我見有些成功blogger成日放閃，例如我幾欣賞既為何斯德哥爾摩沒有譚仔三哥既三家姐，就諗住抄考下啦，但諗耐諗去都冇野好曬喎。
人地程仔溫柔體貼，又成日整好野食，但我男友以欺負我為樂，仲收埋我啲零食。佢成日話要錄低我肚餓咕咕叫同打嗝聲做sound effect，我同佢索吻佢就扮狗lam濕我塊面，佢要我做十下push up先肯陪我行街，又沒收人地送贈既朱古力話要幫我斷甜食上癮症。
講到送禮，我冇花收冇朱古力收，只有多到讀唔哂既增值書及健康食品，點影相放ig呀，人地問我情人節受咩禮物都唔想答啦。唉，真係愈諗愈心酸。
又有人話外藉男友會講多啲甜言蜜語，我個個完全唔係呢回事，佢最鐘意就係得得戚戚咁模仿我唔準既英文發聲，話我既卡通家居服太小朋友，同埋講笑話點解我細個食咁多豬腦都咁蠢。
講就咁講，每個早上飲佢為我沖既桂圓杞子水（飲酒太多要補肝），仲有因為激嬲左我而要著核突螢光內褲哄回我既畫面，竟然成為我最幸福既事之一。
人比人比死人，唔係人人天生公主命，好似我咁被虐狂就有份，想派閃光彈都幾難。但幸福有好多種面貌，冇得曬既幸福猶如螢火蟲，怕光怕吵，兩個人靜靜地欣賞就最好。
有時候幸唔幸福睇你識唔識用心感受，兩個人手拖手行公園，同男友食譚仔佢將你最愛既腐竹夾哂俾你，此等芝麻綠豆事放不上面書，平凡如咸魚白菜，但識食既話都可以食得津津有味。
大家放閃心態亦不一樣，有明星要谷人氣，有blogger要表達愛情訊息，有人要刺激前度，有人純粹愛高調，無論咩原因，都唔值得我地認真，更加唔洗用黎做比較。
我就曲線放閃完啦，唔好意思擺左三家姐上枱，都怪佢同程仔甜得過份，身為港女既我太妒忌啦，哈哈。
.jpg)
