可以全身而退，覺得跟佢穩陣啲，就背粄囉，之後又拎啲錦囊畀佢證明自己忠誠就得，我之前都試過差唔多。」老鬼說。
「之前試過？咁佢點會又再中計？」野仔質疑。
「唔係，我覺得可行。」樂哥久違的開口︰「因為有錦囊，佢都想揾到錦囊贏隻game，所以佢一定會接受。只要佢有一秒鬆懈，你哋就可以得手。」
「好，一於咁話，咁畀啲咩錦囊佢？」Maria媽媽問。
「畀我嗰啲，有一個我都唔明係乜，趁而家不如大家一齊解埋佢。」阿雲說，之後便把那個意義不明的錦囊拿出來分享。
「滄海一聲笑？」各人都異口同聲道。
阿雲點點地，然後說︰「你哋覺得會係咩意思？」
「分明就係一首歌喇，你哋唔乸係未聽過啊？」老鬼隨口便唱了幾句。
「咁但係有咩用？」野仔問。
「我Q知咩。」老鬼不屑的說︰「等嗰個仆街阿月解喇。」
「一個就夠？」Maria媽媽以防萬一問。
「我仲有個『six feet under』，同埋老鬼嗰張『fish me is fishing all』，」樂哥喘着氣說︰「仲有嗰個夾萬入面應該有錦囊，野仔你去睇吓。」
野仔依着樂哥指的方向走去，打開凹陷的夾萬，果然有一個藍色錦囊，他打開後唸出紙條上的字︰「黑夜降臨，永遠都是黎明的先兆。」
「又係一句唔知噏乜春嘅嘢。」老鬼不滿的說。
「等等先，」野仔看着錦囊，發現了新大陸︰「個錦囊入面暗花有個阿拉伯『2』字。」
「咩話？」樂哥驚呼，同時拿出所有錦囊查看，發覺只有藍色錦囊的裏面有暗花數字，他說︰「我呢個係『5』。」
老鬼也回答︰「我係『6』。」
阿雲查看後也如實的說︰「我嗰個係『3』。」
「喂，有無人話畀Maria媽媽知，呢啲數字代表乜？」Maria媽媽着急起來，因為只有她手上一個錦囊都沒有。
「我估計係順序。得藍色呢個錦囊係有順序的話，即係我哋要跟住呢個順序去做，如果唔係唔會成功。」樂哥推測。
「『1』同『4』會唔會喺阿月度？定未有人揾到？同埋會唔會有『7』、『8』、『9』、『10』或者更多？」阿雲也表達出他的疑慮。
「呢層真係無人知，不過目前有啲咩就見步行步，最少我哋知道呢隻錦囊係有先後次序，其他嘅揾到先再算。」樂哥總結。
「好，都啱，事不宜遲，我哋立即行動。你哋兩個行先，我喺後面匿埋，隨時補刀。而你哋兩個就喺度好好療傷。」阿雲指揮眾人，分工合作，一起踏上討伐阿月的旅途。
