上集：https://post.shikoto.com/posts/112673-我唔係港女，我肯aa！（上）

「嘟，妳知唔知阿揚係專業人士，人工高，但做野好辛苦？」隻錶係地下鳴叫。
「我知，我都無用佢D錢，餐餐飯都AA制，仲唔夠好？」
「嘟，阿揚根本唔介意果D錢，反而佢做野好大壓力，放工想瞓覺，但要陪妳傾電話；
放假佢想食好野、買靚衫、陪屋企人咁，但你要佢行山做Gym。」

我忍唔住大叫：「做下運動唔好咩？」
「嘟，阿揚唔鍾意過呢種生活。仲有妳生日啊，妳逼佢用成個假期整銀包，佢寧願買個名牌包包畀妳。」
「我都有畫畫送畀佢。」
「嘟，你享受過程。而且係妳鍾意，阿揚都唔識欣賞。」

我未反應得切，隻錶突然播一段片，咦，係我同阿揚某一次行山......
我講起：「第時度蜜月呢，我想去登黃山，聽講風景好好。」
阿揚呆一呆：「我仲諗住去歐洲。」
「我又唔係果D名牌港女，點會咁膚淺。如果你體力好D，我直情想去西藏感受下雄麗風光。」
「......嗯。聽日阿媽約飲茶，佢叫妳去，妳得唔得閒？」

「下，我唔想去。你阿媽講黎講去都係三姑六婆野，咩超市買夠幾多錢送個鍋、煮排骨用咩醬好，諗起都悶。你飲完茶出黎，陪我做Gym啦。」
「......好啦。」

「嘟，一直以黎，都係阿揚付出，佢去遷就妳，呢種關係唔會長久。」
「咁阿花呢？」
「嘟，阿花係鍾意名牌，但阿揚買得起，一齊行名店都好開心。
而且阿花學緊煮野食，同阿揚媽咪好傾得埋......」
隻錶講咗一大輪，我打斷佢：「即係話，阿揚就係鍾意D無內涵、性格差嘅死港女？」
「嘟，性格無好／差，只有夾／唔夾。」

我接受唔到，明明大家都鬧港女，點解港女唔係性格差？
直到我遇到現任男友阿明，無乜錢，好鍾意做運動，花好多時間陪我、整小禮物，
最重要嘅係，佢同我一樣咁鍾意鬧港女！
所以，佢覺得我性格好好，直情係完美。

每個人對另一半都有要求，要求無分好壞，
只有分你畀唔畀得起，同埋，願唔願意畀。

一年後，阿明同我講分手，佢鍾意咗個女同事。

我咬牙切齒咁問隻錶：「你又話我地好夾？」
「嘟，經過計算，你同阿明志趣相投，係天作之合。」
「咁點解會分手？個女人有咩好過我？」
「嘟，佢靚過妳。」
「......」
「嘟，阿明唔跟計算結果，貪圖美色，最後佢地都唔會相處得開心架。」
咁有乜用？我依加已經唔開心。
「嘟，經過計算，妳之後會......」

無之後啦，我一腳踩爛咗隻錶。
有人貪慕虛榮、有人堅持AA、有人靚有人醜......
最後佢地喺情場上各有幸或不幸，我地嘗試總結一條Formula去計算最佳模式，
結果，愛情，根本無得計算。