危機

臨近新年，今日又偷到啲時間出嚟講吓嗰3日發生嘅事。

6月28日，我向皇帝提完案後，返咗自己喺黃大仙嘅屋企，係我嚟咗成個幾月第一次去呢面嘅屋企。呢面嘅環境同本身嘅世界好唔同，無哂啲高樓大廈、商場中心、學校公園，我差啲連路都認唔到，唔係有獅子山做地標真係返唔到屋企。

當我一踏入竹園邨範圍，啲邨民即係夾道歡迎，十足我衣錦還鄉咁，佢哋邊歡迎邊開出一條路，指引我返到屋企，好彩有佢哋，唔係我都唔知自己屋企喺邊。

不過我返屋企嘅決定其實係我喺嗰面時最錯嘅決定，因為呢個舉動導致到嗰個危機嘅出現。

我打開屋企門，屋企嘅布置似曾相識，但絕對同我本來嘅屋企唔同，但唔知點解好似之前見過咁。阿爸阿媽同3個細佬妹都喺齊度，佢哋見到我都無咩特別興奮嘅反應，相反仲有啲冷淡，可能呢個世界嘅我同屋企人關係唔多好，簡單打個招呼後，我就行咗入自己房，點解我會知間房係我嘅？其實我都唔知，但好自然咁就行咗入去。

間房嘅格局同擺設亦都有一種莫名熟悉嘅感覺，無意識間，我就喺牆身開咗個暗格，將我搜集得嚟嘅資料統統放哂入去，嗰時我都無覺得揾到個暗格有咩奇怪，只係覺得好自然，不過原來一切都係同香港政府有關，關於呢件事，容我吊吊大家癮，喺之後再同大家說明。

我放好哂啲嘢之後，出去同屋企人團聚吓食吓飯傾吓偈，但佢哋依然都係冷淡回應，直到講起我童年，佢哋開始回應多咗，反應大咗，而且開始有啲眼濕濕，而喺呢段對話當中，我發現咗自己小時候嘅一啲事件嘅秘密，而呢啲秘密亦導致到我嗰次嘅穿越事件。

傾咗陣，好快就到瞓覺時間，我亦都好安心咁返上床，坦白講，嗰一覺係我喺嗰面咁耐瞓得最安心嘅，只係瞓醒之後變天咁解。

6月29日，我瞓到自然醒，一張開眼，熟悉嘅環境再次映入我眼簾──白色天花板，落地大窗連房門，密密麻麻垂直嘅圓柱體窗花，中間空隙絕對穿唔過一條成年人嘅手臂，絕對安全，配以昏暗嘅燈光，令人昏昏欲睡。無錯！我又畀人收咗監。

見我醒咗，看守我嘅獄卒即刻去通知佢哋嘅領袖，即係九龍皇帝曾灶財。

皇帝示意啲獄卒開門，然後叫佢哋出去監獄外面守住，佢自己就隻身走入嚟，正當我想開口之時，見到佢手拎住一疊紙，而呢疊紙就係我放喺屋企暗格嗰疊。

點解嗰疊紙會喺佢手上？屋企人出賣我？但連屋企人都唔知我間房有暗格，究竟點解會咁？

「我知你呢一刻有好多疑問，我都一樣，精精地就答個我滿意嘅答案，唔係你唔駛旨意返到去自己世界！」

「你呢疊紙點解釋？點解唔同我報告而要自己收埋佢？係咪想自己一個走？你入面話香港島同我哋嚟呢個世界可能有關係，係咪咁所以你慫恿我出兵香港島，等自己可以乘機返去？」

「皇上息怒。」我睇電視劇啲人都係咁講：「我唔係打算隱瞞你，而係唔想你有危險。」聽到呢句，曾灶財面露疑惑，我就乘勢講落去：「無錯，我係有私心，我係想去調查香港島，不過呢一切都係想我同你可以安全返去原來世界，因為我未sure嗰面有咩秘密，會唔會有危險，而最重要係我未知點先返到去，所以我打算去嗰面慢慢研究，等有結果再同埋你一齊走，但你貴為一國之君，如果我未搞清楚點走就揾你去做實驗品，出咗事點算？你原來世界嘅老婆仔女點算？所以我先特登瞞住你唔想你去冒險。」

