我叫加喂，3個月前，因為我既見義勇為，我比一個陌生男人係後巷打到爆曬崗，仲毀埋容。
話說當日，我返夜更，返到屋企附近已經係零晨1點，周圍冇曬人，條路仲要勁黑。但我成日返夜，已經習慣曬。
行過後巷，我就聽到一男一女鬧交既聲。
「唔好過黎，唔好過黎呀！」（女）
「呢d係你欠我架！」（男）佢一巴打落個女到，個女人跌左落地下。
個男既就對佢拳打腳踢，仲隨手拎起放係旁邊既竹想打落去。
「停手，你想做咩！」我嗌出黎。
佢停底左望過黎，由於實在太黑，無論係個個男人定女人我都睇唔清楚佢地個樣。
「唔關你事，唔想死就行開。」佢舉起左枝竹大大力咁打左落去個女仔身上。我係旁邊睇都feel到勁痛勁痛，我衝左過去推開個男人，但佢只係跌後左兩步，之後就一野揮落我身上，痛到我跌左落地爬唔返起身。佢繼續不停打，不停打。我見到旁邊個女仔起身跑走，越跑越遠⋯越跑越遠，個女仔不時望返轉頭。我被個男人打到冇任何反抗能力，我望住越跑越遠既女仔，一面講「救我⋯救⋯我。」個時我諗佢至少會報警掛。但係我係係第二朝先比經過既路人發現，送左入醫院，個時我已經傷得好重，身上多處骨折同失血過多，我入院後足足昏迷左5日。個晚個個男人仲將有少少尖既竹，劃落我塊面到，由右眼一直劃落下巴，個種痛我永遠都會記得，永遠。佢係我身體上同心上都留底永遠既疤痕。
係醫院醒返之後我用左3個月既時候休養，到今日先可以出院，而係呢段日子，我都慢慢接受自己已經毀容既事實，大不了去整容，仲靚過之前。不過又其實唔係話咁簡單，因為傷口由我右眼開始劃到下巴，其實我隻右眼已經盲左。
出院個日，我心情同身體都已經恢復左好多，而我既屋企人同兩個best fd都黎左接我出院-呀儀同呀珊。我地三個人好朋友係病房執野，佢地見我平復左好多，先敢同我講返個日既事。
「你唔應該救佢。」呀珊皺住眉咁講。
「岩既事就要去做。」我講。
「你會後悔架！」（呀珊）
「我唔會，我都已經慢慢接受架啦！」我指住面上既疤痕講。
「你出院之後再過一段日子就唔會咁講。」呀珊勁擔憂咁講。
「佢根本唔值得你咁做。」呀珊見我咁肯定咁講，佢好嬲同好激動咁講。
「的確！唔值得。一，佢當時逃走唔緊要，但佢冇幫你報警。二，事後，警方大肆報導，要求佢去差館協助調查，但佢至今仍未出現，攪到兇手到而家都捉唔到。」呀儀呢個時候插入我地既對話。
「我唔明！」我好納悶咁講。我唔明點解我係去幫佢，但佢竟然見死不救。」
「有兩個可能性。一，佢唔想成為大眾焦點，唔想惹麻煩。二，就係佢想維護個個男人。」呀儀講到第二點既時候，轉頭望住呀珊。
我聽完之後諗，個個男人咁對佢，仲值得佢維護咩！唔通佢地而家仲係一齊，定係個女仔已經遇害呢？佢安全嗎？我開始擔心。
「加喂，你岩岩話就算時光倒流10萬次，你都會救佢？」呀儀問我。
「係！」我肯定咁答。
「咁我希望時光倒流既時候，個個女仔會良心發現去救你。」呀儀握緊我隻手講，但眼神就望住呀珊。
聽完之後，我笑住咁同呀儀講：「呢個世界邊有時光倒流，不過唔使擔心，我冇事。」
瞓左3個月病床，終於返到屋企，真係好舒服。我第二日睇到自然醒，之後去梳洗，係廁所既鏡面前洗面。突然，我見到不可思議既事發生左，我面上既疤痕冇左，我先驚覺由起身個下，我隻右眼已經睇得返野！
正係我震驚既時候，電話響起黎，係呀儀。
「起身未呀？咪話今日去新開間cafe食野既，幾點去？」我聽完呆左，我竟然返返去我出意外個日，個日我就係去完cafe食野之後就去返工，收工就遇到意外。
咁係咪姐係代表我可以改寫我既命運。
我到左cafe, 呀儀同我講：「呀珊話臨時有時黎唔到。」同個日一樣，呀珊冇黎到。係cafe入面，我心不在焉，望住窗外諗野，陣間我應唔應該返工呢？定係繞路？我要救個女仔嗎？
「加喂，做咩皺曬眉，有咩野煩緊？」呀儀問我。
「冇呀！冇野。」我笑住咁講。
呀儀握緊我隻手認真咁望住我，講：「今晚收夜，小心。」
「你⋯⋯」佢唔通都知時光倒流？
「適逢鬼節，咪話我唔提你，有人叫你唔好另轉頭。」
我苦笑。
到左夜晚，我行返返屋企個條路，心跳一直加速，身體開始震。我實在太驚啦。行到後巷，我匿埋係牆邊睇，冇人，我好肯定就係呢度，我再係到等左1個鐘，已經遠超我上次發生意外既時間，我唯有就帶住滿滿既疑惑咁返左屋企。
明明今日發生既事同當日一模一樣，點解佢地冇出現？唔通⋯個個女仔良心發現，盡力阻止呢件事發生。不過我都唔可以掉以輕心，唔知會唔會好似死神來了咁，幾日後又再發生。
到左第二朝，我收到呀珊媽媽既電話，佢喊住咁講：「呀珊走左啦！你黎醫院見佢最後一面啦！」
太突然，一切發生得太突然啦！我同呀儀一齊入殮房，呀珊塊面比人劃到花曬，好可憐。聽佢家姐講，佢係今朝係距離我發生意外既後巷附近比人發現，當時已經冇生命跡象。
我見到呀珊既遺容，我不停流眼淚，因為我知道係我累死佢架！佢可能都知個件事，為左救我而死，一唔係就係因為我改變左歷史，令佢代替左我。我見到旁邊既呀儀都默默咁留緊眼淚，佢對住呀珊講：「你終於良心發現啦，可惜太遲啦！對唔住！」
「你咁講咩意思？」
「你知道嗎？其實你已經死過一次。你第一次就已經比個男人殺死左架！不過我時光倒流，但又唔知你係邊到遇害，於是拖左好耐先救到你。但因為呀珊遲遲唔肯坦白，而你又話你就算時光倒流都會重覆一樣既選擇⋯所以我令你地兩個同時時光倒流，希望可以逆轉件事。」
「咁你再用多次，我地去救返呀珊呀！」我求呀儀。
「對唔住，每件事每人只有一次機會，你、我同呀珊都用左一次。所以呢個結果已經係無法挽回。」
「呀～」
自此以後，我每隔1個月道就會去見心理醫生。我地已經返唔到轉頭。
