讀中學既時候冇拍拖，冇暗戀人，冇被班裡公認既男神吸引，同女同學傾男仔時完全冇共嗚。當覺得同大家唔同既時候，一度質疑自己係咪同性戀。當時我對同性戀既印象好模糊，大概知道佢地異於平常人，鐘意同性而非異性。無論從生活，電視，報紙雜誌等不同渠道都係接觸開異性戀，見慣佢地拖手仔攬攬錫錫，但要我幻想同性之間既呢啲親蜜行為，唔......對同性戀既陌生令我覺得不安，我吾想異於常人，吾想人地覺得我係死基婆。
原來自覺同大家不同，第一感覺係不安。就算明明冇錯，都不禁質疑自己。
不過我始終冇被女仔吸引過，後來亦陸續對男仔心動，我諗我吾係同性戀。但因為曾經以為自己係les，我對同性戀更包容。人大左眼界闊左，揾過吾少資料，睇過吾少同志電影，身邊有同性戀朋友，我漸漸覺得同性戀真係冇野，就只係性取向同大眾唔同。唔同唔係錯，我唔會用特別眼光睇佢地，覺得就算我真係les都冇所謂。有次同某啲冇對同性戀反感既人傾起同性戀，傾到如果自己仔女係同性戀會點。友人話佢會失望，會幫佢搞清楚，希望佢唔係一時迷失，但如果真係同性戀都會接受。我當堂O嘴，如果你發現仔女係異性戀，會嘗試幫佢地睇清楚佢地既性取向嗎？口口聲話同性戀冇所謂，但原來發生喺自己身上，就變得有所謂。我即時覺得好嬲，覺得佢地係假君子。但後來冷靜回想，佢地未必係虛偽，只係冇足夠思考同性戀呢樣野，人云亦云。如果我唔係曾懷疑自己係les，接觸過吾同野，大概唔會諗咁多，我既回答會同佢地一樣。
原來如果事情唔夠切身，你吾會知你真正點諗。就算講得幾好聽，根本個心吾係咁諗。
我諗如果問同性戀者，佢地應該唔會介意仔女係同性戀掛。（請無視同性戀者如何生育下一代這技術層面）我將個問題同同性戀既朋友傾過，佢地話唔希望下一代係同性戀，因為條路唔易行，會被標籤。佢地提醒左我現實既悲哀，萬一人地知你係同性戀既話，男既就當乸形，女既就當男人婆。就算你有其他人格特點，但人地只會放大你係同性戀呢樣野，用同性戀既形象去理解你既言行舉止， 而忽視你其他更值得注意既地方。聽完覺得好悲哀，如果身為同性戀既人都咁諗，我地社會離全面接受同性戀仲有一大段距離。 如果作為父母既唔想下一代係同性戀，呢個心態會影響佢地既行為，無形地令子女覺得同性戀唔係正常或者應該既野。
原來好多時現實既悲哀，源自標籤呢個人類通病。 就算你唔介意人地點睇你，呢啲標籤實實在在影響你既生活。
從呢三件事中，我見到人既軟弱，人性既醜陋同現實既殘酷。
我唔係想散播負能量，只係難免有點感觸。
.jpg)
