我家姐死咗，廿三歲嘅佢，被人殘忍地斬死。
第一日嘅新聞標題係：「少女街頭被殺，人人自危」。
我好傷心，但係我以為，查案只係警察嘅工作，我只需要等兇手伏法，上香安慰家姐在天之靈，就盡咗做妹妹嘅責任。
點知，網上起底組發現咗，家姐係一個動物傳心師。
加上無幾耐，警察捉到一個疑犯，佢叫Ricky，係家姐之前嘅客人。
家姐死前，Ricky喺網上唱家姐亂傳心，甚至寄過刀片恐嚇家姐。
呢件事揚咗，雜誌封面係：「假傳心，真呃錢。客人怒斬傳心騙子！」
明明兇手都未認罪，就推斷凶案嘅動機過程，講到好似真嘅一樣。
網民嘅評論，亦由惋惜同情，變成「騙子早死早著」、「兇手為民除害」。
我愈睇愈嬲，點解可以咁？未清楚真相就落結論。
我無養過寵物，亦唔清楚動物傳心係咩黎。
但我好肯定，我家姐唔係騙子。
佢從來唔呃人，而且我地屋企幾有錢，據我所知，佢做動物傳心果啲錢，都捐晒畀動物慈善機構。
家姐係好人，我接受唔到，佢背負著騙子嘅惡名，含恨九泉。
我睇晒網上評論，日以繼夜咁逐個逐個覆，但無一個人信我，啲留言仲愈黎愈難聽：
「係咪呃一百蚊，拎一蚊黎做善事啊？」
「傳心本來就係假，信果個都係智障。」
我決意要幫佢洗刷污名，首先，要搞清楚傳心呢件事係真定假。
我家姐唔會呃人，但難保佢唔會俾人呃。
我先搵番教佢傳心嘅老師，老師話我家姐係一個好好嘅學生，並且保證佢學到嘅傳心術係真。
我愈搵資料就愈迷茫，理智上黎講，憑住一張相，就可以同動物，甚至係同離世嘅動物溝通，點聽都唔係好現實。
但與此同時，又有好多傳心師嘅客人分享，講到好似幾準。
眾說紛紜，如果我只係一個食花生嘅網民，我可以憑喜好，就咁留言話我信，或者鬧荒謬呃人。
但依加我要搵真相，我搵唔到確實嘅證據，去證明呢件事係真或者假。
就算某個傳心師唔準，都可以話樹大有枯枝，係佢本人嘅問題。
或者某次傳心真係好準，又可以話傳心師係估岩，甚至係大包圍。
我放棄呢個方向，我應該研究下，家姐幫Ricky傳心果次，結果係點。
原來，Ricky心愛嘅狗狗病死咗，搵家姐傳心。
家姐話畀佢知，佢隻狗狗喺地獄受緊烈火焚身之苦，原來狗狗上世做人，做咗好多壞事，要入地獄，十世輪迴畜生道。
「有咩可能？我隻狗好善良好可愛！」Ricky好嬲，再去搵另一個傳心師。
另一個傳心師話，狗狗喺彩虹橋生活得好開心，只係好掛住Ricky。
Ricky拎住呢個答案，不斷鬧家姐，再開post唱佢。
網民多數幫Ricky：「人地隻狗死咗已經好慘，仲要喺傷口上灑鹽？」「呢個傳心師冷血架！」
我唔明，如果佢假定咗隻狗死後，生活好幸福，咁點解仲要搵傳心師？
如果只係想搵人安慰佢，接受唔到其他答案，就早講丫嘛。
我對輪迴觀念唔係好熟，但我覺得，每一世都會有唔同嘅性格、遭遇，呢世係好狗，唔代表上一世就係好人。
而Ricky都唔認罪，佢話佢雖然好憎家姐，有恐嚇過家姐，但從來無諗過殺人。
不過，佢無辦法提供不在場證據，有動機、有時間，加上搵唔到其他嫌疑犯，我估呢次佢都坐硬監。
但係，我去領取家姐嘅遺物果陣，見到家姐果部Android手機。
