備戰
各位，我要加快講埋我段經歷，因為最近收到好多133電話打嚟唔出聲，我懷疑係警告，不過我覺得我有責任披露成件事，所以我會盡快講哂出嚟。
上次講到我拎住同盟信物返去揾曾灶財皇帝，佢見到之後勁開心，放下心頭大石，但我覺得事不宜遲，要立即備戰，因為劉業強其實係一個x factor，唔太信得過。
我向曾皇帝提出咗兩個建議，第一個係搞好內政，另一個係訓練士兵，而曾皇帝都好同意，全權交畀我負責，但我婉拒咗，因為我要花時間研究點返屋企，所以推薦咗我三個好兄弟負責，我就擬個計劃大綱畀佢哋跟住做，唔係我自我膨脹，我返嚟嗰時九龍啲內政係好咗好多，最起碼啲人心安定咗，喺香港島同新界入藉九龍嘅人多咗，人口有所增加，勉強算安居樂業。
其實我啲計劃都係用返嗰時香港用緊嘅計劃再加少少讀中史學返嚟嘅方法咁mix埋一齊改一改，一般人都係求三餐温飽同有個瓦遮頭，所以我都係起啲公屋，順便增加就業機會，又用獎勵利誘啲人工作，寬減稅收，提供一般福利。可能嗰面啲人簡單啲又未試過呢啲咁新嘅政策，所以都幾受落。我仲喺嗰面試行全民公投，不過無科技輔助點票係幾繁複，但佢哋又幾鍾意。
而軍事方面，始終我未試過打仗，所以無咩意見畀到佢哋，我本身又唔識啲軍備製造，無咩新式武器裝備畀到佢哋，所以我完全無染指，只係畀咗一個心態佢哋──人生最光榮嘅時刻就係喺戰場上勝利，之後嘅勝利證明呢個心態令佢哋打贏咗好多本身無望嘅戰事。
喺呢段備戰期間，我哋九龍同新界嗰面開咗好幾次作戰會議，不外乎都係邊個係最高統帥，有咩策略，大家點配合之類，仲有聯合軍演咁，但係曾特首，應該係曾港督為首嘅香港島又點會坐以待斃，佢哋都有不斷喺尖沙咀、紅磡兩地嘅沿海地方作出騷擾，嘗試登陸，不過每次都好彩畀新界九龍聯合軍擊退，不過而家諗返起先發覺嗰時香港島係特登撤退唔打。
而喺備戰呢段時間，約莫一個月，我都不敢怠慢，除咗處理國家嘅事之外，仲不斷走訪九龍新界各地去問人5月19號嗰日有無發生過啲咩特別事、天文異象之類，但得到嘅答覆都係好普通嘅一日，雨都無落過一滴。另外我都有乘機做吓啲私事去揾吓我啲親戚同埋舊小學嘅同學，因為我自己小時候都係住大窩口，嗰時嘅好朋友黎廣偉同林潤豪喺嗰面世界都好彩係好朋友，問咗佢哋近況同埋其他同學嘅事，畢竟我搬咗去黃大仙之後都無見過佢哋，難得喺嗰面有時間，就當彌補返自己嘅罪惡感。
我同暫時唯一同我同病相憐嘅九龍皇帝曾灶財報告我嘅調查之後，大家都意興闌珊。嗰時我打定輸數諗住要一世都喺嗰面生活，於是就認真同眼前嘅曾灶財傾偈，問佢其實係點樣過咗去嗰面嘅，而喺佢嘅口中，反而令我重燃返希望嘅灰燼。
「我都唔太記得嚟咗幾耐，不過有次我有事要去黃竹坑嗰面，我明明搭緊巴士，喺車上面恰著咗，醒返就喺荒山野嶺，行返落山就發覺過咗嚟呢面。」
原來佢都係喺香港島穿越咗過去，嗰時我心有個諗法，但未確定所以無講到出嚟，如果嗰時有講，可能佢就可以再長命啲同見得返家人。
當我得悉香港島有古怪嘅時候，我心入面只得一個念頭，就係去調查吓，奈何嗰面唔係自己地頭，無可能話過就過，唯一方法就係佔領嗰面，換言之即係打仗。
係提案之前，我去咗一轉揾文仔、肥璋同星姐，問吓佢哋啲士兵情況，再問一吓新界嗰面啲兵同武器如何，好彩答案都尚算正面，都睇得出新界嗰面係真心合作，始終有個兄弟斌哥喺度，情況仲控制到。而另外佢哋仲講多我知一樣令我非常振奮嘅事，原來斌哥揾咗阿大同阿二──我兩個表哥──做副將，睇嚟呢次同盟固若金湯，最起碼掌握兵權嘅都係自己友，唔會畀人背後捅一刀。
當我掌握哂所有情報之後，我就同九龍皇帝提案出兵香港島，而佢都同新界劉皇發主席溝通後決定喺7月1號正式發兵，而距離7月1號仲有3日，偏偏就係呢3日發生咗一連串嘅事令我陷入危機。
