我叫阿權，同事叫我權哥，是這個屋苑的保安員。
我身體有個毛病，晚上總是睡不著，反而白天睡得很沉很香，太陽落山了我便自然會醒來。小時候父親說我前世是公子哥兒的命，帶來了今世也留著不願幹活的根，其實這也是說來好聽，反而我娘老實，她常私下對我抱怨：「你前世一定係鼠竊狗盜之流。」
我卻自知沒做大賊的膽，有這種病是自然讀不了書，出來做事也只能挑上夜班的，年輕時在報館的執字房待了一段長時間，但電腦普及後報紙不用執字粒，便當上這夜班保安員。
本來這份工作頗適合我，也樂得上班時清靜寫意，吃過夜宵聽聽收音機在屋苑走走便下班了。但自從上個月屋苑內發生一宗入屋爆竊案件後，我的工作開始起了變化。
「權叔，計埋呢單，呢個月有三宗爆格，每單都係夜晚發生，咁啱三單都係你當夜更。嗱，我唔係怪你，不過你都知，呢度每間House都賣過千萬，D有錢佬係麻煩㗎啦，鬼叫你打佢工咩？好似嗰個做中港車嘅王生，佢不嬲唔滿意我地話佢D車泊過隔離屋，話我地針對佢。依家佢間屋俾人爆，梗係食住上啦！你睇，D投訴信……」
說話的是陳經理，是我的上司，他將枱面的一堆信紙推到我面前。
「權叔，我清楚你為人，你嘅工作態度我唔會懷疑，但係呢！剩係我信係無用嘅，總公司話一個月三宗爆格已經破左公司紀錄，仲咁啱三個月後，呢個屋苑嘅保安合約到期，如果我地唔做D野俾班業主睇，份約凍過水……權叔，你明唔明我意思？」
「你想我幫你捉賊？」
「捉左一個月啦！捉唔捉到？」
「咁……」
「我要炒你，呢個係總公司意思，其實我幫你講左好多說話，但你明白，我只不過係經理仔，所以……」
「我明。」
「明就最好啦！強積公例假補水一個月通知全部計足，會計部計好會通知你，放心！」
放心？我間套房下個月加租去到七千八，一對仔女還在讀書，大女昨晚說想參加學校的北京五天遊學團，問我要六千三，老婆在停車場幫人洗車扭傷腰骨要停工休息。
你叫我放心？
今晚，我如常般精神，手錶顯示0316分。我來到之前上班的屋苑外牆，我很清楚那個地方可以避開閉路電視，知道那個位置可以爬越圍牆，知道那一戶已經去了旅行未回來，知道那家人會將後備門匙放在花盆底。
當我順利打開一間屋的大門時，我想起我娘的說話：「你前世一定係鼠竊狗盜之流。」
完。
