上集：https://post.shikoto.com/posts/131162
但係，我去領取家姐嘅遺物果陣，見到家姐果部Android手機。
我知家姐一向帶兩部手機出街，一部Android、一部Iphone，佢有講過，主要用Iphone同傳心客人聯絡。
家姐部Iphone去咗邊？我搵晒全間屋，用埋「找回我的Iphone」都搵唔到。
最大嘅可能性係兇手拎走咗，隱藏佢同家姐嘅聯絡，甚至爭執。
而警察唔知家姐會帶兩部手機出街，見到有一部手機，就無再深究呢件事。
假如兇手係Ricky，似乎無必要咁做，佢同家姐嘅恩恩怨怨，早就擺晒上網。
我喺Icloud搵番家姐嘅whatsapp備份，逐個逐個睇，記低有嫌疑嘅人。
如果家姐答，隻寵物好愛主人，想主人多啲陪佢玩，或者死後去咗彩虹橋，咁個客人應該無殺人動機。
家姐會答隻寵物鍾意咩玩具，我唔知佢答得岩唔岩。
但就算答錯咗，我都唔覺得，會有人因為「被騙」幾百蚊而起殺心。
直到我搵到一個好可疑嘅客人，佢叫方太。
所以方太就叫我家姐傳心，問下囡囡對生活有咩唔滿意，點樣改善好。
平時家姐傳心都覆得幾快，但呢一次，方太催咗幾次，足足三日後，家姐先覆Whatsapp，我估家姐好糾結。
「囡囡話，妳唔喺屋企果陣，有個高高瘦瘦嘅男人，成日逼佢交配，佢好唔鍾意。
方太，件事係唔係真？果個係方生？人獸交犯法架，點可以咁樣對小動物？」
呢個係佢地嘅最後一個Whatsapp，方太無回覆。
呢個駭人聽聞嘅傳心結果，會唔會係家姐嘅死因？方太殺人滅口？
我將呢件事話畀警察知，警方搵咗方太黎問話。
方太好驚訝，先提供果晚嘅不在場證據，再拎部手機出黎，搵番家姐嘅Whatsapp記錄，根本無人獸交果個Whatsapp。
「我見傳心師咁耐都唔覆我，睇新聞先知佢遇害，都好震驚，唔通問佢屋企人追番果幾百蚊咩？」方太一臉迷茫：「呢個Whatsapp我無收過，我唔信我老公會做呢啲野，佢好錫囡囡架，睇黎動物傳心術都係呃人。」
警察拎囡囡去檢查，喺囡囡體內發現方生嘅精液。
原來佢果日無意中睇到我家姐個Whatsapp，好驚佢嘅惡行曝光，即刻刪咗個Whatsapp。
但佢怕我家姐會繼續搵方太，就約我家姐出黎，殺人滅口。
真相大白，我將件事公開，還我家姐一個清白，佢唔係騙子！
點知，網民都係鬧我家姐：「傻女，咁樣講，抵死啦！」
「各位傳心師要引以為戒，亂講野會死人架！」
我唔明白，呢個世界到底發生咩事？
但呢件事發生後，似乎傳心師同客人少咗好多爭執，更加無再發生「傳心引起的凶案」，
可能，呢個係我家姐做嘅最後一件好事。
到底動物傳心係真定假？我唔知。
不過我知道，一個唔鼓勵講真話嘅世界，個技術係真定假根本唔重要。
反正，人為咗活落去、活得好，總要揀最好聽嘅說話黎講。
－完－
