Killer

Game Start

在一間無窗戶的密室內，亮著悠和的綠色燈光，給人一種和平、自由的舒適感。密室放著一張實木大圓桌，上面放了二十一張黑色底金色字的牌，而圍著圓桌的是二十一張整齊分布的木椅子。

倒在房內的二十一個人隨著麻醉藥的效力退去而逐漸甦醒過來。勉強撐開睡眼的他們，對眼前陌生的環境和人物充滿疑惑，有的人為了確認自己不是還在夢鄉，決定捏自己大腿；有的人為了令自己清醒，甩了一下自己的頭；有的人為了不再有睡意，雙手大力拍自己臉頰……但無論他們做了什麼動作，到最終都得出一個結論︰他們被綁架了。

「咁多位，歡迎你哋嚟參與我哋嘅遊戲Killer。」密室內突然傳出聲音，燈光也由綠色轉為藍色，在場的二十一人循著聲音尋找來源，終於在大圓桌中間找到一個小丑造型的喇叭。

「我係你哋今次遊戲嘅主持人傳媒。」小丑的嘴隨著聲音開合，驟眼看就像小丑在說話一樣︰「Killer，即係而家好興嘅狼人殺，我相信各位喺O Camp或者Party Game入面都，甚至喺手機上都有玩過。Killer流傳落嚟有好多玩法，而今次我哋玩嘅版本就喺MC Killer，而配合返今次主題，我哋就叫佢做『光時殺』！」傳媒話音剛落，燈光再次轉為綠色。

「咩話？」

「玩咩Killer，放我走呀你呢個變態！」

「你都癡撚線，精精哋好快啲放返我哋，唔係我就報警！」

「你都有病嘅，邊個會同你玩？」

「又好似幾得意喎。」

「捉我哋返嚟就係為咗玩遊戲咁無聊？」

「Killer我鍾意玩喎，一齊玩吓喇。」

「捉得我哋返嚟，又點會咁易畀我哋走？唔順佢意睇怕我哋走唔到。」

「玩咪玩，老子未撚驚過！」

「Killer係咩嚟？我聽都未聽過，有無人話我知？」

「你唔好畀我出到去，唔係一定會斬開你十九碌餵狗！」

「係咪電視台整蠱節目嚟嘅？」

密室內眾人議論紛紛，一時間氣氛沸騰起來，分成了參加派與不參加派。

燈光轉藍，傳媒透過小丑再次開口︰「喺你哋咁多人入面，總算有幾個係明白事理，無錯，呢個遊戲你哋係強制參加，無得揀退出，所以唔理你哋想唔想參加，最後都係要玩，而且仲係幕後有人指定要你哋參加，唔係你哋估點會咁易捉到你哋嚟？你哋想報仇，就要努力贏出比賽喇，哈哈。賣大包畀個幕後黑手嘅提示你哋，揾出你哋之間嘅關係就會知。」

燈光再次轉綠，眾人默不作聲，互相掃視，似是在腦中搜索與其他人的關係，但都一籌莫展。

此時，其中一人率先開口︰「我諗佢都係虛張聲勢，等我哋亂諗，影響我哋情緒同判斷力，我哋千祈唔好畀佢拋到，不如快啲開始遊戲，玩完就可以早啲走人。」

「我都係咁話。」

「啱聽。」

「無撚有錯。」

眾人和議，於是剛才提議的人對小丑說︰「傳媒，我哋全體都決定參加遊戲，你可以開始。」

「Very Good！不過澄清返，我啱啱並唔係虛張聲勢，哈哈。」隨著傳媒開口，密室再次亮起藍燈。

「咁等我簡單介紹吓遊戲規則先，你哋將會分為兩個陣營──黃絲同藍絲，消滅哂對方陣營嘅嗰方就贏。雙方各有十人，入面各有九人係有身份，即係有技能，點樣運用係影響勝負嘅關鍵，而仲有第二十一個人係中立撚，佢都會有技能。呢二十一張牌就已經放哂喺枱上面，大家隨機抽一張牌，再揾個位坐低就得，每張櫈上面都放咗一個電子眼罩，係防止作弊用，遊戲開始就要戴住，直到遊戲結束。每個人都唔可以將自己張牌畀人睇，否則會受到懲罰，而家大家去抽牌先。」傳媒指示著各人行動，而他們也只好乖乖跟著指示去做，不敢違抗。

各人都找了一個自己喜歡的座位坐下，戴上電子眼罩，這眼罩有點像VR裝置，但完全符合人體工學設計，對頭部的負擔近乎零。

大家都坐好後便準備開始抽卡，燈光亦轉為紅色，同時，其中一人大聲阻止︰「等陣先，我哋點決定抽卡次序？個次序好影響最後遊戲賽果嘅喎。」

「順時鐘咪得，我開始先。」

「點解要你開始先？我開始先唔得嘅？」

「咪撚爭，阿叔抽先。」

「唔得唔得，不如鬥快搶？」

「我提議猜包剪揼。」

「咪傻啦，咁多人猜到下年咩，我覺得跟年紀，由大至細。」

「點解唔可以由細到大？」

「我覺得應該Lady First。」

「食屎啦女權撚，有著數就話Lady First。」

「冷靜啲先大家，咁嘈落去都唔係辦法，不如我哋跟姓氏英文字母順序咁決定啦。」