《有7星，一X定係做KOL啦！》
首先唔好講話咩有有一粒兩粒先算啦呢種廢話，你就當我收買左教育局嘅官所以毫不費力之下勇奪左7啦今日。然後有班記者狗衝咁走嚟恭喜我之餘，又問下我係咪住劏房呀？係咪新移民呀？係咪富二代呀？老母有無買層樓俾我呀？對黃色同藍色有咩睇法呀？跟住就問一條問左幾十年嘅問題：呀天才，將來打算做咩行業咁呢？
我會好肯定咁對住部攝影機答3個英文字母：KOL
喺依家呢個形勢，我當然要食住個勢啦！點食？開個專頁先講，名都諗好啦，叫「如何由校內無臉人，一年升做7**狀元」，一聽個名就知係食正香港家長個Market，依家香港做父母嘅，點樣喺自己子女身上洗錢唔駛我講啦！開個專頁呃左Like先，然後出本書，都係例牌講下自己成功之路咁啦，然後咪玩埋直播！拍咩？拍咩無所謂架，今日香港人乜都睇架啦！你咪Set好個Cam直播你平時睇d咩書囉，最好仲話自己因為食左乜乜牌子嘅補品，然後精神一振，記憶力返哂嚟咁囉，因為咁先至有品牌代言嘛！咁先至有錢賺嘛！跟住就搵間補習社加盟，唔駛真係做嘅，錄影都得架！我又唔駛對住d學生嘅，剩係「7星狀元」呢個牌頭都夠吸客啦！讀大學？唔駛急嘅，我搵幾年快錢先，出左個名囉，幾年後我就係「著名網紅作家KOL 7星DSE狀元補習星級名師」啦！咭片有呢行嘢都仲駛驚無大學收？我驚個人發左達，無心機讀書就真啦！
我如果聽到有人攞住7星8星仲話將來想做醫生呀律師呀咁呢！我會當堂笑出聲囉！依家咩時勢呀？你嘅「我的志願」仲係醫生？Come On！我討厭政治，同樣討厭理想，我同你講錢！OK？喺香港無錢做鬼連個鞋盒咁大嘅骨灰龕都無得你住呀！你話錢重唔重要先？有人話做醫生咪搵到錢囉！呢句嘢錯唔哂，喺香港仲有麗的電視嘅時代就係嘅，你今日去大學學醫，中間要考幾多試呀？要借政府幾多錢呀？唔駛還架？（富二代就直頭乜都唔駛講啦！）出到嚟你都只係個見習醫生，即係呢，喺公家醫院，每朝成排操兵咁，跟住個高級醫生去巡房嘅Junior呀！連一個清潔阿姐都可以俾面色你睇嗰種醫生呢！想話醫生可以搵錢嘅，得！等你做左專課先，等你有班熟客先，等你有錢開間自己嘅診所先啦！喺呢d嘢發生之前，喺香港做一個醫生只係個要爭取最低工時、要爭人手、要加人工嘅大學生勞工囉！