「哈！笑話！你以為我會信你？你返咗去仲會返嚟咩？唔好呃人喇，當我3歲細路哥？仲要將啲嘢收埋喺暗格？唔係我事先同你呢面屋企人講咗你想叛國，而佢哋深明大義，肯大義滅親，恐怕你走咗我都唔知咩事。」

原來係佢耍手段所以屋企人先唔理我，難怪當我講返童年時佢哋眼濕濕，太過份喇，竟然利用佢哋！

「如果你係咁諗嘅我都無辦法，不過我真係出自一片丹心想一齊安全咁走。」

「我唔會再信你，不過念在你過往嘅功績，我唔會殺你，但你所有職務都會被褫奪，所有家財被沒收，流放你去荔枝角守邊境，遠離香港島，即時執行。」

單純流放我咁簡單？我諗就唔係，所以我一定唔可以留喺荔枝角，唔係隨時有殺身危機。

喺九龍皇帝離開之後，啲獄卒就帶我出去，手手腳腳都鎖住，由九龍城一直遊街去荔枝角。沿途一路行，一路被人指指點點，遊哂成個九龍城先行去九龍塘，之後兜返去樂富咁，當刻唔知點解咁唔順路，但之後我就明。

當去到比較荒蕪嘅樂富時，天都開始入黑，啲獄卒留低咗我話叫我等陣之後自己就走咗。我手腳都畀人鎖住，如果有咩事真係反抗唔到，而個天永遠都係好嘅唔靈醜嘅靈，我企喺度約莫10分鐘，附近草叢就開始有動靜，正當我極度緊張準備迎戰之際，由草叢跑出嚟嘅幸好只係一隻兔仔，我放下心頭大石，但一秒鐘之後就後悔了，因為有隻老虎撲咗出嚟，我立即屏住氣息，將自己同環境融為一體，期望隻老虎見我唔到，不過我錯了，作為天生捕食者嘅老虎好快就發現我嘅存在。

唔怪得要咁唔順路兜去樂富，因為樂富原名老虎岩，有老虎出沒而得名，九龍皇帝諗住用大自然殺我，高招。

一係等死，一係放手一搏，當時我腦入面只有呢兩個諗法，但手腳都被鎖上，唔易搏，而我當時諗到嘅唯一戰術就係用鎖鍊勒死佢。當中過程唔多講，總之而家我仲喺度同大家講到發生過咩事就證明我KO咗隻老虎，不過同佢搏鬥消耗咗太多能量，而且又全日無嘢落肚，所以挨住老虎條屍就瞓咗。

6月30日，我畀一盆水淋醒咗，原來喺琴日嗰兩個獄卒，我諗佢哋本身喺想嚟收我屍，但點知見到我仲未死，佢哋都好驚訝，佢哋好仔細檢查啲鎖鍊，發覺仲係鎖實我就安心咁帶我上路去荔枝角。

佢哋一前一後咁行，將我夾住喺中間，以免我有咩古惑，既然九龍皇帝殺得我一次，一定會有第二、第三次，而且仲可能犧牲埋嗰兩個獄卒都在所不惜，所以我嗰時諗咗條計仔去逃走。

「好肚餓啊，我兩日無食嘢，行唔郁喇。」我跌坐喺地。

「咪玩嘢，快啲起身繼續行！」前面個獄卒拉住我條鎖鍊想拖行我。

「分半個饅頭畀佢食喇，今日都去唔到我哋就受罰嘅喇。」後面個獄卒拎咗個饅頭出嚟分咗一半畀我。

食完之後我就嘈話要去廁所，其中一個獄卒就陪我去附近草叢解決，一對一我絕對有優勢，我痾痾吓特登轉身痾濕佢條褲，喺佢發嬲彎身查看條褲情況嘅同時，我跑上前用條鎖鍊箍住佢條頸勒住佢，逼佢解開我身上嘅鎖，但呢個時候，另一個獄卒因為聽到聲而走嚟望吓發生咩事，我就順勢用個獄卒做人質，之後命令佢畀條鎖匙我解鎖，事情當然唔會咁順利，另一個獄卒無視我，仲衝過嚟想制伏我，不過就畀我三兩下手勢收拾咗，而被我脅持住嘅獄卒就即刻淆底畀條鎖匙我解鎖，當我自由後就扑暈佢地換咗佢哋套獄卒衫再鎖住，然後就潛返入九龍軍隊，準備7月1日隨軍去香港島作戰。